25/08/2024
အခွင့်အရေးချိုးဖောက်မှုနှင့် မတရားမှုခံနေရသည့် မြန်မာသတင်းသမားတို့၏အရေးကို MJC မှ အပြည့်အဝရပ်တည်သွားမည်ဟုဆို
လွတ်လပ်သောမွန်သတင်းအေဂျင်စီ၊ ဩဂုတ် ၂၅၊ ၂၀၂၄။
အာဏာသိမ်းကာလအတွင်း အခွင့်အရေးချိုးဖောက်မှုနှင့် မတရားမှုခံနေရသည့် မြန်မာသတင်းသမားတို့၏အရေးကို ပြည်တွင်း၊ ပြည်ပရှိ သတင်းသမားများ စုပေါင်း၍ ဖွဲ့စည်းထားသည့် မြန်မာသတင်းများကလပ် ( Myanmar Journalists Club )မှ အပြည့်အဝရပ်တည်သွားမည်ဟု ဆိုသည်။
MJC မှ အာဏာသိမ်းစစ်တပ်ကြောင့် မြန်မာသတင်းသမားများ ရုပ်ပိုင်းဆိုင်ရာနှင့် စိတ်ပိုင်းဆိုင်ရာ နစ်နာနေကြသည့်အပြင် အခွင့်အရေးချိုးဖောက်မှုပါခံနေရပြီး အဆိုပါမီဒီယာလုပ်သားတို့၏အရေးကို အတူတကွ ရပ်တည်ရန်နှင့် လွတ်လပ်၍တရားမျှတသည့် မီဒီယာလုပ်ငန်းနယ်ပယ် ဖြစ်လာစေရန် ရည်ရွယ်ပြီး သြဂုတ် ၁၇ ရက်နေ့တွင် စတင် ဖွဲ့စည်းလိုက်သည်ဟု လူမှုကွန်ရက်စာမျက်နှာမှတစ်ဆင့် ကြေညာချက်ထုတ်ပြန်ထားသည်။
အထူးသဖြင့် လက်ရှိအကျပ်အတည်းကာလတွင် အမျိုးသမီးသတင်းထောက်တို့၏ အခွင့်အရေးတို့ကို မြှင့်တင်ရန်နှင့် သတင်းဌာနများ အခွင့်အရေးချိုးဖောက်မှုမလုပ်ဆောင်နိုင်ရန် ကာကွယ်ဖော်ထုတ်သွားမည်ဟု MJC ပြန်ကြားရေးကော်မတီတာဝန်ရှိသူတစ်ဦးက ဆိုသည်။
“ဥပမာ ကိုယ်ဝန်ရှိတဲ့ အမျိုးသမီး သတင်းထောက် တယောက်ဟာ maternity leave ကို paid leave ရဖို ခက်ခဲတာမျိုး စတဲ့ အခြေခံ ရပိုင်ခွင့် တွေ နစ်နာနေပါတယ်။ ဒီလို အမျိုးသမီးသတင်းထောက် အခွင့်အရေးတွေကိုလည်း မြှင့်တင် နိုင်ဖို ဒီ အဖွဲက ကြိုးစားသွားမှာပါ။ လုပ်ခ လစာ နည်းပါးမှု ကတော့ အမျိုးသမီးရော အမျိုးသား သတင်းထောက်တွေပါ နစ်နာနေတာမျိုးပဲ ဖြစ်ပါတယ်။ အာဏာသိမ်းစစ်တပ်ကြောင့် ရုပ်ပိုင်းဆိုင်ရာ စိတ်ပိုင်းဆိုင်ရာ နစ်နာနေကြရတဲ့ သတင်းထောက်တွေ အားလုံးကို ၎င်းတိုရဲ့ သတင်းဌာနတွေကပါ အခွင့်အရေး ချိုးဖောက်မှုတွေ မပြုလုပ်ဖို့အတွက် ဒီအဖွဲက ကြိုးစားဆောင်ရွက် သွားမှာပါ” ဟု ဆိုသည်။
စစ်အာဏာသိမ်းကာလမှစ၍ နိုင်ငံတစ်ဝှမ်း သတင်းမီဒီယာဌာနအများစု ပိတ်သိမ်းခံရခြင်း၊ သတင်းသမားတို့ ဖမ်းဆီးထောင်ချနေခြင်းကြောင့် တိုင်းရင်းသားမီဒီယာသတင်းဌာနတို့အပါအဝင် သတင်းမီဒီယာဌာနအများစု ပြည်ပသို့ပြောင်းရွေ့အခြေစိုက်လာခဲ့ရသည်။
အဆိုပါအခြေအနေတွင် သတင်းဌာနမှ သတင်းသမားတို့ကို အကြောင်းမဲ့အလုပ်ထုတ်ခြင်း၊ ဖိနှိပ်ခြင်း၊ အခွင့်အရေးအပြည့်အဝမရရှိခြင်းတို့ လုပ်ဆောင်နေသည်ဟု အလွတ်တန်း အမျိုးသမီးစစ်မြေပြင်သတင်းထောက်တစ်ဦးက ဆိုသည်။
＂ကျမတို့လို စစ်မြေပြင်မှာ သတင်းယူနေတဲ့သတင်းသမားတွေတောင် အထောက်အပံ့ပြည့်ပြည့်ဝဝမရှိဘူး၊ မပေးဘူး အဲလိုကိစ္စတွေ သတင်းသမားအများစုကြုံနေရတယ် ဒီလိုအကြောင်းအရာတွေကို ကျမတို့ထိုးဖောက်ပြီးတော့ ပြောဆိုရမယ်၊ တိုက်ပွဲဝင်သွားရမယ်＂ဟု ဆိုသည်။
ထို့ကြောင့် မတရားမှုများကို ပူးပေါင်းအဖြေရှာရန်အတွက် အဖွဲ့ဝင်အသစ်များကိုလည်း MJC မှဖိတ်ခေါ်လျှက်ရှိပြီး လက်ရှိတွင် အဖွဲ့ဝင် အင်အား ၇၀ ခန့်ရှိပြီး အလွတ်တန်းနှင့် တိုက်ပိုင်သတင်းထောက်တို့အပြင် တိုင်းရင်းသားသတင်းထောက်တို့လည်းပါဝင်နေပြီး အခြားအဖွဲ့ဝင်များကို ဆက်လက်ဖိတ်ခေါ်လျှက်ရှိကြောင်း သိရသည်။
၎င်းအပြင် MJC သည် မည်သည့်ဒိုနာအဖွဲအစည်းများထံမှ ငွေကြေးထောက်ပံ့မှု မယူဘဲအမှီခိုကင်းစွာ လွတ်လွတ်လပ်လပ် ရပ်တည်သွားမည်ဖြစ်သည်ဟု ဆိုသည်။
