31/05/2025
Malaysia Ah Myanmar Mi Mipum 1000 Lai In Kaihkhih An Tong
Malaysia ram Selangor district Salayan khawpi ah May 29 niahkhan Myanmar mi mipum 1000 le ramdang mi mipum 1400 lengkai an kaih thu State Immigration Department cun mani May 30 ahkhan thu an suah. Malaysia ih um Myanmar mi pakhat cun hi an kaihmi Myanmar mi pawl lakah hin Chin mi cu an tel a zum um lo ziangahtile an kaihkhihnak hmun ih ceng pawl hi cu Myanmar Muslim miphun asimi Myanmar ram ih မုဒုံ၊ မော်လမြိုင်၊ မြဝတီ၊ သန်လျင် tipawl ih Muslim pawl an si thu le UN card nei zo pawl khal an kaihmi ah an tel nan an thlah sal tiah a rel thu theih asi. Ramdangmi tamsawn umnak Salayan khuapi ih apartment pawlah cun palik le immigration department pawl cun luh cilh ih dan lo ih lut ramdangmi an hawlnak ihsin ramlengmi dan lo ih lut mipum 1400 lengkai lai an kaih thu theih asi. Cun Malaysia cozah cun danlo ih a ram sungih lut ramdang mi pawl kaihkhih hmalaknak an fehpi rero miah hin an kaihmi ramleng mi pawl cu hremnak pe lo in a ranglam in an mai ram ciarah May 19 ni ihsikhan kuat kir cih vivo an si thu Malaysia cozah cun an phuang. Tuhlanah kha cun Malaysia cozah hin dan lo ih a ram sungih lut ramleng mi pawl cu thawngthlak ta lo in an mah le ram ciarah a kuat kir cih dah lo dan vekin hremnak a pe ih k*m tam tang an um thu khal theih asi.
