Wisdom Infinity

26/03/2024

26/03/2024

23/08/2022

တချို့သူတွေ ဘာလို့ အရပ်ပုကြတာလဲ …?
---------------------
အရပ်ရှည်ခြင်း ပုခြင်းဟာ လူတစ်ယောက်နဲ့တစ်ယောက် ကွာခြားချက်တွေ အများကြီး ရှိပါတယ်။ လူတစ်ယောက်ရဲ့အရပ်အတိုင်းအထွာ၊ ခန္ဓာကိုယ်သန်မာထွားကျိုင်းမှုဟာ အစားအသောက်နဲ့လည်း သက်ဆိုင်သလို၊ မျိုးရိုးကလည်း ဆိုင်ပါတယ်။

အခု တွေ့ရှိချက်မှာတော့ လူတစ်ယောက်ရဲ့ ဦးနှောက်နဲ့လည်း ဆိုင်ပါသတဲ့။ ဦးနောက်ထဲမှာ ပါဝင်တဲ့ ဆင်ဆာတစ်ခုကြောင့် အရပ်အတိုအရှည်အပေါ် သက်ရောက်မှုတွေ ရှိသွားတာပါ။ ဒီအတွက် သိပ္ပံပညာရှင်တွေဟာ သုတေသနတွေ ပြုလုပ်ခဲ့ရပါတယ်။

University of Cambridge, Queen Mary University of London, the University of Michigan, Vanderbilt University နဲ့ University of Bristol တို့ ပူးပေါင်းပြုလုပ်ခဲ့တဲ့ သုတေသနရလဒ်တွေအရ-

ဦးနှောက်အတွင်းမှာ MC3R လို့ အမည်ပေးထားတဲ့ Receptor လေးဟာ ဦးနောက်ရဲ့ hypothalamus လို့ခေါ်တဲ့ အပိုင်းလေးဆီကို အစားအစာတွေဆီကရတဲ့ အချက်အလက်တွေ ပို့ပေးရတဲ့အလုပ်ကို လုပ်ပါတယ်။

Hypothalamus ဟာ အစာစားချင်စိတ်နဲ့ ခန္ဓာကိုယ်အပူချိန်ကို ထိန်းညှိပေးဖို့ လုပ်ဆောင်ရပြီး၊ အကယ်၍ MC3R က သူ့ရဲ့လုပ်ငန်းတွေကို ကောင်းမွန်စွာ အလုပ်မလုပ်နိုင်ရင်၊ အဲဒီလူတွေဟာ သာမန်အားဖြင့် အရပ်ပုကြပါတယ်။ MC3R လုပ်အားနှုန်း ကောင်းတဲ့သူတွေက အရပ်ရှည်တယ်လို့ အထက်က သိပ္ပံပညာရှင်တွေက ဆိုပါတယ်။

သုတေသနအဖွဲ့ထဲမှာ ဦးဆောင်ပါဝင်သူတစ်ဦးဖြစ်တဲ့ ဆာဘွဲ့ရပါမောက္ခ Stephen O'Rahilly က “ အဲဒီစနစ်က … ကျနော်တို့ ဒီမှာ အိုကေတယ် … ကျနော်တို့ အစားအစာတွေ အများကြီးရတယ် … လျှင်မြန်စွာ ကြီးထွားနေတယ် … စသဖြင့် လှုံ့ဆော်ပေးတယ် .. ဒါဟာ မှော်ဆန်ရုံတင်မဟုတ်ပါဘူး … ကျနော်တို့ ဘယ်လိုဖြစ်ပျက်တယ်ဆိုတဲ့ wiring diagram တွေလည်း ရှိကြပါတယ် ‘လို့ ပြောခဲ့ပါတယ်။

ဘာသာပြန်သူ- နတ္ထိမနုဿ

23/08/2022

မှတ်ဉာဏ်ချို့ယွင်းတဲ့ အဖိုးအဖွားတွေအတွက် ‘ဦးနှောက် လှုံ့ဆော်ရေးစနစ်’ကို တီထွင်
-------------------
သိပ္ပံပညာရှင်တွေဟာ အသက်ကြီးလာတဲ့နောက် တဖြည်းဖြညး် မှတ်ဉာဏ်ချို့ယွင်းလာလေ့ရှိတဲ့ သဘောသဘာ၀ကို ကုစားနိုင်ဖို့ လျှပ်စစ်ဦးနှောက်လှုံ့ဆော်ရေးစနစ်ကို တီထွင်လိုက်ကြောင်း သိရပါတယ်။

အဆိုပါ လှုံ့ဆော်ရေးစနစ်ဟာ မှတ်ဉာဏ်တွေကို ဦးနှောက်က ပြန်ဖော်ရာမှ​ာ ထိရောက်စွာ အကူအညီ ပေးနိုင်မယ်လို့ ယူဆရပါတယ်။ အဲဒီနည်းပညာဟာ တစ်ရက်ကို (၄)ကြိမ်၊ တစ်ကြိမ်မှာ မိနစ်(၂၀)ကြာ ဦးနှောက်ကို နှိုးဆွပေးမှာ ဖြစ်ပါတယ်။

ဒီစနစ်ဟာ ဦးနှောက်အတွင်း ထည့်သွင်းရန်မလိုဘဲ၊ အာရုံခံ ဆင်ဆာကိရိယာများတပ်ဆင်ထားတဲ့ Cap ပုံစံတစ်ခုကိုအသုံးပြုထားပြီး၊ ၎င်းက လူတွေရဲ့ အသက်နဲ့အမျှ နေ့စဉ်လုပ်ငန်းဆောင်တာတွေ လုပ်ဆောင်ရာမှာလည်း တိုးတက်စေလိမ့်မယ်လို့ ဆိုပါတယ်။

ဒီစနစ်ကို ဘော်စတွန်တက္ကသိုလ်မှ ပါမောက္ခ Robert Reinhart နဲ့ အဖွဲ့က အချိန်ယူစမ်းသပ်ခဲ့တာဖြစ်ပြီး၊ မှတ်ဉာဏ်နှစ်မျိုး ဖွံဖြိုးတိုးတက်စေရေးအတွက် အသက်(၆၅)မှ (၈၈)နှစ်အတွင်းရှိ လူ(၁၅၀)ကို စမ်းသပ်ခဲ့တာပါ။

တွေ့ရှိချက်အရ ဒီဦးနှောက်လှုံ့ဆော်တဲ့စနစ်ကြောင့် အသက်ကြီးပုဂ္ဂိုလ်တွေဟာ အနည်းဆုံး စကားလုံး(၆)လုံးထက်ပိုပြီး မမေ့တတ်ကြသလို၊ မှတ်ဉာဏ်ရဲ့စွမ်းဆောင်ရည်ပိုင်းမှာလည်း (၅၀)%အထိ တိုးတက်လာခဲ့တယ်လို့ ဆိုပါတယ်။

မှတ်ဉာဏ်အပိုင်းနဲ့ပတ်သက်ရင် ဖြစ်ခဲ့တဲ့အဖြစ်တွေ ပြန်ပြောတာတွေ၊ ပျမ်းမျှအခြေအနေတွေ၊ စကားလုံး (၄)လုံးကနေ (၅)လုံးအထိ မှတ်မိနိုင်တယ်လို့ ဆိုထားပါတယ်။

ဘာသာပြန်သူ - နတ္ထိမနုဿ

21/08/2022

မွေးမြူရေးတိရစ္ဆာန်တွေ လေလည်ခြင်းအတွက် ခြံပိုင်ရှင်များ အခွန်ဆောင်ရမည်-
---------------------
နယူးဇီလန်မှာ ထူးဆန်းတဲ့ အခွန်ဥပဒေတစ်ခု ပြဋ္ဌာန်းခဲ့ပါတယ်။ အဲဒါကတော့ မွေးမြူရေးတိရစ္ဆာန်တွေ လေလည်ခြင်း သို့တည်းမဟုတ် လေချဉ်တက်ခြင်းတွေအတွက် တောင်သူလယ်သမားတွေကို အခွန်ကောက်တော့မှာ ဖြစ်ပါတယ်။

တွက်ချက်မှုတွေဟာ Greenhouse Gas တွေရဲ့ အဓိကရင်းမြစ်ထဲမှာ တိရစ္ဆာန်တွေက စွန့်ထုတ်လိုက်တဲ့ ကာဘွန်ဒိုင်အောက်ဆိုက်တွေလည်း ပါဝင်နေတယ်လို့ ဆိုပါတယ်။

နယူးဇီလန်ဆိုတာ မွေးမြူရေးလုပ်ငန်းမှာ အလွန်ကြီးထွားတဲ့ နိုင်ငံပါ။ စာရင်းတွေအရ မွေးမြူရေးနွား ကောင်ရေ(၁၀)သန်းကျော်၊ သိုးဆိတ်ကောင်ရေ (၂၆)သန်းကျော် ရှိတဲ့အတွက် ဒီတိရစ္ဆာန်ပမာဏက ဘယ်လောက်အတိုင်းအတာထိ လေထုကို ညစ်ညမ်းစေမလဲဆိုတာ မြင်သာစေမှာပါ။

တောင်သူလယ်သမားအများစုကတော့ တိုးမြှင့်ကောက်ခံဖွယ်ရှိတဲ့ အခွန်ဥပဒေသစ်အတွက် စောဒကတက်ခြင်း မရှိဘူးလို့ သိရပါတယ်။

ဘာသာပြန်သူ - နတ္ထိမနုဿ

21/08/2022

ကျောက်မျက်ရတနာသိုက်တွေရှိတဲ့ ဂြိုဟ်သိမ်တစ်သန်းကျော် သိပ္ပံပညာရှင်များ ခြေရာခံထားနိုင်

သိပ္ပံပညာရှင်တွေဟာ ကျောက်မျက်ရတနာသိုက်ကြီးတွေရှိတဲ့ ဂြိုဟ်သိမ်တစ်သန်းကျော်အထိ ခြေရာခံထားနိုင်ပြီး၊ တူးဖော်နိုင်မယ်ဆိုပါက ကျောက်မျက်ရတနာစျေးကွက် လုံး၀ပျက်သုဉ်းသွားနိုင်ပြီး၊ စိန်၊ ပတ္တမြား စတဲ့ရတနာတွေဟာ လူတိုင်းအိမ်မှာ မြောက်များစွာ ရှိနေနိုင်တယ်လို့ ဆိုပါတယ်။

