khobi_shl

09/05/2022

"الشركا هلكا"
عبارة تنتشر كثيرا في المجتمع الجزائري ، وهي سبب انهاء الكثير من المشاريع قبل بدايتها ، اليوم راح نتعرفو على مفهوم الشراكة ، فوائدها ومساوئها .

الشراكة هي علاقة قانونية بين شخصين أو أكثر حيث يتقاسمون ملكية ، مسؤولية ، و تسيير بيزنس معين .

علاش نحتاجو الشراكة ؟ وش فايدتها ؟
🟢- عقول أكثر يساوي تفكير أفضل ، وحسب دراسة أجراها البروفيسور ادوارد روبرت (بروفيسور بكلية الادارة بمعهد ماساتشوستس للتكنولوجيا) ، احتمال نجاح الشركة يزداد بزيادة عدد أطرافها حتى 4 أو 5 أفراد .
🟢- شركاء أكثر يساوي مال أكثر ، بمساهمة أقل و أضرار أقل في حالة الخسارة ( يعني تقدر تبدا مشروع كبير براس مال صغير و ريسك صغير بسبب الشراكة ) .
🟢- شركاء أكثر يساوي علم و خبرة أكثر ، لأنك بمفردك لا يمكنك الإلمام بمختلف جوانب المشروع ، (مش كيما الشراكة ، واحد يحكم التسويق ، واحد الانتاج ، واحد التسيير الخ ) .

لكن كيما عندها فوائد راح يكونو عندها مساوئ ولي نذكرو منها :
🔴 - لست سيد القرارات ، وبالتالي أنت فاقد لجزء من الحرية في تسيير المشروع ، لأن القرارات يجب أن تكون جماعية .
🔴 - من الصعب الاتفاق 100% ، في كثير من الأحيان هناك شريك من الشركاء راح يرقد قلقان الليلة هذيك هههههه.
🔴 - الأرباح ليست كلها لك ، تخيل الشعور لما يوصل رأس العام و الحسابات تشير الى مليون دولار فائدة صافية و بعدها تنصدم بفكرة انو ماهيش ليك وحدك و نتا تسال فيها 250 الف برك ، شعور محبط ، لكنو ضريبة تقاسم الريسك و رأس المال . للأسف .

فالمنشور القادم ان شاء الله راح نحكيو على أمثلة لشراكات ناجحة وصلت للعالمية و حققت ايرادات ضخمة .
اذا عندكم أي اضافة أو استفسار خليوها فالتعليقات .

09/05/2022

الكثير من الشباب الجزائري خصوصا راه متحمس باه يبدى مشروع جديد أو فكرة أو ما شابه باه يحقق مدخول باهي و الحرية المالية و الخ من الأمور لي نعرفوها كامل .
لكن المشكل لي نلاحظوه أنو العديد منهم يفشل قبل مايبدى أو في بدايتو ، والأسباب متعددة .
اليوم راح نحكيو على سبب واحد و هو عنصر المفاجأة ، تكون داير في بالك حاجة و تلقى حاجة مخالفة لتوقعاتك و هنا الضربة القاضية لمشروعك .
مالا باه ماتتفاجؤوش خلينا نستعرضو بعض المشاريع لي ماهيش موجودة ومش راح تكون أصلا ، و نتمنى تشاركوني فالتعليقات أمور أخرى ماذكرتهاش أنا .

🔴 ماكانش مشروع يبدا من الصفر .
للأسف لا يوجد ، الصفر فالرياضيات كلما تضربو في عدد مهما كان يهبطو للصفر ، فالبيزنس تاني .
مستحيل تلقى ولا تبني مشروع من الصفر ، نحي من بالك الفكرة هذي .
🟢 باش تبدى مشروع تحتاج رأس مال ، خبرة عملية ، معرفة مسبقة ، شبكة علاقات ، دبلوم ، مساعدة ، شريك ، مقر ، ... الخ (هذو مش لازم يكونو كامل مع بعض لازم على الأقل زوج ولا ثلاث منهم كبداية) .

