Bohol Balita Daily News

18/02/2025

EDITORYAL

RESIGN NALANG?

Ang Impeachment kon mahukman sa Senado nga sad-an si VP Sara Duterte, dili na makadagan pa og laing posisyon sa gobiyerno. Labing siguro, dili na siya makadagan og Presidente sa 2028. Tiurok ang tanang paglaum sa mga Duterte fans. Aron siyang madakadagan pa, mas maayong moresign nalang daan sa dili pa sugdan ang Impeachment Trial sa Senado inig balik sa session karong Hunyo 2 aron makadagan pa siya pagka Presidente sa 2028. Kini ang tambag sa mga eksperto sa balaud.

Kon dili siya moresign pagka Bise Presidente sa Pilipinas, kinahanglang padag-on ang tanang senador nga kaalyado sa mga Duterte aron sa hinukmanay sa Senado, mahukman nga way sala si Sara. Tungod kay politiko man ang naglangkub sa mga Senador, pamolitika usab ang kalidad sa ilang paghukom. Botar-botar man gud ang hinukman sa Senado mao nga kon kuwangon ug makaabot sa 2/3 sa mga senador kun 16 ka mga senador ang gustong i-convict si VP Sara, goodbye nalang ang tanan. Way nay Sara Duterte nga Makita pa sa politika sa Pilipinas.

Niini, angayang molihok og maayo ang tanang mga lumalaban sa mga Duterte nga pildihon ang mga kaalyado sa administrasyong Marcos-Romualdez karong Mayo 2025 kon gustohon nilang mamahimong Presidente si Sara Duterte.

Sa mga nipirma sa Impeachment Complaint, dili na nila masibog pa ang ilang pagpirma. Mao nga kon gustohon sa mga lumalaban sa mga Duterte, mas maayong ipabati nila ang ilang kasagmuyo karong eleksyon aron makapahungaw sa ilang gibate sa pagnudnud sa ilang idolo sa labing lisod nga kahimtang. Patilawon sa ilang gihimo, kana kon di maagni sa mga Ayuda; susama sa mga lider nga natintal sa P160M kuno nga bugti sa pagpirma.

Adunay 900,000 kapin ka mga registered voters ang Bohol. Si VP Sara nakakuha og doulan sa 600,000 ka mga boto sa 2022 samtang 500,000 ang nakuha ni Marcos Jr, kansang boto natakdan lang sa boto ni Sara. Giilang Duterte bailiwick ang lalawigan sa Bohol. Kon magkauyon ang tanan, minus, sa mga nibiya sa mga Duterte ug nakig-abin ni Marcos ug Romualdez, dako ang purohan nga makahatag kinig baha ug lunop aron malumsan ang tanang kandidato sa administrasyong Marcos-Romualdez.

Kondili makapasalig niini ang mga Duterte fans bisan dinhi lang sa lalawigan, mas maayong mo-resign nalang si Sara Duterte aron makadagan pa siya sa 2028. Dili kini komedya, mao kini ang dagway sa umaabot nga buwan.

18/02/2025

4 ka balay nasunog sa Carmen, P200K danyos

TULO ka mga balay ang nangaugdaw samtang usa ang partially damaged human aksidenteng nasunog lagmit gumikan sa electrical wiring didto sa Sitio Alingasa, Barangay Poblacion Sur, lungsod sa Carmen mga ala 1:12 sa hapon niadtong Sabado, Pebrero 15.
Ang mga balay gipanag-iyahan nila ni Ariel Macabudbud, Joit Sabina, Janessa Juni ug Bebli Delgado.
Sigun ni FO2 Jose Reyer Años sa Carmen Fire Station nagsugod ang kalayo didto sa balay ni Macabudbud.
Gidudahang dunay appliances nga wala naibot hinungdan sa maong hitabo. Apan padayon pang gisusi sa Carmen Fire Station ang maong hitabo.
Nakontrolar ang kalayo mga ala 1:40 sa hapon ug gideklarar nga na fire out mga alas 2 sa hapon nianang adlawa.
Gibanabanaang mokabat ngadto sa P200,000 ang danyos sa nahisgotang insidente.
Way gikatahong may nangaangol atol sa maong sunog. ( AND)

