Tai Education - Shan Version (2025)

13/01/2025

သူင်သိူဝ်းဝၼ်းလုၵ်ႈဢွၼ်ႇ တွၼ်ႈၼႂ်းမိူင်း

ယူႇတီႈၽူႈယႂ်ႇၵူၼ်းလူင် ၸုမ်းၶူး လႄႈ ပေႃႈမႄႈပီႈၼွင်ႉၼႂ်းပိုၼ်ႉတီႈ လႆႈၸတ်းႁဵတ်းပၼ် ဝၼ်းလုၵ်ႈဢွၼ်ႇ ၵႂႃႇယူႇယဝ်ႉ

ယိူင်းဢၢၼ်းၼႂ်းလွင်ႈၸတ်းႁဵတ်းဝၼ်းလုၵ်ႈဢွၼ်ႇၵႂႃႇၼႆႉ ဢမ်ႇၸႂ်ႈတႃႇမူၼ်ႈတႃႇၵျေႃႇလွင်ႈလဵဝ်ၵူၺ်း ယိူင်းဢၢၼ်းလိုၵ်ႉလိုၵ်ႉၼၼ်ႉတႄႉ တႃႇႁႂ်ႈယုၵ်ႉယွင်ႈပၼ်ၵႃႈၶၼ်လုၵ်ႈဢွၼ်ႇတၢင်းလုမ်ႈၾႃႉ လႄႈ လုၵ်ႈဢွၼ်ႇၼႂ်းမိူင်းၸိုင်ႈတႆး ဢၼ်ႁၢမ်းသုၼ်ႇလႆႈယူႇၼၼ်ႉ ႁႂ်ႈပေႃးပဵၼ်ၵၢၼ်တိုၵ်းသူၼ်းလႄႈပွင်ႇၸႂ်ဝႃႈ လုၵ်ႈဢွၼ်ႇႁဝ်းၼၼ်ႉမၼ်းမီးၵႃႈၶၼ်တေႃႇပေႃႈမႄႈၵူၺ်းဢမ်ႇၵႃး ၼင်ႇႁိုဝ်ၸိူဝ်ႉၸၢတ်ႈ ဝၢၼ်ႈမိူင်းႁဝ်း သမ်ႉပေႃးတေၶိုၼ်ႈယႂ်ႇလႆႈၼၼ်ႉ ပဵၼ်ႁႅင်းလုၵ်ႈဢွၼ်ႇႁဝ်းဝၼ်းမိူဝ်ႈၼႆႉယဝ်ႉၼႆသေ မုင်ႈမွင်းဝႃႈ ၵေႃႉပဵၼ်ပေႃႈမႄႈလုၵ်ႈဢွၼ်ႇ လႄႈ ၽူႈယႂ်ႇၵူၼ်းလူင်ႁဝ်းၶႃႈ တေႁူႉၵႃႈၶၼ်လုၵ်ႈဢွၼ်ႇႁဝ်းဝၼ်းမိူဝ်ႈၼႆႉသေ တေသိုပ်ႇၵမ်ႉၸွႆႈတီႇတၢင်းပၼ် သဵၼ်ႈတၢင်းပၢႆးပၺ်ႇၺႃႇလုၵ်ႈဢွၼ်ႇႁဝ်း ႁႂ်ႈႁၢင်ႇၵႆယႃႈမဝ်းၵမ် ႁႂ်ႈလႆႈႁဵၼ်းႁူႉ တႃႇၶဝ်ပေႃးတေပူၵ်းပွင်ၽဝတူဝ်ၵဝ်ႇလႆႈ သေဢမ်ႇၵႃး ပူၵ်းပွင်လႆႈပႃး ၸိူဝ်ႉၸၢတ်ႈ ဝၢၼ်ႈမိူင်းၸဝ်ႈၵဝ်ႇၼၼ်ႉယဝ်ႉ။

ပၢႆးပၺ်ႇၺႃႇတႆး

11/01/2025

ႁွင်ႈၵၢၼ်လူင်ပၢႆးပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး ႁူင်းႁဵၼ်းၸိူဝ်ႉၸၢတ်ႈ ငဝ်ႈၸိုင်ႈ လွႆတႆးလႅင်း ၸတ်းႁဵတ်း ဝၼ်းလုၵ်ႈဢွၼ်ႇလုမ်ႈၾႃႉပီ 2025

မိူဝ်ႈၼႆႉဝၼ်းထီႉ 11 January 2025 ယူႇတီႈႁွင်ႈၵၢၼ်လူင်ပၢႆးပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး ႁူင်းႁဵၼ်းၸိူဝ်ႉၸၢတ်ႈ ၸၼ်ႉငဝ်ႈ ၊ ၸၼ်ႉၵၢင် ၊ ၸၼ်ႉသုင် ၊ ၸၼ်ႉၸွမ် လႄႈ ႁူင်းႁဵၼ်းတၢင်းလတ်း လႆႈႁူမ်ႈၵၼ်သေ ၸတ်းႁဵတ်း ပွႆးသူင်သိူဝ်းဝၼ်းလုၵ်ႈဢွၼ်ႇလုမ်ႈၾႃႉ ယူႇယဝ်ႉ။

ၶၢဝ်းယၢမ်း 9:00 မူင်း ၽူႈယႂ်ႇၵူၼ်းလူင် ၊ ပေႃႈမႄႈလုၵ်ႈႁဵၼ်း ၊ ၶူးသွၼ် လႄႈ လုၵ်ႈႁဵၼ်းၸိူဝ်ႉၸၢတ်ႈ တင်းမူတ်း ၶဝ်ႈႁူမ်ႈ 350 ပၢႆၼႆယဝ်ႉ။ ၼႂ်းပၢင်ၵႅဝ်ႈဝၼ်းလုၵ်ႈဢွၼ်ႇဝၼ်းမိူဝ်ႉၼႆႉ ၸဝ်ႈသိုၵ်းလူင် ဢွင်ႇမျႃႉ လႆႈမွၵ်ႇလၢတ်ႈၶေႃႈၵႂၢမ်းပိုတ်ႇပၢင်ၵႅဝ်ႈၵႂႃႇဝႃႈ ႁႂ်ႈမီးၵၢၼ်လဵပ်ႈႁဵၼ်းလႄႈၵၢၼ်ႁဵၼ်းႁူႉ ၼႆယဝ်ႉ။
သိုပ်ႇသေၼၼ်ႉ ၸဝ်ႈႁၢၼ်ၶိူဝ်းၸႅတ်ႈ လႆႈမွၵ်ႇလၢတ်ႈၶေႃႈၵႂၢမ်းၵႂႃႇ ၵၢၼ်ႁဵၼ်းၼႆႉ ဢမ်ႇၸႂ်ႈသွၼ်လိၵ်ႈလၢႆလၢႆၵူၺ်း တိုၵ်းသူၼ်းႁႂ်ႈလႆႈသွၼ်ပႃး ၾိင်ႈငႄႈၾိင်ႈထုင်း၊ လွင်ႈလၢတ်ႈလွင်ႈၸႃ ၸိူဝ်းၼႆႉပႃးယူႇယဝ်ႉ။
တၢင်တူဝ်ၶူးႁူင်းႁဵၼ်းၸိူဝ်ႉၸၢတ်ႈၵေႃႉၼိုင်ႈ လႆႈမွၵ်ႇလၢတ်ႈၶေႃႈၵႂၢမ်းၵႂႃႇဝႃႈ ႁႂ်ႈမေႃၸွႆႈထႅမ်ၵၼ် လဵၼ်ႈတၢင်းလဵၼ်ႈၵေႃႈ ႁႂ်ႈပေႃးလႆႈလဵၼ်ႈၵႂႃႇၸူမ်းၸူမ်းသိူဝ်းသိူဝ်း ၼႆယဝ်ႉ။
ၶူးၸၢႆးၾူႈ ၽူႈၵွၼ်းႁူင်းႁဵၼ်းတၢင်းလတ်း လၢတ်ႈထႅင်ႈဝႃႈ ၵွပ်ႈလုၵ်ႈဢွၼ်ႇပဵၼ်ဢဵၼ်ႁႅင်းမိူင်းမိူဝ်းၼႃႈလႄႈ ပိူၼ်ႈဝႆႉလမ်ႇလွင်ႈသေ ၸင်ႇတေလႆႈၸတ်းႁဵတ်းမႃး ဝၼ်းလုၵ်ႈဢွၼ်ႇလုမ်ႈၾႃႉ၊ ယွၼ်ႉၼၼ်မိူင်းၼိုင်ႈလုၵ်ႈ တေၶိုၼ်ႈယႂ်ႇဢမ်ႇၶိုၼ်ႈယႂ်ႇၼႆႉ ပိူၼ်ႈတူၺ်းတီႈလုၵ်ႈဢွၼ်ႇၵူၺ်း၊ လုၵ်ႈဢွၼ်ႇဝၼ်းမိူဝ်ႈၼႆႉ တေလႆႈၶႅၼ်ႇလိူဝ်ၵူၼ်းလူင်ယဝ်ႉ။

ဝၢႆးသေပၢင်ၵႅဝ်ႈယဝ်ႉတူဝ်ႈလီငၢမ်း ၶူးလႄႈလုၵ်ႈႁဵၼ်း ဢွၼ်ၵၼ် လဵၼ်ႈၵဵမ်း လဵၼ်ႈတၢင်းလဵၼ်ႈ ၸႅၵ်ႇၶဝ်ႈမုၼ်း ၼႂ်းပၢင်ႇႁူင်းႁဵၼ်းၵႂႃႇ မူၼ်ႈမူၼ်ႈသိူဝ်းသိူဝ်းယူႇယဝ်ႉ။

ပၢႆးပၺ်ႇၺႃႇတႆး

11/01/2025

သူင်သိူဝ်းဝၼ်းလုၵ်ႈဢွၼ်ႇ ပီ 2025

ဝၼ်းလုၵ်ႈဢွၼ်ႇၼႆႉ ပဵၼ်ဝၼ်းမၢႆတွင်း ဢၼ်ၸတ်းႁဵတ်းၵူႈပီ တႃႇယုၵ်ႉယွင်ႈလုၵ်ႈဢွၼ်ႇသေ ဝၼ်းၸတ်းႁဵတ်းပွႆးၼၼ်ႉ တေဢမ်ႇမိူၼ်ၵၼ် ၸွမ်းၼင်ႇၸိုင်ႈမိူင်းလႂ်ၸိုင်ႈမိူင်းၼၼ်ႉ။ ဝၼ်းလုၵ်ႈဢွၼ်ႇလုမ်ႈၾႃႉၼႆႉ တႄႇပိုၼ်ၽၢဝ်ႇမႃး တီႈဝဵင်းၵျီႇၼီႇဝႃႇ မိူဝ်ႈပၢင်ၵုမ်လူင် လွင်ႈၵမ်ႉၸွႆႈလုၵ်ႈဢွၼ်ႇလုမ်ႈၾႃႉၼၼ်ႉ ဢွၼ်တၢင်းသုတ်းယဝ်ႉ။ တႄႇဢဝ်ပီ 1950 မႃး လႆႈႁဵတ်းပွႆး ၼႂ်းဝၼ်းတီႈ 1 လိူၼ် June တီႈလၢႆလၢႆမိူင်း ၸွမ်းၼင်ႇ ၶေႃႈတၢင်ႇၼႄ ၸုမ်းၼၢင်းယိင်း တီႇမူဝ်ႇၶရေႇသီႇ ၸၼ်ႉလုမ်ႈၾႃႉၼၼ်ႉယဝ်ႉ။

