15/01/2024
မနေ့ညက အဖွဲ့က ညီတစ်ယောက်က မေးတယ်။
Q. ကိုကြီး မြောက်ပိုင်းအဖွဲ့တွေနဲ့ စကစ နဲ့ အပစ်ရပ်လိုက်ပြီဆို ၊ အဲ့ဒါဆို တိုက်နေတာဘာရှိတော့လို့လဲ? ကျနော်တို့ ဘာဆက်လုပ်ကြရမှာလဲ?
ကျနော်လည်းနားလည်သလောက်ရှင်းပြလိုက်တယ်။
A. အပစ်ရပ်တယ်ဆိုတာက နိုင်ငံရေးစကားပြောဖို့ ခဏအနားယူဖို့ (လူ၊ လက်နက်၊ ရိက္ခာစုဆောင်း) ပြင်ဆင်ချိန်ယူတာဖြစ်တယ်။ မြောက်ပိုင်းအဖွဲ့တွေရဲ့ တောင်းဆိုချက်တွေကို စကစ က လက်ခံ လက်မခံ ဆွေးနွေးတာဖြစ်တယ်။ လက်ခံခဲ့ရင် မြောက်ပိုင်းရဲ့တော်လှန်ရေး အောင်မြင်တာပဲ။ လက်မခံရင်တော့ အပစ်ရပ်တာက အကြုံးမဝင်တော့ဘူး။
Q. စကစ က သဘောတူလိုက်ရင် မြောက်ပိုင်းအဖွဲ့တွေက တော်လှန်ရေးထဲမပါတော့ဘူးလား?
A. ဒီတော်လှန်ရေးမှာ ဗျူဟာကျကျစဉ်းစားရင် ကိုယ်နယ်မြေ ကိုယ်လွတ်လပ်ဖို့ကို ကြိုးစားတာက အောင်မြင်ဖို့အနီးစပ်ဆုံးပဲ။ AA က ရခိုင်ပြည်နယ်ကို လွတ်မြောက်နယ်မြေဖြစ်အောင်လုပ်ရမယ်။ ကရင်ဆိုလည်း ကော်သူလေးပြည်နယ်လွတ်မြောက်ရေး။ KIA/KIO ဆိုလည်း ကချင်ပြည်နယ်လွတ်မြောက်ရေး ။ KNDF ဆို ကရင်နီ၊ CDF တို့ တခြားချင်းတော်လှန်ရေး အင်အားစုတွေကလည်း ချင်းပြည်နယ် လွတ်မြောက်ရေး နဲ့ ကျန်တဲ့ EROs တွေလည်း ကိုယ့်နယ်မြေ ကိုယ်လွတ်မြောက်ရေးအတွက် ကိုယ့်တာဝန်ကိုယ်ယူ လုပ်နေကြတာက တော်လှန်ရေးအောင်မြင်ဖို့ ပိုနီးစပ်တယ်။ ဥပမာပေးရရင်ကွာ ပန်းတိုင်ကို လက်ချင်းချိတ်ပြေးပြီး အကုန်အတူတူပန်းဝင်တာ နဲ့ တစ်ဦးချင်းပြေးပြီး ပန်းတိုင်မှာဆုံကြတာ ဘယ်ဟာပိုမြန်မလဲ? ဒီပန်းတိုင်ရောက်ရေးအဓိကရည်ရွယ်ချက်ဖြစ်နေတဲ့အချိန် လက်ချင်းချိတ်ပြီး အလုပ်မဖြစ်တာထက်စာရင် တဦးချင်းပြေးပြီး ပန်းတိုင်မှာ ဆုံကြတာ ပိုပြီးမြန်လိမ့်မယ်။ အဲ့လိုပဲ ခုချိန်မြောက်ပိုင်းက နယ်မြေစိုးမိုးရေးရသွားရင် တစ်ယောက်ပန်းဝင်တယ်လို့ ငါတို့မှတ်ယူရမှာ။ တခြား EROs တွေပါ အဲ့သလို နယ်မြေစိုးမိုးမှုရအောင် ငါတို့ကူတိုက်ပေးရမှာ။ တခု သတိထားရမှာက