Spring Victory News

23/02/2023

စစ်ကိုင်းတိုင်း ၃ မြို့နယ်ကို စစ်ကောင်စီက မာရှယ်လောထပ်ထုတ်

စစ်အာဏာသိမ်းအပြီး ၂ နှစ်အကြာမှာ အုပ်ချုပ်ရေး ယိုယွင်းလာတဲ့အတွက် စစ်ကောင်စီက နိုင်ငံတဝှမ်းက မြို့နယ်အချို့ကို စစ်အုပ်ချုပ်ရေး ကြေညာအပြီး ၂၀ ရက်အကြာမှာ အနောက်မြောက်တိုင်း စစ်ဌာနချုပ်(နမခ)နယ်မြေက မြို့နယ် ၃ ခုကိုလည်း ဖေဖေါ်ဝါရီလ ၂၂ ရက် မနေ့က စစ်အုပ်ချုပ်ရေး(မာရှယ်လော) ကြေညာလိုက်ပါတယ်။

စစ်ကိုင်းတိုင်းထဲက ရွှေဘိုမြိုနယ်၊ ဝက်လက်မြို့နယ်နဲ့ အရာတော်မြို့နယ်တို့ကို စစ်အုပ်ချုပ်ရေး မြို့နယ်တွေအဖြစ် ထပ်မံကြေညာတာ ဖြစ်ပါတယ်။

စစ်ကောင်စီက စစ်အုပ်ချုပ်ရေး ကြေညာတာနဲ့ပတ်သက်ပြီး ပြည်သူ့တော်လှန်ရေး တပ်ဦးရဲ့ဗဟို သတင်းနဲ့ ပြန်ကြားရေးဌာန တာဝန်ခံ ရဲဘော်လွန်းညီ​ကတော့ "စစ်အုပ်စုက စစ်အုပ်ချုပ်ရေး ကြေညာလိုက်တယ်ဆိုတာ သူတို့ရဲ့အကြပ်အတည်းကို ထုတ်ဖော်ပြသလိုက်တဲ့ ထွက်ပေါက်တခုလို့ မြင်ပါတယ်။ သူတို့စစ်အုပ်ချုပ်ရေး ကြေညာလိုက်တဲ့ ဒေသတွေဟာ လက်နက်ကိုင်ပြီး နည်းလမ်းနဲ့သော်၎င်း၊ ဆန္ဒထုတ်ဖော်ပြီးတော့သော်၎င်း စစ်ကောင်စီကို အပြင်းအထန် ခုခံတော်လှန်နေတဲ့ ဒေသတွေ ဖြစ်တယ်။ ဒီဒေသတွေကို ထိမ်းလို့သိမ်းလို့ မလွယ်ကူတဲ့ အခြေအနေမျိုး ဖြစ်လာတယ်။ အဲဒီအတွက် ပိုပြီးတော့ ဒီဒေသတွေကို ဖိနှိပ်နိုင်အောင် တော်လှန်ရေးအင်အားစုတွေကို နိမ်နင်းဖို့ လူထုကိုပိုပြီးတော့ ဒုက္ခပေးနိုင်ဖို့ ကြေညာလိုက်တယ်လို့ပဲ မြင်တယ်" လို့ ပြောပါတယ်။

ဖေဖေါ်ဝါရီလ ၂ ရက်က ပထမအကြိမ် ထုတ်ပြန်ကြေညာရာမှာ စစ်ကိုင်းတိုင်းထဲက အင်းတော်၊ ဗန်းမောက်၊ ကောလင်း၊ ပင်လယ်ဗူး၊ မြောင်၊ ဆာလင်းကြီး၊ ပုလဲ၊ ယင်းမာပင်၊ ခင်ဦး၊ တန့်ဆည်နဲ့ ရေဦးမြို့နယ် တို့ဖြစ်ပြီး အခု ၃ မြို့နယ် အပါအဝင် စစ်ကိုင်းအတွင်း စစ်အုပ်ချုပ်ရေး ကြေညာထားတဲ့ မြို့နယ် ၁၄ ခု ရှိပြီဖြစ်ပါတယ်။

မြေလတ်ဒေသ မကွေးတိုင်းထဲက ပေါက်၊ မြိုင်၊ ထီးလင်း၊ ဂန့်ဂေါနဲ့ ဆောမြို့နယ်တွေ ပါဝင်ပြီး ပဲခူးတိုင်းမှာ အရှေ့ခြမ်းက ထန်းတပင်မြို့နယ်နဲ့ အနောက်ခြမ်းက အုတ်ဖို၊ နတ်တလင်း၊ ပေါင်းတည်နဲ့ ပေါက်ခေါင်း စတဲ့မြို့နယ်တွေကိုလည်း ဖေဖေါ်ဝါရီလ ၂ ရက်ကတည်းက စစ်အုပ်ချုပ်ရေး ကြောညာခဲ့တာ ဖြစ်ပါတယ်။

အဲဒီနေ့မှာပဲ ချင်းပြည်နယ်က တီးတိန်နဲ့ တွန်းဇံမြို့နယ်တို့ကို စစ်ကောင်စီက စစ်အုပ်ချုပ်ရေး ကြေညာခဲ့ပါသေးတယ်။

လက်ရှိမှာ ရွှေဘို၊ ဝက်လက်နဲ့ အရာတော်မြို့နယ်တွေမှာ ဒေသခံတော်လှန်ရေး တပ်ဖွဲ့တွေက အပြင်းအထန် ခုခံနေသလို စစ်ကောင်စီတပ်ကလည်း ကျေးရွာတွေကို လှည့်လည်မီးရှို့တာတွေ လုပ်ဆောင်နေပါတယ်။

20/02/2023

နယ်စပ်တိုက်ပွဲ မှာစစ်ကောင်စီတပ်ဖွဲ့ဝင် (၆)ဦးသေ၊(၅)ဦးအရှင်မိ

ဖေဖော်ဝါရီ ၂၀

ကရင်နီ(ကယား)ပြည်နယ်၊မယ်စဲ့မြို့နယ် မြန်မာ-ထိုင်းနယ်စပ်က စစ်ကောင်စီတပ်စခန်းတွေဆီ ရိက္ခာနဲ့ခဲယမ်းပို့လာတဲ့ စစ်ကြောင်းကို ကရင်နီပူးပေါင်းတပ်က ကြားဖြတ်တိုက်ခိုက်ခဲ့ရာ စစ်ကောင်စီတပ်က သေဆုံးမှုရှိခဲ့ကြောင်း ကရင်နီစစ်ဖက်ဆိုင်ရာဗဟို သတင်းထုတ်ပြန်ရေးအဖွဲ့က ထုတ်ပြန်ပါတယ်။

နယ်စပ် BP.12 ဘက်ကို ရိက္ခာနဲ့လက်နက်ခဲယမ်းပို့ရန်လာတဲ့ ခလရ(၅၄) အင်အား(၃၀)ခန့်ကို ကရင်နီတပ်မတော်(KA)၊ကရင်နီကွန်မန်ဒိုတပ်ဖွဲ့တို့ ဦးစီးပြီး ကရင်နီတပ်မတော် အမှတ်(၁)တပ်ရင်း၊ကရင်နီတပ်မတော်အမှတ်(၅)တပ်ရင်းနဲ့ KNDF တို့ ပါဝင်တဲ့ ပူးပေါင်းတပ်ဖွဲ့က မနေ့ကမနက်မှာ တိုက်ခိုက်ခဲ့တာလို့ ဖော်ပြထားပါတယ်။

အဲဒီတိုက်ခိုက်မှုအတွင်း တပ်ခွဲမှူး(၁)ဦးအပါအဝင် စစ်ကောင်စီတပ်ဖွဲ့ဝင် (၅)ဦးအရှင်ဖမ်းမိခဲ့ပြီး လက်နက်မျိုးစုံ (၁၀)လက်၊ ကျည်နဲ့ခဲယမ်းများ ရရှိခဲ့ကြောင်း၊ စစ်ကောင်စီအလောင်း (၆)လောင်း တွေ့ရှိခဲ့ကြောင်းနဲ့ကရင်နီပူးပေါင်းတပ်ဖွဲ့က ထိခိုက်မှုမရှိကြောင်း ထုတ်ပြန်ပါတယ်။

စစ်ကောင်စီတပ်ဟာ ရှမ်းပြည်တောင်ပိုင်း ရှမ်း-ကရင်နီနယ်စပ်နဲ့ တဆက်တည်းရှိနေတဲ့ ရှမ်းပြည်တောင်ပိုင်း ပြည်သူ့စစ် (SSS) အဖွဲ့ရဲ့နယ်မြေကိုအသုံးပြုကာ စစ်သည်အင်အား(၂၀၀)ခန့်နဲ့ ကရင်နီနယ်စပ်ရှိ စစ်ကောင်စီတပ်စခန်းတွေကို ရိက္ခာနဲ့ ခဲယမ်းများ ပို့ဖို့ စီစဉ်နေကြောင်း ဖော်ပြထားပါတယ်။

ဖေဖော်ဝါရီ ၁၈ရက်တုန်းကလည်း ရှမ်းပြည်တောင်ပိုင်း SSS နယ်မြေကို ဖြတ်ပြီး ရိက္ခာပို့ဖို့ ဆင်းလာတဲ့ စစ်ကောင်စီတပ်တွေကို ကရင်နီတပ်မတော်(KA) အမှတ်(၃)တပ်ရင်းတပ်ဖွဲ့က စောင့်ကြိုတိုက်ခိုက်ခဲ့ရာ အာဏာသိမ်းစစ်တပ်ဘက်က(၃)ဦးထက်မနည်း သေဆုံးခဲ့ပြီး ဒဏ်ရာရသူအချို့ရှိခဲ့တယ်လို့ ထုတ်ပြန်ပါတယ်။

ဖေဖော်ဝါရီလ(၁၄)ရက်နေ့မှာလည်း စစ်ကောင်စီတပ်ကို စောင့်ကြိုတိုက်ခိုက်မှု တစ်ကြိမ်ပြုလုပ်ခဲ့ရာ စစ်ကောင်စီတပ်ဘက်က (၅)ဦးခန့်ကျဆုံးပြီး အများအပြားဒဏ်ရာရခဲ့ကြောင်း ဖော်ပြထားပါတယ်။

19/02/2023

ကနီမြို့နယ်တွင် စစ်အာဏာရှင် တော်လှန်ရေး ရှင်ပြု အလှူပြုလုပ်

ဖေဖော်ဝါရီ ၁၉

ကနီမြို့နယ်ရှိ ကျေးရွာတစ်ရွာတွင် အကြမ်းဖက် စစ်အာဏာရှင် တော်လှန်ရေး ရှင်ပြု အလှူပွဲ ပြုလုပ်ခဲ့ကြောင်း သိရသည်။

18/02/2023

PDF စခန်းစီးနင်းခံရပြီး မင်္ဂလာဆောင်ခါနီး ရဲဘော်ဇနီးမောင်နှံလည်း သတ်ခံရ

ဖေဖေါ်ဝါရီ ၁၈၊ ၂၀၂၃။

မကွေးတိုင်း၊ ရေစကြိုမြို့နယ်ရှိ Southern Yesagyo PDF အဖွဲ့စခန်းကို ဖေဖေါ်ဝါရီလ ၁၇ ရက်မနေ့က မနက် ၆ နာရီခွဲလောက်မှာ စစ်ကောင်စီတပ်တွေက ဝင်ရောက်ဖျက်ဆီးခဲ့ပြီး၊ PDF ရဲဘော်ဇနီးမောင်နှံ ၂ ဦးကိုလည်း သတ်ခဲ့တယ်လို့ သိရပါတယ်။

ရေစကြိုနဲ့ ပခုက္ကူဘက်ကလာတဲ့ အင်အား ၂၀၀ ဝန်းကျင်ပါ စစ်သားတွေက သဲတောရွာနဲ့ အနီးဆုံးမှာရှိနေတဲ့ အဆိုပါ PDF စခန်းကို စီးနင်းခဲ့တာလို့ Southern Yesagyo PDF အဖွဲ့ခေါင်းဆောင် ဗိုလ်အောင်မောင်းက ပြောပါတယ်။

