Juventude Organizasaun Sagrada Familia

23/11/2022

𝐋𝐚𝐦𝐞𝐧𝐭𝐚𝐬𝐚𝐮𝐧 𝐡𝐚𝐬𝐨𝐫𝐮 𝐚𝐭𝐚𝐤𝐞 𝐩𝐞𝐬𝐨𝐚𝐥 𝐛𝐚 𝐊𝐨𝐦𝐚𝐧𝐝𝐚𝐧𝐭𝐞 𝐋-𝟕

Juventude husi Organizasaun Rezistensia Sagrada Familia (ORSF) hakarak hato’o ami-nia preokupasaun konaba fotografia ida nebe ema balun edit no sirkula iha plataforma media sosial oioin inklui Facebook hodi negativamente deskreve Komandante L-7 nebe mos nudar deputadu ida Parlamentu Nasional.

Enjerál ami apresia kolega joven sira no sidadaun sira seluk nebe ativu tebes hodi demonstra preokupasaun balun konaba asuntu sira nebe mak afeita ema barak nia vida. Ida-nee merese apresiasaun i espiritu sira hanesan nee mak uluk sai forsa motriz ba funu-nain sira inklui Komandante L-7 hodi luta kontra okupasaun Indonesia.

Maski nune’e, ami lamenta kuandu ita aproveita oportunidade hirak nee hodi utiliza maneira expresaun ida nebe halo atake pesoal liuliu ba funu-nain sira hanesan Komandante L-7 nebe liu husi Organizaun Rezistensia Sagrada Familia halibur Timoroan rihun ba rihun hodi organiza luta koletiva ida nebe rezulta liberdade nebe ita hotu goza ohin loron.

Ami husu atu iha espasu demokratiku ida-nee maski iha diverjensia, ita mantein ita-nia respeitu ba hirak nebe sakrifika iha tempu difisil hodi kontribui ba luta ida nebe harii Timor-Leste nudar pais demokratiku ida.

09/08/2022

Juventude husi Organizasaun Rezistensia Sagrada Familia (J-ORSF) rejista ona atu partisipa iha kompetisaun 𝗧𝗮𝗰̧𝗮 𝗙𝗔𝗟𝗜𝗡𝗧𝗜𝗟 𝗳𝘂𝘁𝘀𝗮𝗹 𝟮𝟬𝟮𝟮.

J-ORSF konsidera partisipasaun iha eventu desportivu refere nudar meios ida hodi relembra no fo valor ba aswain FALINTIL sira nebe ho korajen forte hodi defende ita-nia rain durante jornada luta ba ukun-an.

Involvimentu iha torneu futsal nee mos nudar oportunidade diak ida atu halibur jerasaun husi membru Sagrada Familia no promove sira nia talentu futebol.

Torneu ba 𝗧𝗮𝗰̧𝗮 𝗙𝗔𝗟𝗜𝗡𝗧𝗜𝗟 𝗳𝘂𝘁𝘀𝗮𝗹 𝟮𝟬𝟮𝟮 halao iha salaun futsal F-FDTL Fatuhada-Dili husi 09 Agostu - 01 Setembru 2022.

30/07/2022

Organizasaun Rezistensia Sagrada Familia (ORSF) realiza konferensia munisipal iha Viqueque hodi estabelese estrutura munisipal. Estabelesimentu estrutura munisipal nee nudar programa prioridade ida nebe hatur ona iha ORSF ninia planu estratejiku ho objetivu atu konsolida membru sira no fasilita ORSF ninia prestasaun serbisu.

Konferensia munisipal ida-nee termina ho serimonia toma pose nebe dirije husi fundador ORSF Komandante L-7 no conselheiro ORSF Jeneral Lere Anan Timur.

Atividade refere halao iha loron 30 Julho 2022 iha Postu Administrativu Watulari no hetan partisipasaun husi delegadu sira husi Postu Administrativu 6 nebe pertense ba Munisipiu Viqueque.

18/07/2022

Palasiu Governu RDTL, Segunda feira-18 Jullu 2022

Reprezentante estrutura ezekutivu Organizasaun Rezisténsia Sagrada Família (ORSF) ohin halo audiénsia ho Primeiru Ministru RDTL, Sua Exelénsia Sr. Taur Matan Ruak iha Palasiu Governu.

