25/11/2023
MAXAA KA TAQAANA SOOYAALKA HALGAMAA CISMAAN DIIRIYE KULANE
Cismaan Diiriye Kulane waxaa uu ka mid ah suugaanyahannada kaalinta weyn ku leh halgankii xoraynta dhulkii maqnaa ee Soomaalida iyo halgankii lagaga soo horjeeday Kacaankii. Sidoo kale Cismaan waxa uu burburkii ka dib ka mid noqday dadkii ka dhexmuuqday siyaasadda Soomaaliya iyo mida Puntland.
Cismaan Diiriye h**ey dad badan waa ay u garanayeen, laakiin waxaa dad badan oo kale ay ku barteen barnaamij uu Juxa ka qabtay afar sano ka hor, suugaantiisa badankeed isaga hortii dadku waa ay yaqaaneen, aadna u jeclaayeen. Sida uu sheegay heeso aan 20 ka yarayn oo badankood ay duuban yihiin ayuu leeyahay.
Halgankii Soomaali-Galbeed waxa uu ku lahaa kaalin weyn oo suugaaneed oo uu kaga qaybqaatay dagaalkii afeed iyo kicintii dadka Soomaaliyeed. Waxa uu ka tirsanaa kooxdii Heegan, isaga oo dagaalladii 1977-1978dii ka sameeyay tobaneeyo heesood oo laga xusi karo:
1. Soomaalidu qab iyo kibir
Marna qaadan maysee-
Indhabuur baa qaaday.
2. Taliska Nuguloo
Niyad-jabka ahoo
Naxashka saaran-
Heeskaan oo muddo dheer ka mid ahaa heesaha aan ugu jeclahay ee halganka SG, waxa wadajir u qaaday kooxdii Heegan.
3. Mingistow war-li'idaa
Waxii madaxda kaa dhigay
Waa la isku haystaa-
Waxa iyana wadajir u qaaday Heegan(ma hubo).
Markii ay dawladdu colaadda galisay qabiilkii Majeerteenka oo Soomaalida mucaaradka ah iyagu hormuudka u ahaa, ayuu cadaadiskii dawladda awgii dalka uga baxay, waxaana uu noqday hormuudka fanka jabhaddii SSDF, isaga oo raadiyihii Kulmis ee mucaaradka qaybta suugaanta madax ka noqday.
Saddex heesood oo uu halgankii SSDF kula hadlayay Soomaalida ayuu sameeyay, saddexduba waxa ay ahaayeen qaafiyadda (H)da, saddexdana waxa wada qaaday hoobalkii Maxammed Mooge Liibaan oo ay isaga, Cabdikhadar Xasan Laari iyo qaar kalaba markaa ka mid ahaayeen fannaaniintii jabhadda joogay.
Heesahaasi waxa ay kala ahaayeen:
1. 'Soomaalidu ma huruddaa' oo ku socotay Soomaalida guud. M. Mooge.
2. 'Tolla'ay reer Hargeysoow' oo si gaar ah ugu socotay reer Hargeysa oo aan markaa kacdoonka ku jirin. M. Mooge.
3. 'Halganyohow ku aamminay' oo uu halganka Soomaalidu kula jirto keligiitaliyaha ku macnaynayay, Soomaalidana tilmaanta uga siinayay waxa loo halgamayo. M. Mooge ayaa iyana qaaday.
Waxa uu sidoo kale Kulane sameeyay heeska caanka ah ee aynu soonqaadka ku soo xasuusanno:
'Afura afura afura
Axdigii gudatee afura'
Waxa qaaday fannaanka weyn ee Siciid Mire Xaydar Ehun.
FG: xogtaan badankeed waxa aan ka qoray barnaamijkaa uu Juxa ka qabtay oo aad u koobnaa, weli se waxa aan hubaa wax badan oo kale in ay ku maqan yahiin abwaanka, ayna habboon tahay in laga weeleeyo.
W/Q Gorod Jare.