29/11/2025
| Ginto sa Wakas at Paghihimakas
Pinintahan ng putik ang mga paang walang prenong tumakbo para masunggaban ang matagal nang inaasam na tagumpay. Lumipad sa pakpak ng kaligayahan ang mga paghihirap na ininda kahit ano pang kulay ng kalangitan—nangibabaw pa rin ang sakripisyo, determinasyon, at pagpupursigi upang makamit ang inakalang imposible na ngayo’y naging realidad sa pangalan ng pagkakaisa.
Sinungkit ng Yunit 3 ng College of Arts and Sciences ang kauna-unahang ginto sa larong Frisbee (Women’s Category) matapos ang madugong labanan sa ilalim ng matirik na araw laban sa Yunit 4 na may limang puntos ang pagitan ngayong Intramurals 2025. Kasaysayan para sa Yunit 3 ang gintong napasakamay bitbit ang mga paghihirap sa loob at labas ng palaruan. Nakayapos sa mga anino ng CAS Frisbee Women's Team ang layuning ipanalo at maiangat ang pangalan ng kolehiyo mula sa nakakuom na kamao ng mga katunggali.
“Same man lang kami tanan na goal—ang magdaog, and i-enjoy ang hampang at the same time. Bisan weekend gina baka bakahan man namon training. Deserve gid ni nga daog”, sambit ni Jasmine Demetita, miyembro ng Yunit 3 Women’s Frisbee Team.
Pawang nakaukit sa mga alapaap ang kaligayahan—mga butil ng pawis ang tumulo nang gumuhit ng ngiti ang huling puntos na nasungkit ng lupon.
“Very euphoric gid ya nga moment. Last year, lapitan na kami ma gold, pero hindi pa gd namon time siguro. I’m very thankful to our teammates kay grabe gid ang ila nga baka-baka. Special mention sa amon seniors, amo na lang gid ni siguro ang graduation gift sa ila”, ani Jasmine.
Bilang isang grupong kinakatawan ang isang yunit, walang hamon ang humadlang sa pagpupursigi ng mga atleta nang ipinamalas ang galing laban sa mga kalabang kaliwa’t kanang nakabantay. Walang-lingon nang itinakbo ng bawat kasapi ang mga paang lumilipad at lumalangoy sa luntiang damuhan ng palaruan. Mahigpit na niyakap ng mga manlalaro ang puting platong bukas-kamay na sinalo sa ere.
Pagkakaisa at tiwala—ito ang naging susi ng Yunit 3 upang mabuksan ang ginintuang pinto ng tagumpay. At sa pagbukas ng bagong kabanata ng kasaysayan sa palaruan, nasasabik at puno ng pag-asa ang puso ng mga manlalaro—ipapanalo at iwawagayway ang bandera sa mga susunod na laro.
“Baka-bakahan namon na maka back-to-back gid”, dagdag pa ni Jasmine.
Kahit pang naputikan ang mga medyas, walang bahid ng dumi ang makakahawi sa ngiting ginuhit ng kaligayahan. Lumipad man sa hangin o kahit malubog pa sa putikan, nagwagi ang pagkakaisa't pagtutulungan para sa bawat isa. Imposible mang isipin, ngunit walang mithiin ang hindi makakamit sa nagpupursigi, lalo na kung nagkakaisa.
| via Ray Jezrel G. Centurion, Jeremel Decierdo, Kian Blancia, The Technopacer - Talisay