09/07/2022
Bravo medam
Patrice Dumont.-Listwa ap sonje se foutbòl feminen ayisyen ki fini ak envensiblite Meksik anfas Ayiti: 0-3, penalite Roselord Borgella, penalite Nérilia Mondésir, koufran Sherly Jeudy. Li enpòtan pou nou souliye, anplis skò opliryèl la, 2 sikonstans majè viktwa sa a:
1- se Monnterey, o Meksik menm, vil ki nan plèn, kontrèman a kapital Meksiko ki an altitid, evènman sa a pase, 7 jiyè 2022.
2- se pa yon match amikal oubyen nan yon tounwa anivèsè, oubyen ankò ekip jèn, se gwo seleksyon Meksik, nan kad eliminatwa Koupdimond.
Mèsi, konpliman federasyon, antrenè, tout jwèz yo.
Petèt li ka enteresan pou nou sonje 2-3 match nou te jwe deja ak Meksik. Atansyon, se memwa m, m ap itilize, mwen pa gen tan pou m al nan achiv. Sa ki fè mwen ka bliye youn ou 2 match, epi m ap sonje ane, men mwen pa ka sonje jou.
1953, Meksiko, eliminatwa Koupdimond 1954: 8-0;
Pòtoprens, menm ane 1953 a, 5 mwa aprè, 0-4.
Se Paul Baron, yon fransè ki te antrene Racing Club de Paris, ki te antrenè seleksyon an depi janvye 1953. Seleksyon sa a te genyen ladann Abel Léger kòm gadyen, André "Dessalines" Dieudonné, Jojo Beaulieu, Dadadou, Tassy, Gérald Haig...
1965, vil Guatemala: 0-3. Chanpyona Konkakaf. Seleksyon sa a te gen ladann Michel Blain, Wilfrid Soray, Claude Nemorin, Guy Saint Vil, André Pelao Auguste...
1967, Tegucigalpa, Honduras: 0-1, Chanpyona Konkakaf.
Seleksyon sa a te gen ladann Raphaël Manoyrine, Philippe Vorbe, Formose Gilles, Edner Breton, Joseph Obas...
1971, Pòtòfspenn, Trinidad, chanpyona Konkakaf ki tou konte pou eliminatwa Je Olenpik Minik 1972 : 0-0.
Tassy antrenè; seleksyon sa a te gen ladann Wilner Piquant kòm gòlkipè, Mario Léandre, Jean-Claude "Tom Pouce" Désir, Serge Ducoste, Manno Sanon, Raynald Dévilmé, Pierre Bayonne, Philippe Vorbe...
Bayonne ak Sanon fini meyè bitè, yo chak 3 gòl; komisyon teknik konpetisyon an deziye Vorbe meyè jwè.
1973, Pòtoprens: 0-1, Enrique Borja, yon kout tèt, ki te fè gòl la. Se te Chanpyona Konkakaf ki te konte pou eliminatwa Koupdimond 1974. Se prèske menm jwè 1971 yo. Manno Sanon fini 2zyèm meyè bitè gras ak 5 gòl pou 5 match, anmenmtan meyè jwè. Premye bitè a se te Trinidadyen Steve David ki te fè 6 gòl.
1977, Meksiko, 4-0, chanpyona Konkakaf ki tou eliminatwa Koupdimond 1974. Anplis de plizyè nèg 74 yo, te genyen Louisdor Labissière, Gérald Romulus, Guy Dorsaivil, Daniel Cadet, Leinz Domingue, Frantzy Mathieu... se Joseph Piontek, yon Alman, ki te antrenè.
1981, Tegucigalpa, Honduras: 1-1, chanpyona Konkakaf ki tou eliminatwa Koupdimond 1982. Goebels Cadet ki te fè gòl Ayiti a; Hugo Sanchez egalize pou Meksik. Seleksyon sa a te gen ladann Frantzy Mathieu, Jean Joseph, Nono Jean-Baptiste, Manno Sanon, Romulus, Mathelier, Guy Allen... Antoine Tassy ki te antrenè.
2009, Arlington, États-Unis: 0-4
Gòlkèp. Seleksyon sa a te gen ladann Dominique Zéphirin, Ednerson Raymond, Monès Chéry, Peter Germain, Frantz Gilles, Alexandre Boucicaut, Éliphène Cadet...
2019, Dallas, USA. Demifinal Gòlkèp: 0-1, nan pwolongasyon
Ekip sa a te gen ladann Johnny Placide, Nazon, Hervé Bazile, Frandy Pierrot, Alex Christian, Michaël Cantave...
Kidonk, rezilta ti medam yo jedi 7 jiyè 2022 sa a, se pa yon ti zafè nan istwa foutbòl ayisyen. Sa ap pran anpil, anpil tan avan fanatik foutbòl sispann pale de yo. Men yo:
Roselord Borgella, Claire Constant, Melchie Dumornay, Sherly Jeudy, Florsie Love Joseph, Nahomie Lazarre, Jennifer Limage, Batcheba Louis, Kethna Louis, Ruthny Mathurin, Nérilia Mondésir, Maudeline Moryl, Bethina Petit-Frère, Mikerline Saint Félix, Chelsea Surpris
Antrenè Nicolas Délépine
Nou ka di: ti medam yo vini osekou mesye yo. Yo leve figi foutbòl ayisyen an.
Fò nou pa bliye tou, 16 mas 2022, seleksyon foutbòl andikape Ayiti a bat Meksik 3-1. Se yon bon kòmansman nan seri match n ap genyen pou nou jwe ak Meksik alavni nan domèn sa a. Men nou te gen posiblite gade andirèk gwo seleksyon foutbòl feminen nou an k ap bat Meksik byen bat.
