Alleppey Live

30/10/2024

അമ്പലപ്പുഴയിലെ ആദ്യ അദാലത്തിൽ 223 കേസുകൾ തീർപ്പാക്കി

ഭൂമി തരംമാറ്റ അപേക്ഷകള്‍ വേഗത്തില്‍ തീര്‍പ്പാക്കുന്നതിനായി സർക്കാർ നിർദ്ദേശ പ്രകാരം സംസ്ഥാനവ്യാപകമായി താലൂക്ക് തലത്തില്‍ നടത്തുന്ന അദാലത്തുകള്‍ക്ക് ജില്ലയിൽ തുടക്കമായി. ജില്ലയിലെ ആദ്യ അദാലത്ത് അമ്പലപ്പുഴ താലൂക്കിൽ താലൂക്ക് ഓഫീസ് ഹാളിൽ നടന്നു.

അദാലത്തിൽ ഈ വർഷം ആഗസ്റ്റ് 31 വരെയുള ഫീസിളവിനർഹതയുള്ള ( 25 സെൻ്റിൽ താഴെ) ഫോം 6 അപേക്ഷകളും, ഡാറ്റാ ബാങ്കിൽ നിന്നു ഒഴിവാക്കുന്നതിനായുള്ള ഫോം 5 അപേക്ഷകളുമാണ് പരിഗണിച്ചിട്ടുള്ളത്. അദാലത്തിൽ 223 കേസുകൾ തീർപ്പാക്കി. ഈ കാലയളവിലെ തീർപ്പാക്കാൻ ശേഷിയ്ക്കുന്ന കേസുകളിൽ നവംബർ 30 നുളളിൽ തീർപ്പാക്കുന്നതിനുള്ള നടപടികൾ തുടരും. ഓഗസ്റ്റ് 31 വരെ ലഭിച്ച അപേക്ഷകൾ എത്രയും പെട്ടെന്ന് തീർപ്പാക്കണമെന്ന് ബന്ധപ്പെട്ട ഉദ്യോഗസ്ഥർക്ക് നിർദ്ദേശം നൽകി.

ബഹു.റവന്യൂ വകുപ്പ് മന്ത്രി ശ്രീ.കെ.രാജന്റെ പ്രത്യേക നിര്‍ദേശപ്രകാരം സംഘടിപ്പിക്കുന്ന അദാലത്ത് ജില്ലാ കളക്ടര്‍മാരുടെ മേല്‍നോട്ടത്തിലാണ് നടക്കുക. നിലവിലുള്ള അപേക്ഷകളില്‍ ഉദ്യോഗസ്ഥ തലത്തില്‍ തീര്‍പ്പാക്കലാണ് അദാലത്തുകൊണ്ട് ഉദ്ദേശിക്കുന്നത്. 2024 സെപ്തംബറോടെ സംസ്ഥാനത്തെ 27 ആര്‍ഡിഒ മാര്‍ക്കൊപ്പം ഡെപ്യൂട്ടി കളക്ടര്‍മാര്‍ക്കു കൂടി തരംമാറ്റ അപേക്ഷകള്‍ പരിഗണിക്കാനുള്ള അധികാരം നല്‍കി നിയമസഭ തണ്ണീര്‍ത്തട സംരക്ഷണ നിയമം ഭേദഗതി ചെയ്തിരുന്നു. താലൂക്ക് അടിസ്ഥാനത്തില്‍ ആര്‍ഡിഒ മാരും ഡെപ്യൂട്ടി കളക്ടര്‍മാരുമാണ് ഇപ്പോള്‍ തരം മാറ്റ അപേക്ഷകള്‍ കൈകാര്യം ചെയ്യുന്നത്. ഈ സാഹചര്യത്തിലാണ് രണ്ടാം ഘട്ട അദാലത്ത് താലൂക്ക് അടിസ്ഥാനത്തില്‍ നടത്താന്‍ തീരുമാനിച്ചത്.

25/09/2024

പച്ചമലയാളം കോഴ്‌സിന് തുടക്കം

ആലപ്പുഴ: ജില്ലാ സാക്ഷരതാ മിഷന്റെ നേതൃത്വത്തില്‍ പച്ചമലയാളം ഭാഷാ സര്‍ട്ടിഫിക്കറ്റ് കോഴ്‌സിന് തുടക്കം. ജില്ലാ പഞ്ചായത്ത് പ്രസിഡന്റ് കെ. ജി. രാജേശ്വരി ആലപ്പുഴ ഗവണ്‍മെന്റ് മുഹമ്മദന്‍സ് ബോയ്‌സ് ഹൈസ്‌കൂളില്‍ ഉദ്ഘാടനം ചെയ്തു.

മാതൃഭാഷ പഠനം പ്രോത്സാഹിപ്പിക്കുന്നതിന് വിഭാവനം ചെയ്ത പച്ചമലയാളം പി.എസ്‌സി. അംഗീകരിച്ച പരിഷ്‌കരിച്ച ഭാഷാപഠന കോഴ്‌സാണ്. രണ്ട് സെമസ്റ്ററുകള്‍ ആയി ഒരു വര്‍ഷം നീണ്ടുനില്‍ക്കുന്ന പാഠ്യപദ്ധതിയാണ് പച്ചമലയാളം. കേരള സംസ്ഥാന സാക്ഷരതാ മിഷന്‍ എസ്.സി.ഇ.ആര്‍.ടി.യുടെ മേല്‍നോട്ടത്തിലാണ് ഈ പാഠ്യ പദ്ധതി നടപ്പിലാക്കുന്നത്. ജില്ല കോര്‍ഡിനേറ്റര്‍ കൊച്ചുറാണി മാത്യു ഉദ്ഘാടന യോഗത്തിന് അധ്യക്ഷത വഹിച്ചു, ജില്ലാപഞ്ചായത്ത് അംഗം ആര്‍. റിയാസ് മുഖ്യപ്രഭാഷണം നടത്തി, പച്ചമലയാളം അധ്യാപിക സവിത, ആലപ്പുഴ മുനിസിപ്പാലിറ്റി പ്രേരക് പ്രമീള, അസിസ്റ്റന്റ് കോര്‍ഡിനേറ്റര്‍ എസ്. ലേഖ മുനിസിപ്പല്‍ പ്രേരക് ഉഷ തുടങ്ങിയവര്‍ പങ്കെടുത്തു.

31/08/2024

ബിന്ദു പത്മനാഭൻ തിരോധാന കേസ്സ് അട്ടിമറിച്ചതിനെതിരെ ആക്‌ഷൻ കൗൺസിൽ.

ചേർത്തല കടക്കരപ്പള്ളി സ്വദേശിനിയായ ബിന്ദു പദ്മനാഭന്റെ തിരോധാനവുമായി ബന്ധപ്പെട്ട കേസ് അന്വേഷണം നിലച്ച രീതിയിൽ ആണ്.ബിന്ദുവിന്റെ തിരോധാനവുമായി ബന്ധപ്പെട്ട് അന്വേഷണം ശക്തമാക്കണമെന്നാവശ്യപ്പെട്ട് ആക്ഷൻ കൗൺസിൽ എന്ന നിലയിൽ നിരവധിയായ പ്രവർത്തനങ്ങൾ നടത്തിയതിനെ തുടർന്ന് ആദ്യ ഘട്ടത്തിൽ കുറച്ചു പ്രതികളെ പിടികൂടി എന്നാൽ ബിന്ദുവിനെ കണ്ടെത്തുന്നതിനോ മറ്റു വിവരങ്ങൾ ലഭ്യമാക്കുന്നതിനോ സാധ്യമായിട്ടില്ല.ഒരു സ്ത്രീയുടെ തിരോധാനത്തോടൊപ്പം ഭൂമാഫിയയുടെ ഇടപെടൽ ഇതിൽ ഉണ്ടായിട്ടുണ്ട് വളരെ വലിയ രീതിയിൽ രാഷ്ട്രീയ ഇടപെടൽ ഉണ്ടായിട്ടുണ്ട് എന്ന് ഞങ്ങൾ അന്ന് പറഞ്ഞിരുന്നു ചേർത്തല പള്ളിപ്പുറം സ്വദേശിയായ സിപിഎം മുൻ ഏരിയ സെൻ്റർ അംഗമായ നേതാവിന് നേരെ അന്വേഷണം വരുമെന്ന ഘട്ടത്തിൽ സിപിഎം മുൻ ജില്ലാ സെക്രട്ടറിയും സംസ്ഥാന കമ്മറ്റി അംഗവുമായ സിബി ചന്ദ്രബാബു ഇടപെട്ട് ഈ കേസ് അന്വേഷണം അട്ടിമറിക്കുകയായിരുന്നു.ടി കേസ് പ്രതിയും സിപിഎം നേതാക്കളും ഒരുമിച്ചുള്ള ആഴ്ചകൾക്കു മുൻപുള്ള ചിത്രങ്ങളും മറ്റും ഇവർ തമ്മിലുള്ള ബന്ധം വ്യക്തമാകുന്നതാണ്.ഇതിൽ രാഷ്ട്രീയ ബന്ധമടക്കം ഉള്ള വിവരങ്ങൾ പുറത്തുകൊണ്ടുവരണം എന്നും ബിന്ദുവിന്റെ തിരോധാനം കേന്ദ്ര ഏജൻസിയെ കൊണ്ട് അന്വേഷിപ്പിക്കണമെന്നും ആക്‌ഷൻ കൗൺസിൽ ചെയർമാൻ കെ.ആർ.രൂപേഷ് ആലപ്പുഴയിൽ പത്രസമ്മേളനത്തിൽ ആവശ്യപ്പെട്ടു.

