𝐑𝐚𝐭𝐬𝐚𝐝𝐚 𝐁𝐚𝐥𝐢𝐭𝐚 𝐆𝐞𝐧𝐒𝐚𝐧

28/07/2023

22/09/2021

𝐃𝐞𝐩𝐄𝐝: 𝐏𝐢𝐥𝐨𝐭 𝐬𝐜𝐡𝐨𝐨𝐥𝐬, 𝐡𝐢𝐦𝐮𝐨𝐧𝐠 𝐩𝐫𝐚𝐲𝐨𝐫𝐢𝐝𝐚𝐝 𝐬𝐚 𝐂𝐨𝐯𝐢𝐝 𝐯𝐚𝐱 𝐫𝐨𝐥𝐥𝐨𝐮𝐭

Gipaniguro sa Department of Education nga mamahimong prayoridad sa Covid vaccine rollout ang mga magtutudlo ug uban pang school personnel nga malambigit sa ipahigayong pilot testing sa face-to-face classes.

Sa pakighinabi, gipamahayag ni DepEd Undersecretary Nepomuceno Malaluan nga aduna nay namugnang kasabutan ang DepEd ug ang National Vaccination Operations Center nga mahatagan og alokasyon sa Covid vaccine ang maong mga pilot schools.

Hinuon, gipaklaro ni Malaluan nga nagpabiling boluntaryo sa bahin sa mga school personnel kung buot sa mga niini nga mo-ambit sa maong bakuna.

Subay sa datus sa DepEd, anaa pa amang sa 30 percent sa kapin 788,000 teaching force niini ang nakahuman na sa ilahang bakuna kontra Covid-19.

22/09/2021

𝐋𝐢𝐛𝐫𝐞𝐧𝐠 𝐑𝐓-𝐏𝐂𝐑 𝐭𝐞𝐬𝐭𝐢𝐧𝐠 𝐠𝐢𝐡𝐢𝐫𝐢𝐭 𝐚𝐥𝐚𝐧𝐠 𝐬𝐚 𝐦𝐠𝐚 𝐫𝐞𝐬𝐢𝐝𝐞𝐧𝐭𝐞 𝐬𝐚 𝐆𝐞𝐧𝐒𝐚𝐧

Nanawagan ang local medical community ngadtu sa General Santos City government nga motunol na og libre nga reverse transcription-polymerase chain reaction kon RT-PCR services sa mga residente, aron mas sayo nga matapna ang pagkaylap sa Covid-19.

Gihimo ni Philippine Medical Association-GenSan chapter president Dr. Fidel Peñamante ang panawagan, human matala sa miaging adlaw ang 191 nga dugang kaso ug ang sunod-sunod nga triple-digit nga pag-ambak sa Covid patients sa siyudad.

Saysay pa sa opisyal, sayong mapa-ilawom sa proper isolation ug treatment ang mga adunay minimal o mild symptoms kung gilayong mapailawom ang mga nahisgutan sa testing.

Nagtuo pa si Peñamante nga daghan ang nagduha-duha nga mopailawom sa test gumikan sa mahal nga presyo sa RT-PCR, diin anaa sa P4,500-P5,000 ang presyo.

"This should be offered for free by the local government. This way, we can detect and isolate more infected individuals, and prevent them from transmitting the disease,” ang tipik sa pamahayag sa opisyal.

Gawas sa testing ug contact tracing, giawhag usab sa PMA official ang LGU nga palapdan pa ang vaccination rollout niini sa mga residente.

22/09/2021

𝐋𝐓𝐅𝐑𝐁 𝐬𝐮𝐛𝐥𝐢𝐧𝐠 𝐧𝐚𝐠𝐭𝐮𝐧𝐨𝐥 𝐨𝐠 '𝐥𝐢𝐛𝐫𝐞𝐧𝐠 𝐬𝐚𝐤𝐚𝐲' 𝐬𝐚 𝐦𝐠𝐚 𝐆𝐞𝐧𝐒𝐚𝐧 𝐟𝐫𝐨𝐧𝐭𝐥𝐢𝐧𝐞𝐫𝐬

Anaa sa 22 ka mga public utility vehicles ang gikuha karon sa Land Transportation Franchising and Regulatory Board (LTFRB) alang sa ikaduhang hugna sa “Libreng Sakay” program, nga gitagana sa mga frontliners ug healthcare workers sa General Santos City.