တချို့သော ဂြိုဟ်တွေရဲ့ ရတနာသိုက်တွေဟာ ဒေါ်လာကွမ်တီလီယမ်နဲ့ချီပြီး တန်ဖိုးရှိတယ်လို့ ဆိုပါတယ်။ (ကွမ်တီလီယမ်ဆိုသည်မှာ (၁)နောက်မှာ 0 ၁၈-လုံးပါဝင်သည်)။ အဲဒီရတနာသိုက်ဂြိုဟ်တွေဟာ ကျနော်တို့ ကမ္ဘာကြီးနဲ့ သိပ်မဝေးကြပါဘူး။

အဆိုပါရတနာသိုက်ဂြိုဟ်တွေဟာ အင်္ဂါဂြိုဟ်နဲ့ ကြာသပတေးဂြိုဟ်တို့ရဲ့ နေကြယ်ကြီးကို ပတ်တဲ့လမ်းကြောင်းအတွင်းက ဂြိုဟ်ခါးပတ်အတွင်းမှာ တည်ရှိကြပါသတဲ့။ အဲဒီ ဂြိုဟ်ခါးပတ်အတွင်းမှာ ဂြိုဟ်သိမ်သန်းနဲ့ချီ ရှိနေပြီး၊

တချို့သော ဂြိုဟ်သိမ်တွေကတော့ အချင်းမီတာ (၂၀၀)ကကီလိုမီတာ ကျော်ပါတယ်။ ဒါဟာ အီဂျစ်ပြည်ထက် ကြီးမားတဲ့ ပမာဏဖြစ်ပါတယ်။ နာဆာရဲ့အဆိုအရ အဲဒီဂြိုဟ်ခါးပတ်အတွင်းမှာပင် ရတနာတန်ဖိုးဟာ (၇၀၀) ကွမ်တီလီယမ်ရှိပြီး။

အကုန်လုံးသာ ကမ္ဘာမြေဆီ ရောက်လာခဲ့ရင် လူတစ်ယောက်ကို ဒေါ်လာ (၁၀၀)ဘီလီယံလောက်ဆီ ဝေငှနိုင်မှာလို့ ဆိုပါတယ်။ Davida အမည်ရ ဂြိုဟ်သိမ်ကြီးဟာ တန်ဖိုးအကြီးဆုံးဂြိုဟ်သိမ်ကြီးဖြစ်ပြီး၊ အချင်းကီလိုမီတာ (၃၂၆)ကီလိုမီတာ ကျယ်ဝန်းပါတယ်။ တန်ဖိုးအားဖြင့် ဒေါ်လာ (၂၇)ကွမ်တီလီယမ်ဖြစ်ပါတယ်။

ဘာသာပြန်သူ - နတ္ထိမနုဿ

20/08/2022

ကမ္ဘာမြေကြီးဆီကို ရေနဲ့သက်ရှိတွေ ဘယ်လို ရောက်လာခဲ့တာလဲ …?
-------------------
ကမ္ဘာမြေကြီးဟာ စတင်ဖြစ်တည်လာကတည်းက အလိုအလျှောက် ရေတွေ၊ သက်ရှိသတ္တဝါတွေ ပါလာခဲ့တာမဟုတ်ပါ။ အရင်ဆုံး မိခင်သဘာ၀တရားကြီးက သဘာ၀ပေါက်ပင်တွေ၊ မှီခိုနေထိုင်မဲ့သတ္တဝါတွေ-

မျိုးစိတ်ကွဲ ဆင့်ကဲပြောင်းလဲမှုတွေကို တဖြည်းဖြည်း ဖန်တီးယူခဲ့ရတာပါ။ အခု ဂျပန်နိုင်ငံက သိပ္ပံပညာရှင်တွေကတော့ သူများနဲ့မတူတဲ့ တွေ့ရှိမှုတွေကို ထုတ်ပြန်ခဲ့ပါတယ်။ ဂျပန်သုတေသီတွေဟာ Hayabusa2 အာကာသစူးစမ်းလေ့လာရေးယာဉ်ကို အသုံးပြုပြီး အသစ်သော တွေ့ရှိချက်တွေ ရရှိခဲ့ပါတယ်။

သူတို့ဟာ Ryugu ဂြိုဟ်သိမ်ပေါ်မှ နမူနာတွေ့ရှိချက်တွေကို ခွဲခြမ်းစိတ်ဖြာပြီးနောက် မတူညီတဲ့ တွေ့ရှိချက်တွေ ရရှိခဲ့တာပါ။ သူတို့အဆိုအရတော့ ကမ္ဘာကြီးဟာ ရေနဲ့ သက်ရှိကိစ္စရပ်တွေကို တခြား ဂြိုဟ်သိမ်ဂြိုဟ်မွှားတွေဆီကနေ ရရှိခဲ့တယ်လို့ ဆိုပါတယ်။

Japan Aerospace Exploration Agency ဟာ အဲဒီဂြိုဟ်သိမ်ပေါ်ကနေ (၅၉)မီလီဂရမ်ရှိတဲ့ အမှုန်အမွှားလေးတွေ (၈)ခုကို ခွဲခြမ်းစိတ်ဖြာခဲ့ပြီး၊ အဲဒီအထဲမှာ သက်ရှိသတ္တဝါကိစ္စရပ်တွေ၊ နောက်ပြီး အရည်စနစ်ပုံစံမဟုတ်တဲ့ ဟိုက်ဒရောက်ဇိုင်အုပ်စုတွေ ပါဝင်ပါတယ်။

ထူးခြားတာက အောက်ဆီဂျင်အက်တမ်တစ်ခုဟာ ဟိုက်ဒရိုဂျင်အက်တမ်တစ်ခုနဲ့ နှီးနွယ်နေပြီး၊ အဲဒီဂြိုဟ်သိမ်ရဲ့ အာကာသမြူုမှုန်တွေ၊ ဖုန်မှုန့်တွေထဲမှာ ပါဝင်တဲ့ အက်တမ်တွေ၊ အမှုန်တွေနဲ့ တူညီနေတယ်လို့လည်း ဆိုပါတယ်။

ဘာသာပြန်သူ - နတ္ထိမနုဿ

19/08/2022

(၁၉-၈-၂၀၂၂)နေ့အတွက် မိုးလေ၀သခန့်မှန်းချက်-

ဘင်္ဂလားပင်လယ်အော်မြောက်ပိုင်းမှာ ဖြစ်ပေါ်နေတဲ့ မုန်တိုင်းငယ်ဟာ မြန်မာ၊ ဘင်္ဂလားဒေ့ရှ်၊ အိန္ဒိယနိုင်ငံတွေရဲ့ ကမ်းရိုးတန်းဒေသတွေအပေါ် သက်ရောက်မှုတွေ ရှိနိုင်ပါတယ်။ ဒီမုန်တိုင်းအရှိန်ကြောင့်ပဲ မြန်မာနိုင်ငံ၊ ရခိုင်ကမ်းရိုးတန်းဒေသမှာ လေကြီးမိုးကြီး ကျရောက်နိုင်ပါတယ်။ အခြား ပြည်နယ်နဲ့ တိုင်းဒေသကြီးတို့မှာလည်း ဒေသအလိုက် မိုးကြီးနိုင်ပါတယ်။

စစ်ကိုင်းတိုင်းအောက်ပိုင်း၊ မန္တလေးတိုင်း၊ ကယားပြည်နယ်တို့မှာ နေရာကျဲကျဲ၊ နေပြည်တော်၊ စစ်ကိုင်းတိုင်းအထက်ပိုင်း၊ မကွေးတိုင်းနဲ့ ရှမ်းပြည်နယ်တို့မှာ နေရာစိပ်စိပ်နှင့် ကျန်တိုင်းနှင့် ပြည်နယ်တို့မှာ နေရာအနှံ့အပြားမိုးထစ်ချုန်းရွာပြီး၊ ရန်ကုန်တိုင်း၊ ဧရာဝတီတိုင်းနှင့်ရခိုင်ပြည်နယ်တို့မှာ နေရာကွက်ပြီး မိုးကြီးနိုင်ပါတယ်။

ရန်ကုန်မြို့နဲ့အနီးတ၀ိုက်မှာ - မွန်းလွဲနောက်ပိုင်း နေရာကွက်ကြား မိုးသက်လေပြင်း ကျရောက်နိုင်ပြီး၊ လေကြီးမိုးကြီး ရွာချနိုင်ပါတယ်။ ညနေ ခြောက်နာရီလောက်အထိ မိုးသည်းထန်နိုင်ပါတယ်။ နေ့အပူချိန်မှာ (၃၀)ဒီဂရီမှ ညအပူချိန် (၂၅)ဒီဂရီအထိ ရှိနိုင်ပါတယ်။ နောက်ထပ် (၄၈)နာရီအတွက် ခန့်မှန်းချက်ကတော့ အများအားဖြင့် တိမ်ထူထပ်မှာဖြစ်ပြီး၊ နေရာကွက်ကြား မိုးထစ်ခြုန်းရွာသွန်းမှုတွေ ဆက်ဖြစ်နေပါဦးမယ်။

နေပြည်တော်နဲ့အနီးတ၀ိုက်မှာ - အများအားဖြင့် တိမ်ထူထပ်နေပြီး၊ နေရာကွက်ကြား မိုးရွာသွန်းမှုတွေ ရှိပါမယ်။ နေ့အပူချိန် (၃၁)ဒီဂရီမှ ညအပူချိန် (၂၄)ဒီဂရီအထိ ရှိနိုင်ပြီး၊ ညနေ (၄)နာရီနောက်ပိုင်းမှာ မိုးထစ်ခြုန်းရွာသွန်းမှုတွေ နေရာကွက်ကြား ဖြစ်နိုင်ပါတယ်။ နောက်ထပ် (၄၈)နာရီအတွက် ခန့်မှန်းချက်ကတော့ နေရာအလိုက် မိုးထစ်ခြုန်း ရွာသွန်းမှုတွေ တစ်ကြိမ်မှ သုံးကြိမ်လောက်အထိ ရှိနိုင်ပါတယ်။

