31/08/2023
ياحليلهم ياحليل احبتنا
/......../......../......./....../
حليلك يا إذاعتنا الفي قربك انتي لمتنا....
إنتي انيسة وحدتنا وفي البيت معاك جلستنا....
وبرة البيت يذيد الشوق مادمتي في مخيلتنا....
ونتمني تاني نرجع ليك ونتلم بنلقي راحتنا...
حزتي إنتي كل الريد ومشتاقين تعالي داوي وحشتنا....
شرفتينا بين الكل وبيك نفاخر وفيك محفوظ مجدنا وعزتنا....
أكرمتي تراث اجدادنا وأحييتي تاريخ حضارتنا....
انتي الساس وانتي الراس وسلطة رابعة مع صحافتنا....
ترجمتي احساسنا وطيبتي المشاعر ياسلوة شجن وجدانا وسريرتنا....
يااف ام مية ست الكل لمتين تعودي من تاني وتعود معاك بهجتنا....
*ونسعد سوية *
💐💐💐💐💐
اف ام مية
يابحر العلم الخالد....
ويادوح الفكر الفائد...
وياصفاء الدين الزاهد...
وياجمال الوتر الواعد....
دمتي لينا ودام معاك مجدك الرائد....
يحفظك الوالي الماجد من نكبات شرور الفاسد....
ياريت أكتب فيك احلي قصائد....
وكيف ننساك ومااحلاك عشنا معاك روائع جمة وكل جمهورك حاضر وشاهد....
*وإنتي ليه هوية *
💐💐💐💐💐
حقيقة بنلقي معاك راحة نفسية وإشراق روح تقية وعبق نفحات صوفية وبركات نبوية مع الشيخ محمد صالح محي الدين....
* في الشمائل المحمدية *
💐💐💐💐💐
وبرنامج من اخراج خالد علي سليمان هو قبلة الايمان..
تقديم الشيخ علاءالدين أبوزيد معهم تغنم بالروح والريحان...
فيتجلي نور الجنة أمامك وتطيب ايامك ويشرق اسلامك ان وضعته بين طيات اهتمامك...
*برنامج دوحة المالكية *
💐💐💐💐💐
وفي يوم من الايام اكتمل نصفنا الآخر وتجملت ايام العمر وغني صباحنا فرحا ورقصت ليالي القمر تتناغم بنشوة روح مع اماسي السمر وانت في مكانك وتشعر بلذة السياحة والسفر الى جميع أنحاء السودان المفتخر مع إذاعة بها الخاطر انجبر كانت تنقصنا ليزول الضجر فنتجول في احلي نزهة وترفيه معتبر وخلدت لنا الماضي الجميل المزدهر واحب الاغاني فلم تندثر وأصبحت لنا ملاذا وارتياحا مستمر واخرجت في اجمل لوحة وتصميم مبتكر ببرامج مزدانة بالازهار وحلو الثمر وصارت رفيقتنا منذ ان نصبح الي وقت السحر فله التحية والتجلة والشكر مؤسسها الدكتور طارق البحر...
* ذو افكار ابداعية*
💐💐💐💐💐
وفي برنامج كل صباح افراح تتعم وتنسي معاه الاحزان والغمة مع مصعب هاشم العالي الهمة وبي اسمي الصفات يتسما ومعاه تنتشي وتنجما وتلقي كل السعادة الجمة في دعوة للجميع للود والرحمة وحل قضايا كتيرة وسط الزحمة مفيدة ومجتمعية بيها تعود من تاني البسمة وبالاصلاح تعيش في نعمة مع برنامج هادف بمعني الكلمة صباح البيوت وهو فوق القمة....
*كله فوائد دنيوية *
💐💐💐💐💐
وبرنامج في رقة الفراشة واحلي منوعات تحرك العواطف الجياشة مع جمال ترفيه يروي العطاشي فتتذوق حلاوة الدنيا وانتعاشا مع سيد البشاشة محمد عباس الباشا...
