04/04/2022
AHABW'ENKI MUSEVENI AHINDWIRE, AKABINGA BA RDC
Eiraka Ryaitu
Ebiro 23/03/2022, esabiiti ibiri enyimaho, Omwebembezi w'Eihanga rya Uganda, Owek. Yoweri Kaguta Museveni Tibuhaburwa akashohoza ekihandiiko ky'orukarara rurikworeka ku yaahindura, akarekaho, kandi akabinga bamwe aha bajwekyerwa be n'abahwezi baabo omuri za disiturikiti zitari zimwe na zimwe. Abajwekyerwa barikuhika 147 n'abahwezi baabo 163 bakahindurwa abandi baabingwa, ekintu ekyareeteire abantu omu nshonda z'eihanga baagamba aha nshonga egi omu miringo etarikushushana.
Kandi nabwo omu kuhindura oku, Purezidenti Museveni akataasyamu eminyeeto erikureebeka nka ba maani-masya ahabw'okugira ngu eminyeeto neeyebakura kandi erahukaho, eyanguha kutumwa omu mirimo ya Rwangisiriza.
Nikigambwa ngu Omwebembezi w'Eihanga akatungaho za ripoota kuruga omuri ba Minisita na ba mbega b'eby'okwerinda ku bamwe aha bajwekyerwa baayejumbeire omu;
✍️Okwiha abanya Uganda omu mataka gaabo omu buhenda biragiro.
✍️Okworeka obweremwa omu kurebuuza za puroguraamu za gavumenti
✍️OKwosha aha mirimo
✍️N'okukoragana b'aborubaju oruhakanisa gavumenti kwenda kujumika enkora ya Rwangisiriza kugita ow'eishe-butaka n'okugiremesa.
Okucondooza hoona nikwongyera kworeka ku ba aha bajwekyerwa ba Purezidenti n'abahwezi baabo baakoragaine n'abashaho n'abandi bakuru omuri za disiturikiti kukoresa kubi esente za Korona.
Enshonga ezi n'ezindi ezitakamanyirwe nizo zaaresireho okucondooza okwarugiremu empindahinduka.
Bamwe omu ba RDC(Aradiisi) ababingirwe barimu Omwami Frank Besigye Kyereere obaire ari Sheema, na Omukyara Lillian Ruteeraho obaire ari omuri Kagadi. Aba okubabinga kikashaasha haihi buri omwe omu kicweka kya burengyerw'eizooba bwa Uganda, abantu baayebuuza ahabwaki Museveni abantu aba yaababingire. Itwe nk'abahandiiki titurikumanya ahabwaki abakuru aba Museveni yaababingire.
Omwami Kyereere arikugamba aha nshonga egi, egizire ngu we akamanya ku baamubinga ari omu firidi naakora ngu kwonka amakura yaagaakiira omu mutima murungi kandi ariyo naaza owaabo Rukiga kuhinga.
Ku tugambireho n'omujwekyerwa omusya ahabwa Sheema, Omukyara Pulikeria Muhindo Mwine, orugire Rukiga arikwija Sheema, atugizire ngu Omwebembezi w'Eihanga aine obushoborozi obwamuhairwe engyendererwaho y'eihanga kutaho kandi akaihaho abajwekyerwa be omu bwire obu arikwenda.
© Amanyisa
Eiraka Ryaitu
Esimu: 0706139795|0782711457
Facebook: Eiraka Ryaitu