ဝၼ်းလုၵ်ႈဢွၼ်ႇလုမ်ႈၾႃႉၼႆႉ ပဵၼ်ဝၼ်းဢၼ် ၸတ်းႁဵတ်း ၼႂ်းဝၼ်းတီႈ 20 လိူၼ် November တႃႇမၢႆတွင်း မိူဝ်ႈပၢင်ၵုမ်လူင် UN ပိုၼ်ၽၢဝ်ႇ သုၼ်ႇလႆႈလုၵ်ႈဢွၼ်ႇ မိူဝ်ႈဝၼ်းတီႈ 20 လိူၼ် November ပီ 1959 ၼၼ်ႉယဝ်ႉ။

08/01/2025

ၸုမ်းပွင်ၵၢၼ်ႁူင်းႁဵၼ်းၸၼ်ႉငဝ်ႈ ၊ ၸၼ်ႉၵၢင် ၸွမ်းလႅၼ်လိၼ် လူင်းသူႇၸႂ်းလုၵ်ႈႁဵၼ်းလႄႈ လူင်းၸႅၵ်ႇ ၶိူင်ႈၵမ်ႉၵႅမ်ၵၢၼ်ႁဵၼ်းၵၢၼ်သွၼ်

မိူဝ်ႈဝၼ်းထီႉ 31 December 2024 - 02 January 2025 ယူႇတီႈၸုမ်းပွင်ၵၢၼ်ႁူင်းႁဵၼ်း ၸၼ်ႉငဝ်ႈ ၊ ၸၼ်ႉၵၢင် ၸွမ်းလႅၼ်လိၼ် လႆႈလူင်းသူႇၸႂ်း ၶူးသွၼ်ႁူင်းႁဵၼ်းၸိူဝ်ႉၸၢတ်ႈ လႄႈ လုၵ်ႈႁဵၼ်းႁူင်းႁဵၼ်းၸိူဝ်ႉၸၢတ်ႈ ဢိၵ်ႇပႃးပေႃးမႄႈလုၵ်ႈႁဵၼ်းႁူင်းႁဵၼ်းၸိူဝ်ႉၸၢတ်ႈ လွင်ႉမၢၵ်ႇဢူဝ်း လႄႈ ဝၢၼ်ႈၼွင်ဢေႃႈသေ လႆႈလူင်းၸႅၵ်ႇပႃး ၶိူင်ႈၵမ်ႉၵႅမ်ၵၢၼ်ႁဵၼ်းၵၢၼ်သွၼ် လႄႈ ၽႃႈႁူမ်ႇၶူဝ်းၼွၼ်း ၶူဝ်းၸႂ်ႉတိုဝ်းသုၼ်ႇတူဝ် မိူၼ်ၼင်ႇ သပျႃႇၵွၼ်ႈ ၊ သပျႃႇၽွင် ၊ ယႃႈသီၶဵဝ်ႈ ၊ မႆႉသီၶဵဝ်ႈ ၊ ယႃႈသႃႉႁူဝ် ၊ ၶူဝ်းဢုၼ်ႇ ၊ တဝ်ႈၼမ်ႉ ၊ ၶႅပ်းတိၼ် ၊ ပပ်ႉ လႄႈ ၵမ် ၸိူဝ်းၼႆႉယူႇယဝ်ႉ။

တွၼ်ႈတႃႇတေပူၵ်းပွင်ပၢႆးပၺ်ႇၺႃႇႁႂ်ႈၶိုၼ်ႈယႂ်ႇၼၼ်ႉ ႁႅင်းၸႂ်တွၼ်ႈတႃႇၶူးသွၼ်လႄႈ လုၵ်ႈဢွၼ်ႇႁဵၼ်း ၵေႃႈပဵၼ်ဢၼ်လွင်ႈယႂ်ႇတေႉတေႉၼႆသေ ယူႇတီႈၸုမ်းပွင်ၵၢၼ်ပၢႆးပၺ်ႇၺႃႇႁူင်းႁဵၼ်း ၸၼ်ႉငဝ်ႈ၊ၵၢင် ၸွမ်းလႅၼ်လိၼ်ၵေႃႈ လႆႈလူင်းသူႇၸႂ်းပၼ်ႁႅင်းၸႂ် ၶူးသွၼ်လႄႈ လုၵ်ႈႁဵၼ်းၶဝ်ၵႂႃႇပႃးယူႇဝႃႈၼႆ။

ပၢႆးပၺ်ႇၺႃႇတႆး

07/01/2025

ၸဝ်ႈတႃႇၼၽူႈမီးၼမ်ႉၸႂ်လီ ၸွႆႈထႅမ်ၶိူင်ႈၵမ်ႉၵႅမ်ၵၢၼ်ႁဵၼ်း တီႈႁူင်းႁဵၼ်း ၼႂ်းၼႃႈတီႈၶွင်ႇသီႇ ဢဝ်ၶိုၼ်းၸိုင်ႈတႆးတီႈၼိုင်ႈ

ပူၼ်ႉမႃးမိူဝ်ႈဝၼ်းထီႉ 3 January 2025 လႆႈမီးၸဝ်ႈတႃႇၼၽူႈမီးၼမ်ႉၸႂ်လီ တၢင်တူဝ်ၸၢႆးသိူဝ် ပီႈၼွင်ႉ ၼႂ်းၸုမ်း သဵင်ထႅမ်ႁႅင်းမႂ်ႇ ၊ ပီႈၼွင်ႉႁႅင်းၵၢၼ်ယၢၼ်မိူင်း လႄႈ ပီႈၼွင်ႉၼႂ်းမိူင်းတႆး လႆႈႁူမ်ႈၵၼ်သေ ၸွႆႈထႅမ် ၶိူင်ႈၵမ်ႉၵႅမ်ၵၢၼ်ႁဵၼ်းၵၢၼ်သွၼ် တီႈလုၵ်ႈႁဵၼ်းႁူင်းႁဵၼ်းၸိူဝ်ႉၸၢတ်ႈၼႂ်းၼႃႈတီႈၵုမ်းၵမ်ၶွင်ႇ သီႇဢဝ်ၶိုၼ်းၸိုင်ႈတႆးတီႈၼိုင်ႈ ႁူမ်ႈသၢင်ႉငိုၼ်းဢၼ်လႆႈၸွႆႈထႅမ်မႃး တူၵ်းမႅၼ်ႈငိုၼ်းထႆးယူႇ 8950 ဝၢတ်ႇ ၼႆယူႇယဝ်ႉ။

ယူႇတီႈႁွင်ႈၵၢၼ်လူင်ပၢႆးပၺ်ႇၺႃႇၶွင်ႇသီႇဢဝ်ၶိုၼ်းတႆး ငိၼ်းၸူမ်း ဢဝ်ၵုင်ႇမုၼ်ထိုင် ၸဝ်ႈတႃႇၼ ႁဝ်းၵူႈၵေႃႉ ၸိူဝ်းမီးၼမ်ႉၸႂ်မဵတ်ႉတႃႇ ၸေႇတၼႃႇ ၽိူၵ်ႇၸိုၼ်ႈၶၢဝ်သႂ်သေမႃးၸွႆႈထႅမ်ၼိူဝ် လုၵ်ႈႁဵၼ်းႁူင်းႁဵၼ်း ႁဝ်းၶႃႈယႂ်ႇၼမ်ႉယူႇဢေႃႈ။ ယွၼ်းသူးပၼ် ႁႂ်ႈၸဝ်ႈတႃႇၼ ႁဝ်းၶဝ် ယူႇလီၵိၼ်ဝၢၼ် လွတ်ႈၵၢင်းၽေးၶဵၼ် ပၢႆးယူႇလီၵႅၼ်ႇၶႅင် တဵမ်ထူၼ်ႈသေၵမ်းၶႃႈ။

ပၢႆးပၺ်ႇၺႃႇတႆး

30/11/2024

ႁူမ်ၸူမ်းႁပ်ႉတွၼ်ႈ ပီမႂ်ႇတႆး 2119 ၼီႈ ႁႂ်ႈၶိုၼ်ႈယႂ်ႇမႂ်ႇသုင် ႁဵတ်းသင်ၵေႃႈပဵၼ်ၸွမ်းၼင်ႇဢဵၼ်းဢၢၼ်း ႁွတ်ႈထိုင်ယိူင်းမၢႆၵူႈလွင်ႈလႄႈ ႁႂ်ႈပၢႆးယူႇလီၵႅၼ်ႇၶႅင်ၵူႈၵေႃႉသေၵမ်းၶႃႈ

23/11/2024

ပိုၼ်ၽၢဝ်ႇ ပၢင်ၶေႉၶဵင်ႉလဵၼ်ႈႁႅင်းပီမႂ်ႇတႆး (2119) ၼီႈ

ၸွမ်းၼင်ႇငဝ်ႈၸိုင်ႈလွႆတႆးလႅင်း တေၸတ်းႁဵတ်းပၢင်ၶေႉၶဵင်ႇလဵၼ်ႈႁႅင်း ပီမႂ်ႇတႆး (2119)ၼီႈ ၼႆသေ ယူႇတီႈ ၶူးႁူင်းႁဵၼ်းၸိူဝ်ႉၸၢတ်ႈငဝ်ႈၸိုင်ႈလွႆတႆးလႅင်း လႆႈႁပ်ႉဢဝ်ပုၼ်ႈၽွၼ်းၶပ်းၶိုင် ပၢင်ၶေႉၶဵင်ႇလဵၼ်ႈ ႁႅင်းၼႆလႄႈ ၼင်ႇႁိုဝ်ပေႃးတေပဵၼ်ပိုၼ်ႉတီႈၼႄၼမ်ႉၵတ်ႉ သၢင်ႈလွင်ႈမိုတ်ႈၵိုဝ်းၸမ်ၸႂ်ၵၼ်သေဢမ်ႇၵႃး ယိူင်းဢၢၼ်း ႁႂ်ႈပၢႆးယူႇလီၶႅမ်ႉ ၊ ႁၢင်ႇယၢၼ်ၵႆၵၼ်တၢင်းၽေးယႃႈမဝ်းၵမ် ၊ လူတ်းယွမ်းလွင်ႈၸႂ်သုၵ်ႉလႄႈ ၸႂ်ႉတိုဝ်းၶၢဝ်းယၢမ်းႁႂ်ႈမၼ်းပဵၼ် ၽွၼ်းလီၼႆသေ ၸင်ႇလႆႈၽိတ်ႈမွၵ်ႇမႃးပီႈၼွင်ႉတီႈၸမ်တီႈၵႆ ၸဵမ် ၸၢႆး၊ယိင်း ႁႂ်ႈမႃးၶဝ်ႈႁူမ်ႈသၢင်ႈလွင်ႈ မိုတ်ႈၵိုဝ်းၸမ်ၸႂ်ၵၼ် ယူႇၶႃႈဢေႃႈ။ သင်ဝႃႈပီႈၼွင်ႉႁဝ်းၶဝ်သူၼ်ၸႂ်လဵၼ်ႈမၢၵ်ႇၼင် ၽုတ်ႉသေႃး (Futsal) ဢမ်ႇၼၼ်တၢင်းလဵၼ်ႈတၢင်ႇၸိူဝ်းၼႆၸိုင် ၵပ်းသိုပ်ႇမႃးလႆႈတီႈ ၽူႈမီးပုၼ်ႈၽွၼ်းၽၢႆႇလဵၼ်ႈႁႅင်း ပႃႈတႂ်ႈၼႆႉလႆႈယူႇၶႃႈဢေႃႈ။