အပစ်ရပ်ဖို့စတောင်းတာ ဘယ်ဘက်ကလဲဆိုတာပဲ။ အပစ်ရပ်ဖို့တောင်းတာက အထိနာနေတဲ့ဘက်ကတောင်းတာများတယ်။ ခုဆို မြောက်ပိုင်းအဖွဲ့တွေနဲ့ စကစကြားမှာ ဘယ်ဘက်က အသာစီးရနေလဲဆိုတာ အသိသာချည်းပဲ။ ဒါကြောင့် ဆွေးနွေးပွဲမှာ မြောက်ပိုင်းအဖွဲ့တွေက အပေါ်စီးကတောင်းလို့ရတယ်။ ကိုယ်လိုချင်တာပြောရုံပဲ။ နောက်တစ်ခုမမေ့ရမှာက ဒီ ၂၀၂၁ အာဏာသိမ်းလိုက်မှ EROs တွေက တော်လှန်ရေးလုပ်တာမဟုတ်ဘူး။ သူတို့အစောတည်းက သူတို့လူမျိုး/ပြည်နယ် လွတ်မြောက်ရေးအတွက် တော်လှန်ရေးလုပ်နေကြတာ။ ငါတို့အတွက်သာ နွေဦးကျမှ စစ်တပ်ဖြုတ်ချဖို့ သိကြတာ။ သူတို့ကအစောတည်းက တိုက်နေကြတဲ့သူတွေ။ ဒါကြောင့် ဒီတော်လှန်ရေးမှာ EROs တွေ ဘယ်အထိပါမှာလဲဆိုတာ ငါတို့စိတ်ပူရမည့်ကိစ္စမဟုတ်ဘူး။ သူတို့ရပိုင့်ခွင့်နဲ့ လွတ်မြောက်ခွင့်မရမချင်း သူတို့ကတိုက်နေကြဦးမှာ။
Q. ခုက EROs တွေ အကုန်လုံးက သူတို့နယ်မြေ လွတ်မြောက်ရင် ရပ်လိုက်ကြရင် ကျနော်တို့ပဲ ကျန်ခဲ့မှာပေါ့။ ကျနော်တို့ နယ်မြေကကော ဘယ်မှာလဲ?
A. မင်းမေးတဲ့ အချက်က အရေးအကြီးဆုံးပဲ ငါတို့ ဗမာလူမျိုးတွေရဲ့နယ်မြေက ရှိသလိုလို မရှိသလိုလိုနဲ့ မမဆောင်း ဖြစ်နေတာပဲ။ ခု ငါတို့ ဗမာတွေစဉ်းစားရမှာက ဗမာနယ်မြေသတ်မှတ်ဖို့က ငါတို့ဖြေရှင်းရမည့် အရေးကြီးဆုံးအချက်ဆိုတာ ဗမာ့တော်လှန်ရေးအင်အားစုတွေ လက်ခံရမည့်အချိန်ပဲ။
အရင်လို တိုင်း ၇ တိုင်း ဆိုပြီး ဂျင်း တွေ လက်မခံကြဖို့လိုပြီ။ ခုက တပြည်လုံး တနိုင်ငံလုံး လွတ်မြောက်ရေးဆိုပြီး လက်တွေ့မကျတဲ့ ကြွေးကြော်မှုထက်စာရင် ပြည်နယ်ရရှိရေး ပြည်နယ်လွတ်မြောက်ရေးကို စလုပ်ရမှာ။
ခုဆို မင်းသိထားတဲ့ ရခိုင်ဆို ULA/AA၊ ကရင်ဆို KNU/KNLA၊ ကချင်ဆို KIO/KIA စသဖြင့် ပြည်ထောင်အစိုးရ ပြည်ထောင်စစ်တပ်ရှိကြတယ် အုပ်ချုပ်ရေးအပိုင် နယ်မြေတွေရှိတယ်။ ငါတို့ဗမာတွေမှာ စစ်တပ်လို့ပြောရမည့် PDF ရှိတယ် အစိုးရလို့ပြောရမည့် NUG ရှိတယ်ထားဦး #နယ်မြေကဘယ်မှာလဲ?