Objetivu prinsipál husi soru-mutu ida ne’e mak atu konvida Sua exelénsia PM nudár Komandante FALINTIL no Primeiru Ministru atu marka prezensa no fó mensajen patriotiku iha serimónia selebrasaun aniversariu ORSF nian ba dala 33 iha Postu Administrativu Watulari, Munisipiu Viqueque iha loron 30-31 Jullu 2022.

Selebrasaun aniversariu ORSF ba tinan ida ne’e sei konstitui husi:
1) Retiru nasionál hodi simu mensajen patriotiku husi diresaun nasionál rezisténsia nian ho tópiku “Defende Integridade RDTL no Harii Rezilensia Popular”;

2) Realiza konferénsia munisipál hodi eleje estrutura ezekutivu ORSF munisipiu Viqueque;

3) Realiza ritual tuir tradisaun kada tinan.

Selebrasaun ida ne’e sei marka prezensa husi membru ORSF iha territóriu nasionál hahú husi responsavel no membru sira. Mensajen ida ne’e mós semana hirak liu ba fó sai ona liu husi konferénsia imprensa hanesan evidenti iha link tuir mai nee;
https://www.youtube.com/watch?v=X-2wxbWCUnY

16/07/2022

Feliz aniversário Komandante L-7🥳🎉🎊🎂
Fundador Organizasaun Rezistensia Sagrada Familia

12/07/2022

Obrigadu barak Saudozu Kaer Susar-Deskansa em Paz iha mundu foun
Organizasaun Rezistensia Sagrada Familia, sente triste tebes lakon Aswain FALINTIL ida. Aswain ne'e lalais tebes, liu ba mundu seluk, iha momentu ne'ebe Jerasaun foun sira sei presiza Korajen no Motivasaun Patriotiku, atu lori ajenda Libertasaun ba oin.

Dalan ida ne'e duni mak ita hotu sei liu no destinasaun ida ne'e, la'os iha ita ema nian kontrolu.

Presta ami nian Solidariedade ba familia ne'ebe lakon tiu, aman no maun.
Dala ida tan, Obrigado barak Saudozu ba dedikasaun no luta naruk hodi ohin ita bele hetan Timor-Leste ida la hp ukun Rai li'ur nian.

A Deus Saudozu e ba ho Maromak

20/05/2022

Ohin, 20 de Maiu 2022, Povu Timor-Leste selebra independénsia ba dala 20 .

Parabens, Povu Timor-Leste ba korajen no determinasaun ! Obrigadu barak ba Lider Timor oan sira, obrigadu barak ba Nasoins Unidas no komunidade Internasionál tomak.

Felizmente, Ohin loron, Povu Timor-Leste laiha tan rejime ditadór ne’ebé kada loron oho Timor oan, enfrenta tratamentu kruél no desumanu ho forma sira seluk, Maske tenke hadi’a seguransa no estabilidade dignu liu tan, Realmente Timor tomak moris ho inklima trankuilidade di’ak tebes.

Selebrasaun ida ne’e, nudár momentu refletivu ida ba Timor oan tomak hodi haree didi’ak fali saida mak ita atinje ona durante tinan 20, saida mak seidauk no saida mak loloos ita hetan ona maibé seidauk, tenke refleta ho kle’an no korajen ba redefinisaun diresaun di’ak no loos liu atu harii ekonomia sustentável no rezilensia Popular kontra kualkér krize ne’ebé afeta ita.

Organizasaun Rezisténsia Sagrada Família sente orgullu hola parte ona iha funu kontra Okupasaun Militár Indonézia no duni sai Indonézia husi Territóriu Nasional Timor-Leste nian.

Ami konkorda ho lider Timor oan sira nian afirmasaun, “ita la ukun an atu troka de’it bandeira NKRI ba RDTL, la ukun atu troka de’it lider ditadór husi rejime Indonézia ho lider Timor oan sira, maibé ukun an loloos mak povu Timor oan tomak tenke livre husi kualkér difikuldade hodi hakat ba moris ida ne’ebé di’ak no justu liu”.