وماامتع منوعات المساء بالبهاء مكتملة ومعاه نتابع بي مهلة ونسعد من اول وهلة ياخذنا مع عذب الامنيات في رحلة مع برنامج بكرة احلي...
وكم بسرح وأهيم كأني في جنة سعيدة تطوف بخيالي مع افراح عديدة في برنامج آفاق بعيدة....
* واحلام وردية *
💐💐💐💐💐
وحلاة المتعة لما نغوص في بحر اللغة العربية لغة القرآن النورانية مع احمد ابوحازم وصفاء حروفه المنتقية واحلي قول وحكاوي في مفردات لغوية فيها جمال أسر وبالحكم مسقية علم في الآداب ومعاني متجلية نابعة من سحر الكلام وثقافة نثرية في برنامج....
* تجليات سردية *
💐💐💐💐💐
ونهار الجمعة برنامج هدهدة هو واحة وراحة للروح المجهدة من مقدمته سلمي عبد الرحمن الجليلة المرشدة وذوقا وخلقا مفردة ومع الاطفال عصفورة مغردة في برنامج كالحديقة المورقة المتوردة..
يبرز تجارب ومواهب الاطفال المتعددة ودفعة ليهم بطموحات ونجاحات ممجدة فى حياة علمية مطورة ومتجددة....
* بي منوعات مسلية*
💐💐💐💐💐
ومااطيب حكاوي وذكريات وبداية انطلاق وصمود وثبات في صعود اول سلمة في الحياة الفنية والابداعية من غير تأثر بالعقبات بلسان احبابنا الفنانين والمبدعين الرواد وكانت ارادتهم الفولاذية عدة وعتاد واصبحو السبيل للراحة والاسعاد في النضم الحلوو....
* وصارو معجزات فنية*
💐💐💐💐💐
وعماد البشري برامجه مثال في جمال أشعار وحلو كلام وفي العطاء شلال وطيب العشرة...
* المامنسية *
💐💐💐💐💐
وارقي منوعات مع سارة مهدي في ترويح يروي شوقي ووجدي واحلي غناء فيه اعجابي وودي وجمال تقديم شذاه الورد وانتظار لقاها هو اجمل موعدي واحلي اختيار لينا بتهدي مع اناقة صوت نراها بتشدي بي معسول كلمات فيها فرحي وسعدي واطيب لحظات معاها بسرعة تعدي بس فيها استمتاع بطعم الشهد....
ثنائى جميل لهنانا دليل ومتوج بالاكليل مع عاطف ود الحاج ايضا المبدع في المنوعات يسلم فمه الرائع كلمه واللامع اسمه اسعاد الناس هو كل همه ويتالق كل برنامج ضمه ومعنوية عالية من خفة دمه....
* وروحه عفوية *
💐💐💐💐💐
وتواضع وطيبة نفس صافية نقية وفوائد لغوية مع سيد الفكر عوض بابكر امضي حياته يرعي كنوز من آثار وتراث القري والحضر وهو في ذاته اروع كنز اخصه بالتمجيد والذكر فيه زهو الماضي وطيب الحاضر زاده عطر عبقرية وشعلة من ابداع وثقافة مطر وموسوعة في تاريخ الحقيبة حكر وملك الطرافة في برنامج الهكر...
* كل عشية*
💐💐💐💐💐
وسهرة يوم السبت مع الفيها سماحة خلق وحنية واحساس مرهف وصفاء نية وسلامة ذوق وشعور حية لمياء متوكل في سرد تجارب ونجاحات مهنية مع كل من ثابر في حياته العلمية في برنامج حلو الكلام...
*سهرتي الذهبية *
💐💐💐💐💐
وزيادة جمال وكمال وهنا في فترات مفتوحة تضوي سنا مع آية الصباغ اهديها ود وثناء بسماعها تبلغ كل المني في منوعات المساء تحلق بالروح لأعلي سما متع وافراح لأبعد مدي مع اجمل مثل بي انبل معاني مزينة واروع حكم جوة القلوب مسكنا وتبهجنا اللطائف بي سماع احلي الغنا....