မန္တလေးမြို့နဲ့အနီးတ၀ိုက်မှာ - အများအားဖြင့် တိမ်ထူထပ်နေပြီး၊ နေ့အပူချိန် (၃၄)ဒီဂရီ၊ ညအပူချိန် (၂၆)ဒီဂရီအထိ ရှိနိုင်ပါတယ်။ ညနေပိုင်းနဲ့ မွန်းလွဲပိုင်းတို့မှာ နေရာကျဲကျဲ မိုးခပ်ပါးပါး ရွာသွန်းမှုတွေ ရှိနိုင်ပြီး၊ နောက်ထပ် (၄၈)နာရီအတွက် ခန့်မှန်းချက်ကတော့ အများအားဖြင့် တိမ်ထူထပ်နေပါမယ်။

မော်လမြိုင်မြို့နဲ့ အနီးတ၀ိုက်မှာ - နေ့အပူချိန် (၂၉)ဒီဂရီ ညအပူချိန် (၂၅)ဒီဂရီ ရှိနိုင်ပါတယ်။ အများအားဖြင့် တိမ်ထူထပ်နေပြီး၊ မွန်းလွဲပွဲမှာ နေရာကျဲကျဲ မိုးထစ်ခြုန်းရွာသွန်းမှုတွေ ရှိနိုင်ပါတယ်။ နောက်ထပ် (၄၈)နာရီအတွက် ခန့်မှန်းချက်ကတော့ နေရာကွက်ကြား မိုးထစ်ခြုန်းရွာသွန်းမှုတွေ ဆက်ရှိနိုင်ပါတယ်။

18/08/2022

လူတွေ သတိမထားမိတဲ့ တိရစ္ဆာန်လေးတွေရဲ့ ထူးခြားဆန်းကျယ်မှုများ
----------------------------
(၁) ခြင်္သေ့အမတွေဟာ အမဲလိုက်အခါ ရာခိုင်နုန်း(၉၀)အထိ ပါဝင်ပြီး၊ ခြင်္သေ့အထီးတွေက (၁၀)ရာခိုင်နှုန်းလောက်ပဲ ပါဝင်တာပါ။
(၂) အာတိတ်ဝေလငါးဖြူတွေရဲ့ ဦးချိုကဲ့သို့သော ချွန်ထက်တဲ့အရာဟာ အပြင်ကိုထွက်နေတဲ့ သွားတစ်ချောင်းသာ ဖြစ်ပါသတဲ့
(၃) Puffin ငှက်တွေဟာ ခန္ဓာကိုယ် ယားယံမှုကို ကုတ်ခြစ်ဖို့ တုတ်ချောင်းလေးတွေကို သုံးပါတယ်။
(၄) ပုလင်းနှာခေါင်းလင်းပိုင်တွေဟာ လူသားတွေထက် ညာသန်ရာခိုင်နှုန်း ပိုများပါတယ်။
(၅) မဟက်တန်မှာ ManhattAnt လို့ခေါ်တဲ့ ပုရွက်ဆိတ်တစ်မျိုးသာ ရှိပါတယ်။
(၆) နွားတွေကို မြင်းကျားတွေကဲ့သို့ အဖြူအမည်း ဆေးသုတ်ပေးရင် ခြင်တွေကိုက်တဲ့ဒဏ်က ကာကွယ်ပေးနိုင်ပါသတဲ့။
(၇) Capuchin မျောက်တွေဟာ သူတို့ရဲ့ ကျင်ငယ်ရေနဲ့ လက်တွေ၊ ခြေထောက်တွေကို ဆေးကြပါတယ်။
(၈) တရုတ်မှာရှိတဲ့ တချို့ဝက်ကြီးတွေဟာ ဝက်ဝံတွေရဲ့ အရွယ်အစားလောက် ရှိပါတယ်။
(၉) တချို့ခရုတွေမှာ အမွေးထူတဲ့ ခရုခွံတွေ ရှိတတ်ပါတယ်။
(၁၀) နွားကျောင်းသားငှက်(Cowbird)တွေဟာ သားတွေသမီးတွေကို စကားဝှက်တွေ သင်ပေးလေ့ရှိပါတယ်။

ဘာသာပြန်သူ - နတ္ထိမနုဿ

18/08/2022

ရှေ့ဖြစ်ဟောသူအဖွားအိုကြီးရဲ့ (၂၀၂၂)အတွက် ဟောကိန်း တကယ်မှန်လာခဲ့ပြီ-
----------------
ဘာဘာဗန်ဂါလို့ လူသိများတဲ့ ရှေ့ဖြစ်ဟောဆရာမကြီးရဲ့ (၂၀၂၂)အတွက် ဟောကိန်းတွေထဲက တစ်ခုဟာ မှန်ကန်လာခဲ့ပြီလို့ သတင်းတွေက ဆိုပါတယ်။ ဘူဂေးရီးယားအဖွားအိုဟာ (၁၉၉၆)ခုနှစ်က အနိစ္စရောက်ခဲ့ပေမယ့် အနာဂတ်ကာလ သက္ကရာဇ် (၅၀၇၉)အထိ ကြိုတင်ဟောကိန်းထုတ်ခဲ့တယ်လို့ ဆိုပါတယ်။

​တချို့ကလည်း ဘာဘာဟာ ဒီလောက်ရှည်လျားတဲ့ ဟောကိန်းတွေ ထုတ်နိုင်ခဲ့ဖို့ မရှိကြောင်း၊ နီးစပ်သူတွေက အဖွားအို ဟောခဲ့သယောင်ယောင်နဲ့ လုပ်စားနေကြတာဖြစ်နိုင်ကြောင်း ဆိုသူတွေ ရှိပါတယ်။ တချို့ကတော့ ဒါဟာ ရုရှားတွေရဲ့ ဆိုက်ဝါးတွေလို ဆိုနေပါတယ်။

ရုရှားလူမှုကွန်ရက်ပေါ်မှာတော့ အဲဒီအဖွားအိုရဲ့ ဟောကိန်းဆိုတဲ့အရာတွေဟာ သူတစ်မျိုး ငါတစ်မျိုး ရေးနေကြတယ်လို့ အနောက်နဲ့နီးစပ်တဲ့ ရုရှားနိုင်ငံသားတချို့က ဆိုကြပါတယ်။ အထူးသဖြင့် ဝါဒဖြန့်မီဒီယာတွေက အဲဒီလို ဟောကိန်းတွေ ပိုဖြန့်ပါသတဲ့။

ဘယ်လိုပဲဖြစ်ဖြစ် (၂၀၂၂)အတွက် ဟောကိန်းကတော့ အာရှနဲ့ ဩစတေးလျတို့မှာ မကြုံစဖူး ရေကြီးမှုတွေ၊ ရေလွှမ်းမိုးမှုတွေ ဖြစ်မယ်လို့ ဆိုပါတယ်။ လက်ရှိမှာပဲ အာရှနိုင်ငံတချိ့မှာ ရေကြီးရေလွှမ်းမှုတွေ ရှိနေပြီး၊ ဩစတေးလျအဖို့တော့ မကြာသေးခင် ကာလက အဆိုးဝါးဆုံး ရေကြီးမှု ကြုံခဲ့ပြီးပါပြီ။

ဒီလိုပဲ ဥရောပအတွက် ဟောကိန်းမှာလည်း ရေရှားမိုးခေါင်မှုတွေ ကြုံရမယ်လို့ ဆိုပါတယ်။ အင်္ဂလန်ရဲ့ ဒေသတော်တော်များများမှာ ရာသီဥတု ပူပြင်းခြောက်သွေ့ပြီး ရေပြဿနာကို အကြီးအကျယ် ရင်ဆိုင်နေရသလို၊ အီတလီ၊ ဂျာမနီ၊ ပေါ်တူဂီ အစရှိတဲ့နိုင်ငံတွေလည်း မိုးခေါင်ရေရှားမှု ပြဿနာ ကြုံနေရပါတယ်။

ဘာဘာရဲ့ ဟောကိန်းတိုင်းက မှန်ကန်ခဲ့တာချည်း မဟုတ်ပါဘူး။ လေးနှစ်ကြာ နယူကလီးယားစစ်ပွဲကြောင့် ဥရောပတိုက်ကြီးဟာ (၂၀၁၆)ခုနှစ်မှာ ပျက်စီးမယ်ဆိုတဲ့ ဟောကိန်းကလည်း တက်တက်စင်အောင် လွဲခဲ့တာမျိုးတွေလည်း ရှိခဲ့ပါတယ်။

ဘာသာပြန်သူ - နတ္ထိမနုဿ

18/08/2022

မိုးလေဝသအထူးသတင်း-

လေဖိအားနည်းရပ်ဝန်းက မုန်တိုင်းငယ်အဖြစ် အသွင်ပြောင်းနိုင်၊ မြန်မာနိုင်ငံ အောက်ပိုင်းနဲ့ ကမ်းရိုးတန်းဒေသတွေမှာ မိုးသည်းထန်နိုင်-

ဘင်္ဂလားပင်လယ်အော် အရှေ့အလယ်ပိုင်း၊ အရှေ့မြောက်ပိုင်း၊ ရခိုင်ကမ်းရိုးတန်းမြောက်ပိုင်းအနီးမှာ လေဖိအားနည်းရပ်ဝန်းတစ်ခု ဖြစ်နေပါတယ်။ ဒီလေဖိအားနည်းရပ်ဝန်းဟာ အနောက်မြောက်ဘက်ကို ရွေ့လျှားပြီးနောက် (၆)နာရီအတွင်း ပိုမို အားကောင်းလာဖို့ ရှိပါတယ်။

နောက်ထပ် (၂၄)နာရီအတွင်းမှာပဲ ယင်းလေဖိအားနည်းရပ်ဝန်းဟာ မုန်တိုင်းငယ်အဖြစ် ရောက်ရှိနိုင်ပြီး၊ အနောက်မြောက်ဘက်ကို ဆက်လက်ရွေ့လျားနိုင်ပါတယ်။ ကပ္ပလီပင်လယ်ပြင်နဲ့ ဘင်္ဂလားပင်လယ်အော်နဲ့ ကပ္ပလီပင်လယ်ပြင်တို့မှာ မုတ်သုံလေ အလွန်အားကောင်းနေဆဲပါ။

