17/07/2024
രക്ഷിതാക്കളെ ബഹുമാനിക്കാൻ പഠിക്കുന്നവർ ജീവിതത്തിൽ വിജയികളായി തീരും- ബ്രിഗേഡിയർ പി കെ എം രാജ
പുണെ: രക്ഷിതാക്കളെ ബഹുമാനിക്കാൻ പഠിക്കുന്നവർ ജീവിതത്തിൽ വിജയികളായി തീരുമെന്നും വിജയത്തിന് രക്ഷിതാക്കളുടെ അനുഗ്രഹം അനിവാര്യമാണെന്നും ബ്രിഗേഡിയർ പി.കെ.എം. രാജ- എസ്. എം., വി എസ്.എം (റിട്ട.) പറഞ്ഞു. ഇന്ത്യൻ ബോക്സിങ് കൌൺസിൽ പ്രസിഡന്റും, കോമൺ വെൽത്ത് ബോക്സിങ് കൌൺസിൽ ഡയറക്ടറുമായ അദ്ദേഹം വാഗ്ദേവത മാസിക എസ് എസ് സി., എച്ച് എസ് സി പരീക്ഷയിൽ ഉന്നത വിജയം നേടിയ വിദ്യാർത്ഥികളെ അനുമോദിക്കുന്ന ചടങ്ങ് ആക്കുർഡി യിലുള്ള സീസൺസ് ബാങ്കറ്റ് ഹാളിൽ വൈകീട്ട് 5.30 ന് ഉദ്ഘാടനം ചെയ്ത് വിദ്യാർത്ഥി സംഗമത്തെ അഭിസംബോധന ചെയ്യുകയായിരുന്നു അദ്ദേഹം. വിജയകരമായ ജീവിതം നയിക്കുന്നതിൽ അച്ചടക്കം ഒരു പ്രധാന പങ്ക് വഹിക്കുന്നു; അതിനാൽ എല്ലാ വിദ്യാർത്ഥികളും നന്നായി പഠിക്കുമ്പോൾ അച്ചടക്കമുള്ള ജീവിതം പിന്തുടരണമെന്ന് .
ഏതൊരു ലക്ഷ്യവും കൈവരിക്കുന്നതിന് ഭാവനാവൽക്കരണം വളരെ പ്രധാനമാണ്. ഒരാൾക്ക് അവരുടെ ലക്ഷ്യത്തിന്റെ അവസാനംവരെ ഭാവനാവത്കരിച്ചു മുന്നോട്ട് നീങ്ങാൻ കഴിയുമെങ്കിൽ, അവർക്ക് അവരുടെ ലക്ഷ്യങ്ങൾ കൈവരിക്കാനാകും എന്നത് സുനിശ്ചിതമാണ്. വലിയ സ്വപ്നങ്ങൾ കാണാൻ പഠിക്കുക, സ്വയം വിശ്വസിക്കുക, നിങ്ങളുടെ ആഗ്രഹങ്ങൾ പിന്തുടരുക, നിങ്ങൾ ലക്ഷ്യസ്ഥാനത്ത് എത്തും എന്നും അദ്ദേഹം കൂട്ടി ചേർത്തു.