🔴 ماكانش مشروع يدخلك الدراهم و نتا بعيد عليه .
مهما كان المشروع لي في بالك ، اذا مابقيتش واقف عليه راح يفشل ، مهما كانت جودة العمال لي فيه ، ماكانش كيفك انت .
🟢 بداية مشاريعك لازم تكون بيك انت ، بحضورك و أفكارك و تخطيطك و مراقبتك الدائمة ، مع الوقت من الممكن أنك تنقص من الأعباء لي عليك عن طريق توظيف أشخاص آخرين ، لكن المراقبة لازم تمارسها دائما.

🔴 اذا تحوس على مشروع ، عمل على الانترنت ، فكرة تجيبلك ليشتا مليون للشهر غير أنسى ، ماكانش .
الوظيفة أو الشهرية لي من المفروض تكون ثابتة و تلقاها تتغير من شهر الى اخر ، لذلك يستحيل تلقى مشروع عندو دخل شهري أو سنوي ثابت ، أنسى .
🟢 المشاريع والأعمال الحرة عندها مداخيل متغيرة حسب الزمن و الظروف و عدة عوامل ، أغلب المشاريع تبدى مداخيلها من الصفر و تطلع ولا تهبط ، اليوم ماكانش مدخول غدوة تدخل مليون لي بعدو تخرج زوج ملاين بعدو يدخلو ثلاث و هي رايحا .

🔴 ماكانش مشروع ناجح
نلقى منشورات كثيرة من نوع عندي مبلغ كذا دبرو عليا مشروع ناجح ، لا سامحني خويا ماكانش .
🟢 نجاح المشروع موش مرتبط بإسمو ، النجار موش ناجح لأنو نجار ، بل لأنو عرف كيفاه يخدم ، يطور ، يشري و يبيع ، يحدد ميزانيتو و ينظم أموالو .

🟢ماكانش مشروع ناجح ، كاين أشخاص ناجحين في مشروع🟢

🔴 اذا غلبت من الخدمة شهار من 8 لل 5 و حاب مشروعك الخاص لي تروبوزي فيه ، ابشر ، ماكانش تاني .
🟢 اطلاقك لمشروعك الخاص أو عملك الحر يعني أنك رايح تتحول من نظام 8 ساعات يوميا 5 أيام في الأسبوع الى نظام 24 ساعة يوميا 7 أيام في الأسبوع .

الهدف من المنشور ليس التثبيط ، ولكن توضيح الحقائق خاطر ناس بزاف مش عارفينها .
اذا متفق معي قولي واذا مش متفق معي قولي تاني ، كل الآراء مرحب بيها ، باحترام طبعا .

09/05/2022

اليوم رايح نحكيو حاجة مفيدة ، يعني حاجة مش راح يشوفها أغلب الناس و مش راح يتفاعلو معاها ، لأنها فيها فايدة ليهم .
موضوع النقاش اليوم هو التسويق بالمحتوى ، مبدئيا كل الناس تعرف أنو هو التسويق عن طريق صناعة محتوى مفيد للزبون أو المتابع .
يعني تعمل محتوى مفيد ، تبني قاعدة متابعين ، المتابعين راح يصيرو مهتمين لأنك حاضر باستمرار و دائما عندك الجديد ، بعدها يصيرو أوفياء ، تلقاهم يستناو منك الجديد و يسقسيو عليك كي تغيب و متشوقين يشوفو منك أكثر و راح يدافعو عليك ضد الانتقادات مثلا ، هنا لما تعرض عليهم منتج راح يكونو زبائن محتملين بنسبة كبيرة جدا ، لأنو صار عندهم ثقة فيك .
من بين المحتوى المليح هو التعليم ، تعلم الزبون تاعك كيف يستخدم منتجك ، كيف يصلح بنفسو الأعطال مثلا ، أو تعطيه نصائح حول كيفية الحفاظ على المنتج أو تخزينه .
أنت تبيع أدوات كهرو منزلية ، خلي صفحتك على الفيسبوك فيها محتوى مرتبط بما تبيع ، مثلا وصفات عصائر تقدر تعملها بخلاط تبيعو ، كيفية تنظيف الغسالة لي تبيعها ، أو تصحيح أخطاء شائعة يعملوها الناس بمنتوجاتك مثلا .