ဖြစ်ပေါ်လာတဲ့ မုန်တိုင်းငယ်ကြောင့် - နေပြည်တော်၊ မန္တလေးတိုင်း၊ စစ်ကိုင်းတိုင်း(အောက်ပိုင်း)၊ ရှမ်းပြည်နယ်၊ ကယားပြည်နယ်တို့မှာ နေရာစိပ်စိပ် မိုးထစ်ခြုန်းရွာနိုင်ပြီး၊ မကွေး၊ ဧရာ၀တီ၊ ရခိုင်၊ ကရင်၊ မွန်အစရှိတဲ့ ပြည်နယ်တွေမှာ နေရာအနှံ့အပြား မိုးကြီးနိုင်ပါတယ်။

18/08/2022

(၁၈-၈-၂၀၂၂)နေ့အတွက် မိုးလေ၀သခန့်မှန်းချက်များ-

ဒီကနေ့ ရရှိထားတဲ့ မိုးလေဝသဆိုင်ရာ အချက်အလက်တွေကို အခြေခံပြီး၊ ပရိတသတ်ကြီးအတွက် မိုးလေဝသသတင်းတွေကို တင်ဆက်ပေးချင်ပါတယ်။

ရန်ကုန်မြို့နဲ့အနီးတ၀ိုက် - ရန်ကုန်မြို့နဲ့အနီးတ၀ိုက်မှာ အများအားဖြင့် တိမ်ထူထပ်နေပြီး၊ နေ့အပူချိန် (၂၉)၊ ညအပူချိန် (၂၅)ဒီဂရီတို့ ဖြစ်ပါတယ်။ ညနေပိုင်း နှစ်နာရီနောက်ပိုင်းလောက်မှာ မိုးထစ်ခြုန်းရွာသွန်းတာတွေ နေရာအနှံ့ ဖြစ်နိုင်ပါသေးတယ်။ နောက်ထပ် (၄၈)နာရီအတွက် ခန့်မှန်းချက်ကတော့ အများအားဖြင့် တိမ်ထူထပ်မှာဖြစ်ပြီး၊ မိုးထစ်ခြုန်းရွာသွန်းမှုတွေလည်း နေရာစိပ်စိပ်မှာ ဆက်ဖြစ်ပါ့မယ်။

နေပြည်တော်နဲ့အနီးတ၀ိုက်အတွက် - ​နေပြည်တော်နဲ့အနီးတဝိုက်မှာ အများအားဖြင့် တိမ်ထူထပ်နေပြီး၊ နေ့အပူချိန်မှာ (၂၉)ဒီဂရီအထိ ရှိနိုင်သလို၊ ညဘက်အနိမ့်ဆုံးအပူချိန်ကတော့ (၂၄)ဒီဂရီဖြစ်ပါတယ်။ ညနေ (၅)နာရီနောက်ပိုင်းမှ​ာ နေရာကွက်ကြား မိုးသက်လေပြင်း ကျရောက်နိုင်ပြီး၊ နောက်ထပ် (၄၈)နာရီအတွက် ခန့်မှန်းချက်ကတော့ အများအားဖြင့် တိမ်ထူထပ်မှာ ဖြစ်သလို၊ နေရာကွက်ကြား မိုးထစ်ခြုန်းရွာသွန်းတာတွေ ရှိနိုင်ပါတယ်။

မန္တလေးမြို့နဲ့အနီးတ၀ိုက်မှာ- နေ့အပူချိန် (၃၃)ဒီဂရီ၊ ညဘက်အပူချိန် (၂၆)ဒီဂရီအထိ ရှိနိုင်ပါတယ်။ အများအားဖြင့် တိမ်ထူထပ်နေမှာဖြစ်ပြီး၊ ညနေပိုင်းမှာ နေရာကျဲကျဲ မိုးအနည်းငယ် ရွာနိုင်ပါတယ်။ နောက်(၄၈)နာရီအတွက် ခန့်မှန်းချက်မှာတော့ မိုးရွာသွန်းမှု သိသိသာသာ လျှော့ပါးသွားမှာပါ။

မော်လမြိုင်မြို့နဲ့ အနီးတ၀ိုက်မှာ - အများအားဖြင့်​ တိမ်ထူထပ်နေပြီး၊ နေရာကွက်ကြား မိုးထစ်ခြုန်း ရွာသွန်းမှုတွေ ရှိခဲ့ပါတယ်။ နေ့လည်ပိုင်း၊ ညနေပိုင်းနဲ့ ညဉ့်ဦးပိုင်းအထိ မိုးထစ်ခြုန်း ရွာသွန်းမှုတွေ နေရာအနှံ့ဖြစ်နိုင်ပါသေးတယ်။ နောက်ထပ် (၄၈)နာရီအတွက် ခန့်မှန်းချက်ကတော့ နေရာအနှံ့ မိုးနည်းနည်းမှ မိုးထစ်ခြုန်းရွာသွန်းမှုတွေ နေရာကွက်ကြား ဆက်ဖြစ်နိုင်ပါသေးတယ်။

17/08/2022

ဖွတ်မျိုးထဲမှာ အဆိပ်ရှိတဲ့ ရှားပါးဖွတ်သတ္တဝါတစ်မျိုး
-------------------
ဖွတ်တွေအားလုံးထဲမှာ အဆိပ်ရှိတဲ့ ရှားပါး ဖွတ်သတ္တဝါတစ်မျိုး ရှိပါတယ်။ အဲဒီဖွတ်အမည်ကတော့ Gila Monster လို့ခေါ်တဲ့ ဖွတ်မျိုးဖြစ်ပြီး၊ ပုံစံကလည်း ကြောက်မက်ဖွယ်ရာ အသွင်ကိုဆောင်ပါတယ်။ ဒါပေမယ့် ရာသီဥတု ကြမ်းကြမ်းနဲ့ သူတို့ အံမဝင်ကြပါဘူး။ အခု သူ့အကြောင်းကို ဖော်ပြပေးလိုက်ပါတယ်။

(၁) Gila Monster တွေဟာ အမေရိကန် ဒေသရင်းတွေ ဖြစ်ကြပါတယ်။ မက္ကဆီကိုနဲ့ မြောက်ဘက်နယ်စပ်တချို့မှာလည်း တွေ့ရတတ်ပါတယ်။ ရှားပါးစ ပြုလာတဲ့ သတ္တဝါတွေပါ။

(၂) Gila Monster တွေရဲ့ အရွယ်အစားဟာ (၂)ပေအထိ ရှိပါတယ်။ ဒါပေမယ့် အဲဒီအထဲမှာ (၂၀)%ကတော့ သူတို့ အမြှီးပါ။ သူတို့အမြှီးဟာ သူတို့ ကျန်းမာရေးအတွက် အလွန်အရေးကြီးပါတယ်။ အမြှီးအတွင်းမှာ အဆီဓာတ်ကို သိုလှောင်ကြပြီး၊ လမ်းလျှောက်ရာမှာ ဟန်ချက်ထိန်းပေးပါတယ်။ ထူးခြားတာက ဘာအစားအစာမှ မစားရလည်း အဲဒီအမြှီးအတွင်းက အဆီဓာတ်နဲ့တင် နှစ်များစွာ အသက်ရှင်နိုင်ပါတယ်။

(၃) Gila Monster တွေဟာ အဆိပ်ရှိပေမယ့် အလွန်အေးအေးဆေးဆေး နေတတ်တဲ့ သတ္တဝါတွေပါ။ သူတို့ဟာ အရမ်းနုညံ့တဲ့ စိတ်ရှိကြပါတယ်။ သူတို့ကို စိတ်ဆိုးအောင် စနောက်ရင်တော့ မဖြစ်မနေ တိုက်ခိုက်ပါတော့တယ်။ အရင်ဆုံး ပါးစပ်တွေ ဖြဲပြပြီး သတိပေး တတ်ပါတယ်။

(၄) Gila Monster တွေရဲ့သွားတွေဟာ သေးငယ်ချွန်ထက်ကြပါတယ်။ ဒါပေမယ့် ဝါးဖို့အတွက်ဆိုတာထက် ခက်ရင်းဇွန်းကဲ့သို့ ထိုးပြီး သားကောင်ကို မျိုချဖို့အသုံးပြုတာပါ။ အောက်သွားတွေက ပိုကြီးပြီး၊ အပြင်ကို ငေါနေပါတယ်။ အောက်သွားတွေက သူတို့ရဲ့အဆိပ်ကို ကိုက်လိုက်တဲ့သတ္တဝါအတွင်း အရောက်ပို့ပေးတာပါ၊

(၅) Gila Monster တွေဟာ ကိုက်လေ့ကိုက်ထမရှိသော်လည်း အကိုက်ခံရပြီဆို သူတို့ တကယ်ကို ဒေါသထွက်လို့ ဖြစ်ပါတယ်။ အရမ်းကို ပြင်းထန်ပြီး၊ အဆိပ်ချက်ချင်း သင့်စေနိုင်ပါတယ်။ အကိုက်ခံရင် ဒဏ်ရာကို ချက်ချင်းရေဆေးပြီး၊ ဆရာဝန်ပြသင့်ပါတယ်။ လူကို သေစေနိုင်တဲ့ အဆိပ်မဟုတ်သော်လည်း neurotoxin ပျော့ ပါဝင်ပါတယ်။ နောက်ပြီး သွားလည်း ကျိုးကျန်ခဲ့နိုင်လို့ သတိထားရပါတယ်။

(၆) Gila Monster တွေရဲ့အဆိပ်ကို ဆီးချိုပျောက်ဆေးထုတ်လုပ်ရာမှာ သုံးလေ့ရှိပါတယ်။ အထူးသဖြင့် Type 2 အတွက် သုံးလေ့ရှိပါတယ်။ အဆိပ်ထဲမှာပါတဲ့ Exendin-4 ဆိုတဲ့ဓာတ်ဟာ သူတို့ အစာခြေတဲ့စနစ်ကို နှေးကွေးစေသလို၊ လူရဲ့ အင်ဆူလင်ထုတ်လုပ်မှုနဲ့ သွေးတွင်းသကြားဓာတ်ကို ချပေးနိုင်ပါတယ်။

