22/06/2023
نفرت پور
یہاں ساس بہو سے بہو ساس سے، مالک نوکر سے نوکر مالک سے، آجر اجیر سے اجیر آجر سے، کسان زمیندار سے زمیندار کسان سے، مالک مکان کرایہ دار سے کرایہ دار مالک مکان سے ، گاہک دوکاندار سے دوکاندار گاہک سے، عوام سیاست دان سے سیاست دان عوام سے، امیر غریب سے غریب امیر سے نفرت کی حد تک بدگمان ہے۔
یااللہ یہ کیسی نحوست اس دھرتی پر طاری ہے یہ کیسا مائنڈ سیٹ ہے کہ باپ بیٹا تین دن سے سمندر کی تہہ میں لاپتہ ہیں اور ہماری دعا کے طلب گار ہیں لیکن ہم ۔۔ ہم کہتے جی حرام کا پیسا تھا یہ مکافات عمل ہے کھاد بلیک کرتے تھے دودھ میں یوریا ملاتے تھے غرض جو منہ آ رہا ہے ہفوات بک رہے ہیں۔
بھارت والے فخر سے بتاتے ہیں کہ ٹاپ ٹین امیر ترین لوگوں میں انڈین کتنے ہیں اور ہم نے پیسے والے کو چور بنا کر رکھ دیا ہے ہمارے ایک سابقہ چیف جسٹس صاحب نے اپنے گریبان میں جھانکے بغیر یہ ڈائلاگ داغا تھا کہ ہر دولت کے انبار کے پیچھے جرم ہوتا ہے۔ اب یہ نہ سمجھنا کہ انڈیا والے فرشتے ہیں سب سے زیادہ سوئس بینکوں میں انڈینز کے پیسے ہیں۔ ٹیکس ہیرا پھیری ہر جگہ چلتی ہے ۔
آپ امیروں کو لاکھ برا کہہ لیں مگر غریبوں کے کام بھی یہی آتے ہیں ایک صنعت کار جب فیکٹری لگاتا ہے تو کتنے گھروں کے چولہے روشن ہوتے ہیں سیلاب ،آفات، کرونا میں کون سب سے پہلے آگے بڑھ کر مدد کرتا ہے۔ ان مواقع پر حکومتی نظام کو متحرک ہونے میں دو سے تین دن لگ جاتے ہیں جب تک تو بیچارے متاثرین بھوکے پیاسے مر جائیں۔
ہوں گی کمی کوتاہیاں ضرور ہونگی لیکن کیا ہم ان سے مبرا ہیں۔
آئیے دست دعا بلند کیجئے کہ یونس علیہ السلام کو مچھلی کے پیٹ سے زندہ برآمد کرنے والی ذات لاپتہ آبدوز کے تمام مسافروں کو بخیر و عافیت بازیاب فرمائے۔ آمین
لا الہ الا انت سبحانک انی کنت من الظالمین