CPM സംസ്ഥാന കമ്മറ്റി അംഗം സി.ബി. ചന്ദ്രബാബു ബിന്ദു പത്മനാഭൻ തിരോധാന കേസിലെ പ്രതി ഷിൽജിയ്ക്കും CPM ഏരിയ സെൻ്റർ അംഗമായിരുന്ന ബെന്നിയ്ക്കും ഒപ്പം.

27/08/2024

*വയോജനങ്ങൾക്ക് സഹായ ഉപകരണങ്ങൾ വിതരണം ചെയ്തു*

ചേർത്തല നഗരസഭ വാർഷിക പദ്ധതിയിൽ ഉൾപ്പെടുത്തി വയോജനങ്ങൾക്കുള്ള സഹായ ഉപകരണങ്ങളുടെ വിതരണ ഉദ്ഘാടനം ചെയർപേഴ്സൺ ഷേർളി ഭാർഗവൻ നിർവഹിച്ചു.

2024 - 25 വർഷത്തെ വാർഷിക പദ്ധതിയിൽ ഉൾപ്പെടുത്തി 10 ലക്ഷം രൂപമുടക്കിയാണ് വയോജനങ്ങൾക്കുള്ള സഹായ ഉപകരണങ്ങൾ വിതരണം ചെയ്തത്. വീൽചെയർ, വോക്കർ, ശ്രവണസഹായി തുടങ്ങിയവയാണ് വിതരണം ചെയ്തത്.

വൈസ് ചെയർമാൻ
റ്റി എസ് അജയകുമാർ അധ്യക്ഷത വഹിച്ച യോഗത്തിൽ
സ്റ്റാൻഡിങ്ങ് കമ്മിറ്റി ചെയർമാൻമാരായ
ശോഭ ജോഷി,ജി. രഞ്ജിത്ത്,
കൗൺസിലർമാരായ
ഡി സൽജി, എം കെ പുഷ്പകുമാർ,ഷീജ സന്തോഷ്,കനകമ്മ മധു,
ശ്രീജ മനോജ്,
സീനാമോൾ ദിനകരൻ,
ബാബുമുള്ളൽ ചിറ,
പ്രമീള ദേവി,എ അജി,
ബി. ഭാസി, മുൻസിപ്പൽ സെക്രട്ടറി ടി കെ സുജിത്, ഐ സി ഡി എസ് സൂപ്പർവൈസർ ലക്ഷ്മി തുടങ്ങിയവർ സംസാരിച്ചു.

27/08/2024

എസ് ദിനേശ് പൈ അന്തരിച്ചു. ചേർത്തല നഗരസഭ പതിനൊന്നാം വാർഡിൽ കൃഷ്ണകൃപയിൽ എസ് ദിനേശ് പൈ (റിട്ടയേർഡ് റബ്ബർ ബോർഡ്‌ അസിസ്റ്റന്റ് സെക്രട്ടറി )അന്തരിച്ചു. ഭാര്യ :എസ് വി ലക്ഷ്മി പൈ, മക്കൾ കൃഷ്ണപ്രിയ, കൃഷ്‌ണേന്ദു മരുമക്കൾ :ഉല്ലാസ് (കായംകുളം)റോഷിത് (mattancherry) സംസ്കാരം ഇന്ന് വൈകിട്ട് 7 മണിക്ക്

26/08/2024

അമ്പലപ്പുഴ മണ്ഡലത്തിലെ വിവിധ പ്രവൃത്തികളുടെ നിർമാണ പുരോഗതി വിലയിരുത്തുന്നതിനായി ബഹു.എം.എൽ.എ. ശ്രീ. എച്ച് സലാമിൻറെ അധ്യക്ഷതയിൽ കളക്ടറേറ്റിൽ യോഗം ചേർന്നു.

25/08/2024

21/08/2024

മന്ത്രി എം.ബി.രാജേഷ് പങ്കെടുക്കുന്ന തദ്ദേശ ഭരണ അദാലത്ത് നാളെ;
പരാതികൾ പരിഗണിക്കാനായി 8 കൗണ്ടറുകൾ

പുതിയ പരാതികൾ തത്സമയം സ്വീകരിക്കാൻ പ്രത്യേക സംവിധാനം

സംസ്ഥാന സർക്കാരിന്റെ മൂന്നാം വാർഷികത്തോടനുബന്ധിച്ച്
ആലപ്പുഴ ജില്ലയിലെ തദ്ദേശസ്ഥാപനങ്ങളിൽ പൊതുജനങ്ങളുടെ തീർപ്പ് ആകാത്ത പരാതികൾ തീർപ്പാക്കുന്നതിനും തൽസമയം ലഭിക്കുന്ന പരാതികളിൽ തീരുമാനം എടുക്കുന്നതിനും തദ്ദേശസ്വയംഭരണ വകുപ്പ് മന്ത്രി എം ബി രാജേഷ് നേരിട്ട് പങ്കെടുക്കുന്ന ജില്ലാ തല അദാലത്ത് നാളെ (ഓഗസ്റ്റ് 22) രാവിലെ എസ്.ഡി.വി. സെന്റീനറി ഹാളിൽ നടക്കും. രാവിലെ 8.30ന് രജിസ്ട്രേഷൻ നടപടികൾ ആരംഭിക്കും. അദാലത്തിന്റെ ജില്ലാതല ഉദ്ഘാടനം 9. 30 ന് മന്ത്രി എം ബി രാജേഷ് നിർവഹിക്കും. പി പി ചിത്തരഞ്ജൻ എംഎൽഎ അധ്യക്ഷത വഹിക്കുന്ന ചടങ്ങിൽ ഫിഷറീസ് സാംസ്കാരിക വകുപ്പ് മന്ത്രി സജി ചെറിയാൻ, കൃഷി വകുപ്പ് മന്ത്രി പി പ്രസാദ് എന്നിവർ പങ്കെടുക്കും. ജില്ലയിൽ നിന്നുള്ള എംപിമാർ, എംഎൽഎമാർ, ജില്ല പഞ്ചായത്ത് പ്രസിഡന്റ്, ജില്ല കളക്ടർ, തദ്ദേശസ്വയംഭരണ വകുപ്പ് ഉന്നത ഉദ്യോഗസ്ഥർ തുടങ്ങിയവർ വേദിയിൽ ഉണ്ടാകും.

ആകെ 8 കൗണ്ടറുകളാണ് സജ്ജമാക്കിയിട്ടുള്ളത്. നിശ്ചിത തീയതിക്കകം അദാലത്തിൽ ഓൺലൈനായി അപേക്ഷ നൽകിയവർക്ക്
പ്രത്യേക കൗണ്ടറിൽ ബന്ധപ്പെടാം.പുതുതായി അപേക്ഷകൾ നൽകുന്നവർക്കും അപ്പോൾ തന്നെ പരിഹാരം നിർദ്ദേശിക്കാനുള്ള സംവിധാനം ഉണ്ട്. പരാതികൾ പരിഗണിക്കുന്ന അഞ്ച് ഡസ്കുകൾക്കുപുറമേ ഉപജില്ലാതല പരിഹാര ഡസ്ക്, ജില്ല തല പരിഹാര ഡസ്ക്, സംസ്ഥാന തല പരിഹാര ഡസ്ക് എന്നിവയും പ്രവർത്തിക്കും. അപേക്ഷകർ അവരവർ വരുന്ന തദ്ദേശ സ്ഥാപനത്തിനായുള്ള കൗണ്ടറിലെത്തി പരാതി നൽകണം. ഇവർക്ക് ടോക്കൺ നൽകും. പൊതുജനങ്ങളെ സഹായിക്കുന്നതിന് വോളണ്ടിയർമാരുടെ സഹായവുമുണ്ടാകും.