Matod pa ni LTFRB regional director, Paterno Reynato Padua, ang maong mga sakyanan ang adunay nagkadaiyang rota sa siyudad ug mga kasikbit nga munisipyo, alang sa libreng serbisyo sulod sa 45 days.

Gawas sa mga health workers, mamahimo usab maka-ambit sa libreng sakay ang mga authorized persons outside of residence (APORs) sa siyudad.

Subli namang gipaniguro ni Padua sa mga transport cooperatives nga wala nay mahitabong aberya sa payout scheme, bugti sa maong service contracts.

22/09/2021

𝐏𝐮𝐛𝐥𝐢𝐜 𝐚𝐰𝐚𝐫𝐞𝐧𝐞𝐬𝐬 𝐬𝐚 𝐩𝐢𝐥𝐨𝐭 𝐟𝐚𝐜𝐞-𝐭𝐨-𝐟𝐚𝐜𝐞 𝐜𝐥𝐚𝐬𝐬𝐞𝐬, 𝐢𝐩𝐚𝐡𝐢𝐠𝐚𝐲𝐨𝐧 𝐬𝐚 𝐃𝐞𝐩𝐄𝐝

Padayon pang gi-plantsa sa Department of Education (DepEd) ang "ex*****on details" kalabot sa pagpatuman sa pilot test sa face-to-face classes.

Sa pakighinabi, giasoy ni DepEd Undersecretary Nepomuceno Malaluan, nga lakip sa gipangandaman karon ang paglunsad og information campaign aron mas masabtan sa mga ginikanan ang tumong ug tinguha sa maong lakang sa gobyerno.

Subli usab gipasabot ni Malaluan nga manghinanglan pa og clearance gikan sa concerned local government unit kung tugutan ang partisipasyon sa mga tulunghaan sa nagkadaiyang lugar, alang sa pilot implementation sa maong programa.

Gawas usab matod pa sa LGUs, kinahanglan usab ang consent sa mga ginikinan kung tugutan ang mga estudyante nga pisikal nga motungha, taliwala sa padayong bahad sa Covid-19.

22/09/2021

𝐃𝐎𝐇: 𝟏𝟏𝟔 𝐛𝐚𝐠𝐨𝐧𝐠 𝐩𝐚𝐬𝐲𝐞𝐧𝐭𝐞 𝐬𝐚 𝐂𝐨𝐯𝐢𝐝, 𝟒𝟓 𝐧𝐚𝐤𝐚-𝐫𝐞𝐤𝐨𝐛𝐞𝐫 𝐬𝐚 𝐆𝐞𝐧𝐒𝐚𝐧

Subling nagtala ang General Santos City og dugang kapin 100 nga bagong pasyente sa coronavirus disease 2019.

Base sa September 22 tracker bulletin sa Department of Health, miambak na sa 12,326 ang citywide confirmed cases, diin, 1,050 sa mga niini ang nagpabiling gapaalim sa balay-tambalanan.

Lakip sa mga active patients ang 116 nga newly-reported cases.

Samtang, gikataho usab sa bagong datus sa DOH ang 10,855 nga total recoveries sa siyudad, human maka-rekober ang laing 46 ka mga pasyente.

22/09/2021

𝟔 𝐩𝐚 𝐫𝐞𝐬𝐢𝐝𝐞𝐧𝐭𝐞 𝐬𝐚 𝐆𝐞𝐧𝐒𝐚𝐧, 𝐩𝐚𝐭𝐚𝐲 𝐡𝐮𝐦𝐚𝐧 𝐦𝐚-𝐢𝐠𝐨 𝐬𝐚 𝐂𝐨𝐯𝐢𝐝

Gikumpirma sa Department of Health ang pagtaliwan sa unom ka mga residente sa General Santos City, human maigo sa Covid-19.

Base sa September 22 tracker bulletin sa DOH-Center for Health Development, miambak na sa 420 ang total confirmed fatalities sa siyudad, asa maoy ika-duha sa pinakataas nga ihap sa tibuok Region 12.