Ukun an loloos mak, Povu Timor-Leste tenke livre husi Kiak, tenke livre husi obskurantismu ho nian forma sira hotu, tenke livre husi insufisiente ai han no malnutrisaun kroniku, Povu tomak bele hetan tratamentu dignu no ekitavel husi Estadu ne’ebé ita hotu harii.

Timor oan tomak bele halo esforsu liu tan atu kombate dezafiu hotu-hotu ne’ebé satan netik dalan ba moris di’ak ita hotu nian. Lider sira bele ajuda define no organiza povu ho maneira Pasífiku no dignu liu iha futuru di’ak Timor oan sira nian.

Dala ida tan, Parabens ba vitória no ukun rasik an!
A Luta Tenke kontinua!

06/05/2022

Relasiona ho Avizu nebe fo sai husi CCLN katak, sei kontinua hala'o prosesu validasaun ba 2⁰ Periodu.

Ho ida ne'e Pagina Organizasaun Rezistensia Sagrada Familia ( ORSF ) hakarak fahe tutan Informasaun ba membru ORSF hotu ne'ebe regista iha 2009, bele ba Sentru verifikasaun no validasaun, atu tuir validasaun iha suku ( moris fatin ) ne'ebe ita boot sira Registo ba.

Allende ne mos ba familia martires no kombatente sira atu hakbesik aprejenta a'an, iha sira nia moris fatin hodi bele submete iha prosesu validasaun ba responsavel sira tuir kalendaria nebe iha.

Informasaun detalho bele hare iha imagem anexo.

03/05/2022

Organizasaun Rezistensia Sagrada Familia lakon tan ninia membru ativu ida nebe pertense ba Kaixa Filos. Saudozu Joanico nudar kombatente ida nebe hola parte iha Departementu Lojistiku no Mobilizasaun hahu husi 1991 too ukun rasik an. Saudozu hakotu iis iha HNGV Dili tanba sofre moras komplikasaun ida. Saudozo ninia mate nee husik hela feto faluk no oan Kiak iha Munisipiu Liquica.

Obrigado barak Saudozu maun Joanico ba kontribuisaun ho determinasaun boot ne'ebe fo ona ba ita nia rai doben. Ami nia Sentidu kondolensia klean ba familia em lutada.

30/04/2022

Mate-isin husi Saudozo Domingos Ribeiro “Kiik-oan” haloot ona iha Jardim dos Herois Metinaro liu husi serimonia funeral nebe estadu organiza ba saudozo nudar veteranu ida. Serimonia funebre realiza iha Metinaro depoizde prestasaun ba ultima omenajen iha Parlamentu Nasional no Komite Sentral FRETILIN.

Aleinde serbisu sira seluk iha tempu rezistensia, Saudozo nudar responsavel Sagrada Familia ida iha Universitas Timor Timur (UNTIM). Depoizde ukun-an Saudozo "Kiik-oan" kontinua serbí Timor-Leste liu husi knaar no responsalidade oioin iha Ministeriu Agrikultura no Peska, Parlamentu Nasional, no Prezidensia Republika. Saudozo hakotu iis iha Baucau depoizde sofre moras króniku ida.

28/04/2022

Organizasaun Rezistensia Sagrada Familia ho triste boot lakon ona aswain Saudozu Domingos “Kiikoan”. Durante luta ba ukun-rasik-an, Saudozu Kiikoan nudar aswain ida nebe iha kompromisu forte ba serbisu rezistensia liu husi Organizasaun Rezistensia Sagrada Familia. Depoizde ukun-an saudozu kontinua presta ninia kontribusaun ba rai ida-nee liu husi pozisaun oioin iha entidade estadu nian inklui Ministeriu Agrikultura i Peska no iha Parlamentu Nasional nudar eis-deputadu ida husi Bankada FRETILIN.

Obrigadu barak ba Saudozo ninia kontribusaun. Deskansa ho hakmatek Saudozu Kiikoan!
Kondolensia kle’an ba família Saudozu! Ami hotu nia solidariedade hela ho família tomak.

Adeus, adeus e adeus maun Aswain Saudozu Kikoan.

Medi@ Jerasaun Kontinuador-ORSF

25/03/2022

ORGANIZASAUN REZISTENCIA SAGRADA FAMILIA REALIZA KONGRESU NASIONAL.

