02/08/2022
گل سُن میری گول گول روٹیئے
ایڈے سوہنے مُکھڑے نہ رول روٹیئے
بُھکھیاں دا چین تے قرار تیرے وِچ اے
سَچی دساں رنگاں دی بہار تیرے وِچ اے
زندگی دا نشہ تے خمار تیرے وِچ اے
بولاں وِچوں سوہنے تیرے بول روٹیئے
گل سُن میری گول گول روٹیئے
وِچوں وِچوں خورے کِتھے ڈُب مَر جانی ایں
کَمیاں دے ویہڑیاں چ جھاتی جدوں پانی ایں
بچیاں دے چہریاں تے رونقاں توں لانی ایں
خوشیاں دے وَجدے نیں ڈھول روٹیئے
گَل سُن میری گول گول روٹیئے
دھرتی تے پیندا کیوں اے کال مینوں دس نی
بُھکھے کاہنوں مَردے نیں بال مینوں دس نی
موت کاہنوں سُٹدی اے جال مینوں دس نی
دُکھ سُکھ میرے نال پھول روٹیئے
گل سُن میری گول گول روٹیئے
ایڈے سوہنے مُکھڑے نہ رول روٹیئے
