06/10/2023
තරුෂිලා වගේ ලෝක ජනග්‍රහණයෙන් හරි අඩක් නියෝජනය කරන දැවැන්තම මහද්වීපයේ අපිට වඩා කප්පරක් එහා ඉන්න දියුණු රටවල්වල තාක්ෂණය උපරිම ක්‍රීඩකයො එක්ක තරඟ කරලා ලක් මව රනින් සරසන්න පුළුවන් දක්ෂයො රැසක් ඉන්නවා.ඒක ක්‍රීඩාවට විතරක් නෙමේ අධ්‍යාපන,වෘත්තීය බව ආදී ඕනෑම ක්ෂේත්‍රයක මේවගේ දක්ෂයො මේ පුංචි රටට හිඟ නෑ.
හැබැයි අවාසනාවකට තරුෂි ගැන ආඩම්බර වෙන,තරුෂි ගැන කවි ලියන උඹලා අපිට පුළුවන් වුණාද රු.30 ක් නැතුව පුහුණු වීම් කරන පිට්ටනියෙන් තරුෂි එළියට දැම්මම ඒකට විරුද්ධව කතා කරන්න.බළධාරින් එදා ලෝක කනිෂ්ඨ මළල ක්‍රීඩා උළෙල නියෝජනය කරන්න තරුෂිට වීසා එකවත් කලට වෙලාවට හදලා නොදී නිදි කිරද්දි අපිට පුළුවන් වුණාද තරුෂි වෙනුවෙන් සාධාරණය ඉල්ලලා හඬක් නගන්න.
රජ පවුලේ බේබිලා නීති විභාගෙන් ලංකාවේ එක වෙද්දි,හිතුනු වෙලාවට රොකට් යවද්දි,සමහර පුත්තු නාවික හමුදාවට බැඳිලා ජීවිතේට ක්‍රියාන්විත භූමියකට පය නොගසා චීනේට ශිෂ්‍යයත්ව අරන් යුද පාඨමාලාවලට යද්දි ඒවට හුරේ දැම්ම අපි.තරුෂී ගෙ රු.30 නැති කමට අවලාද කියලා හිනා වෙලා පැත්තකට වුණා.
මේ රට ඔහොම තමා.තරුෂි වගේ දක්ෂයො මේ රටේ ක්‍රීඩා පිටිවල නෙමේ,පාසල්වල,විශ්ව විද්‍යාලවල,ගම් දනව් නගර තුළ විසිරී පැතිර ඉන්නවා හැබැයි අවාසනාවකට මේ රටේ ගොඩක් මහ උන්ට රටේ දරුවො ගැන හරිහමන් ආකල්පයක් නෑ.උන් වෙනුවෙන් පිළිගත් වැඩපිළිවෙලක් නෑ,උන්ගෙ පෝෂණය,අනාගතය,අධ්‍යාපනය ගැන හරි අවබෝධයක් වටිනාකමක් නෑ.
උන් අපිටත් නිහඬව ඉන්න කියලා බල කරලා,එහෙම නිහඬ පරපුරක්,හඬක් නැති පරපුරක් ගොඩ නගන ගමන් තරුෂිලා වගේ දූ පුතුන් දහස් ගණනක් උපන් ගෙයි මරලා දානවා.බහුතරයකට තමන්ගෙ පට්ටම්,බලය,රැකියාව හැරුණු කොට මේ රට වෙනුවෙන් ,සුවහසක් අපේ දරුවන් වෙනුවෙන් තමන් සතු වගකීම,වගවීම අමතකයි.
උන්ගෙ තක්කඩිකම්වලටම ගැළපෙන පරම්පරාවක්
ඒවා අතිශෝක්තියෙන් අගයලා තරුෂිලා පයිසෙකට මායිම් නොකරන පරම්පරාවක් මේ රටේ බහුතරය වුණ පසුබිමක අපි අපි ගැනම ලැජ්ජා වෙනවා විනා තරුෂිගේ ජයග්‍රහණය අපේ කරන් දගලන්න අපිට පුළුවන් ද ?