ပြီးတော့ ဗမာမဟုတ်တဲ့ ကျန်တိုင်းရင်းသားတွေက သူတို့နယ်မြေရရှိဖို့ သူတို့လူမျိုး လွတ်မြောက်ဖို့ သူတို့ကိုယ်တိုင် အားစိုက်ကြိုးစားနေတာ။ ငါတို့ဗမာတွေ လွတ်မြောက်ဖို့ ဗမာပြည်နယ်ရရှိရေးအတွက်လည်း ငါတို့ကိုယ်တိုင်ပဲ အားစိုက်လုပ်ရမှာ။ ခု မြောက်ပိုင်းအဖွဲ့တွေနဲ့ ဗမာတပ်လို့ ပြောလို့ရလောက်မည့် BPLA က ပေါင်းတိုက်နေတယ်။ တခြား EROs တွေ သူတို့နယ်မြေလွတ်မြောက်ဖို့ တိုက်ကြရင်လည်း ငါတို့ ဗမာတွေ ပူးပေါင်းတိုက်ရမယ်။ ဒါမှသာ မဟာမိတ်ဖြစ်ပြီး ဗမာပြည်နယ်လွတ်မြောက်ဖို့ ဗမာပြည်နယ်ရရှိဖို့အတွက် ငါတို့တိုက်ကြရင် ညီနောင်တိုင်းရင်းသားတွေက အားပေးထောက်ခံကြမှာ။
နောက်တစ်ချက်က EROs တွေက သူတို့နယ်မြေလွတ်မြောက်သွားရင် မပါတော့ဘူးလားဆိုတော့
ဗမာပြည်နယ်ရရှိဖို့ ဗမာပြည်နယ်လွတ်မြောက်ဖို့အတွက် သူတို့ရဲ့ လူ၊လက်နက် အင်အားတွေ အကုန်ခံပြီး ပါရမည့်အကြောင်းပြချက်က ဘယ်မှာလဲ?
ဆိုလိုတာက လက်ရှိ ငါတို့ ဗမာခေါင်းဆောင်တွေ EROs တွေ လက်ခံယုံကြည်လောက်တဲ့ နိုင်ငံရေးကတိကဝတ်တွေ ညှိနှိုင်းသဘောတူညီမှု လုပ်ပြီးကြပြီလားပေါ့။ အာဏာရှင်အရင်တိုက်မယ် ပြီးမှ ညှိနှိုင်းကြတာပေါ့ဆိုတဲ့ ဘုံရန်သူပြပြီးတိုက်လို့ရတဲ့အခြေအနေမဟုတ်တော့ဘူး။ ဘုံအကျိုးစီးပွါးပါ တူဖို့လိုတယ်။
ဘာလို့ဆို အင်္ဂလိပ်ဆီကလွတ်လပ်ရေးရပြီးတည်းက လူမျိုးရေးအရ ဘာသာရေးအရ အဖိနှိပ်ခံခဲ့ရတာ တန်းတူမှုမရရှိခဲ့တာ စတဲ့ဒဏ်ရာတွေက အများကြီးပဲလေ။ ဒါကြောင့် ဘုံအကျိုးစီးပွါးပါ တခါတည်း ညှိထားဖို့လိုအပ်တယ်။
Q. ဘုံရန်သူကတော့ စကစ၊ ဘုံအကျိုးစီးပွါးဆိုတာကဘာလဲကိုကြီး?
A. ဘုံရန်သူဆိုတာက စကစ တင်မကဘူး။ အာဏာရှင်စနစ်၊ အလေ့အကျင့်တွေ နဲ့ မညီမျှမှု၊ လူမျိုးကြီးဝါဒ စသဖြင့် နိုင်ငံတော်သီချင်း ခြေဆင်းမှာပါတဲ့ တရားမျှတ၊လွတ်လပ်ခြင်း၊ အခွင့်အရေးတန်းတူညီမျှမှု တွေရှိမနေခြင်းကိုက ဘုံရန်သူပဲ။ အဲ့လိုအခြေအနေ ဖြစ်အောင် လုပ်တဲ့သူ၊ အဖွဲ့အစည်း အတွေးအခေါ် တွေအကုန်လုံးက တော်လှန်ရေးရဲ့ ဘုံရန်သူပဲ။
ဒီတိုင်းပြည်ရဲ့ အခြေအနေအရ ခွင့်တူညီမျှဖို့၊ တရားမျှတဖို့၊ လွတ်လပ်ဖို့အတွက် တန်းတူရေးနဲ့ ကိုယ်ပိုင်ပြဌာန်းခွင့်ကို အာမခံတဲ့ Federal Democracy စနစ်သာလျှင် အပေါ်ကပြောတဲ့ မညီမျှမှုတွေ မလွတ်လပ်မှုတွေကို ပြောင်းလဲပေးနိုင်ပြီ ဘုံရန်သူကို အနိုင်တိုက်နိုင်မှာဖြစ်တယ်။ ဒါကြောင့် အားလုံးရဲ့ ဘုံအကျိုးစီးပွါးက တန်းတူရေးနဲ့ ကိုယ်ပိုင်ပြဌာန်းခွင့်ကို အာမခံချက်ပေးနိုင်တဲ့ Federal Democracy ဖြစ်တယ်။ ဘယ်လို Federal ပုံစံသွားမယ်၊ Federal နဲ့ State (ပြည်နယ်) တွေကြား အာဏာခွဲဝေမှု၊ သယံဇာတခွဲဝေမှု အာဏာကန့်သတ်မှုတွေကို သေချာညှိနှိုင်းပြီး နိုင်ငံတော်အဆင့်စာချုပ်ချုပ်ဆိုပြီး အာမခံဖို့လိုအပ်တယ်။
