05/05/2024
#တတိယဘာလင်
ဂျာမဏီရဲ့ ခေါင်းဆောင် ဟစ်တလာ ကျရှုံးသွားတဲ့နောက် ဒုတိယကမ္ဘာစစ်ကပြီးသွားခဲ့တယ်။ စစ်ပြီးသွားတဲ့အချိန်မှာ ကုလသမ္မဂလည်းမပေါ်သေးတော့ စစ်ရှုံးနိုင်ငံဖြစ်တဲ့ ဂျာမဏီကို ခွဲခြမ်း အုပ်ချုပ်ကြတဲ့အခါ အနောက်နိုင်ငံတွေက အနောက်အခြမ်းကို အုပ်ချုပ်ပြီး အရှေ့ဘက်ခြမ်းမှာ ရုရှားက အုပ်ချုပ်တယ်။ ဒီလိုနဲ့ ဂျာမဏီဟာ အရှေ့ဂျာမဏီနဲ့ အနောက်ဂျာမဏီ ဆိုပြီး နှစ်ခြမ်းကွဲသွားတယ်။
ဒီမှာတင်မပြီးသွားသေးဘူး ဂျာမဏီနိုင်ငံရဲ့ မြို့တော် “ဘာလင်” က အရှေ့ဂျာမဏီ ဘက်ခြမ်းမှာရှိနေတဲ့အတွက် မြို့တော်ကိုလည်း အရှေ့ဘာလင်နဲ့ အနောက်ဘာလင် ဆိုပြီးထပ်ကွဲပြန်တယ်။
အာဏာရှင် အုပ်ချုပ်တာခံရတဲ့ အရှေ့ဂျာမဏီကလူတွေက အနောက်ဂျာမဏီဘက်မှာပဲ နေလိုကြတယ်၊ အဲ့ဒီ့ထဲမှာ ပညာတက်လူငယ်တွေက 70% ဝန်းကျင်လောက်ရှိတယ်တဲ့။ ဒါကိုမလိုလားတဲ့ အာဏာရှင်တွေက သူတို့ပိုင်တဲ့ မြို့တော် “အရှေ့ဘာလင်” ကို အုတ်တံတိုင်းနဲ့ ခတ်လိုက်ပြီး အနောက်ဘက်ခြမ်းကိုသွားလို့မရအောင် လုပ်လိုက်ကြတယ်။
အုတ်တံတိုင်းကို ကြည့်မယ်ဆိုရင် တံတိုင်းရဲ့ အပြင် ဘက်ခြမ်းက “အနောက်ဘာလင်” ဖြစ်ပြီးတော့ အနောက်ဘာလင်က လူတွေက အုတ်တံတိုင်းနားကို ကပ်လို့ရတဲ့အပြင် ဆေးရောင်တွေမှုတ်ပြီး အလှတွေတောင် ဆင်ထားလိုက်ကြသေးတယ်။ ဒါပင်မဲ့ အရှေ့ဘာလင်ဘက်ခြမ်းက လူတွေကတော့ အုတ်တံတိုင်းနားကပ်လို့မရအောင် ဆူးတွေ၊ ခြံစည်းရိုးတွေ၊ ထပ်ကာထားတယ်။ သဲတွေခင်းပြီး မိုင်းတွေထောင်ထားတယ်။
ဆိုလိုတာက ဘာလင်တံတိုင်းဆိုတာ ရန်သူနိုင်ငံက ကိုယ့်ကို လာတိုက်မှာကြောက်လို့ ကာထားတဲ့တံတိုင်းမဟုတ်ပဲ ကိုယ့်နိုင်ငံသားတွေက သူများနိုင်ငံကိုသွားလို့မရအောင် တားထားတဲ့တံတိုင်းဖြစ်ပြီး ကမ္ဘာ့သမိုင်းမှာ ရှက်စရာအကောင်းဆုံး တံတိုင်းတစ်ခုအဖြစ် သမိုင်းဝင်သွားတယ်။
ဒါမျိုးကို ကျင့်သုံးတဲ့ အာဏာရှင်နိုင်ငံဆိုတာ ယနေ့ခေတ်အထိရှိသေးတယ်။ အုတ်တံတိုင်းတစ်ခု မဟုတ်ပင်မဲ့ အစစအရာရာ ပိတ်ထားတဲ့ မြောက်ကိုရီးယားနိုင်ငံဟာ ဒုတိယ ဘာလင်တံတိုင်းလို့ပြောလို့ရတယ်။ အခုတော့ မြန်မာနိုင်ငံကလည်း တတိယ ဘာလင်တံတိုင်းဖြစ်လာခဲ့ပြီ။