18/02/2025

Sakop sa Brod Riders nibangga sa Ceres Dauis, patay

PATAY ang usa ka sakop sa Brod Riders human aksidenteng nibangga sa gikasugat niini nga Ceres bus didto sa Barangay Poblacion, lungsod sa Dauis mga alas 4:00 sa hapon niadtong Dominggo, Pebrero 16.
Ang biktima giila nga si Jaime Pondol Gumahob, 34 anyos, taga Botoc, Brgy. Cabawan, lungsod sa Maribojoc.
Sigun sa imbestigasyon sa kapolisan nga ang biktima luwan sa iyang motorsiklo, nagdagan gikan nitambong og kalihokan sa Brod Riders didto sa Cafe Racer sa lungsod sa Dauis . Dihang pag-abot sa likoon nga bahin sa maong dapit, tungod sa kakusog sa dinaganan niini, wa na nakabawi ug aksidenteng nibangga sa gikatagbo niini nga Ceres.
Naigo sa samin sa driver's side ang ulo sa biktima hinungdan sa grabeng angol sa ulo ug lawas niini.
Gihatud ang biktima didto sa Gov. Celestino Gallares Memorial Medical Center sa siyudad sa Tagbilaran apan nabugtoan sa iyang kinabuhi. ( AND )

18/02/2025

snatser nga na- viral sa social media sikop sa Tagbilaran

SUSPETSADONG isnatser nga na- viral sa social media, nadakpan human nanglabni og usa ka cellphone gikan sa usa ka babaye sa usa ka popular nga night spot sa JA Clarin Street, Brgy. Dampas, siyudad sa Tagbilaran mga alas 9:30 sa gabii niadtong Dominggo, Pebrero 16.
Ang dinakpan giila nga si Mark Christian Avenido y Fornolles, 23 anyos, ulitawo, taga
Enerio Street, Brgy. Poblacion 3, siyudad sa Tagbilaran.
Sigun sa pakisusi sa kapolisan nga samtang ang biktima nagbaktas sa maong lugar duol sa D’Box Bar. Dihang ang suspek kalit lamang ninglabni sa iyang gigunitan nga cellphone ug nisiba.

Ang biktima nigukod sa suspek samtang nisinggit og tabang nga nagpaalerto sa mga katawhan nga naglajaw niadtong tungora.
The victim immediately pursued the suspect while shouting for help, alerting nearby pedestrians.
Pipila ka mga concerned citizens ning responde sa maong komosyon hinungdan nga nakorner ang maong suspek sa dead-end alley duol sa Landbank J.A. Clarin Branch. Diin pipila ka mga tawo naka record og video ug nakuhaan og hulagway ang gikatahapamln ug gi- share kini sa Facebook. Apan sa wala pa makaanot ang police assistance, nakaikyas ang maong suspek.
Pagkadawat sa maong report, ang Tagbilaran City Police Station pinaagi sa koordinasyon sa Tagbilaran City Command Center, ni- review sa CCTV footage gikan sa City surveillance system ubos sa liderato ni Mayor Jane Yap ug ang hepwsa City PNP, PLT Col. John Escober, nagpahigayon dayon og usa ka hot pursuit nga niresulta sa pagkasikop sa maong suspek sa Dalikyat 24-Hour Convenience Store, sa J.A. Clarin Branch, mga alas 11:45 sa gabii.
Narekober gikan kaniya ang usa ka Realme Y51, kolor dark blue nga mobalor ngadto sa Php 5,000 nga iya sa maong biktima.
Dugang pakisusi nagbutyag nga ang maong suspek kangi nadakpan gumikan sa kasong paglapas sa R.A. 9165 kun Comprehensive Dangerous Drugs Act of 2002.( AND)

17/02/2025

HEADLINE UGMA - Feb. 18, 2025

17/02/2025

Disgrasya sa Dauis, sakop sa Brod Riders nibangga sa gikasugat nga Ceres bus

15/02/2025

15/02/2025

Tigum sa AUZA clan agig pangandam sa 4TH Auza Clan Grand Reunion, June 2025

15/02/2025

KARON LANG!
Tigum sa AUZA clan sa pagpangandam sa GRAND REUNION tuig 2025. Gihimo sa panimalay ni Engr Lorenzo Flores, presidente sa AUZA Clan.