Kongresu ne'e hanesan 3⁰ Kongresu Nasional Organizasaun Rezistencia Sagrada Familia ne'ebe ho topico " Valoriza Veteranu Sira no Empodera Jerasaun Foun ba Libertasaun Povu" Ne'ebe Maka Sei Realiza durante loron rua iha Salaun kanociana ha'as laran Dili; 25/03/2022.

Partecipante ba Kongresu Nasional ne participa husi: Fundador OSF, Conseilero Maximo OSF, Sec.Geral OSF, Orgaun Diretiva OSF, Chefe Casa Civil Presidente RDTL, SASCAS-PM (reprezentante PM), Secretaries Geral CNJTL, 1⁰ Vice Secjen RENITIL, Vice Presinte CONSENTIL, Secretario Estado Juventude no Desportu, Presidente Comisaun 25, Chefe Gabinete MACLN, Secretaries Executivo ASSEPOL, Responsavel Jerasaun Patriota, Delegado/a OSF husi 12 Municipio inklui RAEOA no Partisipa Maximo husi Juventude kontinuador Organizasaun Rezistencia Sagrada Familia.

Medi@ Jerasaun kontinuador ORSF

31/01/2022

Ohin, dia 31 Janeiru 2022, membru balun husi Juventude Organizasaun Sagrada Família, sai ona elementu efetivu iha Komponente Forsa Armada RDTL nian F-FDTL, hafoin enfrenta ezersísiu todan durante fulan hirak kotuk.

Jerasaun kontinuador sira husi OSF nafatin firme no determinadu hodi hatutan obra aswain sira nian ba asegura no defende Integridade Territorial Rai doben RDTL.

J-OSF sente orgullu dala ida tan, presta obrigasaun nudár sidadaun responsavel atu defende nafatin Timor-Leste ne’ebé sosa ho Timor oan liu rihun atus rua nian vida, maioria Populasaun kontinua sofre konsekuénsia ba funu kontra Okupasaun ilegál Militár Indonézia nian.

J-OSF enkoraja elementu F-FDTL tomak atu opta nafatin prinsipiu primordial FALINTIL nian, Sai nafatin liman kro’ak povu nian, hodi defende Povu Timor husi ameasa oin-oin.
Sei laiha tan nein ida Populasaun husi Timor oan mak lakon vida husi nian liman kro'ak rasik.

Korajen e ba Oin Nafatin

22/01/2022

Ohin iha Selegua LAGA, dia 22 Janeiru 2022, haloot ona iha fatin deskansa ikus nian, funu na’in Saudozu Tomas da Costa Belo, Saudozu nudár aman ba Eis FALINTIL “Badamau” ne’ebé hola parte iha Komandu Komandante L Foho Rai Boot, L-7 nian.

J-OSF hato’o sentidu kondolensia kle’an ba família ne’ebé ho lutu ba lakon aman, tiu, avó no maun alin. J-OSF mós hato’o obrigadu barak ba sakrifisiu no dedikasaun hotu ne’ebé Saudozu fó libertasaun Patria Timor-Leste nian.

Deseja, deskansa hakmatek iha Saudozu nian mundu foun, ne’ebé ami hotu sei tuir ba.

Adeus e Adeus Saudozu Tomas!

07/12/2021

Loron 07 Dezembru iha sentidu espesial iha Timor-Leste ninia kontextu istóriku tanba loron nebe refleta invasaun eskala boot nebe inisia okupasaun brutal durante tinan 24. Tanba nee, ohin dadersan, Juventude husi Organizasaun Sagrada Familia halibur malu hodi kari aifuan iha tasi ibun Palasiu Governu nudar aktu ida hodi fo omenajen ba martir sira nebe mate iha momentu neba.

12/11/2021

Fundador Organizasaun Sagrada Familia (OSF) Komandante L-7 partisipa komemorasaun Loron 12 Novembru nebe nudar eventu istóriku boot ida iha Timor-Leste ninia jornada luta ba independensia. Eventu ida-nee partisipa mos husi membru OSF balun inklui sira nebe nudar sobrevivente masakre Santa Cruz no juventude OSF. Komemorasaun ba dala 30 ida-nee hahu ho misa no marsa husi Igreja Motael i kulmina iha Semiteriu Santa Cruz.