02/08/2024

ഓഗസ്റ്റ് 10-ന് ആലപ്പുഴ പുന്നമടക്കായലിൽ നടത്താനിരുന്ന നെഹ്റുട്രോഫി ജലമേള മാറ്റിവച്ചു. വയനാട് ദുരന്തത്തിന്റെ പശ്ചാത്തലത്തിൽ ബഹു.മുഖ്യമന്ത്രിയും ജില്ലയിലെ ബഹു. മന്ത്രിമാരായ ശ്രീ.പി.പ്രസാദും ശ്രീ.സജി ചെറിയാനും നടത്തിയ കൂടിയാലോചനയിലാണ് തീരുമാനം.

31/07/2024

ബഹു. മുഖ്യമന്ത്രിയുടെ അറിയിപ്പ്

വയനാടിലെ ദുരിത ബാധിതര്‍ക്ക് ദുരിതാശ്വാസ സഹായം നല്കുവാന്‍ ആഗ്രഹിക്കുന്നവര്‍ മുഖ്യമന്ത്രിയുടെ ദുരിതാശ്വാസ നിധിയിലേക്ക് ലഭ്യമാക്കുക. ദുരിത ബാധിതര്‍ക്ക് എല്ലാ സഹായവും സര്‍ക്കാര്‍ നല്‍കുന്നത് മുഖ്യമന്ത്രിയുടെ ദുരിതാശ്വാസ നിധിയിലൂടെ ആയിരിക്കും.

ഔദ്യോഗിക ദുരിതാശ്വാസ പ്രവര്‍ത്തകര്‍ അല്ലാത്തവര്‍ ആരും വയനാടിലേക്ക് പോകരുത്. മറ്റുള്ളവര്‍ പോയാല്‍ പ്രാദേശിക സാഹചര്യം കാരണം വഴിയില്‍ തടയുവാന്‍ സാധ്യത ഉണ്ട്.

എന്തെങ്കിലും സാഹചര്യത്തില്‍ ദുരിതാശ്വാസ സഹായമായി വസ്തുക്കള്‍ വാങ്ങിയവര്‍ അതാത് ജില്ലയിലെ കളക്ടറേറ്റില്‍ 1077 എന്ന നംബറില്‍ ബന്ധപ്പെട്ടു അറിയിക്കുക. ജില്ലാ കളക്ടറേറ്റില്‍ ഇവ ശേഖരിക്കുവാന്‍ സംവിധാനം ഒരുക്കും. പഴയ വസ്തുകള്‍ എത്തിക്കരുത്. അവ സ്വീകരിക്കില്ല.

പുതുതായി ആരും ഒന്നും ഇപ്പോൾ വാങ്ങേണ്ടതില്ല. ആവശ്യം ഉണ്ടെങ്കില്‍ ദുരന്ത നിവാരണ അതോറിറ്റി അറിയിക്കും.

30/07/2024

70-മത് നെഹ്‌റു ട്രോഫി വള്ളംകളി:
നിറച്ചാര്‍ത്ത് മത്സര വിജയികള്‍

ആലപ്പുഴ: 70-മത് നെഹ്‌റു ട്രോഫി ജലോത്സവത്തിന്റെ ഭാഗമായി സ്‌കൂള്‍ വിദ്യാര്‍ഥികള്‍ക്കായി നിറച്ചാര്‍ത്ത്- കളറിംഗ്, പെയിന്റിംഗ് മത്സരങ്ങള്‍ സംഘടിപ്പിച്ചു. എല്‍.പി., യു.പി., എച്ച്.എസ്. വിഭാഗത്തിലായിരുന്നു മത്സരങ്ങള്‍.

എല്‍.പി. വിഭാഗത്തില്‍ ജ്യോതി നികേതന്‍ സ്‌കൂളിലെ എയ്ബല്‍ ജോണ്‍ ഒന്നാം സ്ഥാനവും മാതാ സീനിയര്‍ സെക്കന്‍ഡറി സ്‌കൂളിലെ ഗ്രേറ്റ ജെ. ജോര്‍ജ് രണ്ടാം സ്ഥാനവും ലറ്റര്‍ലാന്റ് സ്‌കൂളിലെ പത്മശ്രീ ശിവകുമാര്‍ മൂന്നാം സ്ഥാനവും കരസ്ഥമാക്കി.

യു.പി. വിഭാഗത്തില്‍ മണ്ണാറശാല യു.പി. സ്‌കൂളിലെ അബിന്‍ സുരേഷ് ഒന്നാം സ്ഥാനവും എസ്.ഡി.വി. ബോയ്‌സ് എച്ച്.എസ്സിലെ ഹരിനന്ദന്‍ രണ്ടാം സ്ഥാനവും ശ്രീശങ്കര ഇംഗ്ലീഷ് മീഡിയം സ്‌കൂളിലെ അവന്തിക പി. നായര്‍ മൂന്നാം സ്ഥാനവും നേടി.

ഹൈസ്‌കൂള്‍ വിഭാഗത്തില്‍ കാര്‍മല്‍ അക്കാദമി എച്ച്.എസ്.എസിലെ അയാന ഫാത്തിമ ഒന്നാം സ്ഥാനവും എസ്.ഡി.വി. ബോയ്‌സ് എച്ച്.എസ്സിലെ എസ്. നവനീത് രണ്ടാം സ്ഥാനവും സെന്റ് ജോസഫ്സ് ജി.എച്ച്.എസ്.എസിലെ സുമയ്യ നൗഷാദ് മൂന്നാം സ്ഥാനവും കരസ്ഥമാക്കി.

ചിത്രകാരന്‍മാരായ സതീഷ് വാഴവേലില്‍, സിറില്‍ ഡോമിനിക്, വിമല്‍ റോയ് എന്നിവരായിരുന്നു വിധികര്‍ത്താക്കള്‍.

29/07/2024

കടലാക്രണം ചെറുക്കാന്‍ പ്രത്യേക കേന്ദ്ര പദ്ധതി ആവശ്യം- ജില്ല വികസന സമിതി

ജില്ലയുടെ തീരപ്രദേശങ്ങളില്‍ കടലാക്രണം ചെറുക്കാന്‍ അടിയന്തിരമായി പ്രത്യേക പദ്ധതി കേന്ദ്രസര്‍ക്കാര്‍ അനുവദിക്കണമെന്ന് ജില്ല വികസന സമിതി യോഗം. ജില്ലയിലെ തീരദേശ സംരക്ഷണത്തിനായി ശാസ്ത്രീയ പഠനം നടത്തി കടലാക്രമണം ചെറുക്കുന്നതിന് ഏകീകൃത പദ്ധതികള്‍ ആവിഷ്‌കരിക്കണമെന്ന് ശ്രീ.കെ.സി വേണുഗോപാല്‍ എം.പി.യും തീരപ്രദേശങ്ങളില്‍ നിരന്തരമായി കടലാക്രമണം ഉണ്ടാകുന്ന സാഹചര്യത്തില്‍ അടിയന്തിരമായി കേന്ദ്ര ഫണ്ട് അനുവദിക്കണമെന്ന് ശ്രീ.എച്ച്. സലാം എം.എല്‍.എ.യും യോഗത്തില്‍ ആവശ്യപ്പെട്ടു. ദേശീയപാത വികസനവുമായി ബന്ധപ്പെട്ട വിഷയങ്ങള്‍ വികസന സമിതിയോഗം പ്രത്യേക വിശകലനം ചെയ്തു.

പള്ളിത്തോട് ഭാഗത്ത് നിലനില്‍ക്കുന്ന വെള്ളക്കെട്ട് പരിഹരിക്കാന്‍ അടിയന്തിര നടപടി ഉണ്ടാകണമെന്ന് എം.പി. ആവശ്യപ്പെട്ടു. അമ്പലപ്പുഴ മിനിസിവില്‍ സ്റ്റേഷന്‍, ആലപ്പുഴ വെസ്റ്റ് സ്മാര്‍ട്ട് വില്ലേജ് ഓഫീസ് കെട്ടിടനിര്‍മ്മാണം എന്നിവയിലെ പുരോഗതി ശ്രീ.എച്ച്.സലാം എം.എല്‍.എ. വിലയിരുത്തി. തകഴി ഫയര്‍‌സ്റ്റേഷന്‍ കെട്ടിട നിര്‍മ്മാണ നടപടികള്‍, പുളിങ്കുന്ന് സബ് രജിസ്ട്രാര്‍ ഓഫീസ് കെട്ടിട നിര്‍മ്മാണത്തിന്റെ നിലവിലെ സ്ഥിതി എന്നിവ ശ്രീ.തോമസ് കെ. തോമസ് എം.എല്‍.എ. വിലയിരുത്തി. കായംകുളം കെ.എസ്.ആര്‍.ടി.സി. കെട്ടിട നിര്‍മ്മാണ നടപടികള്‍ ശ്രീമതി യു. പ്രതിഭ എം.എല്‍.എ വിലയിരുത്തി.