"ကျဆုံးသွားတဲ့ ကိုပေနဲ့မချိုတို့က Urban Underground Revolution Force (UURF-YSO) အဖွဲ့က ဖြစ်ပေမယ့် Southern Yesagyo PDF မှာ နေတာပါ။ သူတို့လင်မယားက သဲတောရွာမှာ ညအိပ်တာ ၁၇ ရက်မနက်ရောက်တော့ စစ်သားတွေက သူတို့ ၂ ဦးကို ဖမ်းတယ်။ အခြားရွာသား ၁၀ ဦးလောက်ကိုလည်း တစာခံဖမ်းပြီး စခန်းကို လိုက်ပြခိုင်းတာ” လို့ ပြောပါတယ်။

စခန်းအတွင်းရောက်ချိန် ကာကွယ်ရေးရဲဘော်တွေဘက်ကလည်း ပြန်ပြီး မိုင်းဆွဲတိုက်ခိုက်ရာ စစ်သား ၂ ဦး သေဆုံးခဲ့တယ်လို့ ဆိုပါတယ်။

မိုင်းဆွဲချိန်မှာ ရဲဘော်ဇနီးမောင်နှံ ၂ ဦးက ထွက်ပြေးခဲ့ပေမယ့် ပြန်လည်ဖမ်းဆီးခံရပြီး ပစ်သတ်ခံရပြီးနောက် စခန်းမှာပဲမီးရှို့သွားတာလို့ ဗိုလ်အောင်မောင်းက ဆက်ပြောပါတယ်။

စခန်းမီးရှို့ခံရတာကြောင့် ၆၀ မမပြောင်းတွေအပြင် ကိုဖေဆီက G***k 380 ပစ္စတိုတလက်နဲ့ ကျည်ဆံတွေလည်း ပါသွားပြီး ကျပ်သိန်း ၃၀၀ ဖိုးလောက် ဆုံးရှုံးသွားတယ်လို့ ဆိုပါတယ်။

ကိုပေနဲ့မချိုတို့ ဇနီးမောင်နှံဟာ ဖေဖေါ်ဝါရီလ ၁၈ ရက်ဒီနေ့မှာ မင်္ဂလာဆောင်ဖို့ စီစဥ်ထားဖြစ်ပေမယ့် လက်ရှိမှာတော့ သူ့တို့ဇနီးမောင်နှံရဲ့ ကြွင်းကျန်တဲ့ရုပ်အလောင်းတွေကို Southern Yesagyo PDF ရဲဘော်တွေကပဲ မီးသဂြိုလ်ပေးခဲ့ရတယ်လို့ သိရပါတယ်။

17/02/2023

ဓားပြမှု ၊ ခြိမ်းခြောက်မှု ၊ ပိုက်နက်ကျူးကျော်မှုတွေနဲ့ ထွက်ပြေးနေတဲ့ မင်းအုပ်စိုးအိမ်ကို နစက ချိပ်ပိတ်

ဓားပြမှု၊ ခြိမ်းခြောက်မှု၊ ပိုင်နက်ကျူးကျော်မှုတွေနဲ့ထွက်ပြေးနေတဲ့ မင်းအုပ်စိုးရဲ့ နေအိမ်ကို နစက က ဒီနေ့‌ဖေဖော်ဝါရီလ ၁၆ ရက်မှာ ချိပ်ပိတ်လိုက်တယ်လို့ သိရပါတယ်။

မင်းအုပ်စိုးဟာ ဓားပြမှု၊ ခြိမ်းခြောက်မှု၊ ပိုင်နက်ကျူးကျော်မှုတွေနဲ့ ထွက်ပြေးနေပြီး တရားရုံးက ဆင့်ခေါ်တာကို မလာရောက်တဲ့အတွက် ရန်ကုန်တိုင်း ၊ ဗဟန်းမြို့နယ် ဖိုးစိန်လမ်းမှာရှိတဲ့ သူ့နေအိမ်ကို အခုလို ချိပ်ပိတ်လိုက်တာလို့ သိရပါတယ်။

မင်းအုပ်စိုးဟာ ၂၀၁၄ ခုနှစ်တုန်းကလည်း သရပါမဂ္ဂဇင်း အယ်ဒီတာ မတေးနုယဉ်ကို သတ်မှုနဲ့ ထောင်ဒဏ်တသက်ကျခံခဲ့ရပေမယ့် နစက ရဲ့ လွတ်ငြိမ်းနဲ့ ပြန်လွတ်လာခဲ့တာလို့ သိရပါတယ်။

ဒီလိုထောင်ကလွတ်ပြီးနောက်ပိုင်း ဖိုးစိန်လမ်း သူ့နေအိမ်တစ်ခြမ်းကို Oasis တည်းခိုးခန်းကို ငှားရမ်းခဲ့တာဖြစ်ပြီး အဲဒီတည်းခိုခန်းကို လက်နက်ကိုင်ပြီး သွားရောက်ရမ်းကားခဲ့တာလို့ သိရပါတယ်။ ဒါ့ကြောင့် အမှုဖွင့်ခံရပြီးနောက် ထွက်ပြေးနေတာဖြစ်ပြီး တရားရင်ဆိုင်ခြင်းမရှိတာကြောင့် အခုလို သူ့နေအိမ်ကို ချိပ်ပိတ်လိုက်တာလို့ သိရပါတယ်။

16/02/2023

အမျိုးသားညီညွတ်ရေးအစိုးရ၊ တောင်ပိုင်းစစ်ဒေသက နဂါးနီစစ်ကြောင်းအတွက် လက်နက်များ အခမ်းအနားဖြင့် တပ်ဆင်ပေးအပ်

15/02/2023

ကနီမြို့နယ်အတွင်းရှိ မီးဘေးသင့် ပြည်သူများကို KLG PDF က စားသောက်ကုန် ပစ္စည်းများ လှူတန်း

ကနီမြို့နယ်၊ နတ်လဘို့မြောက်ရွာရှိ မီးဘေးသင့် ပြည်သူများကို KLG PDF ကျောက်လုံးကြီးအဖွဲ့က ပြည်သူများမှ ထောက်ပံ့ကူညီထားသော ငွေကြေးများဖြင့် ဆန်တင်း ၂၀ နှင့် စားဆီ ၇ ပုံးတို့ သွားရောက် လှူတန်းခဲ့ကြောင်း သိရသည်။

15/02/2023

ဖားကန့်မှာ အိမ်ဖော်မိန်းကလေးက ထမင်းဟင်းထဲအဆိပ်ခတ်ပြီး အိမ်ရှင်တွေကိုလုပ်ကြံ

ကချင်ပြည်နယ်၊ ဖားကန့်မြို့နယ်မှာ အိမ်ဖော်ဖြစ်သူက ထမင်းဟင်းတွေထဲ ကြွက်သတ်ဆေးတွေ ထည့်ပြီး လုပ်ကြံဖို့ ကြိုးစားတဲ့ဖြစ်စဉ် ပြီးခဲ့တဲ့ ရက်ပိုင်းက ဖြစ်ပွားခဲ့ပါတယ်။

ဖားကန့်မြို့ မော်ရှန်ရပ်ကွက် ၊ ကယားမြေ တာယာရောင်းဝယ်ရေးဆိုင်မှာ ပြီးခဲ့တဲ့ ဖေဖော်ဝါရီလ ၁၁ ရက်က အစာအဆိပ်သင့်မှုဖြစ်ခဲ့ပြီး အိမ်သား ၄ ဦး ဆေးရုံတက်ခဲ့ရကာ ခွေးသုံးကောင်လည်း သေဆုံးသွားခဲ့တယ်လို့ သိရပါတယ်။

အဲ့ဒီဖြစ်စဉ်ကို CCTV က တဆင့်ဖော်ထုတ်ရာမှ နေအိမ်မှာ အိမ်ဖော်အဖြစ် လုပ်ကိုင်နေတဲ့ မိန်းကလေးက ထမင်း၊ဟင်းတွေထဲ အဆိပ်ခတ်ခဲ့တာလို့ အိမ်ရှင်ဖြစ်သူက လူမှုကွန်ရက်ပေါ်မှာ ပြောထားပါတယ်။

အိမ်ဖော်အမျိုးသမီးဟာ အသက် ၁၅ နှစ်အရွယ်သာရှိသေးပြီး သူအလုပ်လာဆင်းပြီးနောက်မှာ ပစ္စည်းတွေပျောက်တာကြောင့် အိမ်မှာ CCTV တပ်ဆင်ခဲ့တာကို မကျေနပ်တဲ့အတွက် အခုလို အဆိပ်ခတ်လုပ်ကြံတာလို့ အိမ်ရှင်ဖြစ်သူက ပြောပါတယ်။

အဲ့ဒီ မိန်းကလေးဟာ ကြွက်သတ်ဆေးတွေကို ထမင်းနဲ့ ဟင်းတွေအပြင် သောက်ရေအိုးတွေထဲမှာပါ ထည့်ခတ်ခဲ့တာဖြစ်ပြီး အိမ်ရှင်လင်မယားနှစ်ဦးနဲ့ အလုပ်သမားနှစ်ဦး ဆေးရုံတက်ကာ ကုသမှုခံယူခဲ့ရပါတယ်။

လက်ရှိမှာ အဆိုပါ မိန်းကလေးကို ဥပဒေအရ အရေးယူနိုင်ဖို့ ဆောင်ရွက်နေတယ်လို့ သိရပါတယ်။

14/02/2023

ကလေးမြို့ပေါ်တွင် လက်ဖက်ရည်လာ သောက်သည့် ဗိုလ်ကြီးဟောင်း၊ လ/ထညွှန်မှူး ငွေဇင် ပစ်ခတ်ခံရပြီး သေဆုံး၊ လက်နက် ၁ လက်၊ ကား ၁ စီး၊ ကျည်ကာဝတ်စုံ၊ ခဲယမ်းနှင့်ဆက်စပ်ပစ္စည်းများ သိမ်းဆည်းရမိ

စစ်ကိုင်းတိုင်း၊ ကလေးမြို့ပေါ်၊ တောင်သာရပ်ကွက်၊ ကျန်စစ်သားလမ်းတွင် ယနေ့ နံနက်ပိုင်း လက်ဖက် ရည်လာသောက်သည့် ဗိုလ်ကြီးဟောင်း၊ လက် ထောက် ညွှန်ကြားရေးမှူး ငွေဇင် ပစ်ခတ်ခံရပြီး သေဆုံးသွားကြောင်း သိရှိရသည်။

ဖေဖော်ဝါရီ ၁၃ ရက်နေ့ နံနက် ၉ နာရီဝန်းကျင် ကလေးမြို့ပေါ် ၊ တောင်သာရပ်ကွက်၊ ကျန်စစ်သားလမ်းတွင် လက်ဖက်ရည်လာသောက်သည့် စစ်မှု ထမ်းဟောင်း ဗိုလ်ကြီးဟောင်း ငွေဇင် ပစ်ခတ်ခံရပြီး သေဆုံးကြောင်း၊ ဗိုလ်ကြီးဟောင်း ငွေဇင်သည် သယံ ဇာတ နှင့် သဘာ၀ပတ်ဝန်းကျင် ထိန်းသိမ်းရေးဝန်ကြီးဌာနမှ လက်ထောက်ညွှန်ကြားရေးမှူး ဖြစ်ကြောင်း ၊ အသက် ၅၃ နှစ်အရွယ်ရှိပြီး ၎င်းထံမှ သေနတ် ၁ လက်၊ ကျည်ကာဝတ်စုံ၊ ခဲယမ်းများ၊ ကား ၁ စီးနှင့် ဆက်စပ်ပစ္စည်းများကို သိမ်းဆည်းရမိကြောင်း သိရှိရသည်။

"ရှင်းလင်းတဲ့အဖွဲ့က အော်ပရေးရှင်းမိုမို ဆိုတဲ့ မြို့ပြပျောက်ကျား စစ်ဆင်ရေးအဖွဲ့ပဲ ။ သူတို့က ပထမဆုံး အဖွဲ့ပဲ ကလေးမြို့မှာ ။ ဗိုလ်ကြီးဟောင်းငွေဇင် ဆီက လက်နက်၊ ကား၊ အီကွေးမန့်၊ မှန်ဘီလူးတွေရတယ်။ မနက်စောစော တောင်သာရပ်ကွက်၊ ကျန်စစ်သားလမ်းမှာ မနက် အစောကြီး လက်ဖက်ရည်လာသောက်တာ။ အပြန်မှာ အပစ်ခံရပြီး သေတာ" ဟု ကလေးမြို့အခြေစိုက် တော်လှန်ရေး သတင်းရင်းမြစ်က ပြောဆိုသည်။