اذا وصلت هنا راك قريت الأمور الكلاسيكية ، أرواح نجيبو لجديد .
كاين أنواع من الفيديوات انتشرت مؤخرا بصورة كبيرة ، بصورة فيروسية ، و متأكد أنو اغلبكم شافها أو شاف البعض منها .
من بين هذي الأنواع عندنا الفيديوات القصيرة (تيكتوك ، شورتس ، ريلز)
عندنا الفيديوات تع الحيل وتسهيل الحياة
كاين ال satisfying videos لي هي فيدوات تتفرجها تعجبك و تبقى ساعة ونتا تشوف منها بلا ملل ، كيما هذوك تع تكسير الأشياء ، التحطيم ، الحرق ، التنظيف ...الخ
و كاين النوع الأخير لي هو الفيديوات الترند ، لي تجي بحمى تصيب الناس كامل و تروح كيما جات .
دركا نتا صاحب بيزنس ، لازم تعرف تستغل هذي الأمور لصالحك باه تنمي متابعينك و مبيعاتك و تعمل اشهار لروحك .
عندك لافاج ؟ صور فيديوات و نتا تنظف السيارات لي موسخة بزاف و دير مقارنة قبل و بعد .
عندك مقهى ؟ صور فيديوات ونتا تخدم فالكابوتشينو ، يا خويا دير فيديو تع القهوة كي تصب من لاباراي فالڨوبلي منظر ماكانش لي مايعجبوش .
عندك محل حلاقة اعمل فيديوات للحلاقة و صور قبل و بعد .
كانكيري ؟ حط فيديوات لكيفية استعمال الألات ، فيديوات تع 30 ثانية كيفاه تركب شوفي فالحيط ههههه صدقني راهم ترند اذا حاسبهم تمسخيرة .
تبيع القش ، قدم نصائح فالموضة ، قال هذي تتلبس مع هذي ، هذي وهاذي مايتلاقاوش ...الخ
نتا يخي راك خادم خادم ، حط التيليفون يصور ، عندك 10 دقايق كل يوم تعطيك 20 فيديو تع 30 ثانية و اتفرج كيفاه حساباتك تكبر و متابعينك و لي مع الوقت تحولهم لعملاء وزبائن .
تطبيق ننصح بيه لصنع الفيديوات القصيرة Capcut
فالأخير نرحب بكل انتقاد أو اضافة فالتعليقات .
لانستا تاعي khobi_shl@ مرحبا بيك الدار دارك

09/05/2022

أنت تاجر ، أو حرفي ، أو صاحب مشروع أو شركة ، و عندك مقر أو محل .
شحال من واحد يفوت عليك فالنهار في مقرك أو محلك ؟ و شحال المدة لي يستغرقها و هو يشوف فيك ؟

الاجابة على هذين السؤالين ماتهمش بزاف لكن يهم أنك تتسائل ، شحال من واحد مايفوتش عليا فالنهار ؟ و وين نلقاهم ؟

الفكرة بسيطة ، الناس لي راهي تشوف محلك أو مقرك راهم زبائن محتملين ، يعني اذا نتا خياط مثلا ، الناس لي يشوفوك و هوما يتسوقو ولا وهوما رايحين و راجعين من عملهم راح يكون في بالهم بلي كاين خياط هنا ، و نهار يحتاجو خياط راح يجيو عندك (احتمال كبير يجيو عندك) بناءً على عدة عوامل منها أنك متوفر دائما و محلك نظيف و معاملتك مليحة .

لكن كاين الكثير من الناس لي راهي تحتاج خياط وهوما جامي فاتو عليك ، يعني ماعلابالهمش اذا راك موجود أصلا ، كيفاش راح يلقاوك ؟ تقولي ندير اشهار ، صحا شفتك في اشهار كيفاش نعرف بلي راك ديما متوفر ؟ .

نعطيك معلومة صغيرة ، يقضي الناس في المتوسط ساعتين و 45 دقيقة في منصات التواصل الاجتماعي (في المتوسط قلنا)

و هنا نقولو من خلال ما سبق أنو التواجد في السوشل ميديا أصبح ضرورة حتمية لكل بيزنس ، حيث أنو رح يزيد من عدد الزبائن المحتملين عندك لأنو راح يخليك ظاهر لأكبر عدد ممكن من الناس .