കുട്ടനാട്ടിലെ നെടുമുടി ജ്യോതി ജംഗ്ഷന്‍ മുതല്‍ കവലയ്ക്കല്‍ വരെയുള്ള പി.എം.ജി.എസ്.വൈ റോഡിന് സാമ്പത്തികാനുമതി ലഭ്യമാക്കണമെന്ന് ശ്രീ.കൊടിക്കുന്നില്‍ സുരേഷ് എം.പി യുടെ പ്രതിനിധി യോഗത്തില്‍ ആവശ്യപ്പെട്ടു. അരുക്കുറ്റി പഞ്ചായത്തില്‍ ബോട്ട് ജെട്ടിക്ക് സമീപം സ്ഥിതിചെയ്യുന്ന ആരോഗ്യ വകുപ്പിന്റെ സ്ഥലം ടൂറിസം വകുപ്പിന് കൈമാറിയാല്‍ കായല്‍ തീരം ടൂറിസം കേന്ദ്രമാക്കി വികസിപ്പിക്കാമെന്നും ആരോഗ്യ വകുപ്പിന്റെ സ്ഥലം ടൂറിസം വകുപ്പിന് കൈമാറണമെന്നും യോഗത്തില്‍ കുറിപ്പ് മുഖേന ശ്രീമതി ദലീമ ജോജോ എം.എല്‍.എ. ആവശ്യപ്പെട്ടു. ചെങ്ങന്നൂര്‍ നഗര നവീകരണം സംബന്ധിച്ച മാസ്റ്റര്‍ പ്ലാനില്‍ കാലാനുസൃതമാറ്റം വേണമെന്ന് ഫിഷറീസ് വകുപ്പ് മന്ത്രി ശ്രീ.സജി ചെറിയാന്റെ പ്രതിനിധി യോഗത്തില്‍ ആവശ്യപ്പെട്ടു. മാലിന്യ മുക്ത നവകേരളം പദ്ധതിയുടെ ഭാഗമായി ജില്ലയിലെ വിവിധ വകുപ്പുകള്‍ സ്വീകരിച്ച നടപടികള്‍ യോഗം പ്രത്യേകം ചര്‍ച്ച ചെയ്തു.

26/07/2024

നെഹ്റു ട്രോഫി വള്ളംകളിയുടെ ഭാഗമായി പബ്ലിസിറ്റി കമ്മിറ്റി വിദ്യാർഥികൾക്കായി നടത്തുന്ന 'നിറച്ചാർത്ത്' മത്സരങ്ങൾ ജൂലൈ 27ന് രാവിലെ 10.00 ന് ആലപ്പുഴ എസ്.ഡി.വി. സെന്റീനറി ഹാളിൽ നടക്കും.

എൽ.പി. സ്‌കൂൾ വിദ്യാർഥികൾക്ക് കളറിംഗ് മത്സരവും യു.പി, ഹൈസ്‌കൂൾ വിദ്യാർഥികൾക്ക് ചിത്രരചന(പെയിന്റിംഗ്) മത്സരവുമാണ് നടത്തുക. ക്രയോൺ, പേസ്റ്റൽസ്, ജലച്ചായം, പോസ്റ്റർ കളർ എന്നിങ്ങനെ ഏതു മാധ്യമവും ഉപയോഗിക്കാം. ഓയിൽ പെയിന്റ് ഉപയോഗിക്കാൻ പാടില്ല. എല്ലാ വിഭാഗത്തിലും ആദ്യ മൂന്നു സ്ഥാനങ്ങൾ നേടുന്നവർക്ക് സർട്ടിഫിക്കറ്റും ട്രോഫിയും നൽകും.

കളറിംഗ് മത്സരത്തിൽ ജില്ലയിലെ എൽ.പി. സ്‌കൂൾ വിദ്യാർഥികൾക്ക് പങ്കെടുക്കാം. നിറം നൽകാനുള്ള രേഖാചിത്രം സംഘാടകർ നൽകും. മറ്റ് സാമഗ്രികൾ മത്സരാർഥികൾ കൊണ്ടുവരണം. ഒന്നര മണിക്കൂറാണ് മത്സര സമയം. ചിത്രരചന (പെയിന്റിംഗ്) മത്സരത്തിൽ രണ്ടു വിഭാഗങ്ങളിലായി ജില്ലയിലെ യു.പി, ഹൈസ്‌കൂൾ വിദ്യാർഥികൾക്ക് പങ്കെടുക്കാം. വരയ്ക്കാനുള്ള പേപ്പർ സംഘാടകർ നൽകും. മറ്റ് സാമഗ്രികൾ മത്സരാർഥികൾ കൊണ്ടുവരണം. ഇവർക്ക് രണ്ടു മണിക്കൂറാണ് മത്സരസമയം. സമ്മാനം സ്വീകരിക്കാനെത്തുമ്പോൾ വിദ്യാർത്ഥിയാണെന്നുള്ള സ്‌കൂൾ അധികാരിയുടെ സാക്ഷ്യപത്രമോ ഐഡന്റിറ്റി കാർഡോ ഹാജരാക്കണം. ഫോൺ: 0477-2251349.

19/07/2024

പ്രിയപ്പെട്ടവരെ,

അരൂർ- തുറവൂർ ഉയരപ്പാത നിർമാണവുമായി ബന്ധപ്പെട്ട പ്രവർത്തനങ്ങൾ വിലയിരുത്തുന്നതിനായി ഇന്നലെ ബഹു. മന്ത്രി ശ്രീ.പി. പ്രസാദ്, ബഹു.എം.എൽ.എ. ശ്രീമതി ദലീമ ജോജോ എന്നിവർക്കൊപ്പം സന്ദർശനം നടത്തി.

റോഡ് നിർമാണവുമായി ബന്ധപ്പെട്ട് നിരവധി പേർ ഫേസ്ബുക്ക് കമന്റായും മെസ്സേജ് ആയും സങ്കടങ്ങളും ആവശ്യങ്ങളും നിർദേശങ്ങളും അറിയിക്കുന്നുണ്ട്. ഇവയെല്ലാം കൃത്യമായി നോട്ട് ചെയ്യുന്നുണ്ട്. പൊതുജനങ്ങൾക്ക് സാധ്യമായ എല്ലാ സൗകര്യങ്ങളും ഉറപ്പാക്കി പരമാവധി ബുദ്ധിമുട്ടുകൾ ഒഴിവാക്കി റോഡിന്റെ നിർമ്മാണം പൂർത്തിയാക്കാനാണ് ലക്ഷ്യമിടുന്നത്.

ഇതിനായി ജില്ല ഭരണകൂടത്തിന്റെ ഭാഗത്ത് നിന്നും സാധ്യമായ എല്ലാ സഹായവും നിങ്ങൾക്ക് ഞാൻ ഉറപ്പ് നൽകുന്നു. നിർമാണ കരാറുകാർക്കും ബന്ധപ്പെട്ട വകുപ്പ് ഉദ്യോഗസ്ഥർക്കും ഇത് സംബന്ധിച്ച് കർശന നിർദ്ദേശം നൽകിയിട്ടുണ്ട്.

റോഡിന്റെ നിർമാണ പുരോഗതി വിലയിരുത്തുന്നതിനായി കൃത്യമായ ഇടവേളകളിൽ സ്ഥലം സന്ദർശിക്കുകയും യോഗങ്ങൾ വിളിച്ച് ചേർക്കുകയും ചെയ്യുന്നുണ്ട്. നിർദ്ദേശങ്ങൾ കൃത്യമായി പാലിക്കുന്നുണ്ടെന്ന് ഉറപ്പാക്കാൻ മിന്നൽ പരിശോധനകളും നടത്തും.