ဗိုလ်ကြီးဟောင်း ပစ်ခတ်ခံရပြီးနောက် ယနေ့ ကလေးမြို့ပေါ်တွင် စစ်ကောင်စီတပ်များက လုံခြုံရေးအင်အား အများအပြားချပြီး စစ်ဆေးမှုများလုပ်ဆောင်နေ ကြောင်း သိရှိရသည်။

13/02/2023

ပလောက်မြို့တွင် စစ်ကောင်စီခန့်အုပ်ကြီး မိသားစုဝင်ခုနစ်ဦး သေနတ်ဖြင့် ပစ်သတ်ခံရ

မူးယစ် ဆေးဝါးရောင်းဝယ်မှုနှင့်ပတ်သက်ပြီး လုပ်ကြံသတ်ဖြတ်ခံရခြင်းဖြစ်ဟု ဒေသခံအချို့ပြော

တနင်္သာရီတိုင်း၊ ပလောက်မြို့တွင် စစ်ကောင်စီခန့်ကျေးရွာအုပ်ချုပ်ရေးမှူးအပါအဝင် မိသားစုဝင်ခုနစ်ဦး သေနတ်ဖြင့် ပစ်သတ်ခံရပြီး မူးယစ် ဆေးဝါးရောင်းဝယ်မှုနှင့်ပတ်သက်ပြီး လုပ်ကြံသတ်ဖြတ်ခံရခြင်းဖြစ်ကြောင်း ဒေသခံအချို့ကပြောသည်။

ပုလောမြို့နယ်၊ ပလောက်မြို့၊ကျောက်လုံးကြီးကျေးရွာအုပ်စု ညောင်ရှင်ကုန်းကျေးရွာမှ စစ်ကောင်စီခန့်အုပ်ချုပ်ရေးမှူး ဦးမြင့်အောင်နှင့် မိသားစုဝင်များသည် ယမန်နေ့( ဖေဖော်ဝါရီ၁၁ ရက်)ည ၈ နာရီခန့်က သတ်ဖြတ်ခံလိုက်ရခြင်းဖြစ်သည်။

12/02/2023

ရွှေဘို အမှတ် (၈) လေ့ကျင့်ရေးတပ် တပ်မှူးဟောင်း၊ စစ်ဗိုလ်မှူးကြီးဟောင်း တစ်ယောက် ပစ်သတ်ခံရ၊

စစ်ကိုင်းတိုင်း၊ ရွှေဘိုမြို့ပေါ်က ဘုန်းကြီးကျောင်းဝင်းအတွင်း ဖေဖော်ဝါရီ (၁၀) ရက် ညနေပိုင်းက ရွှေဘိုမြို့ အမှတ် (၈) လေ့ကျင့်ရေးတပ် တပ်မှူးဟောင်း၊ စစ်ဗိုလ်မှူးကြီးဟောင်း တစ်ယောက် သေနတ်နဲ့ ပစ်သတ်ခံရတယ်လို့ ဒေသခံသတင်းရင်းမြစ်တွေက MFP ကို ပြောပါတယ်။

သေဆုံးသူဟာ ရွှေဘိုမြို့ အမှတ်(၈) လေ့ကျင့်ရေးတပ်၊ စခတ (၈) မှာ ၂၀၁၆-၂၀၁၇ အထိ တပ်မှူး အဖြစ် တာဝန်ယူခဲ့တဲ့ ဗိုလ်မှူးကြီး ကိုကိုကြီး(ငြိမ်း) ဆိုသူ ဖြစ်ပြီး ဘုန်းကြီးကျောင်းဝင်းထဲ ပစ်သတ်ခံရခြင်း ဖြစ်ကာ ဘယ်အဖွဲ့က ပစ်ခတ်တယ်ဆိုတာ အတိအကျ မသိရသေးဘူးလို့ ဆိုပါတယ်။

ရွှေဘိုမြို့ အမှတ် (၄) ရပ်ကွက်နေ ဗိုလ်မှူးကြီးဟောင်း ဦးကိုကိုကြီး (၅၅) နှစ်ကို ဘုန်းကြီးကျောင်းအတွင်း ရှိနေစဉ် ဆိုင်ကယ် နှစ်စီးနဲ့ ရောက်လာသူတွေက သေနတ်နဲ့ လာရောက်ပစ်ခတ်သွားပြီး ဦးကိုကိုကြီးမှာ သေနတ်ထိမှန်ဒဏ်ရာတွေနဲ့ ပွဲချင်းပြီး သေတယ်လို့ စစ်လော်ဘီတွေက ဆိုပါတယ်။

စစ်ဗိုလ်မှူးကြီးဟောင်း ပစ်သတ်ခံရပြီးနောက် စစ်အုပ်စုက သောင်းကျန်းလာနိုင်လို့ အများပြည်သူ အနေနဲ့ စစ်အုပ်စုနှင့် ဝေးဝေး နေကြဖို့ တော်လှန်ရေး အင်အားစုတွေ ကိုယ်စား မေတ္တာရပ်ခံကြောင်း ရွှေဘိုမြို့နယ် သတင်းအမှန်ပြန်ကြားရေးက ထုတ်ပြန်ထားပါတယ်။

11/02/2023

မွေးမြူရေးတပ်စခန်း ဝင်စီးခံရလို့ အရာရှိ၂ဦးအပါ ၇ဦးသေဆုံးပြီး ၃ဦးအရှင်ဖမ်းမိ

ဖေဖော်ဝါရီ ၁၁ ၊ ၂၀၂၃။

မကွေးတိုင်း၊ ပခုက္ကူမြို့နယ် မြစ်ခြေ မွေးမြူရေးတပ်စခန်းကို ဖေဖော်ဝါရီ ၁၁ရက် ဒီနေ့ မနက်ပိုင်းမှာ ဝင်ရောက်စီးနင်းတိုက်ခိုက်ခဲ့လို့ အရာရှိ ၂ဦးအပါ ၇ဦးသေဆုံးပြီး ၃ဦးအရှင်ဖမ်းမိကာ လက်နက်အချို့ သိမ်းဆည်းနိုင်ခဲ့တယ်လို့ မြိုင် PDF တာဝန်ခံ ဗိုလ် Cross က ပြောပါတယ်။

ဝင်စီးနင်းချိန် အပြန်အလှန် ပစ်ခတ်မှု ၃နာရီနီးပါး ကြာခဲ့ပြီး အဆောင်တချို့နဲ့ စခန်းတချို့ကို မီးရှို့ခဲ့ပြီး တပ်ကြပ်ကြီး တဦးနဲ့ တပ်သား ၂ဦးကို အရှင်ဖမ်းမိခဲ့တယ်လို့ ဆိုပါတယ်။

" အဲဒီမွေးမြူရေးစခန်းကို လုပ်ဖို့ရာ နည်းနည်းချိန်နေတာကြာပြီ။ အခုမှအကောင်အထည်
ဖော်ဖြစ်တာ။ ကြားထဲမှာလည်း သတင်းတွေပေါက်နေတာကြောင့် ငြိမ်နေလိုက်တာ။ အဲဒီအထဲက အဆောင်တော်တော်များများကိုလည်း မီးရှို့ဖျက်ဆီးနိုင်ခဲ့တယ်။ အဲဒီအထဲက မြင်းတွေကိုတော့ လွှတ်ခဲ့တယ်။ ခြံစည်းရိုးတွေရှိတော့ လွတ်မှာ မဟုတ်ဘူး" လို့ ပြောပါတယ်။

အဲ့ဒီတိုက်ခိုက်မှုမှာ ဗိုလ်ကြီးတဦး ဗိုလ်လေးတဦးနဲ့ တပ်သား ၅ဦးသေဆုံးခဲ့လို့ စစ်ကောင်စီဘက်က လေယာဉ်နဲ့ လာပစ်ကူပေးခဲ့သေးတယ်လို့ ဆိုပါတယ်။

PDF တွေဘက်က ထိခိုက်မှုမရှိပဲ စစ်ကောင်စီဘက်က ၃ဦးကိုအရှင်ဖမ်းမိခဲ့ပြီး သေနတ် ၃လက်နဲ့ ပစ္စည်းအချို့ သိမ်းနိုင်ခဲ့တယ်လို့ ပြောပါတယ်။

ပြည်သူ့ကာကွယ်ရေးတပ်ဖွဲ့-မြိုင်မြို့နယ် ၊ Earthquake People Defence Force ၊ MC KC မြစ်ခြေပြည်သူ့ကာကွယ်ရေးတပ်ဖွဲ့ နဲ့ Drone တပ်ဖွဲ့တို့က ပူးပေါင်းတိုက်ခိုက်ခဲ့တာလို့ သိရပါတယ်။

11/02/2023

မကွေးမြို့လယ်ခေါင် လူမြင်ကွင်းမှာ ရဲ ၁ ဦး နဲ့ ယာဥ်ထိန်းရဲ ၁ ဦး ပစ်ခတ်ခံရပြီး သေဆုံး

မကွေးမြို့၊ ပြည်တော်သာရပ်ကွက်၊ ကောင်းမွန်ကုန်တိုက်အနီးမှာ ဒီကနေ့ ညနေ ၄ နာရီခန့်က ယာဉ်ထိန်းရဲ ၁ ဦးနဲ့ ရဲ ၁ ဦး သေနတ်နဲ့ ပစ်ခတ်ခံရပြီး သေဆုံးသွားတယ်လို့ ဒေသခံတွေဆီက သိရပါတယ်။

ပြည်တော်သာလမ်းနဲ့ မေတ္တာလမ်းထောင့်မှာရှိ ကောင်းမွန်ကုန်တိုက်အနီးက Zan ကွမ်းယာဆိုင်မှာ ကွမ်းယာလာဝယ်တဲ့ စစ်အုပ်စုလက်အောက်ခံ ရဲ ၂ ဦးကို အမည်မသိသေနတ်သမားတွေက သေနတ်နဲ့ ပစ်ခတ်လို့ သေဆုံးသွားတာလို့ ဆိုပါတယ်။

"ကောင်းမွန်နားက Zan ကွမ်းယာဆိုင်မှာ ကွမ်းယာလာဝယ်တဲ့ ရဲ ၂ ယောက်ကိုပစ်သွားတာ ၂ ယောက်လုံး သေတယ်လို့ သိရတယ်။ အလောင်းတွေပါ ကားနဲ့ တင်သွားတာလို့လည်း ပြောကြတယ်။ ခုမကွေးတမြို့လုံးကို စစ်ကားတွေ ပတ်နေတာ၊ အပြင်သိပ်မထွက်ရဲကြဘူး၊ ရှုပ်ထွေးနေတာ" လို့ မကွေးမြို့ခံတဦးက မြေလတ်အသံကို ပြောပါတယ်။

ပစ်ခတ်ခံရလို့ သေဆုံးသွားသူတွေဟာ စစ်ကောင်စီလက်အောက်ခံ ရဲတပ်ဖွဲ့ဝင်တွေလို့ မြို့ခံတွေက ပြောဆိုပေမယ့် မြေလတ်အသံအနေနဲ့ သီးခြားအတည်ပြုနိုင်ဖို့ ဆက်လက်စုံစမ်းနေဆဲ ဖြစ်ပါတယ်။

ပစ်ခတ်မှုနဲ့ပတ်သက်လို့ ဒေသတွင်း တော်လှန်ရေးအင်အားစုတွေဘက်က တစုံတရာ သတင်းထုတ်ပြန်လာတာမျိုး မရှိသေးပါဘူး။

လက်ရှိမှာ မကွေးမြို့ကို စစ်ကောင်စီတပ်က လုံခြုံရေးတင်းကြပ်ထားပြီး လူသူသွားလာမှုနည်းပါးနေကာ ဒီကနေ့ညပိုင်းကို ညမထွက်ရအမိန့်ကိုလည်း အချိန်တိုးမြှင့်ပြောင်းရွှေ့ထားတယ်လို့ ဒေသခံတွေက ပြောပါတယ်။

10/02/2023

❤10.2.2023❤

Happy 49 Anniversary par💞✨💜

10/02/2023

လားရှိုးမှာ အမျိုးသားတစ်ဦး ဓားခုတ်ခံရပြီး ဖုန်းနဲ့ ဆိုင်ကယ်လုယက်ခံရ

ရှမ်းပြည်နယ်မြောက်ပိုင်း၊ လားရှိုးမြို့မှာ ဒီနေ့ နေ့လယ်ပိုင်းက အမျိုးသားတစ်ဦး ဓားခုတ်ခံရပြီး ဆိုင်ကယ်နဲ့ ဖုန်းလုယက်ခံခဲ့ရတယ်လို့ သိရပါတယ်။