في هذا المنشور راح نحكيو على التواجد في السوشل ميديا بشكل سطحي و نتعمقو فيه في باقي المنشورات ، لذلك تابعني هنا ولا فالانستغرام باه يوصلوك باقي المنشورات .

كيفاش نتواجد فالسوشل ميديا ؟
- اذا كنت صاحب بيزنس فالواقع ، يعني عندك مصنع أو محل أو مقر اجتماعي الخ الخ الخ ، تحتاج الى الظهور فيما يلي :
-
🛑 خرائط ڨوڨل : أصبحت أمر ضروري أنك تتواجد في ڨوڨل حتى تسهل على الناس أنهم يوصلو ليك .

🛑 فيسبوك : أغلب الناس يقضيو وقتهم في فيسبوك ، لذلك راه عاد ضروري للتواجد فيه من أجل التواصل الدائم مع زبائنك .

🛑 أنستغرام : نعتبرو أفضل معرض أعمال للبيزنس الصغير والمتوسط ، تقدر تخليه فقط لعرض صور أعمالك أو منتوجاتك .

🛑 يوتيوب : لا مش لازم لأنو المنافسين تاعو طغاو عليه و هنا نحكي على فيسبوك فيديو و تيكتوك .

🛑 فيسبوك فيديو : للفيديوات الطويلة نوعا ما ، مثلا شروحات لاستخدام منتج أو فيديو يبين مراحل الانتاج أو عرض للمنتجات .

🛑 تيكتوك : ( انستغرام ريلز) أفضل مكان تقدر تنتشر فيه بطريقة فيروسية اذا عرفت تركب الموجة و تستغل الترندات .

و كاين منصات أخرى كثيرة لكن مش راح تناسب كل أنواع العمل ، مثلا اذا عندك محل تجميل راح يساعدك سناب شات ، أما اذا عندك شركة صغيرة الى متوسطة ف لينكد ان لازم تكون موجود فيه .

على كل حال هذي مقدمة فقط للتسويق فالعالم الرقمي ،ذكرنا فيها المنصات لي لازم تتوفر فيها و في قادم الأيام راح نحكيو على كل منصة بالتفصيل و نحكيو استراتيجيات للعمل والظهور في هذه المنصات حسب نوع العمل .

اذا عندكم اضافات أو استفسارات خليوها فالتعليقات و راح نجاوب عليها في منشور اخر ان شاء الله أو في ستوري الأنستغرام khobi_shl@

09/05/2022

عندك مبلغ مالي كبير أو صغير؟ ، عندك إمكانيات في مجال معين؟ ، و حاير وش دير ؟ تبعني نعطيك أفضل مشروع تستثمر فيه دراهمك أو جهدك .

اذا سقسيت أي واحد وش هو أحسن مشروع في نظرك أو كيفاش تحكم على مشروع أنو الأحسن ، راح يقولك يدخل كذا في الشهر أو في اليوم و يدوم لمدة كذا ...الخ من البديهيات .
بينما ناس أخرين رح يقولولك هو المشروع لي يدخلك الدراهم و نتا راقد (دير ڨاراجات من تحت واكريهم) .
والأغلبية تتفق أنو المشروع الناجح والأفضل هو المشروع لي يحسن حياتك و يخليك تعيش الرفاهية مهما كان .
وصح كاينة منها .
بالنسبة ليا أحسن مشروع هو المشروع لي يحسن حياة الناس و يخليهم يعيشو الرفاهية في مجال معين ، كيفاه ؟ لما تكون تخمم فالمشروع ماتخممش فيه وش راح يديرلك ليك أنت ، بل وش راح يدير لعامة الناس و لزبائنك .
كيف يتم هذا الأمر ؟
ببساطة حاول اصلاح المشاكل
كاين مشكل في النقل ظهرت اوبر
كاين مشكل فالتسوق ظهرت أمازون
كاين مشكل ثقة في المعاملات المالية ظهرت بايبال
كاين مشكل في البيع على الانترنت ظهرت ايباي
حاب تشري من الصين بالجملة ؟ ماتقدرش تسافر للصين تشوف السلعة هاك علي بابا .
مريض ؟ هاهو الطبيب هاهو الدوا هاهو السبيطار
جيعان وماعندكش الوقت هاهو فاستفود
راك تشوف بلي كل شي ناجح في العالم يعتمد على انهاء مشاكل الناس و حنا كسكان بلد افريقي ملييييئ المشاكل ، تخيل الثروة لي تقدر تديرها من خلال ايجاد حل لمشكلة واحدة على الأقل .
شاركوني فالتعليقات رأيكم في هذا الموضوع و حبذا لو نشوفو أفكار تقدم حلول للمشاكل لي تدور فالبلاد ، يعني شوي تخمام ايجابي ، بدل ماتلعن الظلام شعل لفلاش تع تيليفونك .
كتبها khobi_shl@ تابعوني فالأنستغرام تشجيعا باه نوليو نحكيو في أمور أكثر فائدة من الڨاراجات لي من تحت .