30/10/2021

J-OSF hato'o sentimentu tristeza tamba Sarani no kreda Timor lakon tan bibi atan di'ak ida ne'ebé fo tomak vida hodi servi igreja ate hakotu destinu, Descansa Em Paz Dom Basilio do Nacimento atual Bispo Diocese Baucau nian.

27/10/2021

Ami triste tebes rona katak amigu boot Povu Timor nian Maun Max Sthal liu ona ba Mundu seluk.
Afirmasaun Simples ida, ami hatoo obrigado barak ba kontribuisaun tomak ne'ebe maun fo iha momentu defisil no maun nian film sai tiha bombardiaun hodi fanu mundu tomak hateke mai sofrementu povu Timor nian.

Ami hatoo mos sentidu kondolensia klean ba familia em lutada, Maske Maun Max Stahl uluk ona, Timor-Leste sai uma mahon nafatin ba ita hotu atu halibur.

Adeus Saudozu Max, ate halibur malu iha mundu espiritual 😭💪
Obrigado barak.

17/10/2021

AVISU

Ho biban ne'e atu informa ba membro Organizasaun Rezisténsia Sagrada Familia no FALINTIL sira hotu iha fatin ne'ebé de'it, Saudozu "Lemorai nu'udar membro OSF no mós FALINTIL ho nune'e husu membru sira hotu atu marka prezensa iha sede Fatuhada hodi presta ultimo homenagen.

15/10/2021

"Maun Lemorai liu ona ba Mundu seluk ho maneira ne’ebé ami hotu la espera!
Triste tebes haree imajen no rona katak maun Lemorai fila ona ba Mundu seluk"

Ami hotu nudár membru organizasaun rezisténsia Sagrada Família sente lakon boot maun husi ami nian sorin, iha momentu ne’ebé povu no Estadu presiza ita hotu nian kontribuisaun.

Obrigadu barak Saudozu maun Lemorai, ba dedikasaun no sakrifisiu hotu ne’ebé fó ona ba prosesu Libertasaun Timor-Leste nian.

Ho triste boot hato’o sentidu kondolensia ba família em lutada.
Adeus no deskansa ho hakmatek maun Komandante Saudozu Lemorai.

Adeus maun! "

02/10/2021

Juventude Organizasaun Sagrada Familia (J-OSF) hato'o sentidu kondolensia profunda ba matebian Sra. Alda Pinto nu'udar inan husi Sekretariu Jeral OSF - Dr. Anteiro Benedito da Silva.

J-OSF expresa simpatia klean ba Sekretariu Jeral OSF no enkoraja atu forte nafatin hodi simu realidade triste ida-nee.

27/09/2021

Loron 27 fulan Setembro tinan 2021 Organizasaun Sagrada Família (OSF) kompostu husi Fundadór Cmdt. L-7 akompaña husi orgaun diretivu, responsavel kaixa,estrutura ezekutivu no Juventude kontinuador Organizasaun Sagrada Família (J-OSF).

Marka prezensa iha Arkivu Muzeum da Rezisténsia hodi presta ultimu homenagen ba saudozu José António Gomes da Costa ho naran kodigu Ma'hunu Bulerek Karathayano ne'ebé hakotu i'is iha loron 24 fulan Setembru tinan 2021 iha HNGV.

Iha tempu invazaun saudozu nu'udar membru Comitê Central da FRETILIN iha tinan 1975.

Hetan nomeasaun nu'udar komisariu polítika ba rejiaun haksolok iha tinan 1971.

Nu'udar konsellu militár iha tinan 1988, nu'udar sekretáriu komisaun diretivu FRETILIN nian.

Saudozu nu'udar susesor natural hodi kaer komando da luta ate loron 5 fulan Abríl tinan 1993 hetan kampturasaun husi Militár Indonézia iha Ainaru.

Hateke husi istória naruk funu nian ba luta libertasaun nasionál Saudozu Ma'hunu fo kontribuisaun direita ba URA.

Agradese wain ba ita boot nia sakrifisiu totalidade hodi liberta ona rai doben Timor-Lorosa'e ba URA.

24/09/2021

Deskanca em Paz 🙏 Heroi Timor-Lorosa'e 🇹🇱.