လားရှိုးမြို့က ဆင်တောင်အနောက်ဘက်၊ သစ်ခွကျောင်း အဝင်လမ်းမှာ ဒီနေ့နေ့လယ်က လူတစ်ဦး ဓားနဲ့ ခုတ်ခံရပြီး ဖုန်းနဲ့ ဆိုင်ကယ်ကို လုယက်သူတွေက ယူဆောင်သွားတယ်လို့ သိရပါတယ်။

အဲ့ဒီအမျိုးသားဟာ ဓားခုတ်ခံရတဲ့အတွက် ဒဏ်ရာအပြင်းအထန်ရသွားပြီး လူမှုကူညီရေးအဖွဲ့တွေက သွားရောက်ကူညီခဲ့တယ်လို့ သိရပါတယ်။

ဒဏ်ရာရသွားတဲ့ အမျိုးသားကို ဒေသခံ လူမှုကူညီရေးအသင်းတွေက လားရှိုးပြည်သူ့ဆေးရုံကြီး အရေးပေါ်ဌာနကတဆင့် ခွဲစိတ်ကုသဆောင်ကို ပို့ဆောင်ထားတယ်လို့ သိရပါတယ်။

လက်ရှိမှာ ဓားနဲ့ အခုတ်ခံရတဲ့ အမျိုးသားရဲ့ ဆွေမျိုးတွေနဲ့ နေအိမ်တွေကို စုံစမ်းနေဆဲဖြစ်တယ်လို့ သိရပါတယ်။

09/02/2023

Breaking News- စစ်အုပ်ချုပ်ရေး ကြေညာထားသော ချင်းပြည်နယ်၊ ထန်တလန်မြို့မရဲစခန်းကို ချင်းကာကွယ်ရေးတပ်ဖွဲ့များက သိမ်းပိုက်လိုက်ပြီး စစ်တပ်က လေကြောင်းတိုက်ခိုက်နေ၊ လက်နက် ၄၀ ကျော်နှင့်ခဲယမ်းများ သိမ်းဆည်းရမိ

ဖေဖော်ဝါရီ ၉

စစ်အုပ်ချုပ်ရေး ကြေညာထားသော ချင်းပြည်နယ်၊ ထန်တလန်မြို့နယ် ရဲစခန်းကို ယမန်နေ့ညပိုင်းတွင် CNA-CDFက အပြီးအပိုင် တိုက်ခိုက်သိမ်းပိုက်လိုက်ပြီး စစ်ကောင်စီတပ်က လေကြောင်းတိုက်ခိုက်မှုများ ဆက်တိုက်ဆိုသလို လုပ်ဆောင်နေကြောင်း ဒေသသတင်းရင်းမြစ်နှင့် CNA-CDF သတင်းရင်းမြစ်တချို့ထံမှ သိရှိရသည်။

ဖေဖော်ဝါရီလ ၈ ရက်နေ့ ည ၁၀ နာရီမှစတင်၍ ရဲစခန်းကို စတင်တိုက်ခိုက်ခဲ့ခြင်းဖြစ်ပြီး ည ၁ နာရီဝန်းကျင်တွင် ထန်တလန် ရဲစခန်းကို လုံး၀ သိမ်းပိုက်လိုက်ကြောင်း၊ ချင်းကာကွယ်ရေးတပ်ဖွဲ့မှ ရဲဘော်တစ်ဦး ကျဆုံးပြီး စခန်းကို လုံး၀ အပြီးအပြတ် သိမ်းပိုက်လိုက်ကြောင်း၊ လက်နက်များ ၊ ဒရုန်းပစ် လက်နက်များ အပါအဝင် လက်နက် ၄၀ ကျော်နှင့် ခဲယမ်းများ အမြောက် အမြား ရရှိကြောင်း သိရှိရသည်။

ရဲစခန်းကို ချင်းကာကွယ်ရေးတပ်များက သိမ်းပိုက်လိုက်ပြီးနောက် စစ်ကောင် စီ က ယမန်နေ့ ညပိုင်းမှစတင်၍ လေကြောင်းတိုက်ခိုက်မှုများ လုပ်ဆောင်နေပြီး လက်ရှိ သတင်းရေးသား ဖော်ပြနေချိန်တွင်လည်း လေကြောင်းမှ တိုက်ခိုက်မှုများ ဆက်တိုက်ရှိနေကြောင်း သိရှိရသည်။

ရန်ကုန်ခေတ်သစ်အနေဖြင့် ထန်တလန်မြို့နယ် CNA-CDF အဖွဲ့ထံသို့ ဆက်သွယ်ရန် ကြိုးစားလျက်ရှိပြီး သက်ဆိုင်ရာ အဖွဲ့က ထုတ်ပြန်လာမည့် တရားဝင် အတည်ပြုချက်ကိုလည်း ရရှိရန် ကြိုးစားလျက်ရှိသည်။

စစ်ကောင်စီက ဖေဖော်ဝါရီလ ၂ ရက်နေ့မှ စတင်၍ ချင်းပြည်နယ်ရှိ ထန်တလန် မြို့နယ် အပါအဝင် ၇ မြို့နယ်ကို စစ်အုပ်ချုပ်ရေး ကြေညာထားသည်။

08/02/2023

ထီးလင်းတွင် PDF သတင်းထောက်လှမ်းနေသည့် စစ်သားနှစ်ဦးနှင့် ပျူစောထီးတစ်ဦးကို ဖမ်းမိပြီး ရုတ်တရက် ထွက်ပြေး သဖြင့် ပစ်ခတ်ရာမှ သေဆုံး

ဖေဖော်ဝါရီ ၈

မကွေးတိုင်း၊ ထီးလင်းမြို့နယ် ပြည်သူ့ကာကွယ်ရေးတပ်ဖွဲ စစ်ဆေးရေးဂိတ်တစ်ခုတွင် “မိန်းမခိုးပြေး လာသော အရပ်သားများ” အဖြစ် ဟန်ဆောင်ထားသည့် စစ်သားနှစ်ဦးနှင့် ပျူစောထီးအမျိုးသမီးတစ်ဦး ကို ဖမ်းမိခဲ့ကြောင်း Yaw Revolution Army- ထီးလင်းထံမှ သခင်ဇော်က ရန်ကုန်ခေတ်သစ်သတင်း ဌာန ထံသို့ ပြောကြားသည်။

ယမန်နေ့ ဖေဖော်ဝါရီလ ၇ ရက် နံနက် ၇ နာရီခွဲခန့်က ဂန့်ဂေါခရိုင်တပ်ရင်း ၁၅ ၊ ၁၆ ၊ ၁၇ (YRA -ထီး လင်း) တပ်ဖွဲ့စစ်ဆေးရေးဂိတ်တွင် လမ်းလျှောက်လာသော မသင်္ကာဖွယ်ရာ အမျိုးသားနှစ်ဦး၊ အမျိုး သမီးတစ်ဦးကို (လက်နက်မပါ)တွေ့ရှိသဖြင့် စစ်ဆေး မေးမြန်းရာ အမျိုးသားနှစ်ဦးမှာ ထီးလင်းမြို့ပေါ်၌ အထိုင်ချပြီး ကျေးရွာများကို လှည့်ပတ်မီးရှို့ရာတွင် နာမည်ကြီးနေသော ခလရ -၅၅ တပ်မှ စစ်သားများ ဖြစ်ပြီး ကျန်အမျိုးသမီးတစ်ဦးမှာ ပျူစောထီးဖြစ်ကြောင်း သိရသည်။

“မနေ့က ကျနော်တို့ရဲ့ ဂိတ်တစ်နေရာ ကုန်းကြောင်းပဲလျှောက်လာတာ၊ မိန်းမခိုးပြေးလာတာလို့ အစ ပိုင်းမှာ လိမ်တယ်၊ နှိုက်နှိုက် ချွတ်ချွတ်စစ်လိုက်တဲ့အချိန်မှာ ထီးလင်းမြို့ပေါ်က မီးရှို့တပ်လို့ နာမည် ကြီးနေတဲ့ တပ်မ ၅၅ ကတပ်သားတွေဖြစ်နေတာ၊ အမျိုသမီးကလည်းထီးလင်းမြို့ပေါ်က ပဲ ပျူစောထီး အဖွဲ့ဝင်မိန်းမတစ်ယောက်ပဲ” ဟု သခင်ဇော်က ရန်ကုန်ခေတ်သစ်သတင်းဌာနထံသို့ ပြောဆိုသည်။

၎င်းတို့ ၃ ဦးကို တွေ့ရှိသည့်နေရာမှ အခြားနေရာ တစ်ခုသို့ ခေါ်ယူပြီး အစားအသောက် များ ကျွေး မွေးကာနိုင်ငံတကာ စစ်သုံ့ပန်းဥပဒေနှင့်အညီ ထိန်းသိမ်းထားခဲ့ကြောင်း၊ ထိုသို့ထိန်းသိမ်းထားစဉ် ရုတ်တရက် ထွက်ပြေးရန် ကြိုးစားသဖြင့် ပစ်ခတ်ဖမ်းဆီးရာ ၃ ဦးစလုံးသေဆုံးသွားသည့်အတွက် ကောင်းမွန်စွာ သင်္ဂြိုလ်ပေးခဲ့ကြောင်း သိရသည်။

“ထမင်းတွေဘာတွေကျွေး၊ ပြီးတော့ မင်းတို့ထွက်မပြေးနဲ့၊ ငါတို့ကြိုးတွေဘာတွေလည်း မတုတ်ဘူး၊ အေး ဆေး နေကြဖို့ သဘောတူညီမှုယူပြီးတော့ လွှတ်ပေးထားတဲ့အချိန်မှာ ထွက်ပြေးကြတာ၊ အဲဒါနဲ့ ပစ်ခတ် ဖမ်းဆီးရင်း ကျည်ထိ သေဆုံးကြတာပါ” ဟု သခင်ဇော်က ရှင်းပြသည်။

မကွေးတိုင်း ထီးလင်းမြို့နယ်သည် အကြမ်းဖက် စစ်ကောင်စီက စစ်အုပ်ချုပ်ရေး ကြေညာထားသော မြို့နယ် ၅ ခုအနက်မှ ၁ ခုအပါအဝင်ဖြစ်သည်။

08/02/2023

စကားများရန်ဖြစ်ရာမှာ သားဖြစ်သူက ဓားနဲ့ထိုးလို့ အဖေဖြစ်သူ သေဆုံး

ပဲခူးတိုင်း၊ တောင်ငူခရိုင်၊ အုတ်တွင်းမြို့နယ်၊ ပေါက်တောကျေးရွာအုပ်စု၊ ပေါက်တောရွာက သားအဖ ၂ ဦးဟာ ရန်ဖြစ်စကားများရာမှ သားဖြစ်သူက ဓားနဲ့ထိုးလိုက်လို့ အဖေဖြစ်သူ သေဆုံးသွားတယ်လို့ သိရပါတယ်။

ဖေဖော်ဝါရီ ၆ ရက်မနေ့ည ၇ နာရီ ၂၀ မိနစ်လောက်မှာ အသက် ၂၄ နှစ်အရွယ် ကိုရန်လင်းစိုးဆိုသူနဲ့ အဖေဖြစ်သူ ဦးဆန်းဝင်းတို့ အ‌ချေတင်စကားများရာမှ သားဖြစ်သူက ဓားနဲ့ထိုးလိုက်လို့ အဖေဖြစ်သူ ပွဲချင်းပြီး သေဆုံးသွားခဲ့တာလို့ ဒေသခံတဦးက ပြောပါတယ်။

"ဦးဆန်းဝင်းက အိမ်ထောင်ကွဲပါ။ သူ့မှာသား ၂ ယောက် သမီး ၁ ယောက် ရှိပါတယ်။ မနေ့က ဦးဆန်းဝင်းကို ဓားနဲ့ ထိုးလိုက်တာက သူ့သား အလတ်ကောင်ပါ" လို့ ဆိုပါတယ်။

ဒီဖြစ်စဥ် ဖြစ်ပွားခဲ့တာနဲ့ပက်သက်ပြီး အသေးစိတ်အခြေအနေတွေကို မသိရှိရသေးပါဘူး။

အခုလက်ရှိမှာတော့ ဦးဆန်းဝင်းကို သဂြိုလ်ဖို့အတွက် ပြင်ဆင်နေပြီး ကိုရန်လင်းစိုးကိုတော့ စစ်ကောင်စီတပ်ဖွဲ့ဝင်တွေက ညတွင်းချင်း ဖမ်းဆီးရမိသွားတယ်လို့ သိရပါတယ်။

