Kalambuan News, RP Sogod Pacific Area

09/03/2023

TAN-AWA | Hiniusang nagpahigayon og site inspection ang buhatan sa Department of Agriculture- Philippine Coconut Authority, 2nd District sa Southern Leyte ug Southern Leyte State University sa posibleng tukuran sa Coconut Seed Farm, karong adlawa, Marso 9.

| via Aljon P. Malot, RP Sogod

09/03/2023

TAN-AWA | Giparmahan sa Department of Agriculture - Philippine Coconut Authority ug Southern Leyte State University ang usa ka Memorandum of Agreement (MOA) nga nagtinguha sa pagtukod og Coconut Seed Farm karong adlawa, Marso 9.

Gisaksihan ang maong pinirmahay ni Congressman Christopherson Yap ug sa mga Mayor sa 2nd District sa Southern Leyte.

Nasayran nga kini agig tubag sa hangyo ni Honorable Yap sa nasudnong kagamhanan nga tabangan ang industriya sa lubi sa probinsya human gikuso-kuso sa nakalabay nga bagyong Odette. via Aljon P. Malot | RP1 Sogod

04/03/2023

PRODUKSIYON SA ABACA SA SOUTHERN LEYTE SA 2022, NIKUNHOD

Niubos ang produksiyon sa abaca sa Southern Leyte niadtong 2022.

Sa report sa Philippine Industry Development Authority kon PHilFIDA, narekord sa probinsya ang 629.42 metric tons nga produksiyon sa abaca sa milabay nga tuig.

Kini mas ubos og 15.37 porsyento kung itandi sa kinatibuk-ang produksyon niadtong 2021.

Gilambigit sa PHilFIDA ang maong pagkunhod sa nahitabong bagyong Odette sa Southern Leyte nga nagbilin og labing kadaot sa natad sa agrikultura.

Dugang pa, nakatampo usab sa pag-us-os sa produksyon sa abaca ang bunchy-top disease, nga matod pa, niigo sa probinsya ug sa kinatibuk-ang rehiyon 8 sukad pa sa sayong bahin sa tuig 2000.

Namatikdan usab ang hinay nga pagpalapad sa mga lugar nga gitamnan og abaca tungod sa limitado nga planting materials, ingon man ang pagkunhod sa presyo sa mga low-grade abaca fibers.

Hinuon bisan pa man sa pagkunhod, giila ang Southern Leyte isip ikatulo sa top-producing province sa abaca sa rehiyon.

01/03/2023

MGA JOB ORDERS, CONTRACTUAL WORKERS SA LGU SILAGO, SOUTHERN LEYTE SAKOP NA SA SSS

Masakop na sa Social Security System kon SSS ang mga job order ug contractual worker sa lokal nga panggamