ang narra

05/09/2024

𝐊𝐎𝐋𝐔𝐌 | 𝐒𝐚𝐫𝐢𝐥𝐢 𝐦𝐮𝐧𝐚 𝐛𝐚𝐠𝐨 𝐚𝐧𝐠 𝐢𝐛𝐚
Ni: Jullie Laurence P. Abucay
Walang epektibong pinuno kung hindi kayang pamahalaan ang sarili bago ang mga miyembro nito. Kinakailangang magkaroon ng sapat na kamalayan at kasanayan bago tanggapin ang mga responsibilidad na nakaatang bilang lider sa mga organisasyong kinabibilangan. Sa pagkamit ng kaunlaran, mahalagang maikintal sa isipan na ang pagiging pinuno ay kapangyarihang hindi dapat sinasamantala.
Nakapanlulumong malaman na sa politika ng Pilipinas, itinuturing na santo ang mga politiko. Halimbawa, kapag naririnig ng iyong kapwa na ika’y may mataas na katungkulan, ganoon na rin katayog ang kanilang inaasahan sa iyong maipapakitang kakayahan. Kung palagi na lamang tinutulungan ng pinuno ang iba, sino naman ang aalalay sa kanila?
Karaniwang mailalarawan ang isang pinuno bilang taong mahusay sa pamumuno, mulat sa kasalukuyang isyu, at maalam sa larangang akademiko. Gayunpaman, hindi sapat ang mga katangiang ito upang masabi na karapat-dapat na mamuno ang isang tao. Higit pa sa mga isteryotipikal na pinuno, ang pakikitungo, respeto, at pakikiramdam ay mahalaga sa paglilingkod.
Nakatutulong din ang pagbabalanse ng pag-aaral at extracurricular activities upang maging epektibo. “Maraming panghihinayang ang mundo ngunit huwag mong sayangin ang mga desisyon mo sa buhay”, diin ng susing tagapagsalita na si Cynth Zephanee N. Nietes. Bukod sa pagsasalita at pagbibigay alam, higit na mas mainam na mangibabaw ang gawa sa pamumuno.
Maging lider na may pangarap para sa ikabubuti ng komunidad na kinabibilangan ngunit dapat limitado upang hindi umabot sa puntong bulsa ay nabubutas. Kapag nasa itaas, matutong lingunin ang mga nasa ibaba. Pakikipagsimpatiya ay mahalaga upang mapunan ang pangangailangan ng kapwa.
Kaakibat ng epektibong pamamahala ang pagpapakumbaba. Ayon nga kay Simon Monek, “Sa hulihang bahagi na kumakain ang mga pinuno”. Bukod pa rito, mahalaga ring maisaisip at maisapuso ng mga student leader na kinakailangan silang matutong lumaban sa kanilang paninindigan.
Nakasalalay sa mga kabataan ang magiging kahihinatnan ng kinabukasan kung kaya kinakailangan silang mapangalagaan. Sa pagbibigay ng tamang gabay, mabibigyang linaw at mapapatibay ang mga tunguhin at hangarin nang sa gayon ay mapagtagumpayan ang mga hamong kahaharapin kinabukasan sa pamumuno.

05/09/2024

𝗞𝗔𝗛𝗔𝗡𝗗𝗔𝗔𝗡 𝗦𝗔 𝗣𝗔𝗠𝗨𝗠𝗨𝗡𝗢
𝗞𝗮𝗯𝗮𝘁𝗮𝗮𝗻𝗴 𝗟𝗶𝗱𝗲𝗿, 𝗻𝗮𝗴𝗹𝗶𝗹𝗶𝘆𝗮𝗯 𝗮𝗻𝗴 𝘀𝗲𝗿𝗯𝗶𝘀𝘆𝗼
Ni: Jeliane Endencia

Pinuno ng mahigit 200 presidents mula sa classroom at organization ang covered court ng ANHS upang makiisa sa programang DILAAB 2024 na may temang "Empowering Change: Igniting Tomorrow's Leaders Today" ngayong ika-5 ng Setyembre sa pangunguna ng Supreme Secondary Learner Government.

Sa kauna-unahang State of the Learner Government (SLG) Address ng SSLG, binigyang diin ni Sapphira Chang ang layunin ng seminar na paigtingin ang kakayahan ng mga kabataan, maging ang pagbibigay ng serbisyong tunay sa kanilang mga nasasakupan.

Pinasalamatan din niya ang Punongg**o ng ANHS, G. Elmer Cataluña at katuwang na Punongg**o na si Gng. Eleanor Masul sa suportang ipinadama.

"Don't dream about getting a life for them, if you cannot have a life for yourself" Ito ang tumatak na linya ni Brgy. Libertad Councilor, Cynth Zephanee N. Nietes unang tagapagsalita tungkol sa pagiging isang epektibong pinuno.

Sa hapon naman, tinalakay ng Instructor mula sa Caraga State University na si Gng. Hazel H. Montederamos ang tamang pagsulat ng mga mahahalagang dokumento tulad ng pormal na liham, katitikan ng pagpupulong, at iba pa.

Ganado naman na nagbigay ng mga payo ang dating pangulo ng ANHS-SSLG, Shayne Khietly D. Melijor, sa usaping pagbalanse sa pag-aaral at pagiging isang ulirang pinuno sa komunidad na kinabibilangan.

Pormal na tinapos ni focal person, Mardee A. Aboc, ang pagtitipon sa ganap na alas 4:00 ng hapon.

Aantabayanan ang mga susunod na aktibidad sa paaralan tulad ng Intramurals, High School Days, at Soiree ngayong panuruang taon.

Kuhang Larawan ni: Yssa Pasok at Jeliane Endencia

04/09/2024

𝐔𝐠𝐧𝐚𝐲𝐚𝐧 𝐬𝐚 𝐤𝐮𝐥𝐭𝐮𝐫𝐚 𝐩𝐢𝐧𝐚𝐠𝐭𝐢𝐛𝐚𝐲, 𝐦𝐚𝐥𝐚𝐲𝐚𝐧𝐠 𝐰𝐢𝐤𝐚 𝐧𝐚𝐠𝐬𝐢𝐥𝐛𝐢𝐧𝐠 𝐭𝐮𝐥𝐚𝐲
Ni: Jullie Laurence P. Abucay
Napuno ng hiyawan ng mga mag-aaral sa araw na ito ang bulwagan ng Sanhay sa pagtatapos ng Buwan ng Wikang Pambansa na may temang: “Filipino: Wikang Mapagpalaya”.
Batay ito sa Proklamasyon Blg. 1041 na isinabatas noong 1997 kung saan ginugunita tuwing Agosto ang Buwan ng Wikang pambansa na alinsunod din sa DepEd Memorandum Blg. 38, s. 2024.
Tampok sa programa ang mga paligsahan sa paglikha ng tula, rap, vlog, pagbati sa Filipino Sign Language (FSL), at masining na pagsasadula na kung saan ibinida ng mga mag-aaral ang kani-kanilang mga kasanayan at kakayahan sa nasabing larangan.
”Ang inyong pagdalo ay patunay ng inyong pagmamahal at pagmamalasakit sa ating wika” diing pahayag ng Puno ng Kagawaran ng Filipino, G. Angelito F. Agustin sa kaniyang pambungad na mensahe.
Ayon naman sa isang mag-aaral mula SPJ-9A, nakakatuwang isipin na ang bawat isa ay binibigyang halaga ang ating Wikang pambansa hanggang sa kasalukuyan sa kabila ng impluwensya ng mga wikang banyaga.
Batid sa mukha ng mga estudyante ang samut-saring reaksiyon nang inanunsyo ang mga nanalong kalahok at buong pagmamalaking naipamalas ang konsepto’t ideya sa pagtatanghal.
”Patuloy ninyong buhayin ang wikang Pambansa”, ito ang panapos na hamon sa mensahe ng Punongg**o ng paaralan, Elmer M. Cataluna.

03/09/2024

𝐏𝐀𝐏𝐀𝐋𝐀𝐏𝐈𝐓 𝐍𝐀 𝐀𝐍𝐆 𝐏𝐀𝐒𝐊𝐎!

Ngayong ika-3 araw ng Setyembre, kumusta naman kayo? Ramdam niyo na ba ang malamig na hangin o malamig pa rin ang buhay? 😄

Mapapa-"Whenever I see girls and boys" ka na talaga dahil BER months na! 🤶🏻🎄Salubungin natin ang taglamig ng may ngiti at kapit.

113 na araw na lang, Pasko na! Maligayang BER months sa inyong lahat, mula sa Pamilyang Ang Narra! 🎄✨

01/09/2024

𝐈𝐒𝐈𝐏-𝐈𝐒𝐈𝐏!
I-type sa comment section ang inyong sagot. Ang unang makakasagot ng tama ay may gantimpala.

Ikaw, ano kaya ang sagot mo sa palaisipan na ito?

31/08/2024

𝐏𝐚𝐫𝐚 𝐬𝐚 𝐤𝐚𝐚𝐥𝐚𝐦𝐚𝐧 𝐧𝐠 𝐥𝐚𝐡𝐚𝐭 𝐧𝐠 𝐦𝐚𝐠-𝐚𝐚𝐫𝐚𝐥, 𝐦𝐚𝐠𝐮𝐥𝐚𝐧𝐠, 𝐠𝐮𝐫𝐨 𝐚𝐭 𝐩𝐮𝐛𝐥𝐢𝐤𝐨 𝐚𝐧𝐠 𝐨𝐩𝐢𝐬𝐲𝐚𝐥 𝐧𝐚 𝐩𝐚𝐡𝐢𝐧𝐚 𝐧𝐠 𝐀𝐠𝐮𝐬𝐚𝐧 𝐍𝐚𝐭𝐢𝐨𝐧𝐚𝐥 𝐇𝐢𝐠𝐡 𝐒𝐜𝐡𝐨𝐨𝐥 𝐚𝐲 𝐧𝐚𝐠𝐢𝐧𝐠 𝐛𝐢𝐤𝐭𝐢𝐦𝐚 𝐧𝐠 "𝐨𝐧𝐥𝐢𝐧𝐞 𝐡𝐚𝐜𝐤𝐢𝐧𝐠". 𝐀𝐧𝐠 𝐚𝐧𝐮𝐦𝐚𝐧𝐠 𝐦𝐞𝐧𝐬𝐚𝐡𝐞, 𝐝𝐢 𝐤𝐚𝐚𝐲𝐚-𝐚𝐲𝐚𝐧𝐠 𝐥𝐚𝐫𝐚𝐰𝐚𝐧 𝐚𝐭 𝐦𝐚𝐥𝐚𝐥𝐚𝐬𝐰𝐚𝐧𝐠 𝐯𝐢𝐝𝐞𝐨 𝐧𝐚 𝐧𝐚𝐢𝐩𝐨𝐬𝐭 𝐚𝐲 𝐰𝐚𝐥𝐚𝐧𝐠 𝐤𝐢𝐧𝐚𝐥𝐚𝐦𝐚𝐧 𝐚𝐧𝐠 𝐩𝐚𝐚𝐫𝐚𝐥𝐚𝐧 𝐚𝐭 𝐦𝐚𝐫𝐢𝐢𝐧𝐠 𝐤𝐢𝐧𝐨𝐤𝐨𝐧𝐝𝐞𝐧𝐚 𝐚𝐧𝐠 𝐧𝐚𝐬𝐚𝐛𝐢𝐧𝐠 𝐠𝐚𝐰𝐚𝐢𝐧𝐠 𝐦𝐚𝐩𝐚𝐧𝐢𝐫𝐚. 𝐇𝐢𝐧𝐢𝐡𝐢𝐤𝐚𝐲𝐚𝐭 𝐧𝐚 𝐢𝐛𝐚𝐡𝐚𝐠𝐢 𝐚𝐧𝐠 𝐦𝐞𝐧𝐬𝐚𝐡𝐞 𝐩𝐚𝐫𝐚 𝐬𝐚 𝐬𝐞𝐠𝐮𝐫𝐢𝐝𝐚𝐝 𝐧𝐠 𝐥𝐚𝐡𝐚𝐭. 𝐌𝐚𝐫𝐚𝐦𝐢𝐧𝐠 𝐒𝐚𝐥𝐚𝐦𝐚𝐭.

30/08/2024

𝐏𝐀𝐍𝐀𝐖𝐀𝐆𝐀𝐍 𝐒𝐀 𝐏𝐀𝐆𝐊𝐀𝐊𝐀𝐈𝐒𝐀
𝐌𝐠𝐚 𝐦𝐚𝐠𝐮𝐥𝐚𝐧𝐠 𝐬𝐚 𝐆𝐞𝐧𝐞𝐫𝐚𝐥 𝐀𝐬𝐬𝐞𝐦𝐛𝐥𝐲, 𝐧𝐚𝐠𝐬𝐚𝐦𝐚-𝐬𝐚𝐦𝐚
Isinulat ni: Gio Martin
Nagtipon- tipon sa ANHS-Covered Court ang daan-daang magulang para sa unang General School Parent-Teacher Assembly nitong taon.
Binigyang diin sa pagpupulong ng Punongg**o ng paaralan, G. Elmer M. Cataluna ang usaping pangkaligtasan at seguridad ng mga estudyante sa loob ng paaralan.
Ibinahagi rin ng SPTA-President, G. Ramy Barry Y. Mero ang mga proyektong nakamit at naisakatuparan sa taong ito tulad na lamang ng pagkabit ng CCTV Cameras at solar lights sa ilang bahagi ng paaralan.
Dagdag pa nito ay ang paglalaan ng pondo at suportang pinansyal sa mga mag-aaral na atleta, campus journalists at iba pang mga kompetisyon na sinalihan ng paaralan.
Sa lahat ng ito, taos pusong pinapaabot ang pasasalamat sa naging kontribusyon ng mga magulang na umabot sa mahigit 4 na milyong piso.
Pagkatapos ng pangkabuuang oryentasyon ay dumiretso na sa silid aralan ng kani-kanilang anak para sa Homeroom Agenda at sa layuning makapaghalal ng mga opisyales na may malaking gampanin para sa ikabubuti’t ikauunlad ng mag-aaral at paaralan.
Itinatakdang muling magkakaroon ng pagtitipon-tipon para sa pagpili ng pangkalahatang kinatawan ng ANHS-SPTA.

Kuhang larawan at disenyo ni: Hugh Havenn De Luna

30/08/2024

29/08/2024

Artistahin ka ba at punong-puno ng kumpyansa? Mala Atom Araulio ang awra at kaboses si Jessica Soho at Noli De Castro? mag-audition na sa TV BROADCASTING SA FILIPINO.

28/08/2024

𝐋𝐢𝐩𝐚𝐝 𝐦𝐠𝐚 𝐤𝐚-𝐀𝐠𝐢𝐥𝐚 🦅

Hawakan n’yo ang inyong mga panulat📝at ilantad ang inyong mga kaisipan sa malayang pamamahayag. Kaya makiisa na sa Pamilya Ang Narra!

I-register ang iyong sarili sa link na ito: https://forms.gle/5HLNfK5ugyUdC51X9

Huwag kalimutang i-like at i-share ang pahina ng ang narra upang laging updated sa mahahalagang kaganapan at usaping pampaaralan! Kitakits, mga Ka-Narra!

28/08/2024

𝗞𝗢𝗡𝗘𝗞𝗦𝗬𝗢𝗡 𝗔𝗡𝗚 𝗦𝗢𝗟𝗨𝗦𝗬𝗢𝗡
𝗠𝗮𝗴𝘂𝗹𝗮𝗻𝗴 𝗻𝗴 𝗦𝗣𝗦-𝟳 𝗦𝘁𝘂𝗱𝗲𝗻𝘁𝘀 𝗻𝗮𝗴𝘁𝗶𝗽𝗼𝗻-𝘁𝗶𝗽𝗼𝗻 𝘀𝗮 𝗼𝗿𝘆𝗲𝗻𝘁𝗮𝘀𝘆𝗼𝗻
Isinulat ni: Jullie Laurence Abucay

Mahigit 80 magulang ng Grade 7 Special Program in Sports (SPS) ang dumalo sa oryentasyong ginanap sa ANHS Covered Court na pinangunahan ng MAPEH Department.

Binigyang diin sa nasabing pagtitipon ang kahalagahan ng gabay at suporta ng magulang tungo sa ikabubuti ng kanilang mga anak na kabilang sa nasabing special program.

"One of the objective in this orientation is to meet halfway between the parents and facilitators and to produce a better SPS Student regardless of their specialization," ani SPS Coordinator Ian Gabiana Go.

Tinalakay rin sa oryentasyon ang mga pagbabago sa guidelines at sistema bunsod ng MATATAG Curriculum at ang pagpapalalim ng proteksyon sa mga SPS learners.

"Nakatabang gayud ning orientation sa akoa isip usa ka ginikanan aron mahibaloan ang mga angay focusan sa amoang mga bata diha sa ilang pag-eskwela." wika ng magulang ng SPS-7B na si J-ann Azote Mag-aso.

Magkakaroon muli ng pormal na pagtitipon upang ihalal ang mga magiging Opisyales ng General Parents and Teachers Association (GPTA) at Homeroom Parents and Teachers Association (HPTA) ngayong Biyernes, Agosto 30.

Kuhang Larawan ni: Hugh Havenn De Luna

26/08/2024

𝐒𝐚 𝐢𝐧𝐲𝐨𝐧𝐠 𝐩𝐚𝐠𝐩𝐮𝐩𝐮𝐧𝐲𝐚𝐠𝐢, 𝐧𝐚𝐠𝐡𝐚𝐫𝐢 𝐚𝐧𝐠 𝐤𝐚𝐥𝐚𝐲𝐚𝐚𝐧 𝐧𝐚 𝐭𝐢𝐧𝐚𝐭𝐚𝐦𝐚𝐬𝐚 𝐧𝐚𝐦𝐢𝐧.

Sabay-sabay nating gunitain ngayong ika-26 ng Agosto ang Araw ng mga Bayani bilang pagpupugay sa kanilang kagitingan sa pagkamit ng soberanya ng bansa mula sa paniniil at manlulupig na mga dayuhan.

22/08/2024

𝗞𝗔𝗔𝗟𝗔𝗠𝗔𝗡𝗚 𝗦𝗜𝗞𝗦𝗜𝗞
𝗣𝗿𝗼𝘆𝗲𝗸𝘁𝗼𝗻𝗴 𝗽𝗮𝗻𝗴-𝗮𝗴𝗵𝗮𝗺, 𝗽𝗶𝗻𝗮𝗹𝗮𝘄𝗶𝗴 𝗻𝗴 𝗽𝗮𝗻𝗮𝗻𝗮𝗹𝗶𝗸𝘀𝗶𝗸
Ramdam ang pananabik at kaba nang ipresenta ng mga mag-aaral ng STE ang kani-kanilang Research Plan na tumutugon sa isyung pangkapaligiran sa huling araw ng workshop training.

“In ideation stage, let us set no boundaries” - paalala ni Education Program Supervisor for Science and Education na si Kevin Hope Salvaña sa mga mag-aaral na researchers upang makagawa ng makabuluhang proyekto at plano.

Tatlo sa mga namukod-tanging research proposal ay ang Sign Language to Text Translation using Convolutional Neural Network (CNN). Kasama rin ang KONEKA: A Sustainable Solar-Powered Charging Machine with Integrated Recycling Incentives for Rural Electrification in the Philippines at ang ECON: A breath of cool fresh air in an eco-friendly alternative.

Matapos ang pag-uusisa’t pagsusuri ng mga g**o sa agham kaugnay sa ibinahaging presentasyon , ginawaran ang tatlong mag-aaral na sina Christian Laurence Cabag, at John Ruzzel Gibriel Riva ng grade 10 Einstein at Jheff Ymann Reyes ng grade 9 Avogadro bilang mahuhusay na tagapresenta ng kanilang research proposal.

Tunguhin ng hakbang na ito ang mapalawak ang kaalaman at kasanayan sa larangan ng pananaliksik at proyektong pang-agham bilang paghahanda sa kompetisyon.

21/08/2024

𝗪𝗼𝗿𝗸𝘀𝗵𝗼𝗽 𝘀𝗮 𝗦𝗜𝗣, 𝗔𝗰𝘁𝗶𝗼𝗻 𝗥𝗲𝘀𝗲𝗮𝗿𝗰𝗵 𝗽𝗶𝗻𝗮𝗹𝗮𝘄𝗮𝗸,
𝗚𝘂𝗿𝗼'𝘁 𝗺𝗮𝗴-𝗮𝗮𝗿𝗮𝗹 𝗻𝗴 𝗦𝗧𝗘 𝘀𝘂𝗺𝗮𝗯𝗮𝗸
Interaktibong nakilahok sa 2 araw na seminar workshop ang mga mag-aaral mula grade 9 at 10 ng STE Program bilang bahagi ng kanilang specialization upang mahasa ang kasanayan sa pananaliksik at proyektong pang-agham.
“The key to get good research is to identify the impact you can create to the people,” wika ni Education Program Supervisor for Science Education, SSES, STE, and SHS Program na si Kevin Hope Salvaña na susing tagapagsalita sa unang araw ng workshop.
Isa sa binigyang diin sa unang araw ng pagsasanay ay ang kahalagahan ng kaakibat na gampanin hindi lamang ng mga mag-aaral kundi maging sa mga g**ong tagasanay sa gagawing research projects.
Aasahang magpapatuloy ang workshop bukas kung saan ibabahagi ng mga kalahok ang nabuo nilang research plan.

21/08/2024

𝐌𝐚𝐠𝐢𝐧𝐠 𝐁𝐨𝐬𝐞𝐬 𝐧𝐠 𝐏𝐚𝐚𝐫𝐚𝐥𝐚𝐧 𝐚𝐭 𝐒𝐮𝐦𝐚𝐥𝐢 𝐬𝐚 𝐏𝐚𝐡𝐚𝐲𝐚𝐠𝐚𝐧𝐠 𝐏𝐚𝐧𝐠𝐤𝐚𝐦𝐩𝐮𝐬!

Nais mo bang magpahayag ng iyong mga ideya, magbahagi ng iyong mga saloobin, at maging tagapagsalita ng mga kapwa mag-aaral? Ito na ang iyong pagkakataon na ipakita ang iyong husay sa pag-aanyo at disenyo, pagkuha ng larawan, pagsulat at paggawa ng mga kuwento na magbibigay inspirasyon at kaalaman sa buong paaralan.

"Magkita-kita tayo sa tanggapan ng Ang Narra."

19/08/2024

𝐇𝐚𝐧𝐝𝐚 𝐤𝐚 𝐧𝐚 𝐛𝐚?

Halina’t maging kaisa sa pagtaguyod ng malayang pamamahayag. Huwag palampasin ang pagkakataong ito upang maipamalas ang taglay na husay at galing at maging certified campus journalist.

I-scan lamang ang QR code sa ibaba at sagutan ang Online Registration Form. Para sa karagdagang katanungan maaaring personal na dumulog sa tanggapan ng Ang Narra at sundan ang aming page para masubaybayan ang mga mahahalagang kaganapan at impormasyon na kailangang malaman.

𝙈𝙖𝙜𝙧𝙚𝙝𝙞𝙨𝙩𝙧𝙤 𝙨𝙖 𝙖𝙢𝙞𝙣𝙜 𝙡𝙞𝙣𝙠: https://forms.gle/EcwJeuUKgTwMfxV49

12/08/2024

𝗕𝗔𝗟𝗜𝗧𝗔 𝗡𝗚𝗔𝗬𝗢𝗡 | Pinangunahan ni Bethany Mayuga ang bilang ng mga boto habang pumangalawa naman si Yuan Laurete sa posisyong Grade 7 Representative.

Gayundin ay naibagahe ni Moises Ilogon ang 811 votes na sinundan naman ni Cybele Chua para sa posisyong Grade 11 Representative.

Aabangan ang National Elections ng ANHS-SSLG sa susunod na taon.

09/08/2024

𝐁𝐀𝐋𝐈𝐓𝐀| 𝐊𝐀𝐋𝐈𝐍𝐈𝐒𝐀𝐍 𝐊𝐎𝐍𝐓𝐑𝐀 𝐃𝐄𝐍𝐆𝐔𝐄
Oplan Galugad agarang inilunsad ng Sanhay
𝙰𝚐𝚘𝚜𝚝𝚘 𝟾, 𝟸𝟶𝟸𝟺
Kaninang alas tres ng hapon, isinakatuparan ang Oplan Galugad kung saan nagkaroon ng general cleaning na nilahukan ng mga mag-aaral at g**o ng buong campus ng Agusan National High School (ANHS) upang makaiwas sa sakit na dengue.
Mabilis na tugon ang naging aksyon ni G. Elmer C. Cataluña, punongg**o IV ng ANHS, matapos matanggap ang mensaheng ipinasa mula sa DepEd Central Office at agad din inaksyunan ang nasabing operasyon.
“Nag-sacrifice lang ta ug more or less mga duha ka hours para sa Galugad. So, see to it na safety gayud ang atong Sanhay,” ani G. Cataluña.
(“Nagsakripisyo lamang tayo ng mahigit kumulang dalawang oras para sa Oplan Galugad upang masig**o na ligtas talaga ang ating paaralan”, ani G. Cataluña.)
Matatandaang nagkaroon ng pagpupulong ang iilang mga teaching personel noong Mayo 4 kung saan napag-usapan ang mga inisyatibong gagawin para sa darating na panuruang taon.
Isa lamang sa mga aktibidad ang Oplan Galugad na pinangunahan ng Oplan Kalusugan (OKD) ng paaralan upang makamit ang healthy learning institution na tunguhin ng Kagawaran ng Edukasyon kaakibat ang Kagawaran ng Kalusugan.
Inaasahan ng punongg**o na mapanatili ang kalinisan ng paaralan at tiniyak nito na kung kinakailangan ay magkakaroon muli ng general cleaning upang masig**o ang kaligtasan ng mga estudyante sa paaralan.

08/08/2024

BUWAN NG WIKA 2024
" FILIPINO: WIKANG MAPAGPALAYA "

07/08/2024

𝐋𝐀𝐓𝐇𝐀𝐋𝐀𝐈𝐍| 𝐏𝐚𝐦𝐚𝐧𝐚𝐧𝐠 ’𝐃𝐢 𝐍𝐚𝐥𝐮𝐥𝐮𝐦𝐚
Ni: Mary Ellah Bacor

Sa pag-usbong ng isang bansang puno ng mga islang marikit, isang malalim na kwento ang isinasambit. Ang mga bakas ng pinagmulan ay tila isang boses na bumubulong sa likod ng ating isipan. Bawat daloy ng ideya, patak ng tinta, at bigkas ng mga salita ay unti-unting nagbibigay buhay sa isang yamang bahagi ng ating kultura. Sa matulin na pagtakbo ng panahon, isang hakbang pabalik ang tugon para sa makabagong henerasyon.

Agosto. Para sa karamihan, ito ay isang ordinaryong buwan lamang. Ngunit sa katunayan, sa buwan ng Agosto ipinagdiriwang ang ating kultura, pinagmulan, at pagkakakilanlan. Sa pagsalubong ng unang petsa, ating sineselebra ang Buwan ng Wika 2024 na may temang, “Filipino, Wikang Mapagpalaya”. Gayunpaman, kadalasang isinasawalang bahala lamang dahil wala raw namang kahalagahan. Ngunit, ito ba’y wala ngang importansya sa bayan? Ano ba ang tunay na diwa nito at paano ito nagiging mahalaga sa atin bilang mga Pilipino?

Sa loob ng isang buwan, lahat ng Pilipino—ano man ang kasarian, edad, at estado,—ay isa-isang ipinapakita ang kanilang pagpapahalaga sa wikang Filipino. “Luma na yan”, karaniwang sambit ng ilan, lalo na ng mga kabataan. Ayon sa kanila, ang pagseselebra ng Buwan ng Wika ay hindi na epektibo dahil sila’y hindi na interesado sa pag-aaral ng wikang Filipino. Lingid sa kanilang kaalaman, ang wika natin ay may malaking epekto at dapat itong pagtuunan ng pansin. Ito ay nagsisilbing boses nating mga Pilipino at susi sa pinto na sa kaunlaran patungo.

Wikang Filipino ang daan sa paghubog ng ating kultura. Bawat libro, kanta, at akda ay nagbibigay ng mahalagang impluwensya at pag-unawa. Higit pa sa mga pahinang puno ng salita ang wikang Filipino. Ito ay nakaukit sa ating pagkakakilanlan at nagsisilbing pundasyon ng ating karunungan. Ang nga stereotipo ay tila isang makapal na hamog lamang na tumatakip sa tunay na hiwaga ng ating wika.

Ang Buwan ng Wika ay hindi simpleng selebrasyon lamang. Simbolo ito ng ating pagkatao bilang mga mamamayang Pilipino. Nawawalang saysay ang mga haka-haka kapag nasaksikan natin ang bunga ng wikang Filipino sa bawat isa. Ito ay nagpapalaya sa mga makabuluhang ideya na siyang nakapagbubuo ng pagkakaisa.

Pinagbubuklod tayo ng ating wika. Sa pamamagitan nito, nagiging buhay ang tunay na diwa ng ating bansa. Bilang isang mag-aaral at Pilipino, natuklasan ko ang ganap na halaga ng wikang Filipino. Tanda ito ng ating malawak na kasaysayan at patuloy na humuhubog sa ating isipan. Bawat aplikasyon ng wika ay nagdadala ng panibagong kaalaman, kasanayan, at pag-asa hindi lamang sa aking sarili kundi pati na rin sa bansa.

Higit sa lahat, ang wikang Filipino ay yaman ng ating kultura. Sa pagmamahal at pagpapahalaga ng ating wika, nagiging bahagi tayo ng isang bansa na kung saan ang pagpapahayag ay malayang naisasagawa.

Sa pagdiriwang na ito, palagi nating tandaan na hindi lamang sa buwan ng Agosto dapat ipinapakita ang pagmamahal sa kulturang Pilipino. Ito ay dapat nating isabuhay, isagawa, at isapuso. Sa simpleng mga kilos na ito, isang larawan ng maunlad na bansa ang ating nabubuo.

Matulin man ang pagtakbo ng panahon, ang ating wika ay isang yaman na habambuhay na nakaukit sa puso’t isipan ng bawat henerasyon.

Halina't makiisa sa selebrasyon ng Buwan ng Wika! Dahil sa bawat hakbang pabalik sa ating pinagmulan, patunay ito na ang wikang Filipino ay isang pamanang hinding-hindi maluluma kailanman.

06/08/2024

𝗘𝗗𝗜𝗧𝗢𝗥𝗬𝗔𝗟 | 𝗪𝗜𝗞𝗔𝗵𝗶𝗵𝗶𝘆𝗮𝗻
Isinulat ni: Jullie Laurence Abucay

Sa pagdiriwang ng Buwan ng Wika ngayong buwan ng Agosto, dumadami rin ang mga posts sa social media bilang proud Pinoy. Bagamat kung pakasusuriin ayon sa sarbey ng isang balita, tanging tatlo sa apat lamang ang bihasa sa paggamit ng wikang Filipino. Kung talagang umiiral ang pusong makabayan, bakit ikinakahiya ang paggamit sa lingguwaheng sinasalamin ang pagkakakilanlan ng bayan?
Dinodomina pa rin ng wikang Ingles ang bansa kahit na mayroon nang Filipino na asignatura ang edukasyon na sektor. Tinatayang 68% o mahigit 50 milyon ng populasyon ng bansa ay sinasabing matatas rito ayon sa LinkedIn. Sinasalamin nito ang malaking impluwensiya ng wikang banyaga sa pananalita ng mga Pinoy.
Sa istatistikang nilahad ng GMA, tinatayang 75% o mahigit tatlo sa apat na mga Pilipino ang maalam sa paggamit ng wikang Filipino. Nakapagtataka nga lamang na karamihan sa mga Gen Z ay wala ni isang salita ng wikang Filipino ang lumalabas sa bibig. Kung gaano kalaki ang porsyentong naipakita, nawa’y ganun rin kalaki ang kumpyansa sa paggamit ng wikang pambansa.
Ngayong buwan ng wika, alalahanin nawa ng mga Pilipino ang dahilan kung bakit Filipino ang pambansang wika. Mahalagang maikintal sa isipan na higit pa sa ginagamit na wika, nakapaskil nito ang pinaglalaban ng ama ng wikang pambansa na si Manuel L. Quezon upang mapagbuklod-buklod bilang nagkakaisang bansa.
Sa tema ng buwan ng wika ngayong taon, maikli man ngunit diretsahang salita ang nais: Wikang Filipino, Wikang Mapagpalaya, kinakailangang maipakita ang pagiging makabayan hindi lamang sa isip maging sa salita na ipinagmamalaking ginagamit ang sariling wika.
Kung maiwawaksi ang kaisipang kinukulong sa ideolohiyang nakakahiya ang pagsasalita ng nasabing wika, makakamit ang tunay na kalayaan. Ayon nga sa katagang iniwan ng bayaning si Jose Rizal, “Ang hindi marunong magmahal sa sariling wika ay higit pa sa malansang isda.” Maging ganap na malaya sa pagsulong at pagtangkilik ng wikang Filipino sa kapwa Pilipino imbis na ikahiya.

06/08/2024

SANHAY, MALIGAYANG PAGBABALIK KLASE

31/07/2024

𝗕𝗔𝗟𝗜𝗧𝗔 𝗡𝗚𝗔𝗬𝗢𝗡 | Nagpasiklaban ang mahigit 15 Club/Organizations para ipakita ang kanilang mga karangalan upang manghikayat sa mga estudyante na sumali sa kanilang grupo.

Patok ang mga kakaibang pakulo ng mga booths upang maengganyo ang mga bagong mag-aaral at sumali sa samahan.

Isa na rito ang Innoventors Club na binida ang kanilang mga winning entry sa ginanap Regional Science and Technology Week (RSTW) ng Department of Science and Technology (DOST) na ginanap sa Robinsons Mall nitong Hulyo 6-9, ngayong taon.

Kabilang sa kanilang mga aktibidad ay ang pagbebenta ng keychain para magkaroon ng pondo ang kanilang mga gagawing proyekto sa panuruang taon.

“Iisa lang ang layunin ng aktibidad na ito, ang mapagbuklod ang mga kabataan sa kanilang natutugmang kinahihiligan,” ani SSLG Vice President Renz Provido.

Dagdag pa niya, isa rin daw sa nagbigay ng inspirasyon para sa aktibidad na ito ay ang mapagbubuklod-buklod ang bawat isa.

Magpapatuloy ang selebrasyon sa kampus ng Junior at Senior High hanggang Agosto 1.

30/07/2024

BALITA | 𝗔𝗴𝘂𝘀𝗮𝗻 𝗡𝗮𝘁𝗶𝗼𝗻𝗮𝗹 𝗛𝗶𝗴𝗵 𝗦𝗰𝗵𝗼𝗼𝗹, 𝗡𝗮𝗴𝗱𝗮𝗼𝘀 𝗻𝗴 𝗞𝗮𝘁𝗮𝗻𝗴𝗶-𝘁𝗮𝗻𝗴𝗶𝗻𝗴 𝗦𝗮𝗹𝘂𝗯𝗼𝗻𝗴 𝟮𝟬𝟮𝟰

Butuan City- Opisyal nang nagsimula ang panuruang taon para sa 2024-2025 sa Agusan National High School. Ang unang salubong ng iba't ibang organisasyon para sa mga g**o, magulang, at estudyante ay may hatid na serbisyo,sorpresa at kasiyahan.

Ang "Salubong 2024: A School Year Starter" ay pinangunahan ng Supreme Student Learner Government na naglalayong makiisa ang komunidad ng sanhay sa iba't ibang aktibidad at bigyan ang mga mag-aaral ng pagkakataon na pumili kung aling landas sa hayskul ang kanilang tatahakin.

May mga bagong estudyante sa Junior High na nagdadalawang isip pumili ng organisasyon. Nagbigay serbisyo naman ang RCY, SDRRMC, Rover Scouts, at BSP para matiyak ang maayos at ligtas na pagbabalik-eskwela at tulungan ang mga mag-aaral sa kanilang unang araw.

Ang senior high student na si Lalamae Bokingo, isang Grade 12 ay nasasabik nang makita ang kanyang mga kaibigan matapos ang isang buwan na bakasyon. "Noong makita ko ang aking mga kaibigan sa pagbabalik-eskwela matapos ang bakasyon, sobra akong natuwa at napuno ng tawa. Sana magpatuloy ang aming bonding at pagtutulungan sa pag-aaral at iba pang aktibidad," ani Bokingo.

Bawat isa sa atin ay may kanya-kanyang karanasan sa pagsalubong sa paaralan ngayong taon. Ngunit ang pinakamahalagang papel bilang estudyante ay magsimulang magpursige na maging maayos at makapagtapos ng pag-aaral.

28/07/2024

𝗕𝗔𝗟𝗜𝗞 𝗘𝗦𝗞𝗪𝗘𝗟𝗔 | 𝐈𝐬𝐚𝐧𝐠 𝐩𝐚𝐧𝐢𝐛𝐚𝐠𝐨𝐧𝐠 𝐭𝐚𝐨𝐧 𝐧𝐚 𝐧𝐚𝐦𝐚𝐧 𝐧𝐠 𝐩𝐚𝐠𝐤𝐚𝐭𝐮𝐭𝐨!

Kaya't sa bawat hakbang ng paglalakbay na ito, sama-sama nating harapin ang mga bagong hamon at pagkakataon. Patuloy lang sa ibayong pagsisikap para makamit ang ating mga pangarap.

𝐌𝐠𝐚 𝐤𝐚-𝐒𝐚𝐧𝐡𝐚𝐲, 𝐬𝐚 𝐮𝐧𝐚𝐧𝐠 𝐚𝐫𝐚𝐰 𝐧𝐠 𝐩𝐚𝐠𝐛𝐚𝐛𝐚𝐥𝐢𝐤 𝐞𝐬𝐤𝐰𝐞𝐥𝐚 𝐬𝐚𝐥𝐮𝐛𝐨𝐧𝐠𝐢𝐧 𝐧𝐚𝐭𝐢𝐧 𝐚𝐧𝐠 𝐩𝐚𝐧𝐮𝐫𝐮𝐚𝐧𝐠 𝐭𝐚𝐨𝐧𝐠 𝐢𝐭𝐨 𝐧𝐚𝐧𝐠 𝐩𝐨𝐬𝐢𝐭𝐢𝐛𝐨 𝐚𝐭 𝐛𝐮𝐨𝐧𝐠 𝐬𝐚𝐲𝐚.

26/07/2024

Shout out to our newest followers! Excited to have you onboard! Jake Ompoy Amigo, Tom Ivar Karlsen, Lex Abellanosa, Kristine Juanillo, Maria Angela Herda, Jeliane Endencia, Wilson Ace Endencia Cadenas, Geraldine Salazar, Nicole S. Calape, Samantha Gabriella Piencenaves, Shemaiah Gab Yee, Roland Galano, Jos Hua, Alistair Ravena, Liam Felix, Gian Guadamor Daan, Kenneth John Asiado Acmanola, Jocelyn Medrano, Kacey, Khrishel Roi Anticresto, Katehleen Sujero.Lubos po ang aming pasasalamat sa inyong lahat,nawa'y makakatulong ang mga naibahagi naming impormasyon para sa lahat at magbigay daan para sa malayang pamamahayag.

24/07/2024

𝗟𝗔𝗧𝗛𝗔𝗟𝗔𝗜𝗡 | 𝗞𝗮𝗹𝗶𝗻𝗶𝗦𝗔𝗡𝗛𝗔𝗬

Sa mga unang sinag ng araw, isang tahimik na komunidad ang nagising sa isang pahiwatig ng bagong kabanata. Ang mga halakhak ng kabataan, ang ingay ng martilyo at lagari, at ang amoy ng sariwang pintura ay tila isang masiglang tanda ng pag-asa. Sa bawat hakbang ng pagkakaisa, dahan-dahang nabubuo ang isang larawan ng bayanihan. Sa tila simpleng mga kilos na ito, may isang mas malalim na kwento ng pagsasama-sama ang sinisimbolo.

Tila di mahulugang karayom kung ilarawan ang naging pagbubukas at umpisa ng Brigada Eskwela 2024 na may temang, “Bayanihan para sa Matatag na Paaralan”. Isang programa na naging bahagi na ng ating kultura. Gayunpaman, madalas ay napagkakamalang madaling pagtulong lamang para mapaganda ang mga silid-aralan. Ngunit, ito ba'y talagang ganun lamang kasimple? Ano nga ba ang tunay na diwa ng Brigada Eskwela at paano ito nagiging mahalaga sa bawat Pilipino?

Sa loob ng isang linggo, mga magulang, mag-aaral, at mga g**o ay nagtutulungan upang mag-ayos at maglinis ng kanilang paaralan. “Sayang lang ang oras at pagod dyan.”, isa sa mga linyang karaniwang binibitawan ng ilan. Ayon sa karamihan, ang Brigada Eskwela ay isang yanong aktibidad na di nagbibigay ng agarang resulta. Ngunit, ang katotohanan, ito ay isang paghahanda para sa kinabukasan. Ang pagkakaroon ng maayos at malinis na kapaligiran sa paaralan ay nagbibigay ng inspirasyon at pag-asa sa mga mag-aaral, na siyang nagiging pundasyon ng kanilang tagumpay sa hinaharap.

Sa katunayan, ang mga pagsisikap ng bawat indibidwal na lumahok sa Brigada Eskwela ay may malalim na epekto hindi lamang sa mga mag-aaral kundi pati na rin sa buong komunidad. Ang bawat kuwentong ibinabahagi, bawat karanasang natutunan, ay nagiging bahagi ng isang mas malaking layunin at kontribusyon. Ang mga haka-haka ay tila ulap lamang na bumabalot sa tunay na liwanag ng bayanihan.

Ang Brigada Eskwela ay hindi lamang isang simpleng aktibidad. Ito ay simbolo ng ating pagkakaisa at pagtutulungan bilang mga mamamayan. Ang mga stereotipo ay nagiging walang saysay kapag nakita natin ang tunay na epekto nito sa bawat bata, g**o, at magulang. Sa bawat haplos ng pintura at bawat pag-aayos ng mga silid-aralan, nabubuo ang isang mas maliwanag na kinabukasan.

Sa Agusan National High School, ang Brigada Eskwela ay naging isang mahalagang bahagi ng aming komunidad. Bawat taon ay nagiging mas makulay at makabuluhan. Bilang isang mag-aaral na parte nito, nasaksihan ko na buhay ang tunay na diwa ng bayanihan. Tanda ito ng ating kakayahan na magtulungan para sa isang mas maliwanag na hinaharap. Nagdadala ng katatagan at pag-asa, hindi lamang sa akin kundi sa buong komunidad.

Higit sa lahat, ang Brigada Eskwela ay isang mahalagang salik ng ating kasalukuyan. Sa pagbabayanihan, tayo ay nagiging parte ng isang mas malaking layunin — ang pagbuo ng isang matatag na paaralan para sa mas maaliwalas na bukas ng mga kabataan.

Patunay lamang na lumipas man ang maraming panahon ang tunay na diwa ng bayanihan ay nananalaytay parin sa dugo't ugat ng bawat Pilipinong hangad ay maginhawang pagbabago.

Sa bawat hakbang tungo sa isang panibagong simula, bayanihan ay ating pinagtitibay. Brigada Eskwela ang nagbubuklod sa atin tungo sa pag-asa at tagumpay. Kaya ano pa ang inyong hinihintay? Halina’t mag Brigada Eskwela at makiisa para sa kaliniSANHAY!