07/02/2023

ညောင်ပင်ဝန်းရဲစခန်းအတွင်းမှ ထွက်လာသောရဲများကို တိုက်ခိုက်မှု ရဲ ၅ ဦးသေဆုံး(ရုပ်သံ)

ဖေဖော်ဝါရီ ၇

စစ်ကိုင်းတိုင်း၊ စစ်ကိုင်းမြို့နယ်၊ ညောင်ပင်ဝန်းရဲစခန်းအတွင်းမှ ထွက်လာသော ရဲများကို ပစ်ခတ် တိုက်ခိုက်ခဲ့ရာ ရဲ ၅ ဦးသေဆုံးပြီး ၂ ဦးအပြင်းအထန်ဒဏ်ရာရရှိခဲ့ကြောင်း Moe Nyo Revolution Force – MNRF ထံမှ သိရသည်။

ယနေ့ဖေဖော်ဝါရီလ ၇ ရက်နေ့တွင် ညောင်ပင်ဝန်းရဲစခန်းအတွင်းမှ ခြေလျင်ထွက်လာသော ရဲ ၇ ဦးကို မိုင်းဆွဲတိုက်ခိုက်ပြီးနောက် လက်နက်ကြီး၊ လက်နက်ငယ်များဖြင့် ဝိုင်းဝန်းပစ်ခတ်တိုက်ခိုက်ခဲ့ရာ ၅ ဦး နေရာမှာပင်ပွဲချင်းပြီးသေဆုံးပြီး ၂ ဦးအပြင်းအထန်ဒဏ်ရာရရှိခဲ့ကြောင်း၊ ရဲစခန်းအတွင်းမှ ၄၀ မမ ၄ လုံး၊ ၆၀ မမ ၂ လုံး၊ ၈၀ မမ ၂ လုံးဖြင့် ပြန်လည်ပစ်ခတ်တိုက်ခိုက်ခဲ့ကြောင်း သိရသည်။

အဆိုပါတိုက်ခိုက်မှုကို Moe Nyo Revolution Force- MNRF ၊ Local Defence Force of Dragon နှင့် ဒေါင်းစစ်သည် Sagaing Region People Defence Forceတို့ပူးပေါင်းကာတိုက်ခိုက်ခဲ့ခြင်းဖြစ်ပြီး ပြည်သူ့ကာကွယ်ရေးတပ်ဖွဲ့ဝင်များအထိအခိုက်မရှိပြန်လည် ဆုတ်ခွာနိုင်ခဲ့ကြောင်း သိရသည်။

Thit

07/02/2023

TNLA က ဂျာယန်ပြည်သူ့စစ်စခန်းကို စီးနင်းပြီး အဓမ္မစစ်မှုထမ်းဖို့ စေခိုင်းခံရတဲ့ ကလေးတွေ အပါအဝင် တအာင်း ၁၂၇ ဦးကို ကယ်ထုတ်

ဖေဖော်ဝါရီ ၇

TNLA တပ်ဖွဲ့ အင်အား ၅၀၀ ဟာ ဂျာယန်ပြည်သူ့စစ်စခန်းကို ဝင်ရောက်စီးနင်းပြီး အဓမ္မ စစ်မှုထမ်းဖို့ စေခိုင်းခံရတဲ့ ကလေးတွေ အပါအဝင် တအာင်း-ရူစိင် ၁၂၇ ဦးကို ကယ်ထုတ်ခဲ့တယ်လို့ မနေ့က PSLF/TNLA သတင်းနဲ့ ပြန်ကြားရေးဌာနက ထုတ်ပြန်ပါတယ်။

ဖေဖော်ဝါရီ ၄ ရက်နေ့က တအာင်း အမျိုးသား လွတ်မြောက်ရေး တပ်မတော်-TNLA တပ်မဟာ (၇) မှ အင်အား ၅၀၀ ကျော်ဟာ မြန်မာစစ်တပ် လက်အောက်ခံ ဂျာယန်ပြည်သူ့စစ်စခန်းကို ဝင်ရောက်စီးနင်းပြီး တအာင်း လူမျိုးတွေကို ရွေးထုတ်ကယ်ဆယ်ခဲ့တာလို့ သိရပါတယ်။

လားရှိုးမြို့နယ်၊ မိုင်းယော်တိုက်နယ်၊ ဂျာယန်ကျေးရွာ အနီးတဝိုက်မှာ စခန်းချ လှုပ်ရှားနေတဲ့ ဂျာယန် ပြည်သူ့စစ်ဟာ တအာင်း(ရူစိင်) လူမျိုးတွေကို အတင်းအဓမ္မ သိမ်းသွင်း ခေါ်ဆောင်ထားတဲ့ အတွက် TNLA က ကယ်ထုတ်ခဲ့တာပါ။

မိုင်းယော်တိုက်နယ် အတွင်းမှာ နေထိုင်ကြတဲ့ တအာင်းလူမျိုးတွေဖြစ်တဲ့ ရူစိင်းမျိုးနွယ်စု တွေကို ငွေပေး သိမ်းသွင်းပြီး အတင်းအဓမ္မ ခေါ်ဆောင်ကာ စစ်မှုထမ်းစေခဲ့တာလို့ သိရပါတယ်။

ဂျာယန်ပြည်သူ့စစ်ထဲက တအာင်းလူမျိုး ကျား ၁၁၂ ဦးနဲ့ မ ၁၅ ဦး စုစုပေါင်း ၁၂၇ ဦးကို ကယ်ထုတ်ခဲ့ရာ အသက် မပြည့်သေးတဲ့ ၈ နှစ်ကနေ ၁၇ နှစ်အရွယ် ၂၀ ဦး ပါဝင်ပြီးတော့ အသက် ၁၈ နှစ်ကနေ ၆၅ နှစ်အရွယ်အထိ ၁၀၇ ဦးပါဝင်တယ်လို့ ဆိုပါတယ်။

အခုလို ကယ်ထုတ်ရာမှာ စစ်တပ်က လေကြောင်းနဲ့ အကြိမ် ၃၀ ထက်မနည်း ပစ်ခတ်တိုက်ခိုက်ကာ ဂျာယန် ပြည်သူ့စစ်ကို စစ်ကူပေးခဲ့တယ်လို့ သိရပါတယ်။

လားရှိုးခရိုင်၊ မိုင်းယော်ဒေသရှိ တအာင်းလူမျိုးတွေဟာ ခေတ်အဆက်ဆက်မှ ဒီကနေ့အထိ လွပ်လပ်စွာ ပညာ သင်ကြားခွင့်၊ လွပ်လပ်ဖြောင့်မတ်စွာ အသက်မွေးခွင့် မရရှိကြဘဲ အဓမ္မနည်းမျိုးစုံနဲ့ လက်နက်ကိုင် အဖွဲ့အစည်းပေါင်းစုံရဲ့ ဖိနှိပ်မှုအောက်မှာ အသက်နဲ့ဘဝကို စတေးပေးပြီး စစ်မှုထမ်းနေခဲ့ကြရတယ်လို့ ထုတ်ပြန်ချက်မှာ ဖော်ပြထားပါတယ်။

အလားတူပင် မူဆယ်နဲ့ အခြားနေရာတွေမှာ ရှိနေတဲ့ မြန်မာ့စစ်တပ် လက်အောက်ခံ ပြည်သူ့စစ်အဖွဲ့ပေါင်းစုံ ထဲမှာလည်း တအာင်းလူမျိုးတွေ အများကြီး ရှိနေသေးတယ်လို့ သိရပါတယ်။

06/02/2023

ကလေးမြို့ပေါ်က စစ်အုပ်စု တိုက်ခိုက်ခံရလို့ ၃ ဦးသေ၊၂ ဦး ဒဏ်ရာရဟုဆို

ဖေဖော်ဝါရီ ၆၊ ၂၀၂၃။

ကလေးမြို့၊ စစ်ကောင်စီလက်အောက်ခံ ခရိုင်ဆည်မြောင်းရုံးအနီးမှာ အထိုင်ချတပ်စွဲဖို့လာတဲ့ စစ်ကောင်စီတပ်သားတွေ ဖေဖော်ဝါရီ ၆ ရက် မနက် ၁၁ နာရီမှာ တိုက်ခိုက်ခံရတာကြောင့် ၃ ဦး သေဆုံးပြီး ၂ ဦး ဒဏ်ရာရရှိခဲ့တယ်လို့ သိရပါတယ်။

ကလေးမြို့၊ ဒေသကွပ်ကဲရေးစစ်ဌာနချုပ်က စစ်ကောင်စီ ၅ ဦးမှာ ရှေ့ပြေးလာချိန် သစ်တောရုံးနဲ့ဆည်မြောင်းရုံးကြားအရောက် အသင့်ထောင်ထားတဲ့မိုင်း ၆ လုံးနဲ့ ဖောက်ခွဲတိုက်ခဲ့တာ ဖြစ်တယ်လို့ ကလေးမြို့ မြို့ပြစီမံချက် UG တပ်ရင်း ဦးဆောင်သူ ကိုရန်မင်းနိုင်က ပြောပါတယ်။

"ကျနော်တို့ မျက်စိရှေ့မှာတင် ၃ ယောက်က ပွဲချင်းပြီး သေတယ်။ နောက်ထပ်၂ ယောက်မှာ ဒဏ်ရာတွေ တော်တော်လည်း ပြင်းထန်လို့ ဆေးရုံကို ပို့လိုက်ကြတယ်" လို့ ဆိုပါတယ်။

အဲဒီ စစ်ကောင်စီတပ်သားတွေဟာ ဆည်မြောင်းရုံးအနီးက ဖြတ်သန်းသွားလာတဲ့ ပြည်သူတွေကို စစ်ဆေးမေးမြန်ဖို့အတွက် ဂိတ်အသစ်ချဖို့ ရောက်ရှိလာခဲ့တာ ဖြစ်ပေမယ့် တိုက်ခိုက်ခံရပြီးနောက် ပြန်လည်ဆုတ်သွားခဲ့တယ်လို့ သိရပါတယ်။

ဒါ့အပြင် ဖေဖော်ဝါရီ ၃ ရက်နေ့မှာလည်း စစ်ကောင်စီလက်အောက်ခံ ခရိုင်ဆည်မြောင်ရုံးထဲမှာ မိုင်း ၃ လုံးခွဲခဲ့တဲ့အပြင် ရုံးအပြင်မှာ ရပ်ထားတဲ့ ဘက်ဟိုးတစီးကိုလည်း မီးရှို့ခဲ့တယ်လို့ God of Empire ရဲ့ ပြန်ကြားရေးတာဝန်ခံက မြေလတ်အသံကို ပြောဆိုထားပါတယ်။

ပုံစာ - မိုင်းဆွဲတိုက်ခိုက်ခံခဲ့ရတဲ့ နေရာအနီးဝန်းကျင်ကို တွေ့ရစဉ်။

06/02/2023

လောင်းကစားဝိုင်းမှာ သေနတ်နဲ့ပစ်ခံရလို့ ဗိုလ်တဦးအပါ ၆ ဦး သေဆုံး

စစ်ကိုင်းတိုင်း၊ ဆားတောင်မြို့နယ်၊ ဆားတောင်မြို့ပေါ်(တနေရာမှာ) လောင်းကစားဝိုင်းဖွင့်ထားတဲ့ ၂ပွင့်ဗိုလ်တဦး နဲ့ နောက်လိုက် ၅ ဦး သေနတ်နဲ့ပစ်ခံရလို့ သေဆုံးခဲ့ပါတယ်။

ဖေဖော်ဝါရီလ ၅ ရက် ဒီနေ့ နေ့လယ် ၁၂ နာရီလောက်မှာ မြေအောက်လျှပ်စီးပြောက်ကျား တပ်ဖွဲ့က ပြည်သူတွေတိုင်ကြားချက်ကြောင့် လောင်းကစားဝိုင်းရှိရာနေရာကို သွားရောက်ပစ်ခတ်ခဲ့တာလို့ ဗိုလ်မုန်တိုင်း က မြေလတ်အသံကို ပြောပါတယ်။