07/09/2021

Organizasaun Sagrada Familia (OSF) lakon ona Kombatente ba Libertasaun Nasional ida saudozu Marçal Guteres ‘Mauclau’ nebe hakotu iis iha Vera Cruz iha loron 07 Setembru 2021.

Saudozu Mauclau nudar responsavel grupu OSF ida nebe fo kontribusaun signifikante ba Timor-Leste ninia luta ba ukun-rasik-an. Kontribusaun importante balun nebe saudozu fo inklui ninia involvimentu iha demonstrasaun nebe joven sira organiza durante Amo Papa João Paulo II ninia vizita mai Timor Leste iha tinan 1989. Nune’e mos durante estuda iha UNTIM (Universitas Timor Timur), saudozu Mauclau lidera grupu OSF ida hanaran “Xanak” nebe mobiliza universitariu sira ba serbisu rezistensia.

Narativa balun husi ninia kompañeiru sira hateten katak saudozu Mauclau ninia involvimentu ativu iha serbisu klandestina sunu ninia vontade boot atu ba apoia rezistensia armada iha ailaran hamutuk ho Komandante L-7 liuliu iha tinan 1994. Maibé iha momentu neba, OSF ninia responsavel másimu Saudozu Andre da Costa ‘L-4’ la aseita ho vontade ida-nee tanba presiza saudozu ninia apoiu iha mobilizasaun ba joven sira iha vila laran.

Depoizde ukun-an, saudozu kontinua serbi Timor-Leste liu husi Polisia Nasional Timor-Leste to’o hakotu iis. Saudozu nudar komandante PNTL ida nebe moris iha loron 15 Fevereiru 1972 iha Suco Bahamori, Venilale Muniçipio Baucau.

Juventude OSF expresa sentidu kondolensia klean ba familia em lutada. Deskansa ho hakmatek saudozu Mauclau i obrigadu barak ba ita-boot nia sakrifisiu no dedikasaun tomak ba Timor-Leste.

29/08/2021

Parabens povu Timor-Leste tomak liuliu ba sira nebe iha korajen boot hodi hakat ba sentru votasaun iha 30 Agostu 1999 hodi finalmente termina Timor-Leste nia luta ba ukun-rasik-an.

Organizasaun Sagrada Familia (OSF) ho organizasaun rezistensia sira seluk iha momentu neba asume responsabilidade krusial ida hodi mobiliza povu ba sentru votasaun. Liu husi ninia redi klandestina nebe estabelese iha teritóriu tomak, lideransa no membru OSF sira ativamente enkoraja populasaun ho aten-brani hakat ba sentru votasaun hodi ezerse sira-nia direitu votu iha prosesu referendum nebe organizadu husi United Nations Missions of Support in East Timor (UNAMET).

20/08/2021

Organizasaun Sagrada Familia (OSF) hato’o ksolok anivesariu loron FALINTIL dala 46 ba Timoroan sira hotu. OSF hakarak expresa ninia respeitu ba asuwain FALINTIL sira hotu nebe sakrifika-an no fó dedikasaun boot durante luta armada hasoru okupasaun.

OSF úniku iha ninia karakter nudar organizasaun rezistensia ida nebe funda husi komandante FALINTIL ida – Cornelio D. C. Gama ‘L-7’ i organizasaun ida-nee ninia membru barak mak nudar membru FALINTIL no seluk nebe ativamente serbisu hodi suporta rezistensia armada.

OSF orgulho hodi selebra loron importante ida-nee i fo omenajen ba eroi no martires FALINTIL nebe lakon vida iha prosesu luta ba ukun-an.

27/07/2021

Joventude Organizasaun Sagrada Familia (J-OSF), hato Feliz Aniversario ba Loron Moris Nia Sr. Domingos Boavida" Cowboy Nagasoro".

Desejo Saude Diak Vida naruk Susesu Nafatin iha Misaun Sagrado ba Libertasaun Povo 🇹🇱.

Dala ida tan parabens 🎊🎉 Maun Jesus Haraik Bensaun 🙏.