ဝၼ်းႁပ်ႉသဵၼ်ႈမၢႆ လႄႈ ဝၼ်းတေႇလဵၼ်ႈ
ပိုတ်ႇႁပ်ႉသၢႆမၢႆတၢင်းလဵၼ်ႈၵူႈၸိူဝ်းၸိူဝ်း ဝၼ်းထီႉ 23 – 26 November 2024
ဝၼ်းတေႇလဵၼ်ႈ 27- 29 November 2024 ၶၢဝ်းယၢမ်း (9:00 -16:00) မူင်း

သၢႆမၢႆလဵၼ်ႈတၢင်းလဵၼ်ႈလႄႈဢွင်ႈတီႈၵၢၼ်လဵၼ်ႈႁႅင်း
1. မၢၵ်ႇၼင် - ႁူင်းႁဵၼ်းၸိူဝ်ႉၸၢတ်ႈၸၼ်ႉငဝ်ႈ၊ၵၢင် (ဝၼ်းထီႉ 27-29/11/2024)
2. မၢၵ်ႇဝၢႆ - ႁူင်းႁဵၼ်းၸိူဝ်ႉၸၢတ်ႈၸၼ်ႉငဝ်ႈ၊ၵၢင် (ဝၼ်းထီႉ 27-29/11/2024)
3. မၢၵ်ႇပိင်းပွင်ႇ - ႁူင်းႁဵၼ်းၸိူဝ်ႉၸၢတ်ႈၸၼ်ႉငဝ်ႈ၊ၵၢင် (ဝၼ်းထီႉ 27-29/11/2024)
4. ၸၼ်ၸိူၵ်ႈ - ႁူင်းႁဵၼ်းၸိူဝ်ႉၸၢတ်ႈၸၼ်ႉငဝ်ႈ၊ၵၢင် (ဝၼ်းထီႉ 27-29/11/2024)
5. ၶိုၼ်ႈလၵ်းၼမ်ႉမၼ်း - ႁူင်းႁဵၼ်းၸိူဝ်ႉၸၢတ်ႈၸၼ်ႉငဝ်ႈ၊ၵၢင် (ဝၼ်းထီႉ 27-29/11/2024)
6. လႅၼ်ႈၶၢဝ်းတၢင်းၵႆ - ႁူင်းႁဵၼ်းၸိူဝ်ႉၸၢတ်ႈၸၼ်ႉငဝ်ႈ၊ၵၢင် (ဝၼ်းထီႉ 27-29/11/2024)

တီႈၵပ်းသိုပ်ႇပၼ်သဵၼ်ႈမၢႆ တၢင်းလဵၼ်ႈၵူႈမဵဝ်း
− Facebook : Zom sai Jpr
− Facebook : တိုၼ်းတိုၵ်ႉတွင်း
− Facebook : ပီႈယူႇသီး
− Facebook : လုင်းပိူင်း

ပၢႆးပၺ်ႇၺႃႇတႆး

18/11/2024

လုၵ်ႈႁဵၼ်းယိင်း ႁူင်းႁဵၼ်းၸိူဝ်ႉၸၢတ်ႈငဝ်ႈၸိုင်ႈလွႆတႆးလႅင်း လႆႈၵႂႃႇၶဝ်ႈႁူမ်ႈပၢင်ၶေႉၶဵင်ႇလဵၼ်ႈႁႅင်း (ပွႆးလွႆးၵထူင်း) ပၢင်မၢၵ်ႇၽႃႈ (ၸိုင်ႈထႆး)

ၸွမ်းၼင်ႇၽူႈယႂ်ႇၵူၼ်းလူင် ပၢင်မၢၵ်ႇၽႃႈၶဝ်လႆႈၽိတ်ႈမွၵ်ႇမႃးဝႃႈ တေၸတ်းႁဵတ်းပၢင်ၶေႉၶဵင်ႇလဵၼ်ႈႁႅင်း (ၸုမ်းၼၢင်းယိင်း) တွၼ်ႈတႃႇပွႆးလွႆးၵထူင်းၼႆသေ ၸင်ႇလႆႈၽိတ်ႈမွၵ်ႇမႃးလုၵ်ႈႁဵၼ်းယိင်းႁူင်းႁဵၼ်းၸိူဝ်ႉ ၸၢတ်ႈငဝ်ႈၸိုင်ႈလွႆတႆးလႅင်းၼႆလႄႈ ယူႇတီႈလုၵ်ႈႁဵၼ်းႁူင်းႁဵၼ်းၸိူဝ်ႉၸၢတ်ႈငဝ်ႈၸိုင်ႈလွႆးတႆးလႅင်းႁဝ်း ၶႃႈၵေႃႈၸင်ႇလႆႈၵႂႃႇၶဝ်ႈႁူမ်ႈၶေႉၶဵင်ႇၸွမ်းယူႇယဝ်ႉ ။ ထႅင်ႈလွင်ႈၼိုင်ႈ တီႈလႆႈၸတ်းႁဵတ်းပၢင်ၶေႉၶဵင်ႇ လဵၼ်ႈႁႅင်း(ၸုမ်းၼၢင်းယိင်း) တွၼ်ႈတႃႇပွႆးလွႆးၵထူင်းယဝ်ႉသေဢမ်ႇၵႃး တွၼ်ႈတႃႇပၢႆးယူႇလီတေၶႅမ်ႉ ၊ ႁႂ်ႈႁၢင်ႇၵႆၵၼ်တၢင်းၽေးယႃႈမဝ်းၵမ် လႄႈ တွၼ်ႈတႃႇမီးလွင်ႈမိုတ်ႈၵိုဝ်းၸမ်ၸႂ်ၵၼ်ပႃး ဝႃႈၼႆ။

ပၢင်ၶေႉၶဵင်ႇလဵၼ်ႈႁႅင်းၼႆႉလႆႈၸတ်းႁဵတ်းၵႂႃႇ ပူၼ်ႉမႃးမိူဝ်ႈဝၼ်းထီႉ 13_14 November 2024 တီႈပၢင် လဵၼ်ႈဢဵၼ်ႁႅင်း ပၢင်မၢၵ်ႇၽႃႈ ၊ ဢိူင်ႇပၢင်မၢၵ်ႇၽႃႈ ၊ တေႈဝဵင်းပၢင်မၢၵ်ႇၽႃႈ ၊ ၸေႈတွၼ်ႈမႄႈႁွင်ႈသွၼ် ၵႂႃႇယူႇယဝ်ႉ။ ၼႂ်းပၢင်ၶေႉၶဵင်ႇလဵၼ်ႈႁႅင်းၼႆႉ ၸုမ်းၼၢင်းယိင်းပၢင်မၢၵ်ႇၽႃႈ လႆႈၵႂႃႇသူးထိ1 ၊ လုၵ်ႈႁဵၼ်း ၸိူဝ်ႉၸၢတ်ႈငဝ်ႈၸိုင်ႈလွႆတႆးလႅင်း လႆႈၵႂႃႇသူးထီႉ2 ၊ ၸုမ်းၼၢင်းယိင်းမႄႈႁွင်ႈသွၼ်လႆႈၵႂႃႇသူးထိ3 ၼႆယူႇ ယဝ်ႉ။ ယူႇတီႈ ႁွင်ႈၵၢၼ်လူင်ပၢႆးပၺ်ႇၺႃႇၶွင်ႇသီႇဢဝ်ၶိုၼ်းၸိုင်ႈတႆး လႄႈ လုၵ်ႈႁဵၼ်းၸိူဝ်ႉၸၢတ်ႈႁဝ်းၶႃႈ တၢင်းသဵင်ႈ ပဵၼ်ဢၼ်ငိၼ်းႁူမ်ၸူမ်း မီးတၢင်းသိူဝ်းတေႉတေႉတီႈၽူႈယႂ်ႇၵူၼ်းလူင်ပၢင်မၢၵ်ႇၽႃႈ ၽိတ်ႈမွၵ်ႇ ႁႂ်ႈၵႂႃႇၶဝ်ႈႁူမ်ႈၸွမ်း ၼႆယူႇယဝ်ႉ။

ပၢႆးပၺ်ႇၺႃႇတႆး

10/11/2024

ႁွင်ႈၵၢၼ်လူင်ပၢႆးပၺ်ႇၺႃႇၶွင်ႇသီႇဢဝ်ၶိုၼ်းၸိုင်ႈတႆး လႆႈၸတ်းႁဵတ်းပၢင်ပိုတ်ႇၵၢၼ်သွၼ်ႁူင်းႁဵၼ်းပူၵ်း ပွင်ၼမ်ႉၵတ်ႉၶူး ၸုပ်ႈ(2)

မိူဝ်ႈၼႆႉဝၼ်းထီႉ 10 November 2024 တူၵ်းမႅၼ်ႈဝၼ်းဢႃးတိတ်ႉ ယူႇတီႈႁွင်ႈၵၢၼ်လူင်ပၢႆးပၺ်ႇၺႃႇၶွင်ႇ သီႇဢဝ်ၶိုၼ်းၸိုင်ႈတႆး လႆႈၸတ်းႁဵတ်းပၢင်ပိုတ်ႇၵၢၼ်သွၼ် ႁူင်းႁဵၼ်းပူၵ်းပွင်ၼမ်ႉၵတ်ႉၶူးၸုပ်ႈ(2) ၼႆယဝ်ႉ။ ၼႂ်းပၢင်ၵႅဝ်ႈဝၼ်းမိူဝ်ႈၼႆႉ မီးၽူႈယႂ်ႇၵူၼ်းလူင်ၵူႈႁွင်ႈၵၢၼ်ၶဝ်ႈႁူမ်ႈသေဢမ်ႇၵႃးႁူဝ်ၼႃႈၶူးၼႂ်း ၼႃႈတီႈၵုမ်းၵမ်ၶွင်ႇသီႇဢဝ်ၶိုၼ်းၸိုင်ႈတႆးၵေႃႈ လႆႈမႃးၶဝ်ႈႁူမ်ႈပႃးၸွမ်းၼႆယူႇယဝ်ႉ။

