20/04/2023
عندما كتبنا عن هذا النبت الشيطاني المدعو حميدتي قبل اكثر من ثلاثة اعوام وصفنا بالجهل والخيانة فالحمد لله الذي اظهر الحقيقة
عبو الشوارع
وابقو عشرة علي التروس
كبو المناكيد
الملاقيط النجوس
المرقه ما شان البطون
الطلقة شان ام العروس
صبو الجلاميد
البتعرف كيف تدوس
تهري المساديد التنظر
ويوم تعوس
سودانا في نون العيون
جوانا ما قايم بروس
والميتة شان تحيا النفوس
عبو الشوارع ياشباب
السكة طالت
والسغير من همو شاب
اتذكرو الودع وغاب
في كل زاوية وكلو باب
كان زيكم بحلم طروب
بالسمحة تقدل في الدروب
خلوهو حاضر في القلوب
والكان بتاجر بالحمير
كايس المواجع والخراب
انشقه بالفرحة العوير
من النياشين
البتلصف زي شهاب
المغسه ما من العوير
المغسه في الصف الكبير
فيهو العجب
تقلان متمسح بالرتب
مليون سفير
ووراهو زي كمين خبير
طابور من البروفات الفطير
الراس ملان لكين خمير
والعين متل عين الغراب
الصلعه تلصف في السحاب
والكل صنم شايلو زير
شان ارفعو الرضا والتمام
للباشا لي راعي الحمير
يا حليلنا يالبلد البقيت
عدمان كبير
بس المؤكد
دون مواربه وارتياب
خازوق وصاب
نطالنا بالشباك دخل
ما جابو باب
لا باصا لا قالو انفصل
لا شاف معامل لا انقفل
من المراجع يوم جفل
لا كان مسجل في الغياب
ما سمعنا مات
او نمه تفرح هجة فات
لا حجة لي بيت الله تاب
يا الله تلهمنا الصواب
حبوبة ردت
للدرافين الجواب
لوكو الصبر
اتوطو للنار والجمر
اتنين احفرو للتالت قبر
لكين عليكن بالتراب
ابقو الترس واحمو التراب
سوادنا لازم في السحاب
صلاح المبارك موسي