(၇) Gila Monster ဟာ ဧပြီနဲ့မေလမှာ ပိုမြူးတတ်ကြပါတယ်။ အစာရှာရလွယ်ကူလို့ပါ။ နောက်ပြီး ကြင်ဖော်ရှာပြီး၊ သားပေါက်ချိန်လည်း ဖြစ်ပါတယ်။ နိုဝင်ဘာနဲ့ မတ်တ်ဆိုရင် သူတို့ ဆောင်းခိုကြပါပြီ။ သူတို့ဟာ အသက်(၂၀)အထိ နေနိုင်ကြပါတယ်။

ဘာသာပြန်သူ - နတ္ထိမနုဿ

17/08/2022

တောကြီးမြွေဟောက်တွေနဲ့ပတ်သက်တဲ့ သိမှတ်ဖွယ်အချက်များ
-----------------------------
တောကြီးမြွေဟောက်တွေဟာ အဆိပ်ရှိမြွေတွေထဲမှာတော့ အရှည်ဆုံးသတ္တဝါတွေ ဖြစ်ကြပါတယ်။ အများစုကတော့ အာရှတောင်ပိုင်း၊ အရှေ့တောင်အာရှနိုင်ငံတွေမှာသာ တွေ့ရတတ်ပါတယ်။ အဆိပ်အလွန်ပြင်းကြပြီး၊ ရန်လိုတဲ့ သတ္တဝါတွေ ဖြစ်ကြပါတယ်။ အခု သူတို့အကြောင်းကို ဗဟုသုတအဖြစ် ဖော်ပြပေးလိုက်ပါတယ်။

(၁) တောကြီးမြွေဟောက်တွေဟာ အရှည်(၁၂)ပေအထိ ရှိနိုင်ပြီး၊ အလေးချိန် ပေါင်(၂၀)အထိ လေးနိုင်ပါတယ်။ တချို့တောကြီးမြွေဟောက်တွေ ပါးပြင်းထောင်ရင် သာမန်လူကြီးတစ်ယောက်ရဲ့ အရပ်နဲ့ ညီမျှပါတယ်။ အရှည်ဆုံးတောကြီးမြွေဟောက်အဖြစ် (၁၈)ပေအထိ ရှိကြောင်း မှတ်တမ်းတွေက ဆိုပါတယ်။

(၂) သူတို့ရဲ့ပါးပြင်းဟာ တကယ်တော့ အရိုးတွေဖြစ်ပါတယ်။ မြွေရဲ အရေမဟုတ်ပါ။ သူတို့ ခုခံကာကွယ်လိုတဲ့အခါ ပါးစပ်ထဲကို အဆိပ်ရေတွေစုဆောင်းဖို့အတွက် အလိုလျှောက် ပါးပြင်းထောင်လိုက်ကြပြီး၊ တိုက်ခိုက်ဖို့ အဆင်သင့်ဖြစ်နေပါတယ်။ အဲဒီအချိန်မှာ အရိုးတွေက တောင်ပံလို ဘေးကို ပြန့်ကားသွားပြီး ယပ်တောင်သဖွယ် ဖြစ်သွားတာပါ။

(၃) တောကြီးမြွေဟောက်ရဲ့အဆိပ်က နှစ်မျိုးရှိပါတယ်။ neurotoxic အဆိပ်နဲ့ hemotoxic အဆိပ်တို့ ဖြစ်ပါတယ်။ neurotoxic အဆိပ်ဟာ အာရုံကြောစနစ်ကို အဓိက တိုက်ခိုက်တာဖြစ်ပြီး၊ hemotoxic ကတော့ သွေးစီးဆင်းမှုစနစ်ကို တိုက်ခိုက်တာပါ။ hemotoxic အဆိပ်ကို မြွေပွေးနဲ့ ခလောက်မြွေတွေမှာလည်း ရှိပါတယ်။

(၄) သူတို့အဆိပ်ရေ အနည်းငယ်လောက် ခန္ဓာကိုယ်အတွင်း ဝင်ရောက်ခဲ့ရင်တောင်မှ ကျွဲနွားဆင်ကို အကြောတွေ တွန့်ဆိုင်းသွားစေနိုင်သလို၊ လူကိုတော့ မိနစ်အနည်းငယ်အတွင်း သေစေနိုင်ပါတယ်။ ကျွဲနွားဆင်တို့ကတော့ နာရီတော်တော်ကြာရင် သေနိုင်ပါတယ်။

(၅) တောကြီးမြွေဟောက်တွေဟာ အသားစားသတ္တဝါတွေ ဖြစ်ကြပါတယ်။ ရနိုင်သမျှ သတ္တဝါတွေကို ဖမ်းဆီးစားသောက်ပါတယ်။ သူတို့ဟာ အလွန်ကြီးတဲ့ အစားအစာတွေစားထားရင် တစ်လလောက် တခြားအစာမစားဘဲ နေနိုင်ပါတယ်။ ရေက သူတို့အတွက် အထူးမလိုအပ်ပါ။ သူတို့ခန္ဓာကိုယ်က သွားရင်းလာရင်း ရေဓာတ်စုပ်ယူနိုင်ပါတယ်။

(၆) တောကြီးမြွေဟောက်မတွေဟာ ဥဥဖို့အတွက် အသိုက်ကို ကိုယ်တိုင်လုပ်ကြပါတယ်။ နွေဦးရာသီမှာဆို သူတို့ သားပေါက်လေ့ရှိကြကြီး၊ ဥအလုံးရေ (၅၀)လောက်ကို ဥချတတ်ပါတယ်။ မြွေဟောက်တစ်ကောင် အရွယ်ရောက်ဖို့ (၄)နှစ်လောက် ကြာတတ်ပါတယ်။

(၇) တောကြီးမြွေဟောက် အကြောက်ရဆုံးရန်သူကတော့ မြွေပါပဲ ဖြစ်ပါတယ်။ မြွေပါတွေဟာ တစ်ပေလောက်သာ ခန္ဓာကိုယ်ရှိကြပေမယ့် သူတို့မှာ မြွေအားလုံးရဲ့အဆိပ်ကို ခံနိုင်တဲ့ ကိုယ်ခံအားစနစ် ပါဝင်ပါတယ်။ သူတို့ဟာ မြွေကိုပါ သတ်ပြီး စားသောက်လေ့ရှိလို့ တောကြီးမြွေဟောက်တွေအတွက်တော့ အကြီးဆုံးရန်သူပါ။

(၈) တောကြီးမြွေဟောက်တွေဟာ လေချွန်သံကဲ့သို့ အသံပြုကာ မိမိကိုယ်ကို ကာကွယ်ဖို့ လုပ်တတ်ကြပါသေးတယ်။ တစ်ခါတလေ သစ်ပင်ပေါ်တက်ပြေးတာ၊ ရေကူးပြေးတာတွေလည်း လုပ်တတ်ပါတယ်။

(၉) တောကြီးမြွေဟောက်တွေဟာ အသက်အားဖြင့် အနှစ်(၂၀)လောက်အထိ နေနိုင်ကြပါတယ်။ သူတို့ဟာ ရာသီဥတုဒဏ်နဲ့ အစာငတ်ဒဏ်တွေကိုလည်း ကြံ့ကြံ့ခံနိုင်ကြပါတယ်။

ဘာသာပြန်သူ - နတ္ထိမနုဿ

17/08/2022

(၁၇-၈-၂၀၂၂)အတွက် မိုးလေဝသသတင်းများ

ဒီနေ့ မြန်မာနိုင်ငံအတွက် မိုးလေဝသအခြေအနေတွေကို ပရိသတ်ကြီးအတွက် တင်ဆက်ပေးချင်ပါတယ်။ မြန်မာနိုင်ငံအောက်ပိုင်းနဲ့ ကမ်းရိုးတမ်းဒေသများ၊ အခြားပြည်နယ်နဲ့ တိုင်းဒေသကြီးတော်တော်များများမှာ မုန်တိုင်းကြောင့် နေရာအနှံ့အပြား မိုးကြီးရေလျံနေပြီး၊ ညနေပိုင်း (၆)နာရီလောက်အထိ မုန်တိုင်းအရှိန် ဆက်ရှိနေမှာမို့ နေရာကွက်ကြား မိုးထစ်ခြုန်းရွာသွန်းတာတွေ ဆက်ရှိနေပါမယ်။

ရန်ကုန်မြို့နဲ့အနီးတ၀ိုက်မှာ - အများအားဖြင့် နေရာအနှံ့ မိုးရွာသွန်းနေပြီး၊ လာမယ့် (၄၈)နာရီအတွင်းထိ မိုးထစ်ခြုန်းရွာသွန်းတာတွေ၊ မိုးသက်လေပြင်း တိုက်ခတ်မှုတွေ ဆက်ရှိနေပါမယ်။ အမြင့်ဆုံးနဲ့ အနိမ့်ဆုံးအပူချိန်တွေကတော့ (၂၆)ဒီဂရီမှ (၂၅)ဒီဂရီဖြစ်ပြီး၊ မိုးဆက်လက် သည်းထန်နေဦးမှာမို့ အချို့ဒေသတွေမှာ ရေကြီးရေလျံမှုတွေ ဆက်ဖြစ်နေနိုင်ပါတယ်။

နေပြည်တော်နဲ့အနီးတ၀ိုက်မှာ - အမြင့်ဆုံးနဲ့အနိမ့်ဆုံးအပူချိန်မှာ (၃၃)ဒီဂရီနဲ့ (၂၅)ဒီဂရီတို့ ဖြစ်ကြပါတယ်။ အများအားဖြင့် တိမ်ထူထပ်နေပြီး၊ အချို့နေရာတွေမှာ နေရာကွက်ကြား မိုးထစ်ခြုန်း ရွာသွန်းမှုတွေ ရှိပါမယ်။ ညနေပိုင်း (၂နာရီနဲ့ (၄)နာရီအတွင်းမှာ မိုးသက်မုန်တိုင်း ကျရောက်နိုင်ပြီး၊ နေရာအနှံ့အပြား မိုးသည်းထန်နိုင်ပါတယ်။

