03/10/2021
တောင်ပျောက်တိုက်နယ်တွင်စစ်ကောင်စီနှင့် PDF တိုက်ပွဲဖြစ်
ဒက္ခိဏ၊ အောက်တိုဘာ ၃
ထားဝယ်ခရိုင်၊ သရက်ချောင်းမြို့နယ်၊ တောင်ပျောက်တိုက်နယ်တွင်း အကြမ်းဖက်စစ်ကောင်စီနှင့် ဒေသခံပြည်သူ့ကာကွယ်ရေးတပ်ဖွဲ့တစ်ခုဖြစ်သည့် ဒေါင်းမင်းစစ်ဆင်ရေးအဖွဲ့တို့ ယနေ့နံနက်စောစောမှ စတင်၍ တိုက်ပွဲဖြစ်ပွားခဲ့ကြောင်းသိရသည်။
တောင်ပျောက်တိုက်နယ်ရှိ ကျွဲခြံရွာတွင် ယနေ့နံနက် ၄ နာရီ ၄၀ မိနစ်မှစ၍ ပစ်ခတ်မှုစတင်ဖြစ်ပွားခဲ့ခြင်းဖြစ်ပြီး နံနက် ရှစ်နာရီခွဲတွင် ရပ်နားလိုက်ကြောင်း ဒေါင်းမင်းစစ်ဆင်ရေးအဖွဲ့ဝင်တစ်ဦးက ပြောသည်။
"သူတို့ဘက်က တစ်ဆယ်ကျော်လောက်ကျနိုင်တယ်။ ထိခိုက်ဒဏ်ရာလည်း ၁၀ ကျော်လောက်ရှိနိုင်တယ်။ ကျနော်တို့က အနီးကပ်ပစ်ကြတာဆိုတော့" ဟု ဒေါင်းမင်းစစ်ဆင်ရေးအဖွဲ့ဝင်ကဆိုသည်။
ဒေါင်းမင်းစစ်ဆင်ရေးအဖွဲ့ဘက်မှ ထိခိုက်ဒဏ်ရာရသူမရှိကြောင်း ၎င်းကဆိုသည်။
စစ်ကောင်စီဘက်က လက်နက်ကြီး အချက်ပေါင်းများစွာပစ်ခတ်ခဲ့ကြောင်း ဒေသခံတချို့ကပြောသည်။
တောင်ပျောက်တိုက်နယ်အတွင်းရှိ ကျေးရွာများတွင် စစ်ကောင်စီတပ်များသည် ပြည်သူများ၏နေအိမ်တချို့ကို မီးရှို့ဖျက်ဆီးမှုများရှိခဲ့ကြောင်းသိရသည်။
Dakkhina Insight