18/07/2024

എച്ചവൺ എൻവൺ: ജാഗ്രത വേണം

ഇൻഫ്ലുവൻസ വൈറസ് കാരണമുണ്ടാകുന്ന എച്ചവൺ എൻവണിനെതിരെ ജാഗ്രത നിർദേശവുമായി ജില്ല ആരോഗ്യ വിഭാഗം. പനി, തുമ്മൽ, തൊണ്ടവേദന, മൂക്കൊലിപ്പ്, ചുമ, ശ്വാസതടസ്സം, ഛർദ്ദി എന്നിവയാണ് രോഗ ലക്ഷണങ്ങൾ.
രോഗബാധയുള്ളവർ മൂക്കും വായും മറയ്ക്കാതെ തുമ്മുകയും ചുമക്കുകയും ചെയ്യുന്നതിലൂടെയും മറ്റുള്ളവരുമായി അടുത്തിടപെടുന്നതിലൂടെയും രോഗിയുടെ സ്രവങ്ങൾ പുരളാനിടയുള്ള പ്രതലങ്ങളിൽ സ്പർശിക്കുന്നതിലൂടെയുമാണ് രോഗം മറ്റുള്ളവരിലേക്ക് പകരുന്നത്.
രോഗലക്ഷണങ്ങൾ തുടക്കത്തിലെ തിരിച്ചറിഞ്ഞ് കൃത്യസമയത്ത് ചികിത്സ തേടണം
എച്ചവൺ എൻവൺ പനിക്ക് സർക്കാർ ആശുപത്രികളിൽ സൗജന്യ പരിശോധനയും ചികിത്സയും ലഭ്യമാണ്.
രോഗപ്പകർച്ച ഒഴിവാക്കാൻ വ്യക്തി ശുചിത്വവും സാമൂഹിക ശുചിത്വവും പാലിക്കുക.

രോഗബാധിതർ ശ്രദ്ധിക്കുക

രോഗമുള്ളപ്പോൾ നിർബന്ധമായും മാസ്ക് ധരിക്കുക. പനിയുള്ളപ്പോൾ മറ്റുള്ളവരിൽ നിന്ന് അകലം പാലിക്കുക. പൊതുസ്ഥലങ്ങൾ, ജോലി സ്ഥലങ്ങൾ എന്നിവിടങ്ങളിൽ നിന്നും വിട്ടു നിൽക്കുക. പനിയുള്ളപ്പോൾ കുഞ്ഞുങ്ങളെ സ്കൂൾ/അങ്കണവാടികൾ/ ക്രഷ് എന്നിവിടങ്ങളിൽ വിടാതിരിക്കുക .
രോഗമുള്ളവർ നന്നായി വിശ്രമിക്കുക.
കഞ്ഞിവെള്ളം, തിളപ്പിച്ചാറിയ വെള്ളം തുടങ്ങിയ പാനീയങ്ങൾ ധാരാളം കുടിക്കുക, പോഷകപ്രദമായ ഭക്ഷണം കഴിക്കുക. കൈകൾ ഇടയ്ക്കിടെ സോപ്പിട്ട് കഴുകുക. പൊതു ഇടങ്ങളിൽ തുപ്പരുത്. മൂക്കു ചീറ്റിയ ശേഷം ഉടനെ കൈകൾ സോപ്പിട്ട് കഴുകുക.
തുമ്മുമ്പോഴും ചുമയ്ക്കുമ്പോഴും മാസ്ക് മാറ്റരുത്.

പ്രതിരോധം ഉറപ്പാക്കുക

വ്യക്തി ശുചിത്വവും സാമൂഹിക ശുചിത്വവും ഉറപ്പാക്കുക.
പൊതു ഇടങ്ങളിലും തിരക്കുള്ള സ്ഥലങ്ങളിലും മാസ്ക് ധരിക്കുക.
കൈ കഴുകാതെ കണ്ണിലോ മൂക്കിലോ വായിലോ സ്പർശിക്കരുത്.
കൈകൾ സോപ്പ് ഉപയോഗിച്ച് കഴുകുകയോ ഇടയ്ക്കിടെ സാനിറ്റൈസർ ഉപയോഗിച്ച് അണുവിമുക്തമാക്കുകയും ചെയ്യുക.
രോഗം ഇല്ലാത്തവരും ആശുപത്രി സന്ദർശന വേളകളിൽ മാസ്ക് ധരിക്കുക. രോഗി സന്ദർശനത്തിനും മറ്റും ആശുപത്രികളിൽ പോകുന്നത് പരമാവധി ഒഴിവാക്കുക.
സമ്പർക്കം മൂലം രോഗസാധ്യത ഉള്ളവരും മറ്റു ഗുരുതര രോഗങ്ങൾക്ക് ചികിത്സയിലിരിക്കുന്ന രോഗസാധ്യത കൂടിയവരും മെഡിക്കൽ ഓഫീസറുടെ നിർദ്ദേശപ്രകാരം പ്രതിരോധമരുന്ന് കഴിക്കേണ്ടതാണ്. ഗർഭിണികളിലെ രോഗബാധ രോഗം ഗുരുതരമാകാനും മരണകരണമാകാനും സാധ്യതയുണ്ട്. ഗർഭിണികൾ ജലദോഷം പോലെയുള്ള രോഗലക്ഷണങ്ങൾ ഉണ്ടായാലും എത്രയും പെട്ടെന്ന് ചികിത്സ തേടുക.
ഹൃദ്രോഗം, ശ്വാസകോശ, കരൾ, കിഡ്നി രോഗങ്ങൾ, നാഡീ സംബന്ധമായ രോഗങ്ങൾ എന്നിവയുള്ളവർ, രക്താതിമർദ്ദം, പ്രമേഹം, ക്യാൻസർ തുടങ്ങിയ രോഗങ്ങൾ, സ്റ്റിറോയ്ഡ് മരുന്ന് കഴിക്കുന്നവർ, പ്രതിരോധ ശക്തി കുറയ്ക്കുന്ന മരുന്നുകൾ (ഇമ്യൂണോ സപ്പ്രസൻ്റുകൾ) കഴിക്കുന്നവർ കുഞ്ഞുങ്ങൾ എന്നിവർ കൂടുതൽ ശ്രദ്ധിക്കുക. രോഗലക്ഷണങ്ങൾ ഉണ്ടായാൽ ആരോഗ്യ പ്രവർത്തകരെ വിവരം അറിയിക്കുക.

17/07/2024

2023-24 വർഷത്തെ ക്രെഡിറ്റ് കാർഡ് ജില്ലാതലത്തിൽ പ്രസിദ്ധീകരിച്ചു

ജില്ലയിലെ കേരള എയ്‌ഡഡ് സ്കൂ‌ൾ എംപ്ലോയീസ് പ്രൊവിഡന്റ് ഫണ്ട് 2023-24 കാലയളവിലെ ക്രെഡിറ്റ് കാർഡ് പ്രസിദ്ധീകരണം വിദ്യാഭ്യാസ ഉപഡയറൂർ ശ്രീലത.ഇ.എസ് നിർവ്വഹിച്ചു. ശ്രീ. എസ്. അജിത്കുമാർ (അസിസ്റ്റന്റ് പ്രൊവിഡന്റ് ഫണ്ട് ഓഫീസർ, ആലപ്പുഴ), ശ്രീ. സക്കറിയ.പി.ബി, ശ്രീ. റെജി. റ്റി.ആർ (സീനിയർ സൂപ്രണ്ട്, ഡി.ഡി.ഇ ആലപ്പുഴ) കെ.എ.എസ്.ഇ.പി.എഫ് ആലപ്പുഴ ജില്ലാ ഓഫീസ് ജീവനക്കാർ എന്നിവരുടെ സാന്നിദ്ധ്യത്തിൽ2023-24 വർഷത്തെ ക്രെഡിറ്റ് കാർഡ് ഗെയിൻ പി.എഫ് വെബ്സൈറ്റിൽ ലഭ്യമാണ്.

17/07/2024

ഓഗസ്റ്റ് 10-ന് പുന്നമട കായലിൽ നടക്കുന്ന 70-ാമത് നെഹ്റു ട്രോഫി വള്ളംകളിയുടെ ടിക്കറ്റ് വിൽപന ആലപ്പുഴ റവന്യൂ ഡിവിഷൻ ഓഫീസിൽ ബഹു. എം.എൽ.എ. ശ്രീ. പി.പി. ചിത്തരഞ്ജൻ ഉദ്ഘാടനം ചെയ്തു. റമദ ഹോട്ടൽ ജനറൽ മാനേജർ ശ്രീ. അജയ് രാമൻ ആദ്യ ടിക്കറ്റ് ഏറ്റുവാങ്ങി.

ജില്ലയിലെ എല്ലാ താലൂക്ക് ഓഫീസുകളിലും തിരുവല്ല താലൂക്ക് ഓഫീസിലും ആലപ്പുഴ- കോട്ടയം ഡി.ടി.പി.സി. ഓഫീസുകളിലും സപ്ലൈ ഓഫീസുകളിലും ആർ.ടി.ഒ., ജോയിൻറ് ആർ.ടി.ഒ., സെയിൽ ടാക്സ് തുടങ്ങിയ സർക്കാർ ഓഫീസുകളിലും ടിക്കറ്റ് ലഭിക്കും. 3000 രൂപയുടെ ഗോൾഡ്, 2500 രൂപയുടെ സിൽവർ, 1500 രൂപയുടെ റോസ്, 500, 400, 200, 100 എന്നിങ്ങനെ രൂപയുടെ ടിക്കറ്റുകളാണ് ലഭ്യമാക്കിയിട്ടുള്ളത്.