09/05/2022

الصراع القديم الجديد لي ديما نشوفوه بين العمل الحر والوظيفة ، كل واحد وش يفضل و كل واحد وين يلقى راحتو و ماتقدرش تحتم رأيك على غيرك .
بالمقدمة لي فاتت تفهم بلي ماجيتش نقولك وينا فيهم لي خير ، كيما قلتلك شوف لي تساعدك ، أنا جيت نعاونك تعرف لي تساعدك .

ببساطة اذا كنت مستعد تخدم 24 ساعة فاليوم / 7 أيام فالأسبوع فمرحبا بك في العمل الحر ، أما ان كنت الناس الهانية لي ماتقدرش على التعب هذا خليك في وظيفتك أحسن .

ثاني شي هو القابلية والاستعداد للخسارة : أنت كعامل حر دير حسابك بلي نهار تحبس الخدمة يحبس المدخول ، تمرض ماكانش مدخول ، تروح عطلة ماكانش مدخول ، قادر تخسر أموالك اذا كنت تاجر و قادر تخسر ماتريالك اذا كنت حرفي و وقتك اذا كنت فريلانسر ، بينما الشهار راه عندو العطل المرضية والعطل السنوية و ماشابه.

الأمر الثالث هو المداخيل :
الشهار يقدر ينظم حياتو احسن من الفريلانسر ، علابالو بلي فاليوم الفلاني من كل شهر يلقى المبلغ الفلاني في حسابو ، بينما العامل الحر الله الله والسوق ، ليوم دخل زوج ملاين غدوة دخل عشرألاف لي بعدو خرج دراهم و مادخل والو و هي رايحا .

رابعا المرونة :
هذي مش متوفرة لكل العاملين الأحرار لكنها متوفرة للبعض ، الشهار لازمو يخدم من الثامنة صباحا للخامسة مساءً ، بينما العامل الحر يقدر يخدم فالوقت لي يساعدو .

خامسا التأمين :
التأمين حاجة مايكسرش راسو بيها الموظف ، بينما الحر لازمو يحسبلها و كل عام يدفع اشتراكات للتأمينات باه يتحصل على تعويض صحي و تقاعد .

هذي الأمور الأساسية لي تصنع الفارق ، اذا شفت وحدة فيهم ماتساعدكش في جانب تقدر تروح للجانب الآخر .

لكن : نصيحتي ليك
في بداية حياتك حاول تجمع بيناتهم في زوج
اذا نتا طالب ، ماتخرجش من الجامعة بديبلوم فقط ، زيدلو مهارة او حرفة ، و اذا نتا موظف اتعلم حاجة اخرى تخدمها .
اذا نتا فريلانسر و عندك وقت فارغ حاول تلقى عمل بدوام جزئي أو عمل ثابت عن بعد .
اخدمهم في زوج ، و نهار تلقى لي تساعدك و تخليك تعيش مليح تما تقدر تخلي الثانية و تتفرغ .

كتبها khobi_shl@ وهو علابالو راح تابونيه فالأنستغرام باه تستفيد أكثر .

11/03/2022

نعرف الكثير من الناس يسلك مرتب هزيل و عايش بيه مكفي والحمد لله .
و ناس يسلكو مرتب كبير و عايشين كريدي .
كاين ناس تتقشف و تبخل روحها و كاين ناس تصرب و تبذر .
بصح وش الطريقة الأصح ؟
-- نتا دركا عامل (شهار كيما نقولو) أو عامل حر (فريلانسر أو تاجر أو حرفي) ، الفرق بين الحالتين هو فالمدخول الشهري ، العامل دخلو ثابت تقريبا و الحر دخلو متغير من شهر الى شهر .