ശിവരഞ്ജിനി ഹരിഹരന്റെ പഞ്ചാരിമേളത്തോടെ ആരംഭിച്ച പരിപാടിയിൽ വെച്ച് ബിന്ദു ജി. പിള്ള രചിച്ച "പ്രകമ്പനങ്ങൾ" എന്ന ചെറുകഥാ സമാഹാരം പ്രശസ്ത സാഹിത്യ നിരൂപകനും പ്രഭാഷകനുമായ സജി എബ്രഹാം ബ്രിഗേഡിയർ രാജയ്ക്ക് നൽകികൊണ്ട് പ്രകാശനം ചെയ്തു. മുപ്പ്ര ഹെൽത്ത് കെയർ പ്രൈവറ്റ് ലിമിറ്റഡ് മാനേജിങ് ഡയറക്ടർ ഡോ. റീപ പവിത്രൻ, ജനറൽ മോട്ടോർസ് മുൻ പ്ലാന്റ് ഡയറക്ടർ വിനയ് പാട്ടിൽ, പ്രോട്ടോസ്റ്റാർ ടെക്നോളോജിസ് പ്രൈവറ്റ് ലിമിറ്റഡ് മാനേജിങ് ഡയറക്ടർ രാഹുൽ രാജൻ, യു കെ യിലെ വിദ്യാർത്ഥിനി അശ്വതി ജിജി, കൺസേർട് ഗ്രൂപ്പ് ഓഫ് കമ്പനീസിന്റെ മാനേജിങ് ഡയറക്ടർ കെ. സി. ശുചീന്ദ്രൻ തുടങ്ങിയവർ വിവിധ വിഷയങ്ങളിൽ വിദ്യാർത്ഥികൾക്ക് മാർഗനിർദേശം നൽകികൊണ്ട് അവരെ ആദരിച്ചു. സാമൂഹിക - സാംസ്കാരിക - കാരുണ്യ പ്രവർത്തകനായ രമേഷ് അമ്പലപ്പുഴയെ ചടങ്ങിൽ വെച്ചാദരിച്ചു. അനീഷ ബി നായർ, ജാൻ മേരി ജോസഫ് എന്നിവർ അവതാരകരായിരുന്നു. പ്രോഗ്രാം കൺവീനർ കെ സി ശുചീന്ദ്രൻ സ്വാഗതവും മാനേജിങ് എഡിറ്റർ ഹർഷ് നായർ നന്ദിയും പറഞ്ഞു. സപ്ന വി. മാരാർ, സ്മിത അനിൽ മാരാർ, കെ. അരവിന്ദാക്ഷൻ, ദേവിക പി നായർ, കെ രഞ്ജിത്ത്, ഹരിഹരൻ പി, വൈഷ്ണവി വി. മാരാർ, വിദ്യ വേണുഗോപാൽ, വേലായുധൻ പി. എന്നിവർ പരിപാടികൾക്ക് നേതൃത്വം നൽകി. പുണെ ജില്ലയിലെ 78 മലയാളി വിദ്യാർത്ഥികളെയാണ് ചടങ്ങിൽ വെച്ചാദരിച്ചത്. ഇതിൽ 90 ശതമാനത്തിൽ അധികം മാർക്ക് വാങ്ങിയ 52 വിദ്യാർത്ഥികൾക്ക് ക്യാഷ് അവാർഡും നൽകി.
അനീഷ ഭാസ്കരൻ നായരുടെ ഗാനാലാപനം, ശിവരഞ്ജിനിയുടെ പഞ്ചാരിമേളം ഇവ പരിപാടികൾക്ക് വേറിട്ടൊരനുഭവം പകർന്നു. കാസറവാടിയിലുള്ള പ്രിയങ്ക ഹോട്ടൽ തയ്യാറാക്കിയ സ്വാദേറിയ ചൂട് പഴംപൊരിയും, പരിപ്പുവടയും ചായയും, അതിഥികൾ, വിദ്യാർത്ഥികൾ, രക്ഷിതാക്കൾ, മറ്റ് ക്ഷണിതാക്കൾക്ക് രുചിഭേദം പകർന്നു. നല്ല മഴയായിട്ട് കൂടിയും തിങ്ങി നിറഞ്ഞ സദസ്സിലായിരുന്നു പരിപാടികൾ നടന്നത്. സീസൺസ് പാർട്ട് ണർ അമിത്തിന് നന്ദി പറയാതെ വാഗ്ദേവതയ്ക്ക് മുന്നോട്ട് പോകാൻ സാധിക്കില്ല. അത്രയും നല്ല സഹകരണമായിരുന്നു അദ്ദേഹത്തിൻറെ ടീം ഈ പരിപാടിയുടെ വിജയത്തിന് നൽകിയത്.