ၸွမ်းၼင်ႇၶပ်ႉမၢႆပၢင်ၵႅဝ်ႈမီးၼၼ်ႉသေ ထိုင်မႃးၶၢဝ်းယၢမ်း 9:00 မူင်း ၽူႈမီးပုၼ်ႈၽွၼ်းဢွၼ်ၼပ်ႉယမ် ၸွမ်ပိဝ် ၼႂ်းပၢင်ၵႅဝ်ႈဝၼ်းမိူဝ်ႈၼႆႉ ၸဝ်ႈၸၢႆးဢူးလႆႈတၢင်တူဝ်ၽူႈၼင်ႈၸိုင်ႈသေ ပိုတ်ႇပၢင်ၵႅဝ်ႈမွၵ်ႇလၢတ်ႈ ၶေႃႈၵႂၢမ်းၵႂႃႇ ၵဵဝ်ႇလူၺ်ႈလွင်ႈ (1) ပၢႆးပၺ်ႇၺႃႇၼႆႉ လမ်ႇလွင်ႈတႃႇၵူၼ်းၼုမ်ႇႁဝ်းဝၼ်းမိူဝ်ႈၼႆႉ (2) ပၢႆးပၺ်ႇၺႃႇတၢင်းႁူႉတၢင်းႁၼ်ၼႆႉ ႁဵတ်းႁႂ်ႈႁဝ်းမီးလွင်ႈမၼ်ႈၸႂ်လႄႈ ယုမ်ႇယမ်တူဝ်ၸဝ်ႈၵဝ်ႇ (3) လူဝ်ႇ မေႃၵပ်းသိုပ်ႇၵွင်ႉသၢၼ်ၵၼ်ၼမ်ၼမ် ၼႆယူႇ။

ဝၢႆးသေၸဝ်ႈၸၢႆးဢူး မွၵ်ႇလၢတ်ႈၶေႃႈၵႂၢမ်းပိုတ်ႇပၢင်ၵႅဝ်ႈယဝ်ႉၵႂႃႇယဝ်ႉၼၼ်ႉ ႁူဝ်ၼႃႈၶူးၼႂ်းၼႃႈတီႈၵုမ်း ၵမ်ၶွင်သီႇဢဝ်ၶိုၼ်းၸိုင်ႈတႆးလၢႆလၢႆၵေႃႉၵေႃႈ မွၵ်ႇလၢတ်ႈၶေႃႈၵႂၢမ်းပၢင်ႁႅင်းၸႂ်လုၵ်ႈႁဵၼ်းၶူးၶဝ်ၵႂႃႇ ၵဵဝ်ႇ လူၺ်ႈလွင်ႈ ႁႂ်ႈမေႃဝႆႉၵႃႈၶၢၼ်ၶၢဝ်းယၢမ်း ၊ ႁႂ်ႈမေႃမီးတၢင်းယိူၼ်ႉၵၼ်ႈ လႄႈ ႁႂ်ႈၶိုၼ်းသိုပ်ႇမႄးပူၵ်းပွင်ပၼ် လုၵ်ႈဢွၼ်ႇတႆးႁဝ်းၶိုၼ်း ၸႃႉၵႂႃႇတၢင်းၼမ်တၢင်းလၢႆယူႇ။ ဝၢႆးၼၼ်ႉ ၵႅမ်ၽူႈၸတ်းၵၢၼ်ႁွင်ႈၵၢၼ်လူင်ပၢႆး ပၺ်ႇၺႃႇၶူးၼၢင်းမူၺ်ၶိူဝ်းၸင်ႇလႆႈသပ်းလႅင်းၼႄလွင်းတၢင်းဢၼ်လႆႈပိုတ်ႇၵၢၼ်သွၼ် ႁူင်းႁဵၼ်းပူၵ်းပွင် ၼမ်ႉၵတ်ႉၶူးၵႂႃႇဝႃႈၼႆ ။ သိုပ်ႇၼၼ်ႉ ၶူးသွၼ်ႁူင်းႁဵၼ်းပူၵ်းပွင်ၼမ်ႉၵတ်ႉၶူး လႆႈမႃးသပ်းလႅင်းၼႄ ၶေႃႈ ယိူင်းဢၢၼ်းလႄႈ ၽႃႇသႃႇၵၢၼ်သွၼ် ဢၼ်တေသွၼ်ၵႂႃႇၼႂ်းႁူင်းႁဵၼ်းပူၵ်းပွင်ၼမ်ႉၵတ်ႉၶူးၼႆယူႇယဝ်ႉ။

ယိူင်းဢၢၼ်းဢၼ်လႆႈပိုတ်ႇႁူင်းႁဵၼ်းပူၵ်းပွင်ၼမ်ႉၵတ်ႉၶူးမႃးၼႆႉ
(1) ၼင်ႇႁိုဝ်ၶူးသွၼ် တေမီးၼမ်ႉၵတ်ႉ လႄႈ မီးၼမ်ႉၸႂ်လွင်ႈပဵၼ်ၶူးသွၼ်သေ မေႃဢွၼ်ႁူဝ်ႁဵတ်း သၢင်ႈတူင်ႉၼိုင် ၼႂ်းၵၢၼ်ပၢႆးပၺ်ႇၺႃႇတႃႇတူင်ႇဝူင်း။
(2) ၼင်ႇႁိုဝ်တေပဵၼ်မႃးၶူးသွၼ် ဢၼ်ဝႆႉၽူႈလဵပ်ႈႁဵၼ်းပဵၼ်ယႂ်ႇသေ ပူၵ်းပွင်ပၼ်လုၵ်ႈႁဵၼ်း။
(3) ၼင်ႇႁိုဝ်တေပဵၼ်မႃးၶူးသွၼ် ဢၼ်မေႃ ၼမ်းၼႃႈၶူးသွၼ် ၽၢႆႇလွၵ်းလၢႆးသွၼ်လႄႈ ၽူႈႁူမ်ႈႁဵတ်း ၵၢၼ်ၼႂ်းၵၢၼ်သွၼ်။
(4) ၼင်ႇႁိုဝ်တေပဵၼ်မႃးၶူးသွၼ် ဢၼ်ႁၵ်ႉၵၢၼ်လဵပ်ႈႁဵၼ်းသေ လဵပ်ႈႁဵၼ်းႁူႉယူႇတႃႇသေႇ။
(5) ၼင်ႇႁိုဝ်တေပဵၼ်မႃးၶူးသွၼ် ဢၼ်လူင်ႉလႅၼ်ႇၼႂ်း ၽႃႇသႃႇၵၢၼ်သွၼ်။

ပၢႆးပၺ်ႇၺႃႇတႆး

31/10/2024

ၶူးႁူင်းႁဵၼ်းၸိူဝ်ႉၸၢတ်ႈငဝ်ႈၸိုင်ႈလွႆတႆးလႅင်းလႆႈၸတ်းႁဵတ်းပၢင်ၶေႉၶဵင်ႇလဵၼ်ႈႁႅင်းပိုတ်ႇႁူင်းႁဵၼ်းထိူမ်း (2)

မိူဝ်ႈၼႆႉဝၼ်းထီႉ 31 October 2024 ယူႇတီႈၶူးႁူင်းႁဵၼ်းၸိူဝ်ႈၸၢတ်ႈငဝ်ႈၸိုင်ႈလွႆတႆးလႅင်း လႆႈဢွၼ်ၵၼ် ႁူမ်ႈၵၼ်သေ ၸတ်းႁဵတ်းပၢင်ၶေႉၶဵင်ႇလဵၼ်ႈႁႅင်းပိုတ်ႇႁူင်းႁဵၼ်းထိူမ်း(2) ၼင်ႇႁိုဝ် ၶူးလႄႈလုၵ်ႈႁဵၼ်း ႁူင်းႁဵၼ်းၸၼ်ႉငဝ်ႈ ၊ ၸၼ်ႉၵၢင် ၊ ႁူင်းႁဵၼ်းၸၼ်ႉသုင် ၊ ဢိၵ်ႇၽူႈႁၢပ်ႇၵၢၼ်ၼႂ်း ႁွင်ႈၵၢၼ်လူင်ပၢႆးပၺ်ႇၺႃႇၶွင်ႇသီႇဢဝ်ၶိုၼ်းၸိုင်ႈတႆးပေႃးတေမီးလွင်ႈမိုတ်းၵိုဝ်းၸမ်ၸႂ်ၵၼ်မႃးလိူဝ်ၵဝ်ႇ လႄႈ ႁႂ်ႈပၢႆးယူႇလီၵေႃႈ တဵမ်ထူၼ်ႈပႃးပိူင်ၼိုင်ႈၼႆသေ ၸင်ႇလႆႈၸတ်းႁဵတ်းပၢင်ၶေႉၶဵင်ႇလဵၼ်ႈႁႅင်းပိုတ်ႇ ႁူင်းႁဵၼ်းထိူမ်း(2) ဝၼ်းထီႉ 31 October 2024 – 1 November 2024 ၼႆႉၼႆယူႇယဝ်ႉ။

ၵၢၼ်ဢွၵ်ႇဢဵၼ်ႁႅင်းပဵၼ်ဢၼ်လွင်ႈယႂ်ႇတႃႇပၢႆးယူႇလီတူဝ်ၶိင်းႁဝ်းၶႃႈတေႉတေႉ လႄႈ ယွၼ်ႉၼၼ် ၼႂ်းၼိုင်ႈဝၼ်းၼိုင်ႈဝၼ်းၼၼ်ႉ ႁဝ်းထုၵ်ႇလီပၼ်ၶၢဝ်းယၢမ်းဢွၵ်ႇဢဵၼ်ႁႅင်းပၼ်တီႈဢေႇသုတ်းမွၵ်ႈ 15-30 မိၼိတ်ႉၼႆႉယူႇ ဢမ်ႇၸႂ်ႈတႃႇတူဝ်ၽႂ် ပဵၼ်တႃႇတူဝ်ၸဝ်ႈၵဝ်ႇႁဝ်းၶိုၼ်းၵူၺ်း ပႅတ်ႉသမ်ႉဝႃႈငိုၼ်းၼႆႉ လွင်ႈယႂ်ႇၼႆသေတႃႉၵေႃႈ သင်ၸိူဝ်ႉဝႃႈပၢႆးယူႇလီႁဝ်းဢမ်ႇတဵမ်ထူၼ်ႈဢမ်ႇၶႅမ်ႉပေႃးၼႆၸိုင် ႁဝ်းၵေႃႈဢမ်ႇ ၸင်ႈႁဵတ်းၵၢၼ်ႁႃငိုၼ်းလႆႈမိူၼ်ၵၼ် ယွၼ်ႉပိူဝ်ႈၸိူင်ႉၼၼ် ပၼ်ၶၢဝ်းယၢမ်းဢွၵ်ႇဢဵၼ်ႁႅင်းပၼ်တူဝ်ၵဝ်ႇ လႄႈ လုမ်းလႃးပၢႆးယူႇလီႁင်းၽႂ်ႁင်းမၼ်းၶႃႈ။

