17/06/2024
Sa kulungan ang bagsak ng liaison officer ng isang security agency sa Cebu City matapos nitong ipangsugal ang perang pangsweldo sa mga kapwa niya empleyado noong nakaraang linggo.
Kinilala ang suspek na si Jovanni Barcelite Borres, 35, residente ng Barangay Malubog, Cebu City.
Ayon sa ulat, inutusan si Borres na i-encash ang cheke na nagkakahalaga ng P534,329.50 para sa suweldo ng mga empleyado ng Gaprotect Security Inc. noong nagdaang Huwebes, Hunyo 13, ngunit hindi na ito bumalik sa opisina nang araw na iyon.
Samantala, nagtungo umano sa Abellana Police Station noong Biyernes si Borres upang i-turn over ang natitirang pera na nagkakahalaga na lamang ng P163,758.
Dahil dito, agad na humingi ng tulong ang kinatawan ng security agency sa mga awtoridad upang imbestigahan at arestuhin si Borres.
Inamin naman ng suspek na ipinangsugal niya sa casino ang pera at natalo ito.
Kasalukuyang nakadetine sa Abellana Police Station si Borres na mahaharap sa kasong qualified theft.
Source: CDN Digital