16/07/2024

നെഹ്‌റുട്രോഫി: ക്യാപ്റ്റൻസ് മീറ്റ് ജൂലൈ 29ന്

ആഗസ്റ്റ് 10 -ാം തീയതി നടക്കുന്ന 70-ാമത് നെഹ്രു ട്രോഫി ജലോത്സവ മത്സര വള്ളംകളിക്ക് മുന്നോടിയായുള്ള ക്യാപ്റ്റൻസ് മീറ്റിംഗ്' ജൂലൈ 29 ന് നടക്കും. തിങ്കളാഴ്ച വൈ.എം.സി.എ പാലത്തിന് സമീപമുള്ള ഹാളിൽ രാവിലെ 10 മണിക്ക് ജില്ലാ കളക്ടർ അലക്‌സ് വർഗ്ഗീസ് ഉദ്ഘാടനം നിർവഹിക്കും. ഈ വർഷത്തെ ജലോൽസവത്തിന്റെ നിബന്ധനകളും, നിർദ്ദേശങ്ങളും അറിയിക്കും. എല്ലാ ടീമുകളെയും പരിചയപ്പെടുത്തും. യോഗത്തിൽ ഈ വർഷം നെഹ്രുട്രോഫി ജലോത്സവത്തിന് ആലപ്പുഴ റവന്യൂ ഡിവിഷൻ ഓഫീസിൽ നിന്നും രജിസ്‌ട്രേഷൻ ഫോം കൈപ്പറ്റിയിരിക്കുന്ന എല്ലാ ചൂണ്ടൻ വളളങ്ങളുടെയും മറ്റ് കളി വളളങ്ങളുടെയും ക്യാപ്റ്റൻമാരും ലീഡിംഗ് ക്യാപ്റ്റൻമാരും നിർബന്ധമായും പങ്കെടുക്കണം. നെഹ്റുട്രോഫി ജലോത്സവത്തിൽ പങ്കെടുക്കുന്നതിനുള്ള രജിസ്‌ട്രേഷൻ ഉറപ്പിക്കുന്നത് ക്യാപ്റ്റൻസ് മീറ്റിംഗിൽ ക്യാപ്റ്റനും ലീഡിംഗ് ക്യാപ്റ്റനും ഹാജരായി ഉദ്യോഗസ്ഥരുടെ സാന്നിദ്ധ്യത്തിൽ സൂഷ്മപരിശോധനയ്ക്ക് ശേഷം മാത്രമായിരിക്കും. യോഗത്തിൽ പങ്കെടുക്കാത്ത വള്ളങ്ങളുടെ ക്യാപ്റ്റനും ലീഡിംഗ് ക്യാപ്റ്റനും ഉണ്ടെങ്കിൽ ആ ക്ലബുകളുടെ ബോണസിൽ 50 ശതമാനം കുറവു വരുത്തുന്നതാണ്. മത്സരത്തിൽ പങ്കെടുക്കുന്ന ചുണ്ടൻ വള്ളങ്ങളിലെ തുഴച്ചിൽകാർക്കുള്ള ഫോം ആലപ്പുഴ സബ് കളക്ടറുടെ കാര്യാലയത്തിൽ നിന്നും വിതരണം ചെയ്യും. ഈ ഫോം പൂരിപ്പിച്ച് ജൂലൈ മാസം 29-ാം തീയതിയ്ക്കു മുമ്പ് ആലപ്പുഴ, ബോട്ട് ജെട്ടിക്ക് എതിർ വശത്തുള്ള മിനി സിവിൽസ്റ്റേഷൻ അനക്സിന്റെ രണ്ടാം നിലയിലുള്ള ആലപ്പുഴ, ഇറിഗേഷൻ ഡിവിഷൻ, എക്സിക്യൂട്ടീവ് എഞ്ചിനീയറുടെ കാര്യാലയത്തിൽ എത്തിക്കണമെന്ന് ആലപ്പുഴ, ഡിവിഷൻ എക്‌സിക്യൂട്ടീവ് എഞ്ചിനീയർ അറിയിച്ചു.

16/07/2024

ലെവൽ ക്രോസ് അറ്റകുറ്റപ്പണി: സമാന്തര ഗതാഗത സംവിധാനം ഏർപ്പെടുത്തി

കായംകുളം-ചെട്ടികുളങ്ങര റോഡിലെ കാക്കനാട് റെയിൽവേ ലെവൽ ക്രോസ്( എൽ.സി.നമ്പർ149)അറ്റകുറ്റപ്പണികൾക്കായി ജൂലൈ 17 രാവിലെ എട്ടുമണി മുതൽ ജൂലൈ 21 അടച്ചിടുന്നു. ഇതുമായി ബന്ധപ്പെട്ട് സമാന്തര ഗതാഗത സംവിധാനം ഒരുക്കുന്നത് സംബന്ധിച്ച് ചെങ്ങന്നൂർ ആർ.ഡി.ഓ ജി.നിർമൽ കുമാറിൻരെ സാന്നിധ്യത്തിൽ യോഗം ചേർന്നു. താഴെ പറയുന്ന ക്രമീകരണം വരുത്താൻ തീരുമാനിച്ചു.

മാവേലിക്കര- ചെട്ടികുളങ്ങര വഴി കായംകുളത്തിന് പോകേണ്ട വാഹനങ്ങൾ ഭഗവതിപ്പടി ജംഗ്ഷനിൽ നിന്നും വലത് തിരിഞ്ഞ് പത്തിയൂർ ആൽത്തറ ജംഗ്ഷനിൽ നിന്ന് ഇടത് തിരിഞ്ഞ് കുറ്റികുളങ്ങര വഴി കാക്കനാട് ചന്ത ജംഗ്ഷനിൽ നിന്നും വലത് തിരിഞ്ഞ് കായംകുളത്തിന് പോകേണ്ടതാണ്.

കായംകുളത്ത് നിന്നും ചെട്ടികുളങ്ങര വഴി മാവേലിക്കരക്ക് പോകേണ്ട ബസ്സും ചെറിയ വാഹനങ്ങളും കാക്കനാട് ചന്ത ജംഗ്ഷനിൽ നിന്നും ഇടത് തിരിഞ്ഞ് എരുവ അമ്പലത്തിന്റെ മുൻ വശത്തൂടെ ചെറിയ പത്തിയൂർ അമ്പലത്തിന്റെ തെക്ക് വശത്ത് കൂടി ഭഗവതിപ്പടി ജംഗ്ഷനിൽ നിന്നും ഇടത് തിരിഞ്ഞ് പോകുക.
മാവേലിക്കരയിൽ നിന്നും കായംകുളത്തിന് പോകേണ്ട ചരക്ക് വാഹനങ്ങൾ മാവേലിക്കര മിച്ചൽ ജംഗ്ഷനിൽ നിന്നും തെക്കോട്ട് തിരിഞ്ഞ് കോടതി ജംഗ്ഷൻ- ഓലകെട്ടി വഴി രണ്ടാംകുറ്റിയിൽ എതിച്ചെർന്ന് കായംകുളത്തിന് പോകേണ്ടതാണ്.

കായംകുളത്ത് നിന്നും മാവേലിക്കര വഴി പോകേണ്ട ചരക്ക് വാഹനങ്ങൾ രണ്ടാംകുറ്റിയിൽ എത്തി ഇടത്തോട്ട് തിരിഞ്ഞ് ഓലകെട്ടി- കോടതി ജംഗ്ഷനിൽ നിന്നും മിച്ചൽ ജംഗ്ഷൻ വഴി പോകേണ്ടതാണ്.

മേൽ സൂചിപ്പിച്ച വഴി കൂടാതെ, മാവേലിക്കരയിൽ നിന്നും കായംകുളത്തിന് പോകേണ്ട ചരക്ക് വാഹനങ്ങൾക്കും യാത്രാ വാഹനങ്ങൾക്കും മാവേലിക്കര കണ്ടിയൂർ ക്ഷേത്ര കവാടത്തിന്റെ എതിർവശത്തുള്ള റോഡിൽ നിന്നും തെക്കോട്ട് തിരിഞ്ഞ് കൊയ്പ്പള്ളികാരാഴ്മ വഴി ഒന്നാംകുറ്റിയിൽ എത്തിച്ചേർന്ന് കായംകുളത്തിന് പോകേണ്ടതാണ്.