ပၢႆးပၺ်ႇၺႃႇတႆး

20/10/2024

ၶူးႁူင်းႁဵၼ်းၸိူဝ်ႉၸၢတ်ႈငဝ်ႈၸိုင်ႈလွႆတႆးလႅင်းလႄႈ ၵူၼ်းၼုမ်ႇၸၢႆးငဝ်ႈၸိုင်ႈလွႆတႆးလႅင်း လႆႈၵႂႃႇၶဝ်ႈႁူမ်ႈ ၶေႉၶႅင်ႇလဵၼ်ႈႁႅင်း ပွႆးဢွၵ်ႇဝႃႇ တီႈပၢင်မၢၵ်ႇၽႃႈ(ၸိုင်ႈထႆး)

ပူၼ်ႉမႃး ဝၼ်းထီႉ 17 October 2024 – 20 October 2024 ဝၼ်းမိူဝ်ႈၼႆႉ ယူႇတီႈၽူႈယႂ်ႇၵူၼ်းလူင်ပၢင်မၢၵ်ႇၽႃႈၶဝ် လႆႈၽိတ်ႇမွၵ်ႇမႃးၸုမ်းၶူးႁူင်းႁဵၼ်းၸိူဝ်ႉၸၢတ်ႈငဝ်ႈၸိုင်ႈလွႆတႆးလႅင်းလႄႈ ၵူၼ်းၼုမ်ႇငဝ်ႈၸိုင်ႈလွႆတႆး လႅင်းၶဝ် တွၼ်ႈတႃႇတေၸတ်းႁဵတ်းပၢင်ၶေႉၶဵင်ႇလဵၼ်ႈႁႅင်းတႃႇပွႆးဢွၵ်ႇဝႃႇ သေဢမ်ႇၵႃး ႁႂ်ႈမိုတ်ႈၵိုဝ်းၸမ် ၸႂ်ၵၼ်ပႃးလႄႈ ႁႂ်ႈပဵၼ်ပႃးတွၼ်ႈတႃႇပၢႆးယူႇလီၼႆသေ ၶူးႁူင်းႁဵၼ်းၸိူဝ်ႉၸၢတ်ႈငဝ်ႈၸိုင်ႈလွႆတႆးလႅင်း လႄႈ ၵူၼ်းၼုမ်ႇငဝ်ႈၸိုင်ႈလွႆတႆးလႅင်းၶဝ် ၸင်ႇလႆႈမႃးၶဝ်ႈႁူမ်ႈၶေႉၶဵင်ႇလဵၼ်ႈႁႅင်းၸွမ်းယူႇယဝ်ႉ။

ၽူႈၶဝ်ႈႁူမ်ႈၶေႉၶဵင်ႇလဵၼ်ႈႁႅင်းပိတ်ႉမၢၵ်ႇၼင် တၢင်းမူတ်းမီး (29) ၸုမ်းၼႆယူႇ ။ ၸုမ်းၵူၼ်းၸၢႆးတင်းမူတ်း မီး(21)ၸုမ်း ၊ ၸုမ်းၼၢင်းယိင်းမႄႈဝၢၼ်ႈမီး(8) ၸုမ်းၼႆယဝ်ႉ။ ဢွင်ႈတီႈဢၼ်ၸတ်းႁဵတ်းပၢင် ၶေႉၶဵင်ႇလဵၼ်ႈ မၢၵ်ႇၼင် လႆႈၸတ်းႁဵတ်းၵႂႃႇတီႈ ဝၢၼ်ႈထၢမ်ႈလွတ်ႈ ၊ ဢိူင်ႇပၢင်မၢၵ်ႇၽႃႈ ၊ ၸေႈဝဵင်းပင်မၢၵ်ႇၽႃႈ ၊ ၸေႈတွၼၼ်ႈမႄႈႁွင်ႈသွၼ် ၵႂႃႇယူႇယဝ်ႉ။

ၼႂ်းပၢင်ၶေႉၶဵင်ႇလဵၼ်ႈႁႅင်းပွၵ်ႈၵမ်းၼႆႉ ၶူးႁူင်းႁဵၼ်းၸိူဝ်ႉၸၢတ်ႈလႄႈ ၵူၼ်းၼုမ်ႇလွႆတႆးလႅင်း လႆႈဢွင်ႇ ပေႉ ၶဝ်ႈႁူမ်ႈလွပ်ႈ(8)ထိမ်းၼႆယူႇ။ သမ်ႉဝႃႈဢမ်ႇလႆႈထီႉၼႆသေတႃႉၵေႃႈ ၼႂ်းပၢင်ၶေႉၶဵင်ႇလဵၼ်ႈႁႅင်းပွႆးဢွၵ်ႇဝႃႇ ၼႆႉ လႆႈတၢင်းလွင်ႈမိုဝ်းၵိုဝ်းၸမ်ၸႂ်ၵၼ်တၢင်း(ၵူၼ်းၼုမ်ႇၽၢင်ႇထႆး)ၶဝ်လႄႈ ပၢႆးယူႇလီၶဵမ်ႉပႃးသေ ယူႇတီႈ ၶူးႁူင်းႁဵၼ်းၸိူဝ်ႉၸၢတ်ႈငဝ်ႈၸိုင်ႈလွႆတႆးလႅင်းလႄႈ ၵူၼ်းၼုမ်ႇငဝ်ႈၸိုင်ႈလွႆတႆးလႅင်းၶဝ်ၵေႃႈ ပဵၼ်ဢၼ် ငိၼ်းႁူမ်ၸူမ်းမီးတၢင်းသိူဝ်းတေႉတေႉတီႈၽူႈယႂ်ႇၵူၼ်းလူင်ပၢင်မၢၵ်ႇၽႃႈၶဝ်ၽိတ်ႈမွၵ်ႈႁႂ်ႈၵႂႃႇၶဝ်ႈႁူမ်ႈၸွမ်း ၼႆယူႇ။

ပၢႆးပၺ်ႇၺႃႇတႆး

11/10/2024

ၾၢင်ႈႁၢင်ႈလုၵ်ႈႁဵၼ်းထၢၼ်ႈသုင်ငဝ်ႈၸိုင်ႈလွႆတႆးလႅင်းတွပ်ႇလိၵ်ႈ ထိူမ်း(1) ပီၵၢၼ်ႁဵၼ်း 2024-2025

ႁူင်းႁဵၼ်း ထၢၼ်ႈသုင် (High School) ငဝ်ႈၸိုင်ႈလွႆတႆးလႅင်း တႄႇတွပ်ႇလိၵ်ႈထိူမ်းၼိုင်ႈ ဝၼ်းထီႉ 11 October 2024 – 13 October 2024 တွပ်ႇ (5) ၽႃႇသႃႇ ၼိုင်ႈဝၼ်းတွပ်ႇ (2) ၽႃႇသႃႇ
1. ဢိင်းၵလဵတ်ႈ (English)
2. ပၢႆးတူင်ႇဝူင်းၵူၼ်း (Social Study)
3. ပၢႆးၼပ်ႉ (Mathematic)
4. ပၢႆးၾိင်ႈပဵၼ် (Science)
5. Computer

တွၼ်ႈႁူင်းႁဵၼ်း တၢင်းလတ်းငဝ်ႈၸိုင်ႈလွႆတႆးလႅင်း (Loi Tai Leng Non – Formal Primary School) တွပ်ႇ (5) ၽႃႇသႃႇ တႄႇတွပ်ႇဝၼ်းထီႉ 10 October 2024 – 15 October 2024
1. လိၵ်ႈတႆး (Shan)
2. ဢိင်းၵလဵတ်ႈ (English)
3. ပၢႆးၾိင်ႈပဵၼ် (Scicence)
4. ပၢႆးတူင်ႇဝူင်းၵူၼ်း (Social Study)
5. ပၢႆးၼပ်ႉ (1) (Mathematic)
6. ပၢႆးၼပ်ႉ (2) (Geometry)
ႁူင်းႁဵၼ်း ပၢႆးပၺ်ႇၺႃႇၶွင်ႇၶွင်ႇသီႇဢဝ်ၶိုၼ်းၸိုင်ႈတႆး ၼႂ်းၼႃႈတီႈၶွင်ႇသီႇဢဝ်ၶိုၼ်းၸိုင်ႈတႆးၵုမ်းၵမ်ဝႆႉ ၼၼ်ႉ လႆႈတႄႇတွပ်ႇၵႂႃႇ ပူၼ်ႉမႃးမိူဝ်ႈဝၼ်းထီႉ 5 October 2024 – 7 October 2024 ၼၼ်ႉပဵၼ်ဢၼ်ယဝ်ႉတူဝ် ၵႂႃႇလီငၢမ်းယဝ်ႉဝႃႈၼႆ။
ပၢႆးပၺ်ႇၺႃႇတႆး

10/10/2024

ႁွင်ႈၵၢၼ်လူင်ပၢႆးပၺ်ႇၺႃႇၶွင်ႇသီႇဢဝ်ၶိုၼ်းၸိုင်ႈတႆး (RCSS) ၸတ်းႁဵတ်းပၢင်တွပ်ႇလိၵ်ႈ ပွၵ်ႈၵမ်း (1) Term (1) ပီၵၢၼ်ႁဵၼ်း 2024-2025

တႄႇဢဝ်ဝၼ်းထီႉ 9 October 2024 ၸွမ်းၼင်ႇပိူင်ၵၢၼ်ႁွင်ႈၵၢၼ်လူင်ပၢႆးပၺ်ႇၺႃႇမီး ၼၼ်ႉသေ ႁူင်းႁဵၼ်းၸိူဝ်ႉၸၢတ်ႈၸၼ်ႉငဝ်ႈ / ၸၼ်ႉၵၢင် ငဝ်ႈၸိုင်ႈလွႆတႆးလႅင်းလႆႈၸတ်းႁဵတ်း ပၢင်တွပ်ႇ လိၵ်ႈ Term (1) ပီၵၢၼ်ႁဵၼ်း (2024 – 2025) ၶၢဝ်းယၢမ်း 09:00 – 12:00 မူင်း တႄႇတွပ်ႇဝၼ်းထီႉ (9 October 2024 – 15 October 2025) ၼႆယဝ်ႉ။
ၼႂ်းတွၼ်ႈႁူင်းႁဵၼ်းၸၼ်ႉငဝ်ႈ/ၵၢင် တွပ်ႇ (6) ၽႃႇသႃႇ
1. ၽႃႇသႃႇလိၵ်ႈတႆး (Shan)
2. ဢိင်းၵလဵတ်ႈ (English)
3. ပၢႆးၼပ်ႉ (Mathematic)
4. ပၢႆးၾိင်ႈပဵၼ် (Science)
5. ပၢႆးတူင်ႇဝူင်းၵူၼ်း (Social Study)
6. လိၵ်ႈထႆး (Thai)
7. လိၵ်ႈမၢၼ်ႈ (Burmese)