*و مهرجانات فكرية *
💐💐💐💐💐
وياسلام علي الدكتور امير النور وهو حقا نور يبهج أفق اسماعنا بي انوار في تاريخ زاهي جميل علي مر العصور واصيل في عازف الاوتار وعزفه زى رقة الازهار ويغرد في شرحه زي اطيار ويحرك في القلوب اوتار يقدمه ياسر محمد بشير ايضا مقامه رفيع ودوره كبير في تعريفنا بي كل من ساهم في روعة الازمان من فنانين وشعراء وملحنين وعازفين في جو مملوء بالإبداع والغناء يأسرنا وله وحنين مع احلي ذكريات السنين وبي تشويق نسعد معاهم ديمة وشفافية فيهم شيمة...
* وروائع فطرية*
💐💐💐💐💐
وعبدالوهاب الخليفة بعد السهرات واجمل توليفة في حلقات برامج لطيفة وحكايات يغني عن تعريفا بابداعات ومع كل برامجو اسعد لحظات وكلمة اضيفا كل سهراته مسك ختام ليوم احتواه بالروعات....
* في ليالي ندية*
💐💐💐💐💐
وشادية خليفة في التقديم لطيفة ظريفة في حوارات شيقة طريفة وبي عفوية شفيفة تجذبنا بي اهتمام واثارة وفي كل برنامج نسعد بي تشريفا وهي حقا رائعة حريفة....
* لها احلي تحية قلبية *
💐💐💐💐💐
وميرغني جبريل وبرنامجه العامر ومنوعات المساء كشذي النسيم العابر يلهم كل مبدع وشاعر وكل مستمع باشواقه حاضر ويستمتع في جو عاطر مع برنامج دندنات في الخاطر....
* جمل كل امسية*
💐💐💐💐💐
وفي ادارة الاذاعة ليلي عوض انيقة فكر وسليمة ذوق والاعلام بيها نهض رقيقة شعور وزهر الروض من اريجا اقترض حبيبة المستمعين وتلبي لكل طلب وغرض وبوجودها دوما....
* الاذاعة بهية*
💐💐💐💐💐
وفايزة عربي وماادراك لله درك مااحلاك تاجوج الشرق في روعتك وبهاك فيك اصالة جبال التاكا وعلا الافلاك سبحان من سواك لك صوت عذب هادئ يريح فؤادي وخلق مهذب للروح اقرب...
هي وابوبكر السماني في سماعهم سلواني في برنامج اماكن في الروح يقطفان زهرة من كل بستان ويحكيان عن اصالة وحضارة اهل السودان ويتمنان ان يكون الكل احبة وإخوان واهل حنان لاقبلية ولاعنصرية بل الكل في الدين سيان....
وبرنامج هام لكل محب بشذي النسمات علينا يهب وبكل هيام وتقدير معجب نستمع بى ترحاب تام في وصف جمال شرق السودان قبلة الإلهام وعادات اهلنا الكرام في برنامج اكوبام....
وبرنامج اهلا ياصباح ينثر فينا عبير فواح بي ميلاد امال وأفراح تبعث فينا هناء وارتياح....
وان انسي لاانسي يوم الاثنين في الصبحية تقدم فايزة لينا هدية برنامج صباح البيوت الهادف وباريحية تحاور الضيف في قضايا غنية تعود بي منفعة واهمية فيها فرص استفسار للمستمع في الامور المعنية ان كانت في الدين او في الصحة اوقانون استشارة ثرة ومجانية والعائد لينا فوائد جمة حياتية ان كانت اوتربوية يضئ للكل درب المعرفة ونهج سليم بمصداقية لك فائزتي كل ود وتحية لما قدمتوه....
* لنفع البشرية *
💐💐💐💐💐
وعند ذكر عمر محي الدين القامة الاستاذ العلامة اقف لاحيي تلك الهامة هامة مضيئة بالراي الثاقب والفكر الواثب وله شعر في شهد ذائب يقع علي شغاف القلب متعاقب بي شجون وحنين صوته الدافئ كالانغام وشعره الحالم كالانسام يداوي الانين وبرامجه تلامس حبل الوتين....