မန္တလေးမြို့နဲ့အနီးတ၀ိုက်မှာ - အများအားဖြင့် တိမ်ထူထပ်နေပြီး၊ အမြင့်ဆု့းနဲ့ အနိမ့်ဆုံးအပူချိန်မှာ (၃၅)ဒီဂရီနဲ့ (၂၆)ဒီဂရီဖြစ်ပါတယ်။ ညနေပိုင်းနဲ့ ညဉ့်ဦးပိုင်းမှာ နေရာကွက်ကြား မိုးကြီးနိုင်ပြီး၊ နောက်ထပ် (၄၈)နာရီအတွက် ခန့်မှန်းချက်မှာလည်း နေရာကွက်ကြား မိုးရွာသွန်းမှုတွေ ရှိနေပါမယ်။

မော်လမြိုင်မြို့နဲ့အနီးတ၀ိုက်မှာ - နေရာအနှံ့အပြားဟာ မုန်တိုင်းငယ်အရှိန်ကြောင့် မိုးသည်ထန်စွာရွာသွန်းမှုတွေကို ညနေ(၄)နာရီလောက်အထိ ဆက်လက်ကြုံတွေ့နိုင်ပါတယ်။ အမြင့်ဆုံးနဲ့ အနိမ့်ဆုံးအပူချိန်တွေကတော့ (၂၇)ဒီဂရီနဲ့ (၂၅)ဒီဂရီတို့ဖြစ်ကြပြီး၊ နောက်ထပ် (၄၈)နာရီအတွင်း ခန့်မှန်းချက်ကတော့ နေရာအနှံ့အပြား မိုးထစ်ခြုန်းရွာသွန်းမှုတွေ ဆက်လက်ဖြစ်ပေါ်နေဦးမှာပါ။

16/08/2022

(၁၆-၈-၂၀၂၂)အတွက် မိုးလေဝသအခြေအနေများ-

ဒီကနေ့ မြန်မာနိုင်ငံအတွက် မိုးလေဝသအခြေအနေများကို တင်ဆက်ပေးပါ့မယ်။ စစ်ကိုင်းတိုင်း(အောက်)၊ မန္တလေးတိုင်း၊ မကွေးတိုင်း၊ ရှမ်း(မြောက်)၊ ချင်း၊ ကယားပြည်နယ်တို့မှာ နေရာကျဲကျဲ မိုးရွာသွန်းမှုတွေ ရှိမှာဖြစ်ပြီး၊ စစ်ကိုင်း(အထက်)၊ ကချင်၊ ရခိုင်၊ ရန်ကုန်တိုင်းတို့မှာ နေရာစိပ်စိပ်နဲ့ မိုးထစ်ခြုန်းရွာသွန်းမှုတွေ ဆက်ရှိနေမှာပါ။

ရန်ကုန်မြို့နဲ့အနီးတစ်၀ိုက်မှာ - အမြင့်ဆုံးနဲ့အနိမ့်ဆုံးအပူချိန်တို့မှာ (၂၉)ဒီဂရီကနေ (၂၄)ဒီဂရီတို့ဖြစ်ကြပြီး၊ နေ့လည် (၁၁)နာရီလောက်မှာ မိုးသက်လေပြင်းကျရောက်မှု အဆုံးသတ်နိုင်ပါတယ်။ ဒါပေမယ့် ညနေပိုင်းမှာတော့ လေကြီးမိုးကြီး ကျရောက်နိုင်တဲ့ အခြေအနေတွေ ရှိနေပါသေးတယ်။ နောက်ထပ် (၄၈)နာရီအတွက် ခန့်မှန်းချက်ကတော့ အများအားဖြင့် တိမ်ထူထပ်နေမှာဖြစ်ပြီး၊ နေရာစိပ်စိပ် မိုးထစ်ခြုန်းရွာသွန်းမှုတွေ ဆက်ရှိနေပါဦးမယ်။

နေပြည်တော်နဲ့အနီးတစ်၀ိုက်မှာ - အများအားဖြင့် တိမ်ထူထပ်နေပြီး၊ နေရာကျဲကျဲ မိုးရွာသွန်းမှုတွေ ရှိပါမယ်။ နေ့လည်ပိုင်းကနေ ညနေ(၃)နာရီလောက်အထိ နေရာကွက်ကြား မိုးသည်ထန်နိုင်ပြီး။ ညနေပိုင်းမှာတော့ နေရာအနှံ့အပြား မိုးရွာသွန်းမှုတွေ ရှိနေပါမယ်။ အနိမ့်ဆုံးနဲ့ အမြင့်ဆုံး အပူချိန်တွေကတော့ (၂၈)ဒီဂရီနဲ့ (၂၄)ဒီဂရီတို့ ဖြစ်ကြပါတယ်။ နောက်ထပ် (၄၈)နာရီအတွက် ခန့်မှန်းချက်ကတော့ နေရာစိပ်စိပ် မိုးသည်ထန်မှုတွေ ရှိနေဦးမှာပါ။

မန္တလေးမြို့နဲ့အနီးတစ်၀ိုက်မှာ - အများအားဖြင့် တိမ်ထူထပ်နေပြီး၊ ညနေပိုင်းမှ ညဉ့်ဦးပိုင်းအတွင်း နေရာကျဲကျဲ မိုးထစ်ခြုန်းရွာနိုင်ပါတယ်။ အမြင့်ဆုံးနဲ့အနိမ့်ဆုံး အပူချိန်တွေကတော့ (၃၂)ဒီဂရီနဲ့ (၂၆)ဒီဂရီတို့ ဖြစ်ကြပြီး၊ နောက်ထပ် (၄၈)နာရီအတွက် ခန့်မှန်းချက်ကတော့ အများအားဖြင့် တိမ်ထူပါ့မယ်။ နေရာကျဲကျဲမှာ မိုးသည်းသည်း ရွာသွန်းတာတွေ ဆက်ရှိနေပါမယ်။

မော်လမြိုင်မြို့နဲ့အနီးတစ်၀ိုက်မှာ - အများအားဖြင့် တိမ်ထူထပ်နေပြီး၊ အမြင့်ဆုံးနဲ့ အနိမ့်ဆုံး အပူချိန်တွေကတော့ (၃၂)ဒီဂရီနဲ့ (၂၆)ဒီဂရီတို့ ဖြစ်ပါတယ်။ မွန်းလွဲပိုင်းမှ ညဉ့်ဦးပိုင်းအတွင်း နေရာစိပ်စိပ် မိုးထစ်ခြုန်း ရွာသွန်းမှုတွေ ရှိပါမယ်။ နောက်ထပ် (၄၈)နာရီအတွက် ခန့်မှန်းချက်ကတော့ အများအားဖြင့် တိမ်ထူထပ်နေမှာဖြစ်ပြီး၊ နေရာအနှံ့အပြား မိုးထစ်ခြုန်းရွာသွန်းမှုတွေလည်း အကြိမ်ကျဲကျဲ ဆက်ဖြစ်နေမှာပါ။

15/08/2022

ကမ္ဘာပေါ်က ရွှေ တူးဖော်ထုတ်လုပ်မှုများဆုံး နိုင်ငံ(၅)ခု-
----------------
ရွှေဟာ အဖိုးတန်လူမှုအသုံးဆောင် ဖြစ်ပါတယ်။ ရှေးပဝေသဏီကတည်းကနေ အခုချိန်ထိ ရွှေဆိုတာ ရှားပါးတန်ဖိုးရှိနေဆဲဖြစ်ပြီး၊ လူသားအားလုံးရဲ့ သည်းခြေကြိုက် ဖြစ်နေဆဲပါ။ အခုဖော်ပြချင်တာကတော့ ရွှေထုတ်လုပ်မှုအများဆုံး (၅)နိုင်ငံအကြောင်း ဖြစ်ပါတယ်။

(၁) တရုတ်နိုင်ငံ - (၃၇၀)မက်ထရစ်တန်
တရုတ်နိုင်ငံဟာ (၂၀၂၁)ခုနှစ်မှာ ရွှေမက်ထရစ်တန်ချိန် (၃၇၀)အထိ တူးဖော်ထုတ်လုပ်တဲ့ နိုင်ငံဖြစ်ပါတယ်။ ကမ္ဘာ့ရွှေထုတ်လုပ်မှုရဲ့ (၁၁)ရာခိုင်နုန်းအထိ ရှိပြီး၊ ယခင်နှစ်က ရွှေမက်ထရစ်တန်ချိန် (၄၀၀)ထုတ်လုပ်မှုကနေ အခုနှစ် သိသိသာသာ လျော့နည်းသွားတာပါ။ သူတို့ဟာ (၂၀၀၉)ခုနှစ်မှာတုန်းက ရွှေမက်ထရစ်တန် (၃၂၀)သာ တူးဖော်ထုတ်လုပ်နိုင်ခဲ့ပါတယ်။

(၂) ဩစတေးလျ - (၃၃၀)မက်ထရစ်တန်
သဘာ၀အရေး လှုပ်ရှားသူတွေနဲ့ ထိပ်တိုက်ရင်ဆိုင်နေရတဲ့ ဩစတေးလျအစိုးရဟာ လာမယ့်နှစ်မှာ သယံဇာတတူးဖော်ထုတ်လုပ်မှုတွေ ရာခိုင်နှုန်းတစ်ဝက်နီးပါး ရပ်နားမယ်လို့ ဆိုပါတယ်။ (၂၀၂၁)ခုနှစ်မှာ သူတို့ဟာ ရွှေမက်ထရစ်တန် (၃၃၀)အထိ ထုတ်လုပ်ခဲ့ပြီး နံပတ်(၂)နေရာမှာ ရပ်တည်နေပါတယ်။