25/07/2021

Organizasaun Sagrada Família (OSF) hanesan organizasaun masa rezisténsia ne’ebé harii iha 25 de Jullu 1989 iha suku Libagua, aldeia Buibata, fatin Durugua Liagua, Postu Administrativu Laga no Funda husi Komandante Cornelio da Conceição Gama - Leki-Na, Eli Foho Rai Bo’ot, L7 ho nia lema “Paz de Crsto Salvador, Unidade, Paz, Fé, Esperança e Caridade”
Objetivu atu haberan rezistensia iha rai-laran liu husi krensa/Fita ba sidadaun ne’ebé hamahan-an iha estrutura de servisu baze (Frente Clandestina) ne’ebé mak kordenadu no kolektivu hamutuk no apoiu Forca Armada FALINTIL hodi bele ultra pasa situasaun defisil iha Luta Libertasaun Patria-nian.

Asmwain gerileiru Falintil Leki-Na, Eli Foho Rai Bo’ot, L7 orienta soldadu Falintil nain rua ho naran Julio L7 Ki’ík no Maudolar hodi hahu habelar krensa ba ema hotu iha Dili no iklui Municipio seluk. Militar indonesia to’o ikus deskobre soldadu nain rua ne’e nia paradeiru, tan ne’e soldadu rua ne’e fila fali ba Ai-laran. Atu kontinua habelar Krensa ne’e mak iha tinan 1992 Leki-Na, Eli Foho Rai Bo’ot, L7 no Rodak Teki Timor Ran Nakali bolu Andre da Costa Belo L4 ba iha komando da Luta hodi fo orientasaun atu kontinua habelar Sagrada Familia iha Vila.

Hanesan responsavel maximu Sagrada Familia, L4 habelar Krensa ne’e ba ema barak iha vila laran iklui mos Adelia Soares Martins Sarmento alias Cristal hanesan responsavel geral OMT. Sagrada Familia sai organizasaun ne’ebe bo’ot kompostu husi grupu, sub grupu, kaixa, sub-kaixa no estafeta gerileiru husi vila to’o aldeia no ikus Timor Leste hetan duni nia indepedensia.

Oras ne’e dadaun aswain sira ne’ebe mensiona iha lete la hamutuk ona ho ita hela deit Fundador.
Obrigado wain ba Aswain tomak nebe nebe sakrifisa an ba organiza kladentina tomak liu-liu membro Organizasaun Sagrada familia. Ita hotu nudar membru no Povu Timor, servisu seidauk hotu, fila oin ba Libertasaun Popular. VIVA ORGANIZASAUN SAGRADA FAMILIA VIVA ASWAIN TOMAK, VIVA JUVENTUDE LORIKU ASWAIN VIVA POVO MAUBERE

20/07/2021

Reprezentante husi juventude iha Organizasaun Sagrada Familia (OSF) partisipa konferensia nasional nebe Conselho Nacional Juventude de Timor-Leste (CNJTL) realiza iha salaun Katedral iha 20 Julho 2021.

Aleinde asuntu importante sira seluk nebe diskuti, konferensia nasional refere halao apresiasaun ba CNJTL ninia estatutu, diskuti no aprova liñas jerais ba CNJTL ninia programa. Hola parte iha konferensia nasional, iha mos talkshow involve lider Timoroan sira nebe halo diskusaun interativa ho tema “Lider transformativu mai ho pensamentu estadista hodi defende estado de direito democrático”.

Sagrada Familia nudar organizasaun ida nebe hamutuk ho organizasaun rezistensia sira seluk funda “Presidium Juventude Lorico Asuwain (PJLA) iha tempu rezistensia. PJLA transformadu ba CNJTL iha 2002. Dadaun nee, OSF iha reprezentante ida nebe asume responsabilidade iha CNJTL ninia estrutura ezekutivu nudar Vice-Prezidenti III.

16/07/2021

Happy Brithday Fundador Organizasaun Rezistencia Sagrada Familia Comandante L 7🇹🇱.

04/07/2021

30/06/2021

Juventude Organizasaun Sagrada Familia vizita saudoza Adelia “Cristal’ nia rate hodi re-lembra tinan ida depoizde saudoza husik hela mundu.

Durante rezistensia, Saudoza Cristal nudar responsavel másimu feto iha Organizasaun Sagrada Familia (OSF).

