06/01/2026
Serikali ya Awamu ya Sita imeendelea kuwekeza kwa vitendo katika maendeleo ya vijana kwa kuweka mazingira wezeshi ya kiuchumi kupitia mikopo ya halmashauri, mafunzo ya ufundi stadi, uwezeshaji wa kilimo na ufugaji, pamoja na urasimishaji wa biashara. Kupitia hafla ya utoaji elimu kwa vijana mkoani Singida, Afisa Maendeleo ya Vijana wa Mkoa, Bw. Friedrich Ndahani, ametoa wito kwa vijana kubadili mtazamo na kasi yao ya maisha kwa kuchangamkia fursa hizo kwa juhudi, nidhamu na uthubutu, akisisitiza kuwa fursa ndizo msingi wa ajira, kipato na maendeleo endelevu.
Katika hafla hiyo, Serikali imeeleza kuwa mikopo ya halmashauri hutolewa kupitia asilimia 10 ya mapato ya ndani, ambapo vijana, wanawake na watu wenye ulemavu wanapewa kipaumbele ili kuhakikisha ushiriki jumuishi wa makundi yote katika uchumi. Aidha, imebainishwa kuwa mafunzo ya ufundi stadi kupitia vyuo k**a VETA yanagharamiwa na Serikali hadi kufikia asilimia 100 kwa baadhi ya makundi, ikiwa ni mkakati wa kuwajengea vijana ujuzi unaohitajika sokoni na kuwawezesha kujiajiri au kuajiriwa.
Viongozi wa maendeleo ya vijana na ujasiriamali wamewahimiza vijana kurasimisha biashara zao ili ziweze kunufaika na fursa rasmi za kifedha, masoko na mafunzo, huku wakisisitiza uwajibikaji katika matumizi ya mikopo na utekelezaji wa miradi yenye tija. Vijana walioshiriki wameeleza kuwa elimu hiyo imewasaidia kutambua fursa zilizopo, vigezo vya kuzipata na namna bora ya kuzitumia kwa maendeleo yao binafsi, jamii na Taifa kwa ujumla.
Ujumbe mkuu unabaki wazi: Serikali imeweka mifumo, rasilimali na sera; sasa ni jukumu la vijana kuchukua hatua, kufanya maamuzi sahihi na kukimbilia fursa kwa kasi na umakini unaolingana na ndoto zao za maisha bora.