(၃) ရုရှား - (၃၀၀)မက်ထရစ်တန်
ရုရှားနိုင်ငံဟာ ယမန်နှစ်က ရွှေထုတ်လုပ်မှုမှာ မက်ထရစ်တန် (၃၀၀)ဖြစ်ခဲ့ပါတယ်။ ဥရောပရောက် (၈၃)ရာခိုင်နှုန်းဟာ ရုရှားရွှေတွေ ဖြစ်ပါတယ်။ ရုရှားဟာ ကမ္ဘာမှာ စိန်တူးဖော်ထုတ်လုပ်မှုမှာတော့ နံပတ်(၁)နေရာက ရပ်တည်နေပါတယ်။

(၄) အမေရိကန် - (၁၈၀)မက်ထရစ်တန်
အမေရိကန်ဟာ ရွှေတူးဖော်ထုတ်လုပ်မှုမှာ ယမန်နှစ်က မက်ထရစ်တန် (၁၈၀)အထိ ရှိခဲ့ပါတယ်။ ဒါပေမယ့် ရွှေတူးဖော်မှုနဲ့ သတ္တုမိုင်းတူးဖော်မှုတွေကို တဖြည်းဖြည်း ရပ်နားလာခဲ့ခြင်းကြောင့် လာမယ့်နှစ်မှာလည်း တန်ချိန် ကျဆင်းနိုင်ပါတယ်။

(၅) ကနေဒါ - (၁၇၀)မက်ထရစ်တန်
ကနေဒါမှာ ရွှေကို (၁၈၂၀)လောက်က စတင်တွေ့ရှိခဲ့ရာ၊ အဲဒီကတည်းက အစဉ်တစိုက် တူးဖော်ထုတ်လုပ်ခဲ့ပါတယ်။ Red Lake ရွှေလုပ်ကွက်ကြီးဟာ ကနေဒါရဲ့ အကြီးဆုံး ရွှေသိုက်ကြောကြီးဖြစ်ပြီး၊ အခြား ရွှေထွက်ရာဒေက ဆယ်ခုထက် မနည်း ရှိနေပါတယ်။

ဘာသာပြန်သူ - နတ္ထိမနုဿ

15/08/2022

ဂြိုဟ်နီကြီးလို့ခေါ်တဲ့ အင်္ဂါဂြိုဟ်ရဲ့ ဗဟုသုတဖြစ်ဖွယ်ရာ အချက်များ-
-------------------------
အင်္ဂါဂြိုဟ်ကို တချို့က ဂြိုဟ်နီကြီးလို့ ခေါ်ကြပါတယ်။ နေကို မိုင်ပေါင်း (၁၄၂)သန်း အကွာကနေ လှည့်ပတ်နေပြီး၊ ယခင်က သက်ရှိတွေ နေထိုင်ခဲ့တယ်လို့ ယူဆခြင်း ခံရတဲ့ ဂြိုဟ်ကြီး ဖြစ်ပါတယ်။ အခု ဖော်ပြချင်တာကတော့ ဂြိုဟ်နီကြီးရဲ့ စိတ်ဝင်စားစရာ အချက်တွေပါ။

(၁) အင်္ဂါဂြိုဟ်နီနေရခြင်းအကြောင်းမှာ ယင်းရဲ့လေထုအတွင်း သံချေးအမှုန်တွေ မြောက်များစွာ ပါဝင်နေလို့ ဖြစ်ပါတယ်။
(၂) အင်္ဂါဂြိုဟ်ဟာ အကြီးဆုံးသော မီးတောင်တွေကို ပိုင်ဆိုင်ထားပြီး၊ Olympus Mons ဆိုတဲ့မီးတောင်ဟာ အချင်းဒိုင်ယာမီတာ (၃၇၄)မိုင်အထိ ဖြစ်ပါတယ်။ အမြင့်မှာ (၁၆)မိုင်ရှိပြီး၊ ဧ၀ရက်တောင်ထက် အစပေါင်းများစွာ မြင့်ပါတယ်။
(၃) အင်္ဂါဂြိုဟ်မှာ Phobos နဲ့ Deimos လို့ခေါ်တဲ့ လနှစ်စင်းရှိပြီး၊ နှစ်ခုစလုံး ကျနော်တို့ရဲ့ လထက် သေးငယ်ပါတယ်။
(၄) အင်္ဂါဂြိုဟ်ဟာ လွန်ခဲ့တဲ့နှစ်ဘီလီယံများစွာက ရေရှိခဲ့ပြီး၊ ဆိုးရွားတဲ့ ရာသီဥတုအပြောင်းအလဲကြောင့် သဘာ၀ပတ်ဝန်းကျင်တွေ ပျက်စီးကုန်တာပါ။ ဒါကြောင့်လည်း သက်ရှိတွေ ရှိနိုင်ခဲ့တယ်လို့ ယူဆနေကြပါတယ်။
(၅) အင်္ဂါဂြိုဟ်ရဲ့ နေထွက်ချိန်ဟာ အပြာရောင်ဖြစ်ပါတယ်။
(၆) လာမယ့်နှစ်ပေါင်း(၅၀၀)လောက်မှာ အင်္ဂါဂြိုဟ်ဟာ နှစ်ပိုင်းကွဲသွားနိုင်ပါတယ်။ အကြောင်းကတော့ သူ့ရဲ့ ဂြိုဟ်ရံလ Phobos ဟာ သူ့ဆီကို အရှိန်ပြင်းပြင်းနဲ့ ချင်းကပ်နေတာမို့ တိုက်မိပြီး ထပ်ခြမ်းကွဲသွားနိုင်သလို၊ ဒီဖြစ်စဉ်ကြောင့် Ring System လည်း ပိုင်ဆိုင်သွားနိုင်ပါတယ်။
(၇) အင်္ဂါဂြိုဟ်ပေါ်မှာ အချိန်ပြည့် သဲဖုံတွေပါတဲ့ မုန်တိုင်းက တိုက်ခိုက်နေလို့ သူ့ရဲ့ကောင်းကင်တစ်ခုလုံးကလည်း ကမ္ဘာမြေမှာလို အပြာမဟုတ်ဘဲ၊ အနီဖြစ်နေပါတယ်။

ဘာသာပြန်သူ - နတ္ထိမနုဿ

15/08/2022

ကမ္ဘာမြေကြီးနဲ့ဝေးရာကို တဖြည်းဖြည်း ထွက်ခွာသွားနေတဲ့ ကျနော်တို့ရဲ့လမင်း
-------------------------
လာမယ့် နှစ်သန်းပေါင်းများစွာ ကြာတဲ့အခါ ကမ္ဘာကြီးမှာ ဂြိုဟ်ရံလရယ်လို့ ရှိမှာမဟုတ်တော့ပါဘူး။ ဒါပေမယ့် သိပ်တော့ စိုးရိမ်ဖို့မလိုပါ။ အကြောင်းကတော့ ကမ္ဘာကြီးဟာ အဲဒီလောက်အထိ သက်တမ်းရှည်ပါ့မလားဆိုတာရယ်၊ သေချာတာကတော့ အခု ဒီစာဖတ်နေသူတွေကိုယ်တိုင် အဲဒီအချိန်မှာ ရှိနေတော့မှာ မဟုတ်လို့ပါဘဲ။

ကျနော်တို့ရဲ့ တစ်စင်းတည်းသော လမင်းဟာ ကမ္ဘာမြေနဲ့ဝေးရာကို တဖြည်းဖြည်း သွားနေပါတယ်။ ဒါဟာ ဘာကြောင့်လဲဆိုတော့ လကမ္ဘာဟာ သူ့ရဲ့ပတ်လမ်းကို တော်တော်လေး မသိမသာ ချဲ့ထွင်နေတာဖြစ်သလို၊ အခြားတစ်ဖက်မှာလည်း ကမ္ဘာမြေပေါ်မှာ သမုဒ္ဒရာရေထု တိုးပွားလာမှု၊ ကုန်းမြေကျဉ်းမြောင်းလာမှုကလည်း လကမ္ဘာရဲ့စွဲငင်အားကို သက်ရောက်မှု ဖြစ်စေခဲ့ရာက၊ လဟာ တဖြည်းဖြည်း ဝေးရာကို သွားနေခဲ့တာပါ။

သိပ္ပံပညာရှင်တွေရဲ့ အတည်ပြုချက်အရ လကမ္ဘာကို စတင်တွေ့ရှိချိန်က လကမ္ဘာနဲ့ ကမ္ဘာအကြားမှာ မိုင် (၁၅၀၀၀)သာ ဝေးကွာမှုရှိခဲ့ပါသတဲ့။ အခုတော့ လနဲ့ကမ္ဘာဟာ မိုင်ပေါင်း (၂၃၈၈၅၅)မိုင်အထိ ဝေးကွာနေပြီဖြစ်ပြီး၊ ဒါဟာ အလွန်သိသာတဲ့ ခြားနားမှုပါ။

ပညာရှင်တွေကတော့ လကမ္ဘာဟာ ကမ္ဘာကြီးဆီကနေ တစ်နှစ်မှာ (၁.၄၈)လက်မနှုန်းနဲ့ ထွက်ပြေးနေပြီး၊ လမယ့်နှစ် (၁၅)ဘီလီယံ ကြာတဲ့အခါ လကမ္ဘာဟာ ကမ္ဘာကြီးနဲ့ လုံးလုံးလျားလျား ကင်းလွတ်သွားပါတော့မယ်။

နောက်ပြီး ကမ္ဘာအတွက် သိသာတဲ့သက်ရောက်မှုကတော့ လကမ္ဘာက ဝေးဝေးကို ရောက်သွားလေ၊ ကမ္ဘာမြေကြီး သူ့ဘာသာ လည်ပတ်နေတဲ့အရှိန်က ပိုပြီးနှေးကွေးသွားလေ၊ နေ့တာတွေ ပိုရှည်လာလေ ဖြစ်မှာပါတဲ့။

လာမယ့်နှစ် ရာနဲ့ချီမှာ တစ်နေ့တာရဲ့ကြာချိန်မှာ ပျမ်းမျှ (၁.၈)မီလီစက္ကန့်တိုးသွားနေမှာဖြစ်ပြီး၊ နှစ်သန်းပေါင်း (၆၀၀)ကြာတဲ့အခါ တစ်ရက်ရဲ့ကြာချိန်ဟာ (၂၁)နာရီသာ ရှိပါတော့မယ်။

