22/04/2023
… بعد ما أخد شهادة السواقة اشترى سيارة جديدة ونزل فيها اول يوم عالشغل
… بعد شوي اتصلت فيه مرتو وقالتلو ابوس ايديك انتبه عالطريق لانه بالراديو عم يقولوا في سيارة ماشية عكس السير ...بخاف تطلع بوجهك فجأة
… قالها مو بس سيارة وحدة .. الله لا يوفقهم .. كل السيارات ماشية عكس السير 🤦♂️
سردة من الذاكرة
عام 83 سجلت الدولة عسيارات...
والدي كان مدرس علوم طبيعية وبيشتغل بتجارة السيارات
صديقو طلعلو سيارة ميتسوبيشي كولت ولازم يستلمها من المرفأ
و هو لابيعرف يسوق ولامعو شهادة
اجا لعند الوالد قالو ايدي بزنارك ..
قالو تكرم وطلع معه عطرطوس جبلو السيارة وصار كل يوم يدربو عليها شوي بمنطقة حلب الجديدة اللي كانت وقتها حفرة نفرة مافيها لاهابوب ولادابوب واذا بتشلف قنبلة مابتصيب حدا 😁
في يوم جمعة بعد العصر بتتصل زوجتو لصديقو مع والدي وبتقلو يا ابو غيث الله يخليك عدنان نزل من الصبح عباب جنين يجيب شوية خضرة ولهلأ مارجع
(( وهي باب جنين بحلب من كتر الزحمة وقتها ...اذا بتشلف كيلو رز. مابتنزل منو رزة عالارض ))
و قالا تكرمي ...
ركب سيارتو ونزل يمشي عخط السير ..لقاه واقف عجنب الطريق ومشغل السيارة ...وعيونو طايرة عالمرايا
نزل قالو وينك يازلمة اش عبتساوي هون مرتك قلقانة عليك
قالو بلهفة ..جيت والله جابك يا ظافر ..الله يخرب ديارن انت عبتعلمني السواقة بحلب الجديدة مافي ولاسيارة ..
هون السيارات الله لايوفقن عبيمشو جنب بعض 😂
لذلك كل ماعبشوف سيارة بالمراية وراي عبصف وبستناها تعدي،😂😂
وللقصة بقية بحكيها بحلقة قادمة لانو فيها ماسأة ....لنفس الشخص ونفس السيارة
ابو ظافر