13/01/2023
کسی غمزدہ سے یوں حالِ دل میاں ایک دم نہیں پوچھتے
کہ جو قہقہوں میں دبا ہوا ہو وہ ضبطِ غم نہیں پوچھتے
دمِ گفتگو نہیں پوچھتے پسِ گفتگو کے ملال کو
کبھی مل بھی لیں وہ تپاک سے تو بھی اُن سے ہم نہیں پوچھتے
مری سُرخیوں بھری آنکھ پر مرے رتجگوں پہ سوال کیوں
پڑا سامنے ہو جو رختِ نم ، مرے محترم نہیں پوچھتے
مرے رازداں مرے زخم کو تری پُرسِشوں نے ہرا کیا
کہ جو واقفِ غمِ حال ہوں وہ تو کم سے کم نہیں پوچھتے
نہیں یاد کیا ؟ تری زلف سے کبھی کھیلتی تھیں یہ انگلیاں ؟
کسی لمس کا تجھے کاکلوں کے یہ پیچ و خم نہیں پوچھتے ؟
کبھی التجا , کبھی سرزنش, کبھی مِنتوں بھری خامشی
رہے ملتجی کسی آنکھ کا چلو کچھ بھرم نہیں پوچھتے
