09/06/2024
بحكم خدمتي ودراستي قبل صناعة المحتوى هي سلامة الجودة في التكييف
🌞🌞🌡️🌡️
مهما كانت درجة الحرارة خارج المنزل .. انت ريڨلو عند 25 أو 26 وخليه .. هكا يخدم مرتاح و يجيبلك الحرارة 24 و يقص يرتاح شوي و مبعد يعاود يخدم
البرودة الي تخرج من المكيف في درجة 26 هي نفسها الي تخرج كي تحطو ف 16 ديما ينفخ تقريبا بمعدل 8° في الحالتين. .. الاختلاف الوحيد هو انك تقولو جيبلي حرارة الغرفة 16 و قص و هذا شبه مستحيل !!
ثاني حاجة اول مرة كي تخدمو بعد 9 اشهر ( سبات ) اغسل فيلترات متاع لداخل .. و لبرا كي تبدى المروحة تخدم اضربو خفيف ملفوق يخرج شوي غبار
كي يبرد الدورة الاولى بعد ما تخدمو .. استناه يعاود يخدم مرة ثانية و اخرج برا .. اذا لقيت التيو الصغير بارد و الكبير ابرد منو و عامل قطر ماء معناه الغاز راهو مريڨل .. اذا لقيت الصغير بارد اكثر على الكبير و عامل كوش ثلج معناه ناقصو غاز . هنا كيف تجيب صنايعي ما تقلوش عبيلي غاز ! قلو المكيف فيه fuite ريقلو وبعد شرجيه 🙂
الناس لي تركب مكيف جديد .. من الاحسن الوحدة الخارجية تكون مركبة في مكان للظل موش مقابل الشمس وتكون الوحدة الخارجية عالقاع والا على الاقل هابط على الوحدة الداخيلية ب 50 سم باش زيت المحرك ما ينجمش يطلع الفوق و يسكر الجعب وكل مرة يحبس المكيف يرجع للمحرك وحدو . الجماعة لي ركبو فيه فوق السطح ومقابل الشمس ينجم يأثر على مردودية المكيف وفي عمر المكيف لأنو أغلب المكيفات خاصة الانواع العادية تشتغل الى حدود 44°
احس المكيفات لي تتماشى مع طقسنا في تونس
-مكيف Tropicalisé يقدر يخدم لحدود سخانة 50°
-مكيف inverter مكيف متطور نوعا ما وقادر بصفة اوتوماتيكية انو يجاري حرارة الطقس ويتحكم في مردودية المحرك بصفة اوتوماتيكية يقدر يخدم في حرارة مرتفعة وفي حالات الضو يكون ضعيف .
حاجة اخيرة راهو المكيف لا يمصلك الماء من بدنك لا شي كلها خزعبلات الماء لي يقطر فيه في الخارج راهو رطوبة في الجو كيف يجبدها المكيف وتتعدى على الوحدة الداخلية تبرد برشا وتتشكل قطرات ماء تخرج عن طريق النبوب الخاص وكيف المكيف متاعك ما يقطرش ماء موش يعني فيه حكاية! هاذيكا يعني الجو مافيهش ندوة لا اكثر لا اقل
الحالات لي تخليك تمرض كيف تقابلو مباشرة وانت عارق و الا ترقد تحتو مباشرة خاطر فما اختلاف كبير بين حرارة بدنك و حرارة المكيف .
ربي يبرد علينا ناس الكل 🤲🏻