14/02/2025

‘Urgent health care services’
sa matag Barangay - Baba Yap

Paghatag ug access sa basic health services ug ambulatory care sa tanang kabarangayan sa First District, usa sa nag-unang programa nga gi-presentar ni kanhi Tagbilaran City Mayor John Geesnell “Baba” Yap sa iyang tinguha nga mapili nga congressman sa Primero Distrito sa Bohol.

Ang pag-establisar ug mga Urgent Care and Emergency Services diha sa mga kabarangayan usa ka mahinungdanong lakang aron matubag ang panginahanglan sa serbisyo sa panglawas ang mga “disadvantaged” ug mga “vulnerable” nga pamilya dinhi sa entero Distrito Uno.

Ang pagpahimutang ug mga intermediate health facilities mahimong tulay tali sa mga primary care facilities, sama sa mga rural health units or health centers, ug mga mas taas nga lebel institusyon sama sa mga hospital, pinaagi sa paghatag ug dinali-ang pag-atiman og pag-tambal, sama sa mga minor surgeries og susamang serbisyo, sa tanang adlaw sa semana.

Mao kini usa sa mga programa nga gi-presentar ni Baba Yap sa iyang mga pakigpulong sa Barangay sa Unang Distrito human iyang namatikdan nga dili tanang mga pamilya labi na kadtong anaa sa mga layo ug hilit nga barangay ang dunay kapasidad nga maka-adto sa ospital o mga primary healthcare facilities nga kasagaran anaa mahimutang sa mga dagkong lungsod o dinhi sa Syudad sa Tagbilaran.

“Gikinahanglan gyud kaayo ang pag establish ug mga health facilities, labi na sa paghatag ug urgent care o dinali-ang pag-atiman ug mga ambulatory services, labi na sa mga marginalized communities sa Unang Distrito. Kinahanglan ang serbisyo alang sa maayong panglawas makab-ot o ma-avail sa tanan, nga dili na kinahanglan nga moadto pa sa Tagbilaran aron magpa-tambal,” pasabot ni Yap.

“Nahimo nato ni sa Tagbilaran City, pinaagi sa pagtambayayong sa DOH, ato kining himoon sa ka-barangayan sa 14 ka lungsod sa First District, nga maka padala ta ug mga doctor, nurses ug uban pang medical professionals aron maka facilitate sa paghatag ug emergency care sa atong mga kaigsuonan sa mga layong barangay,” dugang pa sa magpa-pili pagka-kongresista.

Pasalig ni Baba Yap nga iyang ipasiguro nga ang tanang molupyo sa tanang barangay sa 14 ka municipalities sa Primero Distrito aduna gayo’y access sa de-kalidad nga public healthcare services.

Gipasabot ni Yap nga kini nga pamaagi maka alibyo sa kadaghan sa mga pasyente sa mga emergency rooms ug makunhoran ang ka-huot sa mga na-admitar nga pasyente diha sa mga ospital.

14/02/2025

Ginang patay sa disgrasya sa Buenavista

PATAY ang usa ka ginang human aksidenteng nabanggaan ang iyang gisakyan nga topdown nga motorsiklo sa usa ka motorsiklo didto sa Barangay Canggawa, lungsod sa Buenavista mga alas 3:45 sa sayong kabuntagon niadtong Merkoles.

Ang biktima giila nga si Melve Cerequilla, 32 anyos, taga Barangay La Victoria, lungsod sa Carmen.

Sigun sa taho ang biktima gikan sa ilang Barangay luwan sa iyang gisakyan nga topdown nga gidrayban sa iyang bana. Dihang pag-abot sa maong dapit, aksidenteng nabanggaan sa usa ka motorsiklo nga gimanehoan ni Archel Millang, 21, ug backrider niini.

Daling gihatud ang biktima didto sa Dagohoy Hospital sa lungsod sa Inabanga apan gideklarar nga dead-on-arrival.