"၂ပွင့်ဗိုလ်လို့ ဘာကြောင့်သိရလဲဆိုတော့ ၆လုံးပြူးလည်းကိုင်တယ်။ နောက်ပြီး ကျနော်တို့ကိုသတင်းပေးပို့တဲ့ ပြည်သူက အတိအကျကိုပြောတာပါ။ အဲဒီထဲမှာ ဦးစိန်ထွန်းနဲ့ ဒေါ်သိန်းကြည်က ဒလန်လင်မယားတွေပါ။ သူတို့တွေက ပြည်သူတွေကိုစစ်ကောင်စီနဲ့ ခြိမ်းခြောက်ထားပြီး လောင်းကစားဝိုင်းဖွင့်ထားပါ” လို့ ဆိုပါတယ်။

ကားပေါ်မှာထိုင်နေတဲ့ ဗိုလ်မျိုးထွန်းသိန်း၊ ဦးစိန်ထွန်း၊ ဒေါ်သိန်းကြည်နဲ့အတူ လောင်း ကစားဝိုင်းမှာ လုံခြုံရေးယူပေးနေတဲ့ရဲတပ််ဖွဲ့ဝင် ၄ ဦး စုစုပေါင်း ၆ ဦးပစ်ခံရပြီး သေဆုံးခဲ့တယ်လို့ ဆိုပါတယ်။

“ပြည်သူတွေတိုင်ထားတာကတော့ကြာပြီ၊ အရင်ရက်တွေမှာဆို သူတို့က (စစ်ကောင်စီ) လက်နက်တွေကိုယ်စီနဲ့လာကြတော့ ကျနော်တို့က သွားပစ်လို့မရဘူး၊ လက်နက်အင်အားကမမျှလို့၊ ဒီနေ့တော့ သူတို့တပ်ဖွဲ့ထဲမှာ ဗိုလ်တယောက်ပဲ ခြောက်လုံးပြူးပါတယ်ဆိုလို့ ကျနော်တို့က သွားရောက်ပစ်ခတ်ခဲ့တာပါ” လို့ ပြောပါတယ်။

လောင်းကစားဝိုင်းထဲမှ ငွေကျပ် ၃၄၂၀၀၀ ကိုသိမ်းဆည်းရမိသွားပြီး သိမ်းဆည်းထားတဲ့ ငွေကြေးတွေကိုလည်း တော်လှန်ရေးအတွက် အသုံးပြုသွားမှာဖြစ်ကြောင်း နဲ့ ၂ ပွင့်ဗိုလ် မျိုးထွန်းသိန်း ကနေ ၆လုံးပြူး အတိုတလက်ကို သိမ်းဆည်းရမိခဲ့တယ်လို့ ပြောပါတယ်။

05/02/2023

ကြယ်လေးတစ်ပွင့် ကြွေရပြန်ပြီး 💔😭

RIP သူရဲကောင်းလေးရယ်💔😭

05/02/2023

04/02/2023

စခန်းသိမ်းတိုက်ပွဲမှာ စစ်ကောင်စီဘက်က ၁၅ ဦးသေပြီး လက်နက်ခဲယမ်းတွေရ

ဖေဖော်ဝါရီ ၄၊ ၂၀၂၃။

စစ်ကိုင်းတိုင်း၊ မြင်းမူမြို့နယ်၊ မန္တလေး-မုံရွာလမ်းပေါ်ရှိ ထီးဆောင်းကျေးရွာကို မဟာမိတ်တပ်ပေါင်းစုတွေက ဝင်ရောက်စီးနင်းကာ ၃ နာရီအကြာတိုက်ပြီး စခန်းသိမ်းတိုက်ပွဲဆင်နွှဲနိုင်ပြီး လက်နက်ခဲယမ်း‌တွေ သိမ်းဆည်းရမိခဲ့တယ်လို့ သိရပါတယ်။

ဖေဖော်ဝါရီလ ၄ ရက်နံနက် ၁ နာရီကတည်းက အင်အား ၄၀ ခန့်ရှိတဲ့ အဲဒီစခန်းကို ဝင်ရောက်တိုက်ခိုက်နေတာဖြစ်ပြီး နံနက် ၃ နာရီမှာတော့ စခန်းကိုဖျက်သိမ်းနိုင်ခဲ့တယ်လို့ ဆိုပါတယ်။

"၄ ခရိုင် ၄ ရင်း စခန်းသိမ်းတိုက်ပွဲဆိုပြီးအမည်ပေးထားပါတယ်၊ ထီးဆောင်းမှာရှိတဲ့စခန်းကို ည ၁ နာရီကနေစတင်ပြီးတော့ ဝင်ရောက်တိုက်ခိုက်ပါတယ်၊ စခန်းအပြီးအပိုင်ဖျက်သိမ်းပြီးတော့ မနက် ၃ နာရီမှာဖြစ်ပါတယ်၊ ရန်သူဘက်က ၁၅ ယောက်လောက်ကျဆုံးပြီးတော့ ဒဏ်ရာရရှိသူအများအပြားရှိပါတယ်" လို့ တပ်ရင်းမှူး ဗိုလ်သက်ကြီးကပြောပါတယ်။

ကာဘိုင် ၁ လက် ကျည်ဘောက် ၃ ခု ကာဘိုင်ကျည် ၁၀၄ တောင့် MA3 ၁ လက် ကျည်ဘောက် ၁ ခု 5.56 ကျည် ၁၈ တောင့် ၉ လုံးကျည် ၇၆ တောင့် Drone ဖျက်တဲ့ Jummar စက် ၂ လုံး ကျည်ကာအင်္ကျီ ၁ စုံ ဖိနပ်တွေနဲ့အခြားစစ်သုံးပစ္စည်းတွေ သိမ်းဆည်းရမိခဲ့တယ်လို့ သိရပါတယ်။

"လက်နက်ကောက်ဖို့နဲ့စစ်ကောင်စီတပ်သားတွေကို လိုက်ပစ်ဖို့ရာ မနက် ၃ နာရီထိုးမှာဂျက်ဖိုက်တာရောက်လာပါတယ်၊ ၃ ကြောင်းပြန်ဝဲပြီး ပတ်ဝဲပြီးကင်းထောက်နေတာကြောင့် နောက်ဆုတ်ခဲ့ရတယ်" လို့ ဆက်ပြောပါတယ်။

တပ်ရင်း ၄ ရင်းက ရဲဘော် ၂ ဦး ဒဏ်ရာရရှိခဲ့ပြီး စစ်အုပ်စုရဲ့ လက်နက်ကြီးနဲ့ရမ်းသမ်းပစ်ခတ်မှုကြောင့် အရပ်သား ‌၁ ဦးသေဆုံးခဲ့တယ်လို့ သိရပါတယ်။

အဲဒီတိုက်ခိုက်မှုကို တပ်ရင်း(၇)မြင်းခြံခရိုင်၊ ZERO ပြောက်ကျားတပ်ဖွဲ့တပ်ရင်း(၁၉)ရွှေဘိုခရိုင်တပ်ရင်း(၂)စစ်ကိုင်းခရိုင်၊ တပ်ခွဲ(၂)၊ GTR(မြင်းမူ) နဲ့ တပ်ရင်း(၁)ကျောက်ဆည်ခရိုင်၊နဂါးနီ(ကျောက်ဆည်) တို့က ပူးပေါင်းလုပ်‌ဆောင်ခဲ့တာလို့ သိရပါတယ်။

04/02/2023

သုဝဏ္ဏတံတားအဆင်းမှာ အိမ်စီးကားမောင်းလာသူ ဓားထိုးလုယက်ခံရ

ဖေဖော်ဝါရီ ၄

ရန်ကုန်တိုင်း၊ သင်္ဃန်းကျွန်းမြို့နယ် သုဝဏ္ဏတံတား အဆင်းမှာ ဒီကနေ့ နေ့လယ်ပိုင်းက အိမ်စီးကား မောင်းနှင်လာတဲ့ အမျိုးသားကို ဓားထိုး လုယက်မှု ဖြစ်ပွားခဲ့တယ်လို့ ဒေသခံတွေက မဲခေါင်သတင်းကို ပြောပါတယ်။

ဒီကနေ့ ဖေဖော်ဝါရီ ၄ ရက် နေ့လယ် ၁၂ နာရီကျော်က ရွှေအင်ကြင်း အိမ်ယာအနီး ဓားထိုးလုယက် ခံခဲ့ရတာဖြစ်ပြီး ဓားထိုးခံရသူ အမျိုးသားကို စံပြဆေးရုံသို့ တင်ပို့ပေးထားတယ်လို့ မျက်မြင်တွေ့သူ တစ်ဦးက ပြောပါတယ်။

"အဲ့နားမှာ ရောင်းနေတဲ့ ဈေးသည်တွေက အငှားယာဉ်ခေါ်ပြီး ဆေးရုံ ပို့လိုက်တယ်။ လုတဲ့သူတွေက ကားသော့ပါချိုးပြီး ပြေးသွားကြတာ။ ဘယ်လိုက စဖြစ်တာလဲတော့ သေချာမမြင်လိုက်ဘူး။ ကားကိုတော့ သက်ဆိုင်ရာအဖွဲ့ ကရိန်းနဲ့ လာဆွဲသွားပြီ" လို့ သူကပြောပါတယ်။

ဓားထိုး လုယက်ခံရတဲ့ ကားပိုင်ရှင်ရဲ့ မိသားစုဝင်တွေ အနေနဲ့ စံပြဆေးရုံသို့ သွားရောက် ဆက်သွယ်ပေးကြပါလို့ ကူညီရေးမှာ ပါဝင်သူ တစ်ဦးက မဲခေါင်သတင်းကို ပြောပါတယ်။

03/02/2023

စစ်အုပ်ချုပ်ရေး ကြေညာထားသော ခင်ဦးမြို့ပေါ်ကို PDF တပ်များက ဝင်ရောက် ပစ်ခတ်မှု စစ်သား ၁ ဦး သေဆုံးပြီး သေနတ် ၁ လက် သိမ်းဆည်းရမိ

ဖေဖော်ဝါရီ ၃

စစ်ကိုင်းတိုင်း၊ ခင်ဦးမြို့နယ်တွင် စစ်ကောင်စီက စစ်အုပ်ချုပ်ရေး ကြေညာပြီးနောက် PDF တပ်များက ခင်ဦးမြို့ပေါ်သို့ ဝင်ရောက်ပစ်ခတ်ရာ စစ်ကောင်စီ တပ်သား ၁ ဦး ပစ်ခတ်ခံရပြီး သေနတ် ၁ လက် သိမ်းဆည်းရမိခဲ့ကြောင်း ပြည်သူ့ ကာကွယ်ရေး တပ်ဖွဲ့ဝင်များက ရန်ကုန်ခေတ်သစ် မီဒီယာသို့ ပြောဆိုသည်။

ဖေဖော်ဝါရီလ ၃ ရက်နေ့ နံနက် ၁၀ နာရီ ခန့်တွင် ခင်ဦးမြို့ပေါ် စစ်တပ် စခန်းအနီးတွင် ဆိုင်ကယ်စီး၍ သွားလာသော စစ်သား ၁ ဦးကို မြို့လယ် လမ်းမတော် လမ်းမကြီးပေါ်တွင် ဒေသခံ ကာကွယ်ရေး တပ်ဖွဲ့များက ပစ်ခတ် တိုက် ခိုက်ခဲ့ရာ ပွဲချင်းပြီးသေဆုံးခဲ့ကြောင်း သိရသည်။

အဆိုပါ သေဆုံးသွားသော စစ်ကောင်စီ တပ်သားထံမှ စကရ-၁၇၄၄ G3 လက် နက် ၁ လက်၊ ကျည်ဘောက် ၁ ဘောက်နှင့် ကျည် ၉ တောင့်ကို ကာကွယ်ရေးအဖွဲ့များက သိမ်းဆည်းခဲ့ကြောင်း၊ သိမ်းဆည်းရမိ ပစ္စည်းများကို ရွှေဘိုခရိုင် အမှတ် ၂ ကွပ်ကဲရုံးသို့ အပ်နှံခဲ့ကြောင်း သိရှိရသည်။

ယင်း တိုက်ခိုက်မှုကို ခင်ဦးမြို့နယ် မြို့နယ် ပကဖ နှင့် ဖီးနစ် မြို့ပြ ပျောက်ကြား (UG)အဖွဲ့တို့မှ ပူးပေါင်း လုပ်ဆောင်ခဲ့ကြောင်း သိရသည်။

03/02/2023

အကြမ်းဖက် မြန်မာစစ်တပ်ကို ICC တရားရုံးပို့ဆောင်ရေးနှင့် ICJ တွင် တရားစွဲဆိုထားမှုတွင် ဦးဆောင်ပါဝင်ရန် ဥရောပသမဂ္ဂနှင့် ဥရောပနိုင်ငံများ သို့ အဖွဲ့ ၆၁ ခုက တောင်းဆို