كيفاش ندير باه نقدر نعيش بشهريتي ؟
الخطة بسيطة ، خلينا نسميوها (50-30-20)
باعتبار هذو الأرقام نسب مئوية رح نفصلوها كالآتي :
🛑50% المصاريف الأساسية
و لي رح تكون : السكن ، النقل ، الأكل والشرب ، اللباس ، التأمين ، الفواتير . (الفردية والعائلية)
ملاحظة : الشهار عندو تأمين تسما يقدر ينحيه من الحساب ، الأحرار لالا .
🛑30% المصاريف الثانوية
و لي رح تكون : الكماليات ، الحفلات ، الخرجات ، التحواس ، عشاء فاخر .... الخ
🛑20% الثروة
علاش سميتها الثروة لأنو الأمور السابقة ماهمش دراهمك هذوك رايحين يخرجو و يتصرفو ، أما الثروة فهي ملكك الخاص خارج كل المصاريف .

دركا راك تقول أنا نسلك زوج ملاين كيفاه رايح نقسمها و كذا .
نقولك أنا حاجة ، اذا كان نصف مداخيلك مايكفيكش باه تغطي الأساسيات ، راك تحتاج راتب أعلى اما تزيد خدمة او تغير الخدمة لي راك فيها .

»»بالنسبة للأساسيات خليها على قدك ، راسك راس مرتك أكري ستيديو ، مش لازم تسلك ابونمون تع الكونيكسيون ب 4000 و نتا تحتاج تع 1000 برك ، مش لازم تركب طاكسي و نتا تقدر تركب الحافلة ...الخ .
و اذا بقاولك دراهم من الشهر هذا ضيفهم للشهر الجاي لأنو كل شهر و خصوصياتو (شهر تشري فيه لبسة و شهر تسلك الفواتير و الخ الخ .

»» الكماليات اذا تحتمت اتخلى عليها لصالح الأساسيات ، لكن من الأحسن انك تجمعها و تدير بيها فاكونس اخر العام او فالصيف او تقلش بيها روحك كيما تحب .

»» الثروة : هذي مخدومة باه تكبر ، الثروة مصيرها الاستثمار مش التخزين ، كي نقول الاستثمار ماتتخيلش حاجة عظيمة و شركة و كذا ، تقدر مثلا تجمع تع 3 أشهر تشري بيها حاجة تبيعها ، تقدر تستثمرها فالتداول اذا تعرفلو ، تقدر تجمع تع مدة كبيرة و تشرك بيها مع واحد ، تشريها ذهب ، كاين بزاف أفكار تستثمر بيها مبلغ مالي .
و العائد من الاستثمار (يعني الفايدة) يعاود يخضع لخطة (50-30-20) .
مثلا : تسلك 2 ملاين
مليون مصاريف أساسية
ستميات الف للكماليات
ربعمياتلف ثروة .
تلم تع 10 أشهر عندك 4 ملاين
تشري بيها تيليفون من علي اكسبرس تبيعو ب 4 و نص مثلا
راك عندك ربع شهريتك فايدة في معاملة وحدة .
تقدر تستثمر ال 4 و نص كاملة او تقسم ال نص مليون هذاك بالخطة لي حكينا عليها .
هذا مثال برك .

علابالي الكلام هذا مش راح يعجب الكثير
لكن نقولك حاجة ، كونك واقعي ، تسلك 2 ملاين ماتحبش تعيش كيما لي يسلك 20
حاول توصل لل 20 و عيش كيفو .
و اذا كنت انسان يخلص مدخولو الشهري قبل مايخلص الشهر ، صدقني نعطيك 10 ملاين تخلصها ، لأنو اذا ماتحكمتش في روحك راح يزيدو مصاريفك بتناسب طردي مع زيادة مداخيلك .
و من هذا كلو نزيدك ، ماتبقاش تشكي و تستنا الدولة تزيدلك الشهرية ولا الشركة لي تخدم فيها
دير حل لروحك ولا ابقى في حالتك حتى تموت .
و نصيحة أخيرة : عددوا مصادر دخلكم .

11/03/2022