Samtang ang drayber nga nakabangga nakaangkon og bali sa toong bahin sa tiil, angol ug bun-og sa iyang kalawasan. Ug ang backrider niini anaa sa kritikal nga kundisyon didto sa Gov. Celestino Gallares Memorial Medical Center sa siyudad sa Tagbilaran.
( AND )

14/02/2025

Mag- uuma napalgang patay sa Dagohoy,
lawas sa biktima natusak sa bala sa armas

MAG-UUMA napalgang patay human gipusil sa wa mailhing mamumuno ug natusak sa mga bala sa armas ang nagkadaiyang parte sa kalawasan niini sulod sa usa ka abandonadong balay sa lungsod sa Dagohoy niadtong Merkules sa alas 8 sa buntag, Pebrero 12, 2025.

Ang biktima nailhan nga si Cornelio Anino Jr., hamtong, minyo, lumolupyo sa Barangay La Esperanza, Dagohoy.

Sugun ni PCPL Matias Publiko sa Dagohoy Municipal Police Station, nga gibanabana nga pasado alas 10 sa gabii niadtong Martes sa dihang nahitabo ang pagpamusil, apan pagkabuntag na nadiskobrehan ang patay'ng lawas sa biktima.

Nahiagom kini og daghang samad pinusilan sa nagkadaiyang parte sa lawas jinunsa hinanaling kamatayon.

Wa pay nakit-ang motibo ang kapolisan kun unsa ang hinungdan sa pagpatay sa nasampit nga biktima. Ug wa pa mailhi ang responsable sa maong krimen.

Padayon pang gisusi sa Dagohoy PNP ang maong hitabo. ( AND)

14/02/2025

P6.8M shabu sakmit sa buy-bust sa Cortes

ULITAWO nga trabahante sa tigbaligya og feeds, nadakpan ug nakuhaan og usa ka kilong gidudahang shabu nga mokantidad ngadto sa minilyon ka pesos atol sa buy-bust operation didto sa Purok-3, Barangay Upper Dela Paz, lungsod sa Cortes niadtong Merkules sa gabii.

Ang suspetsado giila nga si Judy Tongco, 30 anyos, ulitawo, nagtrabaho sa Fortune Agrivet, lumad nga lumolupyo sa Purok-7, Barangay Danahaw, lungsod sa Clarin, kasamtangang nagpuyo sa Barangay Cogon, siyudad sa Tagbilaran.

Ang ginsakpan sa Provincial Drug Enforcement Unit ubos sa supervision ni PLTCOL Jomar Pomarejos nagpahigayon og anti-illegal drug operation sa maong dapit nga niresulta sa pagkasikop sa maong suspek.

Napalitan ang suspek og usa ka putos nga giingong shabu kantidad og P13,000.

Laing 12 ka mga dakong putos nga may sud gituohang shabu ang nakuha gikan sa iyang posisyon.

Gibanabanaang motimbang tanan ngadto sa usa ka kilo ug anaa sa Standard Drug Price
mokabat ngadto sa P6,800,000.

Kasong paglapas sa Akta Republika 9165 kun Comprehensive Dangerous Drugs Act ang giandam nang ipasaka batok kaniya sa piskaliya. ( AND )

12/02/2025

Unanglinya

Gigutom ang mga tawo, ayaw pakan-a og wak-wak

Si Gob Aris na mismo ang nagpahayag sa pagpasabot kon nganong namirma ang tulo ka mga Kongresista sa impeachment complaint atol sa usa ka programa nga iyang gitambongan. Ang unod sa iyang pagpasabot mao ra ang gisuwat sa press release nga gipakatap. Abi ko’g naay bag-o. Anyway, maayong pagpasabot ni Gob Aris, pero kuwang sa duot. Wa man gud siya mopirma, pero siya na karon ang spokesperson sa tulo ka mga Kongresista.

Kay nabungat na man sa atong gobernador, mas maayong abagan sa mga sakop sa media, binayran man o wala. Paspasan sa komentaryo sa ilang mga programa, lindog, fb page, live, reels ug uban pa aron matuhop gyud og maayo ang buot ipasabot sa gobernador. Kini ang atong matabang aron makahupay sa mga nag-alintabo nga kasuko. Tulo nalang ka buwan ang nahabilin ug tinghukom na.

Pero taym una gob, mura man og naa kay giistorya nga wa matiwas? Kadto bitawng niingon ka nga “Di na mo nako…labaw…” dayon ni divert ka og valentines day. Wa sa script? Bitaw good job. At least para nako, naglibog ko kon makasabot ba ko o dili. Ang uban tingale nakasabot na. Pero nganong naay quadcom? Imbes mohait, nahabol man. Naglutaw og samot. Gi-impeach aron komportableng manubag? Unsay logic?