ဖေဖော်ဝါရီ ၃

စစ်ရာဇဝတ်မှုနှင့် လူမျိုးတုန်းသတ်ဖြတ်နေသော မြန်မာစစ်တပ်ကို ICC တရား ရုံးပို့ဆောင်ရေးနှင့် ICJ တရားရုံး တွင် တရားစွဲဆိုထားမှုတွင် ဦးဆောင်ပါဝင်ရန် ဥရောပသမဂ္ဂနှင့် ဥရောပနိုင်ငံများသို့ အဖွဲ့ ၆၁ ခုက စာပေးပို့ တောင်းဆို လိုက်ကြောင်း သိရှိရသည်။

ဥရောပရောက် အဝေးရောက် မြန်မာနိုင်ငံများသား ဦးဆောင်သော အဖွဲ့အစည်း ၆၁ ခုက ဖေဖော်ဝါရီလ ၁ ရက်နေ့တွင် ဥရောပသမဂ္ဂနှင့် ဥရောပနိုင်ငံများသို့ အိတ်ဖွင့်ပေးစာတစ်စောင် ပေးပို့လိုက်ပြီး ကမ္ဘာပေါ်တွင် အဆိုးရွားဆုံး မြန်မာစစ်အာဏာရှင်ကြောင့် ဖြစ်ပျက်နေရသော လူ့အခွင့်အရေးပြဿနာများနှင့် လူသားချင်းစာနာမှု လိုအပ်သောဒုက္ခအဝဝတို့ကို ဝိုင်းဝန်းကူညီတုံ့ပြန်ကြပါရန် နှင့် မြန်မာစစ်တပ်ကို ချက်ချင်း အရေးယူဆောင်ရွက်ရန် ဥရောပသမဂ္ဂနှင့် ဥရော ပနိုင်ငံကြီးများသို့ တောင်းဆိုလိုက်ကြသည်။

အဖွဲ့ ၆၁ ခုက တောင်းဆိုစာကို ဥရောပသမဂ္ဂ၏ ခေါင်းဆောင် ၄ ဦးဖြစ်သည့် Mr. Charles Michel၊ Dr. Ursula Von der Leyen၊ Mr. Josep Borrell Fontelles၊ Ms. Roberta Metsola တို့ကို လိပ်မူ ပေးပို့ပြီး သက်ဆိုင်ရာ ဥရောပ နိုင်ငံများသို့လည်း ပေးပို့ခဲ့ကြသည်။

မြန်မာနိုင်ငံတွင် လက်ရှိနာကျင်ခံစားနေရသော ဒုက္ခအပေါင်းကိုလည်းကောင်း၊ ပြည်သူများ၏ အလားတူ ရဲရင့်ပြောင်မြောက်လှသော တော်လှန်ရေးကိုလည်း ဥရောပသမဂ္ဂနှင့် အဖွဲ့ဝင်နိုင်ငံများအနေနှင့် ရှင်းလင်းပြတ်သားသည့် ရပ်တည်ချက်တစ်ခု ချက်မှတ်ပြီး တုံ့ပြန်မှုကို မဆိုင်းမတွဆောင်ရွက်ကြပါရန်နှင့် မြန်မာနိုင်ငံ၏ ပြဿနာကို ဖြေရှင်းရာတွင် ပိုမို တက်ကြွစွာပါဝင်ကြပါရန် တိုက်တွန်းသည်။

ဥရောပသမဂ္ဂနှင့် အဖွဲ့ဝင်နိုင်ငံများအနေဖြင့် မြန်မာ့အရေး ဆောင်ရွက်ရာတွင် အောက်ပါအတိုင်း အကြံပြုကြောင်း အဖွဲ့ ၆၁ ခုက ပေးပို့ တိုက်တွန်းထားသည်။

- NUG, CRPH, NUCC, လူမျိုးစုပြည်နယ်များမှ အတိုင်ပင်ခံကောင်စီများ၊ EROs အသီးသီး၏ နိုင်ငံရေးကိုယ်စားလှယ် အခြားအစုအဖွဲ့နှင့် တိုက်ရိုက်ဆက်ဆံပြီး လက်တွဲဆောင်ရွက်စေလိုပါသည်။ ၎င်းတို့၏ စွမ်းဆောင်ရည်မြှင့်တင်မှုအစီအစဉ်များတွင် ပံ့ပိုးကူညီပေးစေလိုပါသည်။ ဖယ်ဒရယ်ဒီမိုကရက်တစ်ချာတာကို ထောက်ခံကြသော ထိုကျယ်ပြန့်သည့် မဟာမိတ်အစုအဖွဲ့များကို ထောက်ပံ့ပေးခြင်းကသာ မြန်မာပြည်၏လက်ရှိပဋိပက္ခကို အဆုံးသတ်စေနိုင်ပြီး ဆယ်စုနှစ်ပေါင်းများစွာ ကြာမြင့်ခဲ့သော ပြည်တွင်းစစ်မီးငြိမ်းနိုင်မည်ဖြစ်သည်။ ထိုအချက်ကသာလျှင် EU ၏ မူဝါဒရေးရာ မျှော်မှန်းချက်လည်းဖြစ်သင့်သည်။

-မကြာသေးမီအထိ NUG ကိုယ်စားလှယ်များနှင့် လူသိရှင်ကြား တွေ့ဆုံဆွေးနွေးခဲ့ကြသော ဥရောပသမဂ္ဂနှင့်အဖွဲ့ဝင်နိုင်ငံများကို များစွာကြိုဆိုပါသည်။ သို့ရာတွင် မြန်မာစစ်တပ်ကို ယခုထက်ပိုမိုပြင်းထန်သောသတင်းစကားမျိုးပေးပို့ရန်၊ မြန်မာပြည်သူတို့နှင့် အတူရှိကြောင်း ပို၍ ထိရောက်စွာအသိပေးနိုင်ရန်အတွက် ယခုအချိန်တွင် ထိုကဲ့သို့သော အစည်းအဝေးများ၌ဝန်ကြီးချုပ်နှင့် သမ္မတအဆင့်များအထိ ပါဝင်လာရန်လိုအပ်ပါသည်။

- NUG နှင့် EROs များ၏ ပြည်သူ့ဝန်ဆောင်မှုလုပ်ငန်းများကို ငွေကြေးထောက်ပံ့ပေးရန်- စစ်တပ်က တမင်တကာ ဖျက်ပစ်ပစ်နေသော ပြည်သူများကို မပေးဘဲ တမင်နေသော ကျန်းမာရေး၊ပညာရေး၊ တရားရေးနှင့် အခြား ပြည်သူ့ဝန်ဆောင်မှုလုပ်ငန်းများကို ဤအဖွဲ့အစည်းများအနေနှင့် တစိုက်မတ်မတ်ဆောင်ရွက်နေကြောင်း တွေ့ရှိခဲ့ရပြီးဖြစ်ပေသည်။ EU မှ ထိထိရောက်ရောက်ရံပုံငွေ ပေးအပ်နိုင်ပါလျှင် ထို အရေးပေါ်လိုအပ်နေသော ပြည်သူ့ရေးရာ လုပ်ငန်းများ ပိုပြီး ခိုင်မာစွာ လည်ပတ်လာနိုင်မည်ဖြစ်ပြီး လျှင်လျှင်မြန်မြန်ပင် နိုင်ငံတစ်ခု ပြိုလဲပျက်စီးလာနေသည့်အဖြစ်မှ ကာကွယ်နိုင်ပေလိမ့်မည်။

- ပြည်သူတို့၏ အာဏာဖီဆန်ရေးလှုပ်ရှားမှု Civil Disobedience Movement (CDM)ကို ငွေကြေးထောက်ပံ့ရန် တိုက်တွန်းလိုပါသည်။ CDM များကို ကူညီခြင်းအားဖြင့် မရှိမဖြစ် အခြေခံပြည်သူ့ရေးရာ ဝန်ဆောင်မှုလုပ်ငန်းများကို ပြန်လည် ထူထောင်လာနိုင်ရန် ကူညီနိုင်ပေသည်။ ကူညီလည်းကူညီသင့်ပေသည်။ စစ်အုပ်ချုပ်ရေးပိုင်းသည် ပြည်သူရေးရာဝန်ဆောင်မှုများပြန်လည်ထူထောင်ရာတွင် လိုအပ်နေသော လုပ်ငန်း ကျွမ်းကျင်သူများဖြစ်ကြသည့် CDM များကို အိမ်တိုင်ရာရောက်လိုက်လံရှာဖွေခြင်း၊ ဖမ်းဆီးခြင်း၊ ကိုယ်ထိလက်ရောက် ထိပါးခြင်း၊ နှိပ်စက်ခြင်း၊ ထောင်ချခြင်းနှင့် သတ်ဖြတ်ခြင်းများပင်ရှိနေပါသည်။

-မြန်မာနိုင်ငံလူ့အခွင့်အရေးကိစ္စများဆိုင်ရာ ကုလသမဂ္ဂ အထူးကိုယ်စားလှယ် သောမတ်စ် အန်ဒရူးက အကြံပြုထားသည့်အတိုင်း မြန်မာ့လူ့အခွင့်အရေးကိစ္စများကို အားပေးကူညီနိုင်ရန် အဖွဲ့ဝင်နိုင်ငံများအားလုံးကို အစည်းအဝေး ခေါ်ယူဆွေးနွေးပါရန်။ ထိုသို့ဆွေးနွေးရာတွင် ပြည်သူအပေါ် ကြမ်းချင်သလောက်ကြမ်းပြီး ဒီမိုကရေစီလိုလားသော ပြည်သူများကို ဖိနှိပ်အကြမ်းဖက်လိုသည့် စစ်တပ်ဘက်တွင် လက်နက်များ၊ ငွေများ၊ တရားဝင်မှုများမရရှိရလေအောင် ပို၍ တိကျပြတ်သားပြီး၊ အချိတ်အဆက်မိသော၊ မဟာဗျူဟာကျသော လုပ်ငန်းများကိုဆောင်ရွက်ကြပါရန်တောင်းဆိုအပ်ပါသည်။

- နယ်စပ်မှ ဖြတ်ကျော်ပြီးပေးပို့ခြင်းနှင့် ဒေသခံအကူအညီ‌ပေးရေးအဖွဲ့များနှင့် ရပ်ရွာအခြေပြုအဖွဲ့အစည်းများမှတဆင့် လူသားချင်းစာနာမှုအကူအညီပေးအပ်နိုင်ရေး အထောက်အပံ့ပေးရန်- တင်းကြပ်သော ဗြူရိုကရေစီယန္တရားကို ဖြတ်စရာမလိုသည့်အပြင် ဒေသခံအရပ်ဘက်လူ့အဖွဲ့အစည်းအပေါ်ကျစေသည့် ဝန်ထုတ်ဝန်ပိုးများကို ဖယ်ရှားပေးခြင်းအားဖြင့် လူသားချင်းစာနာမှု အကူအညီများကို ထောက်ပံ့ပေးအပ်ပါရန်။
-UNOPSနှင့် INGO များက စီမံခန့်ခွဲနေသော ယခု လက်ရှိ အလှူရှင်စုပေါင်း ရံပုံငွေ စနစ်ကြီးကို အလွန်အကျွံ မှီခိုနေရခြင်းက ထင်သလောက် ခရီးမတွင်ခြင်းများရှိပါသည်။ ထိုသို့ ဖြစ်ရခြင်းကြောင့် အကူအညီကို အလျင်စလို လိုအပ်နေကြသည့် အားနည်းထိခိုက်လွယ်သော လူ့အဖွဲ့အစည်းနှင့် ရပ်ရွာအစုအဝေးများထံသို့ အကူအညီများ မရောက်နိုင်ခြင်းများရှိခဲ့ပါသည်။ အကူအညီအတိုင်းအတာကို ကြီးကြီးမားမား တိုးမြှင့်ပေးရန်လိုအပ်နေသကဲ့သို့ မှတ်ပုံတင်မရှိသော အရပ်ဘက်လူ့အဖွဲ့အစည်းများနှင့် နယ်စပ်ဖြတ်ကျော်အကူအညီပေးရေး အစီအစဉ်များကတဆင့် EU သည် တိုင်းပြည်အတွင်း အကူအညီလိုအပ်နေသော သန်း‌ပေါင်းများစွာထံသို့ ထောက်ပံ့မှုများ အရောက်ပို့နိုင်ပါသည်။