ၼႂ်းတွၼ်ႈႁူင်းႁဵၼ်း ထၢၼ်ႈသုင် (High School) တႄႇတွပ်ႇဝၼ်းထီႉ 11 October 2024 – 13 October 2024 တွပ်ႇ (5) ၽႃႇသႃႇ ၼိုင်ႈဝၼ်းတွပ်ႇ (2) ၽႃႇသႃႇ
1. ဢိင်းၵလဵတ်ႈ (English)
2. ပၢႆးတူင်ႇဝူင်းၵူၼ်း (Social Study)
3. ပၢႆးၼပ်ႉ (Mathematic)
4. ပၢႆးၾိင်ႈပဵၼ် (Science)
5. Computer

တွၼ်ႈႁူင်းႁဵၼ်း တၢင်းလတ်းငဝ်ႈၸိုင်ႈလွႆတႆးလႅင်း (Loi Tai Leng Non – Formal Primary School) တွပ်ႇ (5) ၽႃႇသႃႇ တႄႇတွပ်ႇဝၼ်းထီႉ 10 October 2024 – 15 October 2024
1. လိၵ်ႈတႆး (Shan)
2. ဢိင်းၵလဵတ်ႈ (English)
3. ပၢႆးၾိင်ႈပဵၼ် (Scicence)
4. ပၢႆးတူင်ႇဝူင်းၵူၼ်း (Social Study)
5. ပၢႆးၼပ်ႉ (1) (Mathematic)
6. ပၢႆးၼပ်ႉ (2) (Geometry)

ႁူင်းႁဵၼ်း ပၢႆးပၺ်ႇၺႃႇၶွင်ႇၶွင်ႇသီႇဢဝ်ၶိုၼ်းၸိုင်ႈတႆး ၼႂ်းၼႃႈတီႈၶွင်ႇသီႇဢဝ်ၶိုၼ်းၸိုင်ႈတႆးၵုမ်းၵမ်ဝႆႉ ၼၼ်ႉ လႆႈတႄႇတွပ်ႇၵႂႃႇ ပူၼ်ႉမႃးမိူဝ်ႈဝၼ်းထီႉ 5 October 2024 – 7 October 2024 ၼၼ်ႉပဵၼ်ဢၼ်ယဝ်ႉတူဝ် ၵႂႃႇလီငၢမ်းယဝ်ႉဝႃႈၼႆ။

ပၢႆးပၺ်ႇၺႃႇတႆး

04/10/2024

ၶူးႁူင်းႁဵၼ်းၸိူဝ်ႉၸၢတ်ႈလွႆသၢမ်သိပ်း လူင်းသူႇၸႂ်းပေႃႈမႄႈလုၵ်ႈႁဵၼ်း

ပူၼ်ႉမႃး မိူဝ်ႈဝၼ်းထီႉ 2 October 2024 ယူႇတီႈၸုမ်းၶူးႁူင်းႁဵၼ်းၸိူဝ်ႉၸၢတ်ႈၸၼ်ႉငဝ်ႈ လွႆသၢမ်သိပ်း လႆႈလူင်းသူႇၸႂ်းပေႃႈမႄႈလုၵ်ႈႁဵၼ်းဝၢၼ်ႈလွႆသၢမ်သိပ်းၼႆယူႇယဝ်ႉ ။လွင်ႈဢၼ်လႆႈလူင်းသူႇၸႂ်းပေႃႈမႄႈ လုၵ်ႈႁဵၼ်းၼၼ်ႉ လႆႈလူင်းတွင်ႈထၢမ်ၵဵဝ်ႇလူၺ်ႈလွင်ႈယူႇသၢင်ႈၵိၼ်သဝ်းပေႃႈမႄႈလုၵ်ႈႁဵၼ်းပဵၼ်ႁိုဝ်လႄႈ မီးလွင်ႈယၢပ်ႇၽိုတ်ႇၸိူင်ႉႁိုဝ် ယူႇတီႈၸုမ်းၶူးႁူင်းႁဵၼ်းလွႆသၢမ်သိပ်းသမ်ႉ တေၸၢင်ႈၸွႆႈသင်လႆႈၸိူင်ႉႁိုဝ် ၸိူဝ်းၼႆႉယူႇယဝ်ႉ။

ပူၼ်ႉမႃးမိူဝ်ႈဝၼ်းထီႉ 1 October 2024 ၼၼ်ႉၵေႃႈ ယူႇတီႈၸုမ်းပွင်ၵၢၼ်ပၢႆးပၺ်ႇၺႃႇတွၼ်ႈၼႂ်းမိူင်း လႆႈၵႂႃႇ ၶဝ်ႈႁူမ်ႈပၢင်လူင်းၵၢၼ်သွၼ်သူင်ႇသင်ႇမေႃယႃၶူးသွၼ်ၽၢႆႇယူႇလီ ၼႂ်းၼႃႈတီႈၵုမ်းၵမ်ၶွင်ႇသီႇဢဝ်ၶိုၼ်း ၸိုင်ႈတႆးတီႈၼိုင်ႈသေ ၶူးသွၼ်ၼႂ်းပၢႆးပၺ်ႇၺႃႇၵေႃႈ လႆႈၵႂႃႇလဵပ်ႈႁဵၼ်းသွၼ်ပႃးၸွမ်းၵဵဝ်ႇၵပ်းလူၺ်ႈလွင်ႈ ငဝ်ႈၶၢမ်ႇ ပိုၼ်ႉပၢႆးယူႇလီ တႃႇၶၢဝ်းတၢင်းသွင်လိူၼ်ပွၵ်ႈၵမ်းၼႆႉယူႇယဝ်ႉ။

ပၢႆးပၺ်ႇၺႃႇတႆး

03/10/2024

ၵႅမ်ၽူႈၸတ်းၵၢၼ်ၸုမ်းပွင်ၵၢၼ်ပၢႆးပၺ်ႇၺႃႇ ႁူင်းႁဵၼ်းၸၼ်ႉငဝ်ႈ ၊ ၸၼ်ႉၵၢင် တွၼ်ႈလႅၼ်ႈလိၼ် မႃးပၼ်ၵႂၢမ်းႁူႉၼိူဝ်လုၵ်ႈႁဵၼ်းၸိူဝ်ႉၸၢတ်ႈငဝ်ႈၸိုင်ႈလွႆတႆးလႅင်း

မိူဝ်ႈၼႆႉဝၼ်းထီႉ 3 October 2024 ၵႅမ်ၽူႈၸတ်းၵၢၼ်ၸုမ်းပွင်ၵၢၼ်ပၢႆးပၺ်ႇၺႃႇ ႁူင်းႁဵၼ်းၸၼ်ႉငဝ်ႈ ၊ ၸၼ်ႉၵၢင် တွၼ်ႈလႅၼ်လိၼ် ၶူးသႅင်သိုၵ်း လႆႈမႃးပၼ်တၢင်းႁူႉၼိူဝ်လုၵ်ႈႁဵၼ်းၸိူဝ်ႉၸၢတ်ႈၸၼ်ႉငဝ်ႈ ၊ ၵၢင် ငဝ်ႈၸိုင်ႈလွႆတႆးလႅင်းယူႇယဝ်ႉ။ ႁူဝ်ၶေႃႈဢၼ်လႆႈမႃးပၼ်တၢင်းႁူႉၵႂႃႇၼႂ်းဝၼ်းမိူဝ်ႈၼႆႉၼၼ်ႉ ၵဵဝ်ႇၵပ်း လူၺ်ႈလွင်ႈ ပၢႆးၵၢၼ်သိုၵ်းလႄႈ ၵၢၼ်မိူင်း ၼႂ်းမိူင်းတႆးယၢမ်းမိူဝ်ႈလဵဝ်ၼႆယူႇ ။ ယွၼ်ႉသင်လႄႈ ၽႂ်ၽႂ်ၵေႃႈ ၶႂ်ႈလႆႈမိူင်းတႆးဢၼ်ဝႃႈၼၼ်ႉ (1) ယွၼ်ႉပိူဝ်ႈတႆးမီးႁၢင်ႈႁေႃ မီးပိုၼ်းလူင်လင်လီ (2) ၶိူဝ်းတႆး ၸိူဝ်ႉၶိူဝ်းတႆးမီးလူင်ၵႂႃႇၵူႈတီႈလႄႈ ပိူၼ်ႈၵူဝ်တႆးၽွမ်ႉႁူမ်ႈၵၼ်မႃး (3) ယွၼ်ႉမီးၶူဝ်းၶွင်ၼိူဝ်လိၼ် တႂ်ႈလိၼ်ၼမ်လၢႆလၢႆမဵဝ်း (4) ယွၼ်ႉၾိင်ႈငႄႈၾိင်ႈထုင်းတႆးႁၢင်ႈလီ လႄႈ ၵူႈမိူင်းမိူင်းၵေႃႈယွမ်းႁပ်ႉ (5) ယွၼ်ႉမိူင်းတႆးမီးလွင်ႈသၽႃႇဝႁၢင်ႈလီလႄႈ ၵတ်းယဵၼ်ၸႂ် (6) ၵၢၼ်ၽုၵ်ႇသွမ်ႈလီလႄႈ ဢွၵ်ႇမၢၵ်ႇၶဝ်ႈ တဝ်ႈၼမ်ႉၵူႈၸိူဝ်းၸိူဝ်း (7) မိူင်းႁူမ်ႈတုမ်မိူင်းမၢၼ်ႈ တႄႇမီးမႃးတီႈတႆး ၸႃႉၵႂႃႇၸိူဝ်းၼႆႉယူႇယဝ်ႉ။

ပၢႆးပၺ်ႇၺႃႇတႆး

27/09/2024

ႁူင်းႁဵၼ်းတၢင်းလတ်းငဝ်ႈၸိုင်ႈလွႆတႆးလႅင်း လႆႈၸတ်းႁဵတ်း ပၢင်ပွႆးႁပ်ႉတွၼ်ႈလုၵ်ႈႁဵၼ်းမႂ်ႇ ပီႊသွၼ်လိၵ်ႈ 2024-2025