ഭാഗവതിപ്പടി ജംഗ്ഷനിൽ പാർക്ക് ചെയ്തിട്ടുള്ള ഓട്ടോറിക്ഷകൾ ടി സ്ഥലത്ത് നിന്നും താൽക്കാലികമായി മാറ്റുന്നതിന് പത്തിയൂർ ട്രാഫിക് റെഗുലേറ്ററി കമ്മിറ്റി തുടർ നടപടി സ്വീകരിക്കണം.
കാക്കനാട് ജംഗ്ഷനിൽ പാർക്ക് ചെയ്തിട്ടുള്ള ഓട്ടോറിക്ഷകൾ ടി സ്ഥലത്ത് നിന്നും താൽക്കാലികമായി മാറ്റുന്നതിന് പത്തിയൂർ, കായംകുളം ട്രാഫിക് റെഗുലേറ്ററി കമ്മിറ്റി തുടർ നടപടി സ്വീകരിക്കേണ്ടതാണ്.
എല്ലാ സ്ഥലത്തും മതിയായ സൈൻബോർഡുകൾ സ്ഥാപിക്കുന്നതിന് മോട്ടോർ വാഹന വകുപ്പും, പോലീസും സംയുക്തമായി നടപടി സ്വീകരിക്കേണ്ടതാണെന്ന് ആർ.ഡി.ഓ അറിയിച്ചു.

13/07/2024

വലിയ കണ്ടെയിനർ പോലുള്ള ഹെവി വാഹനങ്ങൾ അനുവദിക്കില്ല

ഹൈവേ നിർമാണം നടക്കുന്ന തുറവൂർ മുതൽ അരൂർ വരെയുള്ള ഭാഗത്ത് കണ്ടെയ്നർ ഉൾപ്പെടെയുള്ള വലിയ ചരക്ക് വാഹനങ്ങൾ കടത്തി വിടാതിരിക്കാൻ ഉള്ള നടപടികൾ കർശനമായി നടപ്പാക്കാൻ തീരുമാനിച്ചു. നിലവിൽ തെക്കു നിന്നു (ആലപ്പുഴ നിന്ന്) വരുന്ന വാഹനങ്ങൾ തുറവൂരിൽ നിന്ന് ടി ഡി ഹൈസ്കൂൾ വഴി തിരിഞ്ഞു കുമ്പളങ്ങി വഴി മരട് ജംഗ്ഷനിൽ എത്തുന്ന ക്രമീകരണവും വടക്കു നിന്നും(അരൂർ ഭാഗത്തുനിന്ന്) വരുന്ന വാഹനങ്ങൾ അരൂക്കുറ്റി മാക്കേകടവ് വഴി തുറവൂർ വരുന്ന ക്രമീകരണവും ഏർപ്പെടുത്തിയിട്ടുള്ളതാണ്. വലിയ വണ്ടികൾ( കണ്ടെയ്നർ പോലുള്ള വലിയ ഹെവി വാഹനങ്ങൾ) തൃശ്ശൂരിൽ നിന്നും വരുന്നത് അങ്കമാലി വഴി പെരുമ്പാവൂരിലൂടെ തിരിച്ചുവിടും. എറണാകുളം ഭാഗത്തുനിന്ന് വരുന്ന വലിയ കണ്ടെയ്നറുകൾ കുണ്ടന്നൂർ ജംഗ്ഷനിൽ നിന്ന് തിരിച്ചു വിട്ടു തൃപ്പൂണിത്തുറ വഴി എംസി റോഡിലേക്ക് കടത്തിവിടും. ഈ ക്രമീകരണം കാര്യക്ഷമമാക്കുന്നതിന് ബന്ധപ്പെട്ട ജില്ലാ കളക്ടർമാർ, പോലീസ് ഉദ്യോഗസ്ഥർ എന്നിവർ നടപടി സ്വീകരിക്കും.

കൊല്ലം ഭാഗത്തുനിന്ന് വരുന്ന വാഹനങ്ങൾ അമ്പലപ്പുഴയിൽ വച്ച് തിരിച്ച് വിട്ട് തിരുവല്ല കടത്തിവിടും. എന്നാൽ ഇവിടെ റെയിൽവേ ക്രോസ് പ്രശ്നം ഉള്ളതിനാൽ ദീർഘദൂര കണ്ടെയിനർ ഹെവി വാഹനങ്ങൾ ചവറ ടൈറ്റാനിയം ഭാഗത്തുനിന്ന് തിരിച്ച് ശാസ്താംകോട്ട വഴി തിരിച്ചുവിടും .അമ്പലപ്പുഴ, അരൂർ ജംഗ്ഷനുകളിൽ വാഹന ഗതാഗതം വഴിതിരിച്ചു വിടുന്നതിന് ഹൈവേ പെട്രോൾ സംഘത്തെ നിയോഗിക്കാനും തീരുമാനിച്ചിട്ടുണ്ട്.
റോഡ് നിർമാണത്തിലെ പ്രതിസന്ധികൾ ചർച്ച ചെയ്യുന്നതിന്
രണ്ടാഴ്ച കൂടുമ്പോൾ യോഗം ചേരാനും തീരുമാനിച്ചു. ഈ ഭാഗത്തെ സ്കൂളുകൾ തടസ്സമില്ലാതെ തിങ്കളാഴ്ച മുതൽ പ്രവർത്തിക്കണമെന്നും കളക്ടർ പറഞ്ഞു.

09/07/2024

ജില്ലയിലെ നഗരസഭകൾ സമ്പൂർണ്ണ ശുചിത്വത്തിലേക്ക്

മാലിന്യമുക്തം നവകേരളം ക്യാമ്പയിന്റെ ഭാഗമായി ആലപ്പുഴ ജില്ലയിലെ നഗരസഭകളിൽ സമ്പൂർണ്ണ ശുചിത്വം കൈവരിക്കുന്നതിനുള്ള 2024- 25 കർമ്മ പദ്ധതി തയ്യാറാക്കുന്നതിനുള്ള ജില്ലാതല ശില്പശാല ജൂലൈ 4,5 തീയതികളിലായി മാരാരിക്കുളം നോർത്ത് ഗ്രാമപഞ്ചായത്തിൽ നടന്നു.ജില്ല ആസൂത്രണ സമിതി അദ്ധ്യക്ഷ കെ ജി രാജേശ്വരി ശില്പശാല ഉദ്ഘാടനം ചെയ്തു.തദ്ദേശ സ്വയംഭരണ വകുപ്പ് ജോയിന്റ് ഡയറക്ടർ ബിനു ജോൺ,ശുചിത്വ മിഷൻ ജില്ലാ കോഡിനേറ്റർ കെ.ഇ വിനോദ് കുമാർ,മാലിന്യമുക്തം നവകേരളം ജില്ലാ ക്യാമ്പയിൻ സെക്രട്ടറിയേറ്റ് അംഗങ്ങൾ എന്നിവർ ശില്പശാലയ്ക്ക് നേതൃത്വം നൽകി.ജില്ലയിലെ ആറ് മുനിസിപ്പാലിറ്റികളുടെയും സെക്രട്ടറിമാരും ആരോഗ്യ വിഭാഗം ജീവനക്കാരും ശില്പശാലയിൽ പങ്കാളികളായി.ശില്പശാലയിൽ മുനിസിപ്പാലിറ്റികളുടെ മാലിന്യമുക്തം നവകേരളം ക്യാമ്പയിൻ കർമ്മപദ്ധതി തയ്യാറാക്കി.ഹരിത കർമ്മ സേനയുടെ സേവനം എല്ലാ വീടുകളിലും സ്ഥാപനങ്ങളിലും ഉറപ്പുവരുത്തുക,ഗാർഹികജൈവമാലിന്യ സംസ്‌കരണം സമ്പൂർണ്ണമായി നടപ്പിലാക്കുക,പൊതുവിടങ്ങളിൽ മാലിന്യ ശേഖരണത്തിനുള്ള ബിന്നുകൾ സ്ഥാപിക്കുകയും സൗന്ദര്യവൽക്കരണ പ്രവർത്തനങ്ങൾ നടത്തുകയും ചെയ്യുക, ദ്രവമാലിന്യ സംസ്‌കരണ പ്ലാന്റുകൾ സ്ഥാപിക്കുക, പൊതു വിദ്യാലയങ്ങൾ കേന്ദ്രീകരിച്ചുള്ള മാലിന്യ സംസ്‌കരണ വിവര വിജ്ഞാന വ്യാപന പ്രവർത്തനങ്ങൾ സംഘടിപ്പിക്കുക തുടങ്ങിയ ലക്ഷ്യങ്ങൾ കർമ്മപദ്ധതി മുന്നോട്ട് വച്ചു.2025 ന് മാർച്ച് 31 നകം ജില്ലയിലെ മുഴുവൻ മുൻസിപ്പാലിറ്റികളെയും സമ്പൂർണ്ണ മാലിന്യ മുക്ത കേന്ദ്രങ്ങൾ ആക്കി മാറ്റുക എന്ന ലക്ഷ്യം കർമ്മ പരിപാടി ലക്ഷ്യംവയ്ക്കുന്നു.