- စစ်အုပ်ချုပ်ရေး၏ တရားဝင်မှုကို ငြင်းပယ်ရန်- ဥရောပသမဂ္ဂနှင့် အဖွဲ့ဝင်နိုင်ငံများ၏ ငွေကြေးထောက်ပံ့မှုဖြင့် ကျင်းပသော အခမ်းအနားများသို့ တရားဝင်မဟုတ်သောနည်းလမ်းများဖြင့် အာဏာကိုယူထားသော အာဏာပိုင်တို့၏ မည်သည့်ကိုယ်စားလှယ်ကိုမဆို ဖိတ်ကြားခြင်းမပြုဘဲ ငြင်းပယ်ကြပါရန် (ဥပ‌မာ- ဂျာမန်ဖယ်ဒရယ်နိုင်ငံခြားရေးရုံး၏‌ ငွေဖြင့် ကျင်းပသော နိုင်ငံတကာ ငြိမ်းချမ်းရေးနှင့် တရားဥပဒေစိုးမိုးရေးစီမံကိန်းသို့ ပါဝင်ခွင့်မပေးဘဲ ငြင်းပယ်ခြင်း)

- စစ်တပ်၏ ရွေးကောက်ပွဲအလိမ်အညာကို ဥရောပက ငြင်းဆန်ကြောင်း ရှင်းလင်းပြတ်သားစွာ ကြားသိစေရန်- အခြားမိတ်ဖက်များကိုလည်း ထိုသို့ မုသားရွေးကောက်ပွဲကို လက်လည်းမခံ၊ ဖြစ်သင့်ကြောင်းလည်း မထောက်ခံကြောင်း သတင်းစကားပါးသင့်ပါသည်။ အထူးသဖြင့် အာဆီယံ။ ရွေးကောက်ပွဲကျင်းပခြင်းသည်လည်း ရွေးကောက်ပွဲအင်္ဂါများနှင့်အညီလွတ်လပ်ပြီးတရားမျှတသော ထုံးစံများနှင့်အညီကျင်းပနိုင်မည်မဟုတ်ပေ။

-စစ်အာဏာပိုင်များကို ဆန့်ကျင်သော နိုင်ငံရေးပါတီများမှ ကိုယ်စားလှယ်များသည် ဖမ်းဆီး ထောင်ချပြီး နှိပ်စက်ခံနေရသလို ပြည်ပသို့ တိမ်းရှောင်နေကြရသူများ အသတ်ခံခဲ့ကြရသူများလည်းရှိသည်။ တစ်ချိန်တည်းတွင် ရွေးကောက်ပွဲကိုတစ်နည်းနည်းနှင့် ထောက်ခံခြင်းသည် ‘ဘေးရန်ကင်းကွာစေရေး ‘do no harm’ မူများကိုလည်း ချိုးဖောက်ရာကျပါသည်။ ရွေးကောက်ပွဲတွင် မဲပေးသူစာရင်းကိုကောက်ယူခြင်းအား ဆန့်ကျင်နေကြသည့်အလျောက် လက်နက်ကိုင်လှုပ်ရှားမှုတိုက်ပွဲများပို၍ အရှိန်ပို မြင့်တက်လာသည်ကိုတွေ့မြင်နေကြရသည်။

-ကုလလုံခြုံရေးကောင်စီက မြန်မာနိုင်ငံကို အပြည်ပြည်ဆိုင်ရာ ရာဇဝတ်မှုတရားရုံး (ICC) သို့ လွှဲပြောင်းပေးရန် သို့မဟုတ် မြန်မာနိုင်ငံအတွက် ခုံရုံးတစ်ခုသီးသန့် ဖွင့်လှစ်နိုင်ရန် ကြိုးစားလျှက်ရှိရာ ထိုကိစ္စအတွက် အထောက်အကူများပေးရန်။

- The Rome Statute ရောမသဘောတူစာချုပ်၏ ပုဒ်မ ၁၂(၃) အရ မြန်မာနိုင်ငံ နယ်နိမိတ်အတွင်း ကျူးလွန်ခဲ့သည့် စစ်တပ်၏ နိုင်ငံတကာ မှုခင်းများနှင့် စပ်လျဉ်း၍ အပြည်ပြည်ဆိုင်ရာ ရာဇဝတ်မှုတရားရုံး (ICC) ထံ NUG က စွဲဆိုချက်များတင်သွင်းလာလျှင် လက်ခံပေးပါမည့်အကြောင်း ICC ကို EU ကတိုက်တွန်းပေးရန်။

- အပြည်ပြည်ဆိုင်ရာ တရားရုံး (ICJ) တွင် မြန်မာကို ဂမ်ဘီယာက တရားစွဲထားသော အမှုကို ဆက်လက် ထောက်ခံပေးပြီး ရိုဟင်ဂျာများအပေါ် ကျူးလွန်ခဲ့သော လူမျိုးတုံးသတ်ဖြတ်မှုများအတွက် အပြည့်အဝတာဝန်ယူမှုရှိစေရေးအတွက် ဆက်လက်အကောင်အထည်ဖော်ခြင်းကို အားပေးရန်။

- EU နှင့်အဖွဲ့ဝင်နိုင်ငံများသည် မြန်မာနိုင်ငံစစ်တပ်က လေယာဉ်ဆီမရရှိနိုင်ရေးအတွက် ပိတ်ဆို့မှုများရနိုင်သလောက် ဆောင်ရွက်ပေးရန်။ အရပ်သားပြည်သူများအပေါ် ဂျက်လေယာဉ်များ၊ရဟတ်ယာဉ်များဖြင့် လေကြောင်းမှ ထင်သလို ဖြစ်ခတ်နေခြင်းကြောင့် သေဆုံးမှုများထောင်ချီဖြစ်ပေါ်ခဲ့ရသလို လူပေါင်းများစွာမှာ အိုးအိမ်ဆုံးရှုံးခဲ့ရပါသည့်အပြင် လူ့အခွင့်အရေးနှင့် လူသားချင်းစာနာမှုဆိုင်ရာလူမှုဒုက္ခကြီးမားစွာဖြစ်ပေါ်စေပါသည်။

- တည်ဆဲချမှတ်ထားသော ပိတ်ဆို့အရေးယူမှုများကို အကောင်အထည်ဖော်ရန်နှင့် စောင့်ကြည့်မှုများကိုတိုးမြှင့်ဆောင်ရွက်ရန်- မြန်မာစစ်တပ်က လက်နက်နှင့် ဝင်ငွေအရင်းအမြစ်များကို ပုံမှန်ထပ်မံပိတ်ဆို့ပေးသည့် လက်ရှိမူဝါဒကို ဆက်လက်ဆောင်ရွက်ရန်နှင့် အရှိန် တိုးမြှင့်အကောင် အထည်ဖော်ပေးပါရန်တိုက်တွန်းအပ်ပါသည်။ ပိတ်ဆို့ဒဏ်ခတ်မှု အသစ်များကို ချမှတ်ရာတွင် အမေရိကန်နှင့် ယူကေက မိတ်ဖက်များနှင့် အတူပူးပေါင်းကာ သတ်မှတ်ဆောင်ရွက်သင့်ပါသည်။ ထို့အတူ သြစတြေးလျား၊ တောင်ကိုရီးယား၊ စင်ကာပူနှင့် ဂျပန်တို့ကိုပါ ဥရောပသမဂ္ဂ၏ ပိတ်ဆို့ဒဏ်ခတ်မှုအသစ်များတွင်ပါဝင်ပေးကြပါရန် နားချသင့်ပါသည်။

-မြန်မနိုင်ငံသို့လက်နက်များရောင်းချနေကြသော ရုရှား၊ တရုတ်၊ အိန္ဒိယနှင့် ပါကစ္စတန် ကုမ္ပဏီများကို ပိတ်ဆို့ဒဏ်ခတ်ပေးပါရန် နှင့် အိန္ဒိယနှင့် ပါကစ္စတန်တို့နှင့်အတူ အဆင့်မြင့်အစည်းအဝေးများကျင်းပပြီး မြန်မာစစ်တပ်ကို လက်နက်ရောင်းချခြင်း ရပ်တန့်ပေးသင့်ကြောင်း တိုက်တွန်းပေးရန်အတွက် တောင်းဆိုသည်။

- စစ်တပ်၏ ဖိနှိပ်ခြင်းကိုခံရသော ဒီမိုကရေစီအရေးလှုပ်ရှားသူများ၊ ဂျာနယ်လစ်များနှင့် အရပ်ဘက်လူ့အဖွဲ့အစည်းများမှာလူပုဂ္ဂိုလ်များအား ထောက်ကူပေးသည့်အစီအစဉ်များကို စတင်သင့်ကြောင်း တိုက်တွန်းလိုပါသည်။ ၎င်းတို့ထဲတွင် အိမ်နီးချင်းနိုင်ငံများတွင် မလုံမခြုံနေထိုင်နေကြရသူများလည်း ပါဝင်ပါသည်။ ထိုသူတို့အား ကူညီပေးသည့်အစီအစဉ်များတွင် ၎င်းတို့ ဗီဇာလျှောက်ထားရာတွင် လိုအပ်ချက်များကို ရှင်းလင်းလွယ်ကူအောင်ဖြေလျှော့ပေးခြင်း၊ ပြန်လည်နေရာချထားပေးခြင်းနှင့် လူသားချင်းစာနာမှုအကူအညီများပေးရာတွင်လည်း လိုရာရည်မှန်းချက်ကို အသေအချာရောက်ရှိပြီး လိုအပ်နေသူများထံ ကွက်တိရောက်နိုင်စေရန် ချိတ်ဆက်ဆောင်ရွက်မှုများရှိသည့်အပြင် လုပ်ငန်းရပ်များကိုလည်း လှေနံဓားထစ်မဟုတ်ဘဲ ပြုလွယ်ပြင်လွယ် သဘောဆောင်စေသင့်ပါသည်။

- ဥရောပသမဂ္ဂနှင့်အဖွဲ့ဝင်နိုင်ငံများသည် ဥရောပနိုင်ငံများတွင် နေထိုင်နေကြသော မြန်မာနိုင်ငံကူးလက်မှတ်ကိုင်ဆောင်သူများ အထူးသဖြင့် ပညာသင်ယူနေကြသူများအတွက် လိုအပ်လာလျှင် အကူအညီပေးနိုင်ပါရန် ညှိနှိုင်းသဘောတူထားသော မူဝါဒတစ်ခုကို မဆိုင်းမတွ အကောင်အထည်ဖော်စေလိုပါသည်။ စစ်အုပ်ချုပ်ရေးလက်အောက် မြန်မာသံရုံးများသည် နိုင်ငံကူးလက်မှတ်သက်တမ်းနှစ်နှစ်မျှသာရှိသာ ကိုင်ဆောင်ခွင့်ပြုထားသော ပြည်ပရောက် မြန်မာနိုင်ငံသားများကို စာအုပ်အသစ်လဲလှယ်ခွင့်မပေးတော့ဘဲ ငြင်းပယ်နိုင်သည့် အရိပ်အယောင်များကို ရှင်းရှင်းလင်းလင်းပြသနေပါသည်။ ထိုသို့ပြုလုပ်လာလျှင် မြန်မာနိုင်ငံသားများသည်တိုင်းပြည်သို့ ပြန်ရာတွင် အန္တရာယ်နှင့်ကြုံတွေ့နိုင်သလို အလိုမတူဘဲ အတင်းအကျပ်ပြန်ခိုင်းသကဲ့သို့ ဖြစ်လာနိုင်ပါသည်။

- ဥရောပတလွှားတွင်ရှိနေသော မြန်မာနိုင်ငံသားအဖွဲ့အစည်းများ၊ မြန်မာ့အရေး သွေးစည်းလှုပ်ရှား နေကြသော ဥရောပအဖွဲ့အစည်းများနှင့် ဆက်သွယ်တိုင်ပင်နိုင်သော ဆက်သွယ်ရေး လမ်းကြောင်းတစ်ခုကို ဖွင့်လှစ်သင့်ရန် တို့ဖြစ်သည်။

ဓာတ်ပုံ- ဥရောပသမဂ္ဂ၏ ခေါင်းဆောင် ၄ ဦးဖြစ်သည့် Mr. Charles Michel၊ Dr. Ursula Von der Leyen၊ Mr. Josep Borrell Fontelles၊ Ms. Roberta Metsola ။