Kining mga pangutanaha ang gihuwat nga direktang tubagon: Nganong gitraydoran si Kumare? Unsa ka tinuod ang P160M(milyon?) nga bugti sa matag pirma sa Kongresista? Cash ba kini or in kind? Kini ug daghan pang pangutana ang nitumaw nga way makatumbok sa tubag. Mao nga, tabang mga media. Ayaw lang paapila si RVO kay nagkamalisod pa intawon to.

Hinumduman lang nga dili sama sa bata ang mga tawo nga gipanggutom. Nangita og kaon ang bata, ayaw hatagi og wakwak. Kay bisan wakwak kan-on sa bata kay gigutom.

12/02/2025

Nag-andam og litson, gituhog sa iyang bilas patay
PATAY ang usa ka lalaki human gidunggab sa iyang bilas didto sa Purok-7, Barangay San Vicente, lungsod sa Dagohoy mga alas 12:52 sa sayong kabuntagon niadtong Lunes.

Ang biktima giila nga si Joel Man-on, 51 anyos.

Ang suspetsado nailhan nga si Arcadio Balonga, 60, pulos taga Barangay Malitbog, lungsod sa Dagohoy.

Sigun sa taho sa kapolisan nga ang biktima ug bilas niini nagkuyog kay gi-hire nga maglitson sa kasal sa ilang silingan. Ug samtang nag-andam og litsonon ang biktima nga nagtalikod apan kalit kining gidunggab sa iyang likod sa maong suspek.

Daling gihatud ang biktima didto sa Gov. Celestino Gallares Memorial Medical Center sa siyudad sa Tagbilaran apan patay na paghidangat sa maong tambalanan.

Samtang ang suspek nadakpan sa niresponding kapolisan.

Kasong murder giandam nang ipasaka batok sa maong suspek sa piskaliya. ( AND )

11/02/2025

Brgy. tanod gitigbas sa uyoan nga chief tanod

LILA---Hingsamdan ang usa ka barangay tanod human gitigbas sa iyang uyoan nga usa ka chief tanod human nagkabikil kay nakatagay didto sa Purok-1, Barangay Macalingan, lungsod sa Lila mga alas 9:00 sa gabii niadtong Sabado.

Ang biktima giila nga si Jimmy Cagumbay Tagudin y Cagumbay, 32 anyos, may kapuyo, lumulopyo sa maong lugar.

Ang suspetsado nailhan nga si Antonio Cagumbay y Jaojao, 51, minyo, taga Purok-2, Barangay Macalingan, Lila.

Sigun sa imbestigasyon sa Lila Municipal Police Station nasayran nga ang biktima ug ang suspek nag-inom uban sa ilang mga kauban sa gawas sa pinuy-anan ni Eboy Dinoy, sa maong dapit. Hangtud nga militok ang biktima ug dili maayong mga pulong ug nangitag away hinungdan nga gipakalma kini sa suspek.

Gipakalma ning biktima sa íyang uyoan nga chief tanod apan nagpakita og agresibo, butyag ni PCapt Antonio Sanchez, hepe sa Lila PNP nga nahinabi sa BBDN.

Matud ni Sanchez nga gikomprontase sa biktima ang suspek nga niresulta sa ilang init nga mga pinulongan.

Gisumbag sa biktima ang suspek apan nakalihay kini. Ug nakahigayon ang suspek og kuha sa sundang nga gitakin sa hawak ni Necito Cagumbay ug gitigbas niini ang biktima.

Nahiagom ang biktima og samad tinigbasan sa wala nga bahin sa bukton niini.

Gihatud ang maong biktima didto sa Gov. Celestino Gallares Memorial Medical Center sa siyudad sa Tagbilaran.

Samtang ang suspek nasikop sa kapolisan ug nasakmit ang sundang nga gigamit sa pagpanigbas.

Apan gibuhian kagahapon human ni- execute og affidavit of undertakings tungod sa relasyon sa duha. Ug nagpasalig ang uyoan nga siya ang mangabagabsa galastohan sa pagpatambal sa iyang pag- umangkon sigun pa ni Sanchez. ( AND )