မိူဝ်ႈၼႆႉဝၼ်းထီႉ 27 Sepetember 2024 ႁူင်းႁဵၼ်းတၢင်းလတ်းငဝ်ႈၸိုင်ႈလွႆတႆးလႅင်း လႆႈၸတ်းႁဵတ်းပၢင်ပွႆး ႁပ်ႉတွၼ်ႈလုၵ်ႈႁဵၼ်းမႂ်ႇ ပီႊသွၼ်ႁဵၼ်း 2024-2025 ၼႆယူႇ။ ၸွမ်းၼင်ႇယိူင်းဢၢၼ်းလႄႈ ၽႅၼ်ၵၢၼ် ႁူင်းႁဵၼ်းတၢင်းလတ်းမီးၼၼ်ႉသေ ၼင်ႇႁိုဝ်လုၵ်ႈႁဵၼ်းၼေႃႇတႅၼ်းၶိူဝ်းႁဝ်းမိူဝ်းၼႃႈ တေႁူႉၵုင်ႇမုၼ် ၵႃႈၶၼ်ပၢႆးပၺ်ႇၺႃႇသေ တေမီးႁႅင်းၸႂ်လႄႈ မီးတၢင်းၶတ်းၸႂ်ၶႂ်ႈႁဵၼ်းဢဝ် ပၺ်ႇၺႃႇတၢင်းႁူႉၼၼ်ႉ ယူႇတီႈၵေႃႇမတီႇၶူးတင်းလုၵ်ႈႁဵၼ်းႁူင်းႁဵၼ်းတၢင်းလတ်း ၸင်ႇလႆႈၸတ်းႁဵတ်း ပၢင်ၵႅဝ်ႈႁပ်ႉလုၵ်ႈႁဵၼ်းမႂ်ႇ ပီႈသွၼ်လိၵ်ႈ 2024-2025 ၼႆယူႇယဝ်ႉ။

ၼႂ်းပၢင်ၵႅဝ်ႈဝၼ်းမိူဝ်ႈၼႆႉ ၽူႈၸတ်းၵၢၼ်ၵေႃႇမတီႇႁူင်းႁဵၼ်းငဝ်ႈၸိုင်ႈလွႆတႆးလႅင်းၸဝ်ႈႁၢၼ်ၶိူဝ်းၸႅတ်ႈ လႆႈမွၵ်ႇလၢတ်ႈၶေႃႈၵႂၢမ်းပိုတ်ႇပၼ်ပၢင်ၵႅဝ်ႈၵႂႃႇဝႃႈ ၵၢၼ်ႁဵၼ်းႁူႉၼႆႉဢမ်ႇမီးဝၼ်းသုတ်းသဵင်ႈ ယႃႇၸႂ်ဝင်ႇ ဝိူဝ်ႈ ၶတ်းၸႂ်သွၼ်ဢဝ်ပၺ်ႇၺႃႇတၢင်းႁူႉၵႂႃႇၼႆယူႇယဝ်ႉ။ ဝၢႆးသေၸဝ်ႈႁၢၼ်ၶိူဝ်းၸႅတ်ႈမွၵ်ႇလၢတ်ႈၶေႃႈ ၵႂၢမ်းယဝ်ႉၵႂႃႇယဝ်ႉၼၼ်ႉ ၽူႈၵွၼ်းႁူင်းႁဵၼ်းတၢင်းလတ်းၶူးၸၢႆးၾူႈ လႆႈမႃးသပ်းလႅင်းၼႄလွင်ႈလႆႈၸတ်း ႁဵတ်းပၢင်ၵႅဝ်ႈပွႆးႁပ်ႉလုၵ်ႈႁဵၼ်းမႂ်ႇလႄႈၽၢၵ်ႇတွၼ်ႈၶေႃႈၵႂၢမ်းၵႂႃႇဝႃႈ “လုၵ်ႈႁဵၼ်းႁဝ်းၶႃႈမီးၼမ်ႉၵတ်ႉၵၼ် ၵူႈၵေႃႉ လႄႈ မီးၵႃႈၶၼ်ၵၼ်ၵူႈၵေႃႉ ၵူၺ်းလူဝ်ႇၶတ်းၸႂ်ၵႂႃႇၶဝ်းတၢင်းၼႃႈ ႁူႉတီႈယူပ်ႈယွမ်းၸဝ်ႈၵဝ်ႇယဝ်ႉ လူဝ်ႇမူၼ်ႉမႄးၵႂႃႇႁႂ်ႈၶိုၼ်ႈယႂ်ႇမႂ်ႇသုင်လႄႈ ယႃႇပေၸႂ်တူၵ်းဝႃႈၼႆ။

သိုပ်ႇၼၼ်ႉ တၢင်တူဝ်ၸုမ်းပွင်ၵၢၼ်ပၢႆးပၺ်ႇၺႃႇၶွင်ႇသီႇဢဝ်ၶိုၼ်းၸိုင်ႈတႆး ၽူႈၼင်ႈလုမ်း ႁွင်ႈၵၢၼ်လူင် ပၢႆးပၺ်ႇၺႃႇ လႆႈမွၵ်ႇလၢတ်ႈၶေႃႈၵႂၢမ်းပၼ်ႁႅင်းၸႂ်လုၵ်ႈႁဵၼ်းၵႂႃႇ 1. ၵၢၼ်ႁဵၼ်းၼႆႉယႃႇပေပႂ်ႉႁဵၼ်းဢဝ် တီႈၶူးသွၼ်ဢၼ်လဵဝ်ၵူၺ်း လဵပ်ႈႁဵၼ်းႁူႉပႃးတၢင်းၼွၵ်ႈ ယႃႇပေယူႇမဝ်မၢင် 2. ၽၢၼ်(ၵူၼ်းႁဝ်းၵူႈၵေႃႉ ၽႂ်ဢမ်ႇၶႂ်ႈၽၢၼ်) ၵူၺ်းမၢင်ပွၵ်ႈပေႃးဢမ်ႇၽၢၼ်တူၺ်းၼႆ ႁဝ်းဢမ်ႇႁူႉၵႃႈၶၼ်(မိူၼ်ၸိူင်ႉၼင်ႇ ၽၢၼ် ၼမ်ႉၵတ်ႉပေႃးႁဝ်းဢွၵ်ႇႁဵတ်းၵၢၼ်တူဝ်ထူပ်းယဝ်ႉ သမ်ႉဢမ်ႇမီးၼမ်ႉၵတ်ႉသင်တွၼ်ႈတႃႇၼႂ်းၼႃႈၵၢၼ် ဢၼ်ႁဝ်းႁဵတ်းၼၼ်ႉၼႆ မိူဝ်ႈၼၼ်ႉမႃးႁဝ်းတေႁူႉၵႃႈၶၼ်ၼႆယူႇယဝ်ႉ။

ဝၢႆးသေၼၼ်ႉ မီးၶူးႁဝ်းၶႃႈလၢႆလၢႆၵေႃႉ လႆႈမွၵ်ႈလၢတ်ႈၶေႃႈၵႂၢမ်းပၼ်ႁႅင်းၸႂ်ၼိူဝ်လုၵ်ႈႁဵၼ်းႁူင်းႁဵၼ်း တၢင်းလတ်းႁဝ်းၶႃႈၵႂႃႇလႄႈ မီးလုၼ်ႈပီႈဢၼ်ယၢမ်ႈယူႇတီႈႁူင်းႁဵၼ်းတၢင်းလတ်းသေ ဢၼ်တိုၵ်ႇသိုပ်ႇ ႁဵၼ်းဝႆႉတီႈႁူင်းႁဵၼ်းၸၼ်ႉသုင်လႂ်ၸိူဝ်းၼႆႉၵေႃႈ မႃးမွၵ်ႇလၢတ်ႈၶေႃႈၵႂၢမ်းပၼ်ႁႅင်းၸႂ်တီႈလုၼ်ႈၼွင်ႉ မိူၼ်ၵၼ်ၼႆယဝ်ႉ။ ဝၢႆးသေ မွၵ်ႇလၢတ်ႈၶေႃႈၵႂၢမ်းယဝ်ႉတူဝ်ႈၵႂႃႇယဝ်ႉၼၼ်ႉ လႆႈၶတ်းလိူၵ်ႈၸၢႆးငၢမ်း၊ၼၢင်း ငၢမ်း လုၵ်ႈႁဵၼ်းမႂ်ႇ ပီႊ(1)လႄႈ တွၼ်ႈသူးလုၵ်ႈႁဵၼ်းပီ1-2-3 ၵႂႃႇသေ ၽူႈၸတ်းၵၢၼ်ၵေႃႇမတီႇႁူင်းႁဵၼ်း ငဝ်ႈၸိုင်ႈၸဝ်ႈႁၢၼ်ၶိူဝ်းၸႅတ်ႈ လႆႈမွၵ်ႇလၢတ်ႈၶေႃႈၵႂၢမ်းပိၵ်ႉပၼ်ပၢင်ၵႅဝ်ႈၵႂႃႇယူႇယဝ်ႉ။

ပၢႆးပၺ်ႇၺႃႇတႆး

12/09/2024

လိၼ်ယူတ်ႇသႂ်ႇၸွမ်းတၢင်းလူင်းႁူင်းႁဵၼ်းၸၼ်ႉငဝ်ႈ/ၵၢင် ငဝ်ႈၸိုင်ႈလွႆတႆးလႅင်းလႄႈ ယူတ်းသႂ်ႇပႃး တၢင်းလင်ႁူင်းသဝ်းၸၢႆး ႁူင်းႁဵၼ်းၸၼ်ႉသုင်

ဢိင်ၼိူဝ်ငဝ်းလၢႆးၾႃႉၽူၼ်သေ ငဝ်ႈၸိုင်ႈလွႆတႆးလႅင်း ယွၼ်ႉၽူၼ်တူၵ်းထပ်းၵၼ်လၢႆဝၼ်း ဢမ်ႇႁိူတ်ႇ သေပွၵ်ႈလႄႈ ႁဵတ်းႁႂ်ႈလိၼ် ယူတ်ႇသႂ်ႇၸွမ်းသဵၼ်ႈတႃႈသၢႆတၢင်းလၢႆလၢႆတီႈ ႁူမ်ႈပႃးတၢင်းလူင်းၵႂႃႇႁူင်းႁဵၼ်း ၸိူဝ်ႉၸၢတ်ႈၸၼ်ႉငဝ်ႈ/ၵၢင် ငဝ်ႈၸိုင်ႈလွႆတႆးလႅင်း ဢိၵ်ႇပႃး လႆႈၵူတ်ႇယူတ်ႇသႂ်ႇ ပႃးထႅင်ႈ တၢင်းလင်ႁူင်းသဝ်း ၸၢႆး ႁူင်းႁဵၼ်းၸိူဝ်ႉၸၢတ်ႈၸၼ်ႉသုင်လွႆတႆးလႅင်းၼႆယူႇယဝ်ႉ။

