02/02/2022
🔴 نصيحة لعشاق المقلوب في بنزرت..🌮
وقت تاخذو مقلوب، خوذو فيه بعد ما يخرجو من الفور شوية هريسة شوية مايوناز وشوية laitue 🥗 (كوبل مزيان هو والمايوناز) ما أكثرش وتفكروني..
علاش؟ خاطر برشا في بنزرت وتونس يعباوه بالطماطم والبصل والكرمب والفقوص والسفنارية🥕 يولي مطعم كسكروت كفتاجي في شكل مقلوب..
التعبية هاكي تخليك لا تذوق جبن🧀، لا تذوق سكالوب، لا تذوق عجينة، تقعد تمغض كان في الخضرة، وشلالات وقطاطر هابطة ودنيا داخلة بعضها.🤬
في حين كي تاخذوه كيما ذكرتلكم بش تحسو بالPATE كيفاش مخدومة.. وتعرفوها بنينة، ماسطة، فيها مطعم خايب، تحسو بالجبن زادا وتعرفوه حطلكم مستحضر يبلفط فيكم وإلا حط كمية صغيرة برشا... تحسو بالسكالوب زادا مفوح مليح خايب وإلا فيه مطعم..
ما خاسرين شي، أعملو تجربة، وتفكرونا بش تاكلو مقلوب جديد عمركم لا كليتوه بالطريقة هاذي🥰، بش تحسو بمطعم كل حاجة، ووقتها بش تعرفو البلفاط من إلي يخدم في حاجة صحيحة، خاطر برشا يعباوه بالخضرة، بش يغطاو على كمية الجبن، السكالوب، والعجينة
شطبت على برشا مطاعم فاست فود بالطريقة هاذي..خاطر وليت نلقى بشكل واضح يا عجينة تعيف، يا الجبن بالاسم محطوط يا أما ما تلقى شيء كي تاكل.. وفوق هاكا دافع 7 آلاف وإلا 6.5 آلاف.
نحكيلكم طرفة؟😅 نعرف شكون مشا طلب مقلوب🌮 بالطريقة هاذي في بنزرت، يدورلو الي يحضر يقلو ما يجيش هكا تو يجي فارغ راو.. المهم صديقتنا وقت أصرت وخذاتو كيما حبت، ما لقات فيه شيء من مكونات أساسية محسوب، الجبن والسكالوب شمان محطوطين، بالرغم إلى السعر متاعو فوق 6 دينارات..
برشا ناس تخدم بضمير وتوفي وربي يباركلها والناس تقبل عليها ليل ونهار وربي يزيدهم 🥰.. وبرشا مطاعم الي يجرب مرة معادش يرجع👎.. الخدمة بضمير ربي يبارك فيها، خدمة التبلفيط الله يعين عليها هذا الي نقولو..