Iha vizita ida-nee, J-OSF fo onra mos ba eroi sira seluk inklui Sudozo Andre da Costa Belo “L4” no komandante pelotaun Domingos da Costa “Serifi” nebe haloot iha Jardim dos herois Metinaro; Dili 30/06/2021.

23/06/2021

Joventude Organizasaun Sagrada Familia hato'o Rihun Parabens ba Aniversario Loron Moris Nia ba Sra. Maria Dadi Magno nudar Prezidente CNJTL (Conselho Nasional Juventude Timor Leste).

22/05/2021

Organizasaun Sagrada Familia (OSF) hato’o sentidu kondolensia ba familia husi Saudozo Manuel Adelaide “Mau-Mutin” nebe hakotu ona iis iha Hospital Naçional Guido Valadares iha loron 21 Maio 2021.

Saudozo Mau-Mutin nudar veteranu no membru OSF ida-nebe fo kontribusaun signifikante durante luta ba independensia. Saudozo hahu halao serbisu nudar soldadu FALINTIL to’o tinan 1979 no kontinua fo ninia kontribusaun ba luta iha Frente Clandestina atravez OSF partikularmente husi kaixa rezistensia “Laloran”. Nudar forma rekoñesimentu ba ninia serbisu, saudozo hetan ona kondekorasaun husi estadu ho medalha Ordem de Nicolao Lobato.

Deskansa ho hakmatek saudozo Mau-Mutin i obrigadu barak ba ita-boot nia sakrifisiu no dedikasaun tomak ba Timor-Leste.

Saudozo orijinadu husi Suco Sagadate, Posto Administrativo Laga, Muniçipio Baucau.

05/05/2021

05 Maiu 2021, Organizasaun Rezisténsia Sagrada Família lakon tan nia membru ida, Saudozu Luis Martins ho naran Revolusionáriu “Waeleu”. Saudozu nudár responsável sub-kaixa ida iha kaixa fatuk bandeira Dili.

Bainhira fila husi baze de apoiu iha foho Matebian, saudozu involve ativamente hodi organiza populasaun tama iha liña “rezisténsia urbana” nebe dala barak bolu klandestina.

Realidade hatudu katak saudozu Waeleu nia falesimentu similar ho veteranu no kombatente sira seluk nia mate; mate ho moras grave sira ne’ebé loloos Estadu bele prevene ho kuidadu médiku preventiva. Infelizmente, ita seidauk haree esforsu sériu no sistemátiku husi autoridade Estadu atu proteje ita-nia eroi sobrevivente sira-nee.

Dala ida tan, Juventude Organizasaun Sagrada Família (J-OSF) apela ba kombantente no veteranu sira atu kuidadu-an ho medida preventiva hodi minimiza risku ba moras mortal. J-OSF apela mós ba autoridade saúde atu kria mekanizmu Apropriado hodi tau matan ba veteranu sira-nia saude.

Obrigadu barak ba kontribuisaun hotu-hotu ne’ebé Saudozou fó ona ba ita-nia luta ba independénsia.

J-OSF hato’o sentidu kondolensia kle’an ba família matebian.

Obrigadu barak.
Sekretáriadu J-OSF

30/04/2021

Happy birthday Sekretario Geral Organizasaun Sagrada Familia (OSF)

29/04/2021

Organizasaun Sagrada Familia (OSF) lakon ninia membru ho naran Sabino Boavida.
Durante rezistensia, maun Sabino ativu nudar membru OSF liu husi kaixa rezistensia “Laloran”.

Nudar forma rekoñesimentu ba ninia serbisu, saudozo hetan kondekorasaun husi estadu ho medalha Ordem de Nicolao Lobato.

Saudozo hakotu iis iha 29 Abril 2021 tanba moras. Maun Sabino orijinadu husi Laga, partikularmente husi aldeia Lalulai, Suco Samalari.

Obrigadu barak ba saudozo nia kontribusaun tomak durante funu.

Juventude OSF expresa sentidu kondolensia klean ba familia em lutada.

09/04/2021

Juventude OSF kontinua fo Suporta Aihan ba Komunidade sira iha Metiaut ( Dili, 09 Abril 2021 ).

07/04/2021

Juventude OSF kontinua fornese suporta aihan ba Vitima Inundasaun iha area Bidau no Becora (Dili, 07 Abril 2021).