Sa gipagawas nga case profile, lakip sa maong newly-reported fatalities ang:

30 years old female
51 years old male
72 years old female
39 years old male
60 years old male
79 years old female

Gawas sa Covid-19, gikataho usab nga adunay comorbidities o laing balatian ang maong mga pasyente.

22/09/2021

𝐈𝐬𝐤𝐨 𝐌𝐨𝐫𝐞𝐧𝐨, 𝐖𝐢𝐥𝐥𝐢𝐞 𝐎𝐧𝐠, 𝐩𝐨𝐫𝐦𝐚𝐥 𝐧𝐚𝐧𝐠 𝐧𝐚𝐠𝐝𝐞𝐤𝐥𝐚𝐫𝐚 𝐬𝐚 𝟐𝟎𝟐𝟐 𝐛𝐢𝐝

Pormal nang gianunsyo ni Manila Mayor Isko Moreno ang plano niining pagdagan sa 2022 presidential elections.

Sa gipahigayong launching sa kandidatura niini sa Tondo District, gipaila-ila usab ni Isko ang ka-tandem nga si Dr. Willie Ong.

Base sa pinakaulahing survey, gikataho nga anaa sa ika-duhang puwesto si Moreno sa mga "top bets" sa mga posibleng sunod nga mamahimong pangulo sa nasud.

Gawas kang Isko, una nang nagdeklara sa presidential bid silang Senators Ping Lacson ug Manny Pacquiao.

22/09/2021

𝐏𝐚𝐥𝐚𝐛𝐚𝐧 𝐬𝐢 '𝐰𝐚𝐝 | 𝐃𝐢𝐧𝐨𝐩𝐨𝐥 𝐤𝐚𝐧𝐠 𝐋𝐚𝐠𝐚𝐫𝐞: '𝐘𝐨𝐮 𝐬𝐡𝐨𝐮𝐥𝐝 𝐛𝐞 𝐚 𝐦𝐚𝐧'

Mialma si General Santos City-SP committee on finance chairperson, Councilor Vivencio Dinopol human kini alegaran og "incompetence" ug "ignorance" sa mga kaubanan, kalabot sa iyahang paghupot sa maong komitiba.

Partikular nga gikasakit ni Dinopol ang nahimong pamahayag batok kaniya ni City Councilor, Atty. Dominador Lagare, Jr., kalabot sa giaprubahang P450,000 nga budget ilawom sa Annual Investment Plan (AIP), inay nga ang original budget proposal nga P450-million.

Pagpaklaro pa ni Dinopol, adunay problema sa audio sa Sanggunian, hinungdan nga namali ang pagpaminaw sa maong kantidad.

Gipanghingusgan pa sa committee chair nga "inadvertently" o wala gituyo ang maong kapakyasan sa bahin sa stenographer ug staff sa SP.

Kini matod pang hinungdan kung nganong gilayong gi-amyendahan ang partikular nga probisyon sa AIP.

Dungan niini, giawhag ni Dinopol si Lagare nga magpaka-lalaki ug sabton una og pag-ayo ang mga isyu, inay nga magpataka og mga pamulong.

Una nang gitugyan ni Dinopol sa mga kaubanang konsehal kung buot sa mga niini nga pulihan siya isip labaw sa maimpluwensiyang komite sa konseho.

Gipanghingusgan pa ni Dinopol nga nakaandam kining moluwat sa maong puwesto kung kini ang pagbuot sa mayorya.

22/09/2021

𝐋𝐚𝐠𝐚𝐫𝐞, 𝐠𝐢𝐭𝐚𝐰𝐚𝐠 𝐧𝐠𝐚 '𝐢𝐧𝐜𝐨𝐦𝐩𝐞𝐭𝐞𝐧𝐭' 𝐬𝐢 𝐃𝐢𝐧𝐨𝐩𝐨𝐥 𝐢𝐬𝐢𝐩 𝐒𝐏 𝐟𝐢𝐧𝐚𝐧𝐜𝐞 𝐜𝐡𝐚𝐢𝐫

Gisuportahan ni General Santos City Councilor, Atty. Dominador "Jun" Lagare, Jr. ang naunang panawagan kang City Councilor Vivencio Dinopol nga mo-resign na lang isip chairman sa maimpluwensiyang committee on finance, ways and means sa Sangguniang Panlungsod.