ၵွပ်ႈယူတ်ႇသႂ်ႇတၢင်းလူင်းႁဵၼ်းလႄႈ ၼင်ႇႁိုဝ်ႇလူတ်ႉၵႃးတေၵႂႃႇမႃးငၢႆႈ၊ လုၵ်ႈႁဵၼ်းၶဝ်ၵေႃႈတေၵႂႃႇမႃးငၢႆႈ ၼၼ်ႉ ယူႇတီႈၶူးႁူင်းႁဵၼ်းၸိူဝ်ႉၸၢတ်ႈငဝ်ႈၸိုင်ႈလွႆတႆးလႅင်း ၸင်ႇလၢတ်ႈၸတ်းႁႅင်းၵၢၼ်တီႈလုၵ်ႈႁဵၼ်း ၶဝ်မႃးဢဝ်ဢွၵ်ႇလိၼ်ဢၼ်ၵူၼ်ႇ၊ယူတ်ႇဝႆႉ ၼႂ်းသဵၼ်ႈတၢင်းလူင်းမႃးႁူင်းႁဵၼ်းၼၼ်ႉယူႇယဝ်ႉ။

ပၢႆးပၺ်ႇၺႃႇတႆး

08/09/2024

ႁွင်ႈၵၢၼ်လူင်ပၢႆးပၺ်ႇၺႃႇၶွင်ႇသီႇဢဝ်ၶိုၼ်းၸိုင်ႈတႆး လႄႈ ႁွင်ႈၵၢၼ်လူင်တိတ်းတေႃႇထႆး ႁူမ်ႈၵၼ်ၸတ်းႁဵတ်း ပွႆးလူင်းပၢင်သွၼ်လိၵ်ႈတႆးၶၢဝ်းပွတ်း

မိူဝ်ႈၼႆႉဝၼ်းထီႉ 8 September 2024 လိူၼ်10 မႂ်ႇ 6 ၶမ်ႈပီတႆး 2018 ၼီႈ ယူႇတီႈႁွင်ႈၵၢၼ်လူင်ပၢႆးပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆးလႄႈ ႁွင်ႈၵၢၼ်လူင်တိတ်းတေႃႇထႆးႁူမ်ႈၵၼ်သေ လႆႈၸတ်းႁဵတ်းပွႆး လူင်းပၢင်သွၼ်လိၵ်ႈတႆးၶၢဝ်းပွတ်း (တီႈဝတ်ႉၵူႇမၢၼ်ႉမူင်းၶူၼ်းၶျႆး) ၼႆယူႇယဝ်ႉ။
ယၢမ်း 13:30 ႁူဝ်ပဝ်ႈလူင်ၶွင်ႇသီႇဢဝ်ၶိုၼ်းၸိုင်ႈတႆး ၸွမ်သိုၵ်းလူင်ယွတ်ႈသိုၵ်း ၶႅၵ်ႇၽူႈယႂ်ႇၵူၼ်းလူင် ႁွတ်ႈၽႅဝ်ဢဝ်တီႈယူႇၼႂ်းပၢင်ၵႅဝ်ႈသေ မီးတၢင်းၵႃႈၾိင်ႈငႄႈၾိင်ႈထုင်းတီႈလုၵ်ႈႁဵၼ်းၶဝ်ၵႃႈၼႄၵႂႃႇယူႇ။
ထိုင်မႃးၶၢဝ်းယၢမ်း 14:30 ႁူဝ်ပဝ်ႈလူင်ၸွမ်သိုၵ်းလူင်ယွတ်ႈသိုၵ်း ၸပ်းတဵၼ်းလႄႈ လႆႈဢွၼ်ၼမ်း ဝၢႆႈၽြႃး သေ ဝၢႆးၼၼ်ႉ မီးတူဝ်တႅၼ်းၽူႈဢွၼ်ႁူဝ် တူင်ႇဝူင်းၵူၼ်း ၸၢႆးၵေႃႉဝိ မွၵ်ႇလၢတ်ႈၶေႃႈၵႂၢမ်းၵႂႃႇလႄႈ မီးတူဝ် တႅၼ်းၶူးသွၼ်ၼိုင်ႈၵေႃႉလႄႈ လုၵ်ႈႁဵၼ်းၼိုင်ႈၵေႃႉ လႆႈၵၢဝ်ႇၵႂၢမ်းၶွပ်ႈၸႂ်ၵႂႃႇယူႇ။
သိုပ်ႇမႃး ၽူႈၸတ်းၵၢၼ်ႁွင်ႈၵၢၼ်လူင်ပၢႆးပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး ၶူးၸၢႆးလၢၼ်တႆး မွၵ်ႇ လၢတ်ႈၶေႃႈၵႂၢမ်းၼႂ်းပၢင်ၵႅဝ်ႈပၢင်သွၼ်လိၵ်ႈတႆးၶၢဝ်းပွတ်းၵႂႃႇယူႇယဝ်ႉ။
ၼႂ်းပၢင်ၵႅဝ်ႈပွႆးလူင်းၵၢၼ်သွၼ်လိၵ်ႈတႆးၶၢဝ်းပွတ်းဝၼ်းမိူဝ်ႈၼႆႉ မီးၽူႈယႂ်ႇၵူၼ်းလူင် ၶူးသွၼ်လႄႈ လုၵ်ႈ ႁဵၼ်း ဢိၵ်ႇပႃးပေႃႈမႄႈလုၵ်ႈႁဵၼ်း မႃးၶဝ်ႈႁူမ်ႈတၢင်းၼမ်။ ပၢင်သွၼ်လိၵ်ႈတႆးၶၢဝ်းပွတ်းၼႆႉ လႆႈတႄႇသွၼ်မႃး မိူဝ်ႈဝၼ်းထီႉ 1.March.2024 ထိုင် 31.May.2024 တႃႇၶၢဝ်းတၢင်း3လိူၼ် လုၵ်ႈႁဵၼ်းဢၼ်လႆႈမႃးႁဵၼ်းသွၼ်တၢင်းမူတ်းမီး(76)ၵေႃႉ ၶူးပူင်သွၼ်မီး(17) ၵေႃႉ လႄႈႁူင်းႁဵၼ်းလၢႆလၢႆပိုၼ်ႉတီႈမိူၼ်ၼင်ႇ ဝတ်ႉသီပူဝ်းငိုၼ်း ၊ ဝၢၼ်ႈပူင်ႇယဵင်း ၊ ဝၢၼ်မႂ်ႇတႆးမၼ်ႈၵိုမ်း လႄႈ ဝတ်ႉသၼ်ပႃႇႁဵင် လမ်းပုၼ်း ၸႄႈတွၼ်ႈၵဵင်းမႆႇ ၸိုင်ႈထႆး ၼႆယူႇ။
ထိုင်မႃးၶၢဝ်းယၢမ်း 15:15 မိၼိတ်ႉ ႁူဝ်ပဝ်ႈလူင်ၶွင်ႇသီႇဢဝ်ၶိုၼ်းၸိုင်ႈ ၸွမ်သိုၵ်းလူင်ယွတ်ႈသိုၵ်း လႆႈမွပ်ႈ ဢၢပ်ႈပၼ်ဝႂ်ယုၵ်ႉယွင်ႈတီႈ ၽူႈမီးၼမ်ႉၸႂ်ၸွႆႈပၢႆးပၺ်ႇၺႃႇ ၊ ၶူးသွၼ် ၊ လုၵ်ႈႁဵၼ်းၵတ်ႉၶႅၼ်ႇ လႄႈ လုၵ်ႈႁဵၼ်းၽၢၼ်ႇပူၼ်ႉၵၢၼ်သွၼ်ၵႂႃႇသေ လႆႈမွၵ်ႈလၢတ်ႈၶေႃႈၵႂၢမ်း ၵႂႃႇဝႃႈ 1.လိၵ်ႈလၢႆးၼႆႉမိူၼ်ပဵၼ်ၾႆးတဵၼ်း ဢၼ်ၼိုင်ႈ ႁဝ်းယူႇတီႈလႂ်ၵေႃႈ ဢမ်ႇလပ်းသိင်ႇ သင်ၽႂ်ဢမ်ႇမေႃလိၵ်ႈလၢႆးၵေႃႈ တေပဵၼ်ၵူၼ်းတူၵ်းလိုၼ်း၊ 2. ႁဝ်းမႃးယူႇၼႂ်းၽႅၼ်ႇလိၼ်ၸိုင်ႈထႆး မႃးပိုင်ႈဢိင်ၼႂ်းမိူင်းပိူၼ်ႈ ႁႂ်ႈမေႃၼပ်ႉယမ်ပၵ်းပိူင် ႁဝ်းယႃႇပေယူႇလိူင်း ၊ 3. ၸိူဝ်ႉမူင်ႈၵေႃႈမူင်ႈပႅင်း ၸိူဝ်ႉမႅင်းၵေႃႈမႅင်းႁၵ်ႉ ႁဝ်းလူဝ်ႇမေႃႁၵ်ႉၶိူဝ်း ယူႇတီႈလႂ်ၵေႃႈယႃႇလိုမ်းၶိူဝ်းႁဝ်း ယႃႇလိုမ်းမိူင်းႁဝ်း ၼႆယဝ်ႉ ။
သိုပ်ႇသေၼၼ်ႉ ၸဝ်ႈသိုၵ်းၸွမ်သႅင်ႁိူင်း ၽူႈၸတ်းၵၢၼ်ႁွင်ႈၵၢၼ်လူင်တိတ်းတေႃႇထႆး မွၵ်ႇလၢတ်ႈၶေႃႈ ၵႂၢမ်းၵႂႃႇယူႇ။
ဝၢႆးသေမွၵ်ႇလၢတ်ႈၶေႃႈၵႂၢမ်းယဝ်ႉတူဝ်ႈၵႂႃႇယဝ်ႉၼၼ်ႉ ၽူႈယႂ်ႇၵူၼ်းလူင် ၶူးလႄႈလုၵ်ႈႁဵၼ်း ႁူမ်ႈၵၼ် ထႆႇၶႅပ်းႁၢင်ႈႁူမ်ႈမူႇ ပဵၼ်တီႈမၢႆတွင်းလႄႈ ပၢင်ၵႅဝ်ႈယဝ်ႉတူဝ်ႈၵႂႃႇယူႇယဝ်ႉ။

ပၢႆးပၺ်ႇၺႃႇတႆး

Tai Education - Shan Version

13/01/2025

11/01/2025

11/01/2025

08/01/2025

07/01/2025

30/11/2024

23/11/2024

18/11/2024

10/11/2024

31/10/2024

20/10/2024

11/10/2024

10/10/2024

04/10/2024

03/10/2024

27/09/2024

12/09/2024

08/09/2024

Address

Telephone

Website

Alerts

Contact The Business

Videos

Shortcuts

Share