24/05/2022
https://www.facebook.com/106550444965333/posts/326606749626367/
PAGPANGHOSTAGE SA LALAKI KAMATAYON ANG GISAMPUTAN
Namiligro ang kinabuhi sa usa ka babaye nga na-hostage kagahapong adlawa, Mayo 23, 2022 sa may alas 12:05 sa udto hinungdan nga napusilan ang hostage taker sa kapulisan.
Kini ang insidente nga nahitabo atbang sa opisina sa LTO sa Poblacion, Ipil, Zamboanga Sibugay.
Nasayran nga ang suspetsado kay una nang nag-deklara ug “hold-up” sa usa ka lalaki nga biktima sa Purok Tubod, Barangay Tiayon, Ipil ning probinsya. Nailhan ang biktima nga si Rogelio Catacutan, 75 anyos, minyo ug residente sa nasangpit nga lugar. Gihinganlan sa otoridad ang suspetsado nga si Eduardo P. Andres, residente sa Tungawan, Zamboanga Sibugay. Nahibaloan nga nahimo pa kining nakahapak sa ulo sa biktima gamit ang armas nga gibitbit nga kalibre 45 ug gition kini kay Catacutan. Nihawa gilayon ang suspetsado sa lugar gihitabuan ug namara kini ug tricycle nga gimanehoan sa usa ka Zandro Cinco, 49 anyos ug nagpahatud kini sa sentro sa Ipil kauban ang biktima nga si Catacutan.
Dugang pa, sa ilahang pag-abot sa sentro sa Ipil, atbang sa opisina sa LTO, minaog ang suspetsado sa tricycle nga ginsakyan ug miadto largo sa usa ka opisina, ang Pacific Insurance Union nga katapad lamang sa LTO kung asa kini misulod ug nanion sa iyahang bitbit nga armas ngadto sa duha ka mga babayeng biktima nga nailhan sa pangalan Marilyn Panghilayan, 62 anyos ug Irene B. Leysaon, 42 anyos. Niining hitabua, dali-daling mipahawa ang duha ka biktima gawas sa opisina apan misunod kanila ang suspetsado ug gibira ang usa ka babayeng biktima nga si Leyson. Samtang hawid ni Andres si Leyson isip hostage niini, mitabok kini sa pikas kalsada.
Miresponde ang kapulisan sa panghitabo ug sa pagkakita sa otordad sa suspetsado, gi-storyahan kining mo-surrender ug buhian ang gibitbit nga pusil. Apan, mibalibad ang suspetsado sa pagtuman sa hangyo sa otoridad ug gition ang armas niini sa hostage. Diha-diha, naka-angkon ang suspetsado ug usa ka pinusilan sa tuo nga bahin sa ulo hinungdan sa hinanali niyang kamatayon. Matud pa, wala nay laing pamaagi aron maluwas ang biktima gikan sa peligro kundi ang pag-neutralize na lamang sa kapulisan batok sa suspetsado.
Nagpahigayon gilayon ug scene of the crime operation ang Provincial Forensic unit ug narekober sa insidente ang 1 ka kalibre 45 nga pistol nga adunay serial number 125933, 1 ka magazine nga adunay 5 ka buhing bala, 1 ka magazine nga adunay 3 ka bala ug 1 ka fire cartridge case.
Samtang ang mga biktima kay gidala diha-diha sa Ipil MPS alang sa debriefing.
(Source: ZSPPO)
Photo: Creamlin Calago
Joelyn CLabiaga SDaelto
FR/NewsWriter, Easy Radio
Balita hatud kaninyo sa
*S and J Primier Company Corp
*RSV Trading
*Blacrice Mangosteen Coffee
*TMJM OPC/Gabon Products