Sa pakighinabi sa 𝐑𝐚𝐭𝐬𝐚𝐝𝐚 𝐁𝐚𝐥𝐢𝐭𝐚 𝐎𝐧𝐥𝐢𝐧𝐞, subling gikuwestyon ni Lagare ang katakos ni Dinopol nga gunitan ang maong sensetibong komitiba.

Atol sa gipahigayong regular session sa SP, gibutyag ni Lagare ang matod pa "apparent incompetence" sa committee chair, sa dihang giaprubahan sa komitiba niini ang P450,000 nga budget ilawom sa Annual Investment Plan (AIP), inay nga ang original budget proposal nga P450-million.

Gumikan matod pa sa maong kapakysan, adunay nahitabong "insertion" sa budget proposal aron ma-korek ang budget sa mga nakataganang programa sa siyudad.

Gipanghingusgan pa ni Lagare nga isip "engineer by profession", gilauman matod pa nga hanas si Dinopol sa numero og computation.

Una pa si Lagare, nanawagan na si City Councilor, Atty. Franklin Gacal kang Dinopol sa pag-resign sa committee chairmanship gumikan sa klaro ug tataw matod pang wala kini kasayuran sa iyahang obligasyon.

22/09/2021

𝟏𝟓 𝐂𝐨𝐯𝐢𝐝-𝐫𝐞𝐥𝐚𝐭𝐞𝐝 𝐝𝐞𝐚𝐭𝐡𝐬, 𝟖𝟗𝟖 𝐛𝐚𝐠𝐨𝐧𝐠 𝐩𝐚𝐬𝐲𝐞𝐧𝐭𝐞 𝐬𝐚 𝐒𝐨𝐜𝐜𝐬𝐤𝐬𝐚𝐫𝐠𝐞𝐧 - 𝐃𝐎𝐇

Anaa na sa 1,494 ang ihap sa mga nakabsan sa kinabuhi sa Region 12, gikan sa mga pasyenteng na-igo sa coronavirus pandemic.

Kini human matal ang 15 nga newly-reported fatalities.

Base sa September 21 tracker bulletin sa DOH-Center for Health Development, lakip sa maong ihap sa dugang nangamatay ang duha sa South Cotabato; lima sa General Santos City ug walo sa North Cotabato.

Sa regionwide tally, anaa sa 165 ang Covid deaths sa Sultan Kudarat; 449 sa South Cotabato; 57 sa Sarangani; 409 sa North Cotabato ug 414 gikan sa General Santos City.

Samtang, mitungtong na sa 47,746 ang regionwide Covid-19 cases sa Soccsksargen, human matala ang 898 nga bagong pasyente.

Base sa September 21 tracker bulletin sa Department of Health, gikan sa kinatibukang ihap, anaa sa 13.87-percent o 6,620 ang aktibong pasyente.

22/09/2021

𝐒𝐢𝐧𝐠𝐥𝐞-𝐝𝐚𝐲 𝐫𝐞𝐜𝐨𝐫𝐝 𝐧𝐠𝐚 𝟒𝟐𝟔 𝐂𝐨𝐯𝐢𝐝 𝐜𝐚𝐬𝐞𝐬, 𝐧𝐚𝐭𝐚𝐥𝐚 𝐬𝐚 𝐒𝐨𝐂𝐨𝐭

Natala ang highest single-day Covid cases sa South Cotabato human madugang ang 426 nga bagong pasyente, sulod sa usa ka adlaw lamang.

Base sa September 21 case bulletin sa Department of Health, lakip sa maong newly-reported cases ang 31 sa Banga; 112 sa Koronadal City; unom sa Norala ug 90 gikan sa Polomolok.

Aduna usab upat gikan sa Sto. Nino; 51 sa Surallah; 54 sa Tampakan; 31 sa Tantangan; 26 sa T'boli ug 21 gikan sa Tupi.

Alayon niini, miambak na sa 15,430 ang provincial-wide tally sa Covid cases, diin, 2,579 ang aktibong pasyente.

Anaa sa 12,401 ang ihap sa mga naka-rekober ug 449 ang natala nga nakabsan sa ilahang kinabuhi.