30/08/2022
Guida Castro “99 Ha’u Hahú Vota ba Dahuluk Hodi Determina Futuru Timor – Leste”
Loron 30 fulan Agusto tinan 1999, Povu Timor – Leste hala’o festa konsulta popular ou votasaun ba opsaun simu otonomia no rejeita otonomia husi Negara Kesatuan Republik Indonesia (NKRI).
Refleta ba loron 30 fulan Agostu tinan 2022, Timor – Leste, komemora ona, loron konsulta popular ba dala 23(30-8-1999 – 30-8-2022).
Guida Castro e Sousa hanesan sidadaun baibain ida dehan, tempu ne’eba, nia atinzi ona tinan 17, nune’e konsege vota, hodi determina distinu povu Maubere, nune’e, ohin loron ema hotu bele moris hodi goja iha País ida ne’e.
“Iha loron 30 fulan Agustu 1999, Tinan 23 liu ba kotuk, haú mós vota. Husi votasaun ne’e, nia resultadu mak ohin loron ita livre ona, hodi moris hanesan País ida. Tanba ne’e ha’u orgullu sai hanesan Timoroan ida ihatempu difisil bele vota” istoria ne’e, hato’o husi Guida Castro ba Time Timor iha Jardim 5 de Maiu, Colmera – Dili, bainhira partisipa iha feira ba komemorasaun loron konsulta popular ba dala 23.
Sidadaun ne’e dehan, tinan 23 ba kotuk bainhira atu vota no depois vota, situasaun iha Dili laran, hahú manas. Nune’e hamutuk ho familia, evakua ba Becora, Mota – Ulun, parte Karau Mate nian.
“Triste tebes bainhira votasaun hotu. Aat liutan tama ba anunsia rezultadu konsulta popular iha loron 4 fulan Setembru 1999, ahi komesa suar iha Dili laran, ema mate, uma sira hetan estragus husi milisia sora. Maibé ami halai ba parte Becora, hodi salva aan husi situasaun perigu,” nia konta.
Antes termina dada lia ho Media ne’e, husu ba Timoroan hotu, iha rea liverade nia laran, tenke hadomi malu, respeita malu nafatin, tanba ukun aan ida ne’e, la’os mai le’et deit.
“Hosi terus, matan be’e, ruin no ran mak ita sai Nasaun ida. Timoroan sira tenke tenke orgullu, moris dame- malu, paz no moris iha estabilidade nia laran sai ita hotu nia responsabilidade. Diferensa ideas, diferensa politika, no organizasaun iha fiar no arte ritual, ou arte marsiais, labele haketak Timoroan sira.”Guida husu hodi hakotu.
Intervensaun no mensajen paz husi PR iha loron konsulta Popular ba dala 23
Presidente da Repúblika José M Ramos Horta, liuhusi nia deskursu iha Jardin 5 de Maiu – Colmera, Dili rekonese hodi dehan, - Antes akontese loron konsulta popular, Timoroan sira moris iha situasaun sira ne’ebé perigu, ikus mai liuhosi Frennte Armada, Frente Klandestina no Frente Diplomata, konta mós apoiu husi Igreja, no Nasaun lubuk ida, liu –liu Portugal, Indonesia no seluk tan, Timor – Leste, bele realiza konsulta popular ne’ebé monu iha loron 30 fulan Agostu tinan 1999 maske iha dezafiu maibe la impede totalmente votasaun ne’ebé hala’o husi ONU iha Timor - Leste.
Tanba ne’e, Presidente husu ba Timoroan sira tenke moris iha dame no paz nia laran, só nune’e de’it mak labele repete fali Guera Civil hanesan akontese ona iha pasadu.
“Tanba saida Guera Civil mosu hahú tinan 1975, hodi ikus mai dura ba tinan 24. Timoraon sira mak estraga malu. Ita mak karega kilat ba malu. Ita mak ohon malu. Ita mak asalta malu. Tanba ne’e, ita labele hatudu lima ba malu bebeik iha tempu liverdade nia laran”, deskursu Presidente.
Ligsaun ho eventu komemorativu loron konsulta popular ba tinan 2022, Ministru Estatal Miguel de Carvalho Amaral, atual Presidente komisaun organizadora ba eventu sira dehan, - Atividades no eventu komemorasaun nian hala’o hotu kobre Munisípiu sira hotu, la’ós de’it iha kapital Dili.”
Obserbasaun Jornalista Time Timor iha Jardin 5 de Maiu, eventu komemorativu ba loron konsulta popular asiste direta husi Presidente Repúblika José M. Ramos Horta, hamutuk ho funsionar Estatal, parte Siguransa no Defese kontente hamutuk ho komunidade sira iha parte Colmera no Motael nian. Atividade la’o ho di’ak nune’e, ba atividade desportiva, manan na’in sira hotu hetan premiu husi emprezariu lokal no Internasional sira lubuk ida ne’ebé hala’o knar iha Timor - Leste **** (TTM)