ဘာသာပြန်သူ - နတ္ထိမနုဿ

15/08/2022

နေမင်းကြီးအကြောင်း သိသင့်သိထိုက်တဲ့ ဗဟုသုတဖြစ်ဖွယ်အချက်များ-
----------------
(၁) နေမင်းကြီးဟာ စကြာ၀ဠာ အလယ်ဗဟိုတည့်တည့်မှာရှိတဲ့ ဧရာမကြယ်ကြီးတစ်လုံး ဖြစ်ပါတယ်။
(၂) နေမင်းကြီးဟာ ကျနော်တို့ ကမ္ဘာကြီးနဲ့ ကီလိုမီတာသန်းပေါင်း (၁၅၀)အထိ ဝေးကွာပါတယ်။
(၃) သူ့မျက်နှာပြင်ရဲ့ အပူချိန်ဟာ (၅၇၈၀)ဒီဂရီကယ်လ်ဗင် ရှိပါတယ်။ ဒါကြောင့် နေရဲ့ရောင်ခြည်ဟာ အဖြူရောင်နီးပါး ဖွေးစွတ်နေပြီး၊ ကမ္ဘာ့လေထုကို ၎င်းက ဖြတ်သန်းတဲ့အခါ အဝါရောင်ဖြစ်သွားပါတယ်။
(၄) helium ဆိုတဲ့ ဒြပ်စင်ဟာ နေမင်းကြီးဆီက ရတဲ့နာမည်ဖြစ်ပါတယ်။ ဂရိနေနတ်သား Helios ကို အစွဲပြုပြီး၊ အဲဒီနာမည်ကို ရလာခဲ့တာပါ။
(၅) ဟီလီယမ်ဓာတ်ဟာ နေမင်းကြီးရဲ့ဖွဲ့စည်းမှု (၄)ပုံ(၁)ပုံအထိ ပါဝင်ပြီး၊ (၇၃)%ဟာ ဟိုက်ဒရိုဂျင်တွေဖြစ်ပြီး၊ ကျန်တာကတော့ လေလံတဲ့ ဒြပ်စင်တွေ ဖြစ်ပါတယ်။
(၆) နေမင်းကြီးရဲ့ ထုထည်ဟာ ယင်းကို ဝန်းရံနေတဲ့ ဂြိုဟ်တွေထက် အစပေါင်း(၅၀၀)ပိုကြီးပါတယ်။
(၇) နေမင်းမှာ (solar corona )သရဖူရှိပြီး၊ ဂရိလို Corona လို့ ခေါ်ပါတယ်။ နေမင်းရဲ့ ပြင်ပအလွှာပါ။ ကမ္ဘာနဲ့လရဲ့ အကွာအဝေးထက် ပိုရှည်ပါတယ်။
(၈) solar corona ရဲ့အပူချိန်ဟာ ကယ်လ်ဗင် (၁)သန်းကနေ (၂)သန်း ဒီဂရီအတွင်းရှိပြီး ကယ်လ်ဗင် ဒီဂရိ သန်း( ၂၀)အထိ တိုးနိုင်ပါတယ်။
(၉) နေမင်းရဲ့မျက်နှာပြင်ပေါ်မှာလည်း အစက်အပျောက်တွေ ရှိနေပြီး၊ အနည်းငယ်မြင်သာပါတယ်။ ဖိုတိုစပီးယားလို့ ခေါ်ပြီး၊ အားကောင်းတဲ့ တယ်လီစကုပ်+Fliter ခံပြီးမှ ကြည့်လို့ အဆင်ပြေမှာပါ။
(၁၀) ဆိုလာမုန်တိုင်းဟာ ကမ္ဘာမြေကို တိုက်ရိုက်သက်ရောက်စေနိုင်ပြီး၊ မဂ္ဂနက်တစ်ဖီးတွေကို အနောက်အယှက်တွေ မြောက်များစွာ ပေးနိုင်ပါတယ်။
(၁၁) လာမယ့်နှစ် (၁၀.၉)ဘီလီယံအရောက်မှာ နေမင်းကြီးဟာ သာမန်ကြယ်တစ်လုံးအဖြစ်သာ ရှိနေပါတော့မယ်။ သူ့ဆီမှာရှိတဲ့ ဟိုက်ဒရိုဂျင်ဟာ အဲဒီအချိန် ကုန်ဆုံးမှာဖြစ်ပြီး၊ မီးတောက်မီးလျံတွေကို ထုတ်လွှတ်နိုင်မှာ မဟုတ်တော့ပါ။

ဘာသာပြန် - နတ္ထိမနုဿ

15/08/2022

15-8-2022 ရက်နေ့အတွက် မိုးလေ၀သခန့်မှန်းချက်-

ဒီကနေ့ မြန်မာနိုင်ငံအတွက် မိုးလေဝသသတင်းများကို ပရိသတ်ကြီးအတွက် တင်ဆက်ပေးချင်ပါတယ်။

ရန်ကုန်မြို့နဲ့အနီးတစ်၀ိုက်မှာ - အမြင့်ဆုံးနဲ့ အနိမ့်ဆုံးအပူချိန် (၃၀)ဒီဂရီမှာ (၂၅)ဒီဂရီ ဖြစ်ပါတယ်။ မနက်ပိုင်းမှာ တိမ်ထူထပ်နေပြီး၊ မွန်းလွဲပိုင်းမှာ နေရာကျဲကျဲ မိုးအနည်းငယ် ရွာသွန်းနိုင်သလို၊ ညနေပိုင်းမှာ၊ နေရာကျဲကျဲ မိုးထစ်ခြုန်း ရွာနိုင်ပါတယ်။ ညဉ့်ဦးပိုင်းမှာ နေရာအနှံ့အပြား မိုးထစ်ချုန်း ရွာပါမယ်။ နောက်ထပ် (၄၈)နာရီအတွက် ခန့်မှန်းချက်ကတော့ နေရာကျဲကျဲမှ နေရာစိပ်စပ် မိုးထစ်ခြုန်း ရွာသွန်းမှုတွေ ရှိနေပါဦးမယ်။

နေပြည်တော်နဲ့အနီးတစ်၀ိုက်မှာ - တိမ်ထူထပ်နေပြီး၊ အမြင့်ဆုံးနဲ့ အနိမ့်ဆုံး အပူချိန်ကတော့ (၃၁)ဒီဂရီနဲ့ (၂၄)ဒီဂရီတို့ ဖြစ်ပါတယ်။ မိုးရွာသွန်းမှု သိသိသာသာ လျော့နည်းသွားသော်လည်း ညနေနပိုင်းနဲ့ ညဉ့်ဦးပိုင်းတို့မှာ နေရာကွက်ကြား မိုးထစ်ခြုန်း ရွာသွန်းမှုတွေ ရှိပါမယ်။ နောက်ထပ် (၄၈)နာရီအတွက် ခန့်မှန်းချက်ကတော့ မိုးထစ်ခြုန်းရွာသွန်းမှု တစ်ကြိမ်မှ နှစ်ကြိမ်အထိ ရှိနိုင်ပြီး၊ အများအားဖြင့် တိမ်ထူထပ်နေပါမယ်။

မန္တလေးမြို့နဲ့အနီးတစ်၀ိုက်မှာ - အများအားဖြင့် တိမ်ထူထပ်နေပြီး၊ အမြင့်ဆုံးနဲ့ အနိမ့်ဆုံးအပူချိန်မှာ (၃၃)ဒီဂရီနဲ့ (၂၆)ဒီဂရီဖြစ်ပါတယ်။ မိုးရွာသွန်းမှုအနေနဲ့ မွန်းလွဲပိုင်းမှာ နေရာကျဲကျဲ မိုးအနည်းငယ် ရွာနိုင်ပြီး၊၊ ညနေပိုင်းနဲ့ ညပိုင်းတို့မှာ နေရာစိပ်စိပ် မိုးထစ်ခြုန်းရွာနိုင်ပါတယ်။ နောက်ထပ်(၄၈)နာရီအတွင်း ခန့်မှန်းချက်ကတော့ နေရာကျဲကျဲ မိုးခပ်ပါးပါး ရွာနိုင်ပြီး၊ အများအားဖြင့် တိမ်ထူထပ်နေပါမယ်။

မော်လမြိုင်မြို့နဲ့ အနီးတစ်၀ိုက်မှာ - နေရာကွက်ကြား မိုးရွာသွန်းမှုတွေ ရှိနေမှာဖြစ်ပြီး၊ အမြင့်ဆုံးနဲ့အနိမ့်ဆုံး အပူချိန်တွေကတော့ (၂၉)ဒီဂရီနဲ့ (၂၅)ဒီဂရီတို့ဖြစ်ပါတယ်။ ညနေ (၆)နာရီနောက်ပိုင်းမှာ နေရာအနှံ့ပြား မိုးသည်းထန်နိုင်ပြီး၊ နောက်ထပ်(၄၈)နာရီအတွင်း ခန့်မှန်းချက်ကတော့ မိုးခပ်ကျဲကျဲ ဆက်ရွာနေဦးမှာပါ။

တစ်နိုင်ငံလုံးအနေနဲ့တော့ - နောက်ထပ် (၄၈)နာရီအတွက် ခန့်မှန်းချက်မှာ ရှမ်းပြည်နယ်၊ ရခိုင်ပြည်နယ်၊ ကရင်ပြည်နယ်၊ မွန်ပြည်နယ်၊ ဧရာ၀တီတိုင်းဒေသကြီးတို့မှာ နေရာကျဲကျဲမှာ နေရာစိပ်စိပ် မိုးသည်ထန်မှု၊ မိုးထစ်ခြုန်းရွာသွန်းမှုတွေ ရှိနိုင်နေပြီး၊ ရန်ကုန်တိုင်း၊ တနင်္သာရီတိုင်းတို့မှာ နေရာအနှံ့အပြား မိုးထစ်ခြုန်း ရွာနိုင်ပါတယ်။ ကျန်တဲ့ ပြည်နယ်တိုင်းဒေသကြီးတို့မှာ အများအားဖြင့် တိမ်ထူထပ်နေမှာဖြစ်ပြီး၊ နေရာကျဲကျဲ မိုးခပ်ပါးပါး ရွာသွန်းနိုင်ခြေ ရှိနေပါတယ်