وكم كسبنا فائدة جميلة وحصيلة جليلة من معلومات في معلومة اصيلة...
وفي سهرة سهر القوافي كم هو فيها مبدع ووافي يزهو تمكن وألق خرافي في سهرة ملونة بالاطياف مزدانة بالوان الطيف الصافي بل فيها سحر القوافي تخطفنا لروضة غناء نرتع فيها مزينة بالياسمين والصفصاف وفي شذاها عبق المرافئ مع سحر وقت الاصيل في الضفاف يلونه شعاع الافق الشفاف في سهرة ننتظرها شوقا كل يوم اربع ويذيد فيها الفرح اضعاف نفوز بي متعة الاستماع وفينا المعلول يصبح متعافي...
* وروحه صفية *
💐💐💐💐💐
لديه مكتبة ثرة من تسجيلات واندر الاغاني من ثروات بلاده الغرة فخر لكل سوداني ما انسته الغربة اغلي جواهر وعز انساني د/ امين حسن عبداللطيف من المملكة المتحدة له كل تقديري وامتناني....
* وبيه حفية *
💐💐💐💐💐
واغلي برنامج من اعداد عثمان محمد عمر يحلو معاه الجلوس والسمر تسامر جميل ومع شعاع القمر بالروائع انهمر ..
في برنامج أغنيات من ذهب وفي كل مساء معاه نرتقب ولي احلي اختيار لينا وهب ولي عقولنا سلب بي اغاني عثمان حسين والكابلي وزيدان والجابري وغيرهم من فنانين بلادي ليهم انادي فهم جليس وحدتي وسهادي والنجوم شهادي في انا والنجم والمساء حبيبة فؤادي وزيدان في الليلة ديك عندليبي الشادي وحمد الريح في حمام الوادي وشرحبيل فى الليل الهادئ و وردى في ارحل وبنادي وصالح الضي في ناسك ودلال واوعك تخلف ميعادي وابو داؤد سماعه مرادي وسيدخليفة في حليلك وحليل ايامك يابلد احبابي كم فيها اسعادي لهم جميعا كل ودادي ومعهم دوما يزول اجهادي وفي صحبتهم جل اعتيادي ....
*وبالمتع مروية *
💐💐💐💐💐
وكم فاقدين اغاني الحقيبة من زمان هي لينا حبيبة ولاحساسنا قريبة وللروح العليلة طبيبة واحلي معاني مليانة طيبة وفنانينها لينا احباب اولاد شمبات وسرور وكرومة هم تاريخ لامع مابكفيه كتاب واصل الفن المستطاب والاغنيات معاها نذوب من جمال كلمات تخلب الالباب واداء وصوت من صافي وعذب الرباب ورقة الحان تعرج بنا للسحاب ان كانت كمنجة اوبالرق والدربكة في الابداع عجب عجاب مع الصفقة وشيل الكورس نال كل طرب واعجاب والفن الشعبي هو اول طلبي وأسر قلبي يهون علينا تعب وصعاب من اغنيات محمداحمدعوض وعبدالوهاب الصادق وترباس وعبدالله محمد ليهم اداء بالجد جذاب
ويااهلي في الشمالية بي أصالة النخيل مهدية وجمال خضرة ندية تلهم بي اشعار عذرية والنعام ادم ومحمد جبارة وغيرهم فى غناء الطمبور كتغريدة طيور يحلق بنا في مرح وحبور وديمة غلاتو في القلب حضور وطاعم زي شهد التمور يمحو فينا الهم واكتئاب.....
*ومعهم كل لحظة هنية *
💐💐💐💐💐
وفنانات وطني العزاز هم لينا اطيب ملاذ ملكات الطرب حقيقي ومجاز في جمال الصوت فاقو كل اعجاز رائعتنا عشة الفلاتية ومني الخير وفاطمة الحاج واماني هم للفن اعظم إنجاز وياحلاة البلابل اقولها ليهم من غير اجامل دخلتو القلوب من غير جواز واحلي اغاني من الحان بشير عباس في الابداع نلتو استحواز وكل الاغاني...
