01/10/2024
Zogam Galkap Siamsin Zawhna
(Passing Out Parade)
Lawhcing takin kibawlzo
ZPCC Pawlpi hanciamna, ZRA Phualpi mapatpihna leh Zogam a it Zomi Minam Nasemte panpihna tawh, ZRA(EC) Zogam Galkap Siamsin mimal (150) in, Galkap Sinna Zawhna (Passing Out Parade) pen 2024 k*m, October kha, Ni 1 ni in, Zogam New Eden Lenpi ah lawhcing takin bawlzo uhhi cih thu, Zogam Galkap Mangpipa in Zogam Media Tanute tung ah hong theisak hi.
Zogam Galkap Mangpipa in a genna ah, tutung Siamsin Zawhna pawi pen, Siamsin tengbek hilo in, Zomi taangpi taangta in Zogam Galkapte dinmun ahong theihpihna ding deihna tawh, mipi zong akizawn hi a, Zomi numei naupang dongin, mimal 600 val in tha hong pia uhhi ci hi. Tuaban ah, ZRA Phualpi lam panin, Galkap Mangpipa a kipan makai tuamtuamte, ZRO Phualpi panin Makaipizom leh a seppihte, Zomi Council Makaite tawh Frontal Organization kici kipawlna tuamtuam pan Makaite, mawtaw 10 tawh, Zogam Galkap Siamsin Zawhna muak dingin hong kuan uh a, tha hong pia uhhi ci hi. New Eden Lenpi kiim leh paam pan, Hausa Upate, khua leh tui kipawlna Makaite, Khuanu Khuapate leh Nungak Tangvalte inzong thupi takin hong muak in tha hong pia uhhi ci in hong genbeh hi. Zogam Galkap Siamsin Zawhna pawi ahong kuan mipi khempeuh in, ankuang ki-umkhawm a, minam it Zomi Minam Nasemte hong s*k Sialpi khat, Bawngpi khat leh Vokpi khat kigo in, Zogam Galkapthate muakna pawi kibawl zo hi cih thu kiza hi.
Zogam Siamsin Zawhna hun bawlna sung ah, Zogam Galkap Siamsinte in athuang athuang in, Section (3) kikhen in, Len Tualpi sung ah lutin, Galkuan bangin hong kizui uh a, Makaite leh Mipi zahtakna hong pia uhhi. Zogam Galkap teeltuam pawl khatin, Zogam Salphate zahtakna thaulapna hong bawl uh a, mipi khempeuh cimul tholiang in, thupi kisa mahmah hi. Zogam Galkap Siamsinte in Zogam leh Zomi ading kipiakkhiatna leh kiciamna hong bawl uh a, Laisiangtho s*ksan in hong kiko uh ahih manin, Zomi buppi adingin kilungmuang tuam mahmah hi ci in, Siamsin zawhna pawi asiim, Tedim khuami khatin Zogam Media tanute tung ah hong gen hi.
Zogam Galkap Mangpipa in, tutung Siamsin Zawhna pen Zomi taangpi taangta inzong ahong theihpih a, tha ahong piakna ding lunggulhna tawh, asimtham in kibawllo a, suakta takin akibawl ahih manin, lungkim huai mahmah hi ci hi. Kawlgam Vaigam panin Zomi makai tampi in hong theihpihbek thamlo, thapiakna thugenna zong hong neitek uhhi. Thugente sung ah, Zomi Council a kipan, Zomi MP cihte dongin kihel hi cih thu hong gen hi.
Zogam Galkap Mangpipa in a thugenna sung ah, Zogam sung a namdang galte nawtkhia in Zogam suahtakna ding, Zogam akembit ding leh Zogam sung ah daihna a omna dingin, nuntakna kipiakhia a, Zogam Galkap dingin hong kipiakhia, Zogam Galkapthak teng tung ah zahtakna ka pia hi, T**a Pasian in hong ompih henla, hong makaih tahen ci in, hanthotna thu ka gen hi ci hi. Tuaban ah, tutung Zogam Galkap Siamsinna tawh kisai in, ZRA Phualpi in ma hong patpih ahih manin, Cabinet leh Defense tung ah ka lungdam hi, Siamsinna hun sung khempeuh leh tuni a Siamsin Zawhna hun ciangdong, annek tuidawn a kipan, nikten puansilh, zatui zaha akisam khempeuh leina dingin sum leh paai hong s*k, ZPCC Pawlpi leh Minam Nasemte tung ah zong lungdamna ka ko hi ci in genbeh hi. Guahlak dailak ah Siamsin Zawhna pawi hong siim mipite tung ahzong a lungdamna thu pulak hi.
Zogam Media Tanute in, Zogam Galkapte leh Galkapthakte maban ding tawh kisai in, Zogam Galkap Mangpipa in kilawm asak tantan ahong genna dingin a kinget ciangin, Zogam Galkapthak tengpen asawtlo in, Zogam sung ah a omsa Len Nga teng ah khenin, a omsa Zogam Galkapte tawh akigawm dingin kipuakbeh ding a, Zogam bitna dingin ma hong pang ding uhhi, Zomi taangpi taangta lunggulhna bangin, Zogam sung a namdang galte hawlkhiat ding vaizong limtak in kigeel hi, a hun a tun ciangin kikuan ding hi ci in dawngkik hi. Gamkuanna ding ahizong, Gamvaanna ding ahizong, Zogam Galkapthakte tawi dingin galvan tampi kisamlai ahih manin, gam leh minam a it, Zomite panpihna kisam mahmah hi ci in, Zogam Galkap Mangpipa in Zogam Media Tanute tung ah hong vaikhak hi.
Zogam Media
Camp New Eden
Zogam, Myanmar
1 October 2024