08/07/2024

നെഹ്‌റു ട്രോഫിയുടെ ഭാഗ്യചിഹ്ന പ്രകാശനം
ചലച്ചിത്ര താരം കുഞ്ചാക്കോ ബോബൻ നിർവഹിക്കും

ആലപ്പുഴ: 70ാമത് നെഹ്‌റു ട്രോഫി ജലോത്സവത്തിന്റെ ഭാഗ്യചിഹ്ന പ്രകാശനം ചൊവ്വാഴ്ച രാവിലെ 10.15ന് ജില്ല പഞ്ചായത്ത് ഹാളിൽ സിനിമ താരം കുഞ്ചാക്കോബോബൻ നിർവഹിക്കും. തിരഞ്ഞെടുക്കപ്പെട്ട ഭാഗ്യചിഹ്നം അന്ന് കുഞ്ചാക്കോബോബൻ ജില്ല കളക്ടർക്ക് കൈമാറും.

06/07/2024

വെസ്റ്റ് നൈല്‍ പനി: ജാഗ്രത വേണം
-കൊതുകിന്റെ ഉറവിട നശീകരണം പ്രധാനം

ആലപ്പുഴ ജില്ലയില്‍ വെസ്റ്റ് നൈല്‍ പനി റിപ്പോര്‍ട്ട് ചെയ്ത സാഹചര്യത്തില്‍ ജാഗ്രത പാലിക്കണം. തൃക്കുന്നപ്പുഴയില്‍ നിന്നാണ് കേസ് റിപ്പോര്‍ട്ട് ചെയ്തത്. രോഗം റിപ്പോര്‍ട്ട് ചെയ്ത സാഹചര്യത്തില്‍ പ്രദേശത്ത് രോഗ നിരീക്ഷണവും പ്രതിരോധ പ്രവര്‍ത്തനങ്ങളും നടന്നു.

വെസ്റ്റ് നൈല്‍ പനി പ്രതിരോധിക്കാന്‍ കൊതുക് നിവാരണവും ഉറവിട നശീകരണവും പ്രധാനമാണ്. ഉറവിട നശീകരണ പ്രവര്‍ത്തനങ്ങള്‍ ഊര്‍ജിതമാക്കണം. വീടും പരിസരവും വൃത്തിയായി സൂക്ഷിക്കണം. വെള്ളം കെട്ടിനില്‍ക്കാതെ നോക്കണം. ജില്ലയില്‍ കഴിഞ്ഞ വര്‍ഷവും വെസ്റ്റ് നൈല്‍ കേസ് റിപ്പോര്‍ട്ട് ചെയ്തിരുന്നു. നിലവില്‍ ആശങ്കപ്പെടേണ്ട കാര്യമില്ല. പനിയോ മറ്റ് രോഗ ലക്ഷണങ്ങളോ ഉണ്ടെങ്കില്‍ ഉടന്‍ ചികിത്സ തേടണം.

ക്യൂലക്സ് കൊതുക് പരത്തുന്ന പകര്‍ച്ചവ്യാധിയാണ് വെസ്റ്റ് നൈല്‍. ജപ്പാന്‍ ജ്വരത്തിന് സമാനമായ രോഗ ലക്ഷണങ്ങളോടെയാണ് വരുന്നത്. എന്നാല്‍ ജപ്പാന്‍ ജ്വരത്തെ പോലെ രോഗം ഗുരുതരമാകാറില്ല. ശുദ്ധജലത്തിലും വെള്ളം, കെട്ടിക്കിടക്കുന്ന ഇടങ്ങളിലും ക്യൂലക്‌സ് കൊതുക് മുട്ടയിട് പെരുകും. ഈ പനി മുതിര്‍ന്നവരിലാണ് കൂടുതലായും കാണുന്നത്.

രോഗലക്ഷണങ്ങള്‍

തലവേദന, പനി, പേശിവേദന, തലചുറ്റല്‍, ഓര്‍മ്മ നഷ്ടപ്പെടല്‍ എന്നിവ പ്രധാന രോഗലക്ഷണങ്ങള്‍. രോഗബാധയുണ്ടായ ഭൂരിഭാഗം പേരിലും പലപ്പോഴും രോഗലക്ഷണങ്ങള്‍ പ്രകടമായി അനുഭവപ്പെടാറില്ല. ചിലര്‍ക്ക് പനി, തലവേദന, ഛര്‍ദ്ദി, ചൊറിച്ചില്‍ തുടങ്ങിയ ലക്ഷണങ്ങള്‍ കാണാം. ഒരു ശതമാനം ആളുകളില്‍ തലച്ചോറിനെ ബാധിക്കുന്നതുമൂലം ബോധക്ഷയവും ചിലപ്പോള്‍ മരണം വരെയും സംഭവിക്കാം. എന്നാല്‍ ജപ്പാന്‍ ജ്വരത്തെ അപേക്ഷിച്ച് താരതമ്യേന മരണ നിരക്ക് കുറവാണ്.

രോഗപ്രതിരോധവും ചികിത്സയും

പ്രതിരോധമാണ് പ്രധാനം. കൊതുകുകടി എല്‍ക്കാതിരിക്കുകയാണ് എറ്റവും നല്ല പ്രതിരോധ മാര്‍ഗം. ശരീരം മൂടുന്ന വിധത്തില്‍ വസ്ത്രം ധരിക്കുക, കൊതകു വല ഉപയോഗിക്കുക, കൊതുകിനെ അകറ്റുന്ന ലേപനങ്ങള്‍ പുരട്ടുക, കൊതുകുതിരി, വൈദ്യുതിയില്‍ പ്രവര്‍ത്തിക്കുന്ന കൊതുക് നശീകരണ ഉപകരണങ്ങള്‍ എന്നിവ ഉപയോഗിക്കുന്നത് ഫലപ്രദമാണ്. സ്വയം ചികിത്സ രോഗത്തെ സങ്കീര്‍ണമാക്കും. ആരംഭത്തില്‍ തന്നെ ചികിത്സ തേടേണ്ടതാണ്.

05/07/2024

ജില്ലയിൽ ഹയർസെക്കൻഡറി തുല്യത പരീക്ഷയ്ക്ക് 1,992 പേർ

ജില്ലയിലെ എട്ട് സ്ക്കൂളുകളിലായി 1,992 പേർ ഹയർസെക്കൻഡറി തുല്യതാ പരീക്ഷ എഴുതും. 2024 ജൂലൈ അഞ്ച്, ആറ്, ഏഴ്,12,13,14 തീയതികളിൽ രാവിലെ 9.30 മുതൽ 12.15 വരെയാണ് പരീക്ഷ. മാവേലിക്കര ഗവ. ഗേൾസ് ഹയർസെക്കൻഡറി സ്ക്കൂൾ, കായംകുളം ഗവ. ഗേൾസ് ഹയർസെക്കൻഡറി സ്ക്കൂൾ, ഹരിപ്പാട് ഗവ ഗേൾസ് ഹയർസെക്കൻഡറി സ്‌കൂൾ, അമ്പലപ്പുഴ കുഞ്ചുപിള്ള മെമ്മോറിയൽ ഹയർസെ ക്കൻഡറി സ്ക്കൂൾ, കിടങ്ങറ ഗവ.ഹയർസെക്കൻഡറി സ്ക്കൂൾ, ആലപ്പുഴ ഗവ മുഹമ്മദൻസ് ഗേൾസ് ഹയർസെക്കൻഡറി സ്ക്‌കൂൾ, കലവൂർ ഗവ.എച്ച്.എസ്.എസ് ചേർത്തല ഗവ. ഗേൾസ് ഹയർസെക്കൻഡറി സ്ക്കൂൾ എന്നിവിടങ്ങളിലായാണ് പരീക്ഷ നടക്കുന്നത്.

04/07/2024

വാഹനം ആവശ്യമുണ്ട്

ചെങ്ങന്നൂര്‍ ജില്ല ട്രഷറിയുടെ ഉപയോഗത്തിനായി പുതിയ മഹീന്ദ്ര ബോലേറോ ജീപ്പ് വാടകയ്ക്ക് ആവശ്യമുണ്ട്. ഇതിലേക്കുള്ള അപേക്ഷ ജൂലൈ 15-ന് വൈകീട്ട് അഞ്ച് വരെ ജില്ല ട്രഷറി ഓഫീസര്‍, സിവി സ്റ്റേഷന്‍, ഗ്രൗണ്ട് ഫ്‌ളാര്‍, ചെങ്ങന്നൂര്‍, ആലപ്പുഴ 689121 എന്ന വിലാസത്തില്‍ നല്‍കാം. ഫോണ്‍: 04792542028, 9496000078