* لينا هدية*
💐💐💐💐💐
واهلي في غرب السودان اهديكم ود ووئام ومن جبل مرة البجلب المسرة احلي سلام مطربنا ابراهيم موسي ابا في روائع الفن ليه اسهام في اغنية بعز التوب نالت كل حب وغرام وجمال الحان تأسر الوجدان هيام وتسكره بالخمر المدام وعذوبة صوت كهدل اليمام...
وعمر احساس في زولي هوى وحمرة عجز التعبير وكتابة الافلام عن وصف جمال كل الانغام وصوت واداء عليه ياسلام يبهج الروح ويذهب الجروح ويهتز الكيان طربا وتمحي الالام ...
وكل الفنون ليها اكرام في موسيقي معبرة تمام الحان نقارة بي انسجام وكمان الوازا في الافراح دوام وفي الحصاد ليها اهتمام ووقفة حكامة بي وقار واحترام تنشد احلي قول وكلام....
* بي معاني قوية*
💐💐💐💐💐
ويااهلي الطيبين في الشرق اهل عثمان دقنة من اصل الشجاعة منبثق والشمس تشرق من هناك وسحر البريق منها أنطلق وجمال رقصة سيوف بتبرق برق مع غناء وموسيقي ليها فرق و دبايوا كلمة شوق وسلام وفي الاكرام ليهم سبق ومعاهم تعشق ريحة البن واصل القهوة وطيب العبق وسحر الطعم واحلي بهار من قرفة وعرق وصينية مزينة بالافراح فيها رقة وعمق لراحة بال وجمال الفال لمزاج طاب وعشق وعطر اقداح بالمستكة فاح تودع بيها تعب ورهق ومطايب من كل متاح وتمتع للوجدان يخترق واريج بخور لقلوبنا طرق مهما نكتب عنهم مابكفينا ورق عن جمال كسلا وطبيعة جبال توتيل والتاكا فيهم بريق من وادي عبقر مسترق وفي بورسودان ثراء بالبحر الاحمر وسحره من عيني النوم سرق وغروب الشمس الخلاب عند احمرار الشفق...
* وروائع بحرية*
💐💐💐💐💐
كل الفنون والاغاني كم فاقدنك لو ترجعي لينا ومانبعد عنك وننهل دوما من روعة لحنك وشهد فنك....
*وارواحنا ليك سبية *
💐💐💐💐💐
اذاعتنا الفتية ليها تسعتاشر سنة عمر الزهور عمر الغرام وعمر المني عشت معاها اعوام من بهجة وهناء ومعاها تنسي الهم والضني وكل السنين مااتفارقنا لحظة هي وانا عقبال تدومي اعوام واعوام ياشعلة النور والسنا....
*وتسلمي للابدية *
💐💐💐💐💐
واخص بالتحية بانقا حسب الرسول بانقا كل التقدم بيه ارتقي واحلي الروائع لينا سقي والابداعات هو سابقا بجمال برامج مشرقة وكل البرامج من اخراجه كالمهرجان حقيقة وثقة وبالحضور معاه اجمل ملتقي....
* وفي التنسيق مية المية*
💐💐💐💐💐
ولكم التحية اعزائي الفوارس مزيعي ومزيعات اف ام مية وكل العاملين وراء الكواليس من مخرجين ومنسقين ومعدي برامج في هذا الصرح العامر والحقل الزاهر اعادكم الله لنا مجبورين الخاطر وتقديرى لكل...
* الصفوة البقية*
💐💐💐💐💐
اهداء بكلماتي المتواضعة لكم وانتم تستحقون الافضل والأجمل من محبة لكم ومشتاقة...
* لاذاعتكم الملوكية *
💐💐💐💐💐
اختكم تهاني...