Q. အဲ့ဒါဆိုကျနော်တို့က အခုဘာဆက်လုပ်သင့်လဲ? ဘာလုပ်ရမှာလဲ?
A. ခုအရင်ဆုံးလုပ်သင့်တာက ဗမာနယ်မြေသတ်မှတ်ဖို့ပဲ။ လုပ်ရမှာကတော့ ခုတိုက်နေတဲ့ EROs နယ်မြေတွေ လွတ်မြောက်ရေး ငါတို့ကူတိုက်ရမှာ၊ အားပေးရမှာ။ ဘာလို့ဆို သူတို့က ခြေကုပ်ရှိတဲ့အတွက် အရင်လွတ်မြောက်ဖို့ပိုမြန်မယ်။ သူတို့ကို ငါတို့ကူတိုက်ပေးပြီး မဟာမိတ်ဆက်ဆံရေးထူထောင်ထားနိုင်မှ ငါတို့နယ်မြေရရှိရေး လွတ်မြောက်ရေးအတွက် သူတို့လည်း ဝန်းရံကြမှာ။ စစ်အာဏာရှင်တွေအောက်ကအကုန်လွတ်မြောက်မှ ဆွေးနွေးညှိနှုင်းပြီး နိုင်ငံသစ်ထူထောင်ကြတာပေါ့။
Q. ကျနော်တို့ ဗမာနယ်မြေသတ်မှတ်ဖို့ ရရှိဖို့က NUG က လုပ်မှရမှာပေါ့ ဒါဆို။
A. NUG ကို ကိန်းသေအနေနဲ့ထားမတွက်နဲ့
သူက အမြဲရှိမည့်ဟာမဟုတ်ဘူး
တိုင်းရင်းသားတွေ နယ်မြေအပိုင်ရပြီးရင် ဗမာနယ်မြေရရှိရေးက လိုအပ်ချက်ဖြစ်လာမှာ။
အဲ့အချိန် ဒီပုံစံအတိုင်း ကိုယ့်ဘာသာ ဗဟိုလို့စဉ်းစားပြီးဆက်သွားရင် အဲ့အဖွဲ့အစည်းကဘေးရောက်မှာပဲ။ အဲ့အချိန် ဗမာနယ်မြေရရှိရေးမူနဲ့ သွားနေတဲ့အဖွဲ့တွေ ခေါင်းဆောင်အသစ်ကလိုအပ်ချက်အရပေါ်လာမှာ။ ခုကို တချို့ ဗမာလူငယ်တွေဦးဆောင်တဲ့အဖွဲ့တွေက တော်လှန်ရေးလိုအပ်ချက်ကို အဖွဲ့အစည်းမူအဖြစ်ထားထားတယ်။
Q. NUG ကကော မူအဖြစ်မထားဘူးလား?
A. သေချာတော့မသိဘူး။ တရာဝင်ကြေငြာထားတာတော့မရှိသေးဘူး။ တပ်ဦးမှာရှိနေတဲ့ NUG က အဲ့လိုမူ တရားဝင်ထားထားရင်တော့ အကောင်းဆုံးပဲပေါ့။
အင်းနားလည်ပြီကိုကြီး နောက်မှ သိချင်တာတွေထပ်မေးတော့မယ်။
Oakar
