15/11/2023
ကလောဘက်မှတောင်ကြီးဘက်သို့ သံဖရိန်များတင်ဆောင်ထားသော ကားကြီးအစီးပေါင်းများစွာတက်သွား ၊ တောင်ကြီးဂိတ်နှင့်အောင်ပန်းဂိတ်တို့မှ လွိုင်ကော်မှလာသောစစ်ရှောင်ပြည်သူများကိုအဝင်မခံ
ကေတီအမ် ၊ နိုဝင်ဘာ ၁၅ ၊ ၂၀၂၃
ကယား(ကရင်နီပြည်)တွင် ပြည်သူ့ကာကွယ်ရေးတပ်များ၏ထိုးစစ်ဆင်တိုက်ခိုက်မှုများကြောင့် စစ်ကောင်စီတပ်များအတုံးအရုန်းကျဆုံးနေချိန်တွင် ပြီးခဲ့သည့် နိုဝင်ဘာလ ၁၃ ရက်နေ့က ကလောမြို့ဘက်မှတောင်ကြီးမြို့သို့ဦးတည်နေသော သံဖရိန်များတင်ဆောင်ထားသည့် ကားကြီးအစီးရေပေါင်းများစွာကို တွေ့ရှိခဲ့ရကြောင်း ပြည်သူတစ်ဦးမှသတင်းပေးပို့လာပါသည်။ ယင်းကားကြီးများသည် နိုဝင်ဘာ ၁၄ ရက်နေ့မနက်ပိုင်းမှသာ တောင်ကြီးကိုရောက်ရှိခဲ့ကြောင်းလည်း သိရသည်။ ကားတိုင်းပေါ်တွင် သံဖရိန်များကိုတင်ဆောင်ထားပြီး ယင်းကားတန်း၏အရှေ့၌ စစ်ကောင်စီ၏ရှေ့ပြေးပွိုင့်ကားတစ်စီးလည်းပါဝင်ကြောင်း သိရသည်။
ထို့အပြင် ကယားပြည်နယ်မှစစ်ဘေးရှောင်လာသောပြည်သူများအား တောင်ကြီးအဝင်ဂိတ်နှင့် အောင်ပန်းအဝင်ဂိတ်တို့မှ ဖြတ်သန်းသွားလာခွင့်မပြုဘဲ ပိတ်ဆို့ထားကြောင်းသိရပြီး ညောင်ရွှေမြို့ရှိဘုန်းတော်ကြီးကျောင်းတစ်ခုတွင် စစ်ရှောင်ပြည်သူများအားလက်ခံထားရှိခြင်းမပြုရဟုပင် လာရောက်ပြောဆိုသွားကြောင်းလည်း သိရသည်။ ကယား(ကရင်နီပြည်)တွင် ၁၁၁၁ စစ်ဆင်ရေးအဖြစ် ပြည်သူ့ကာကွယ်ရေးတပ်များက နိုဝင်ဘာ ၁၁ ရက်နေ့မှစ၍ အကြမ်းဖက်စစ်ကောင်စီတပ်များအား ထိုးစစ်ဆင်တိုက်ခိုက်နေပြီး စစ်စခန်းအချို့နှင့်လက်နက်ခဲယမ်းများကိုလည်း သိမ်းပိုက်နိုင်ခဲ့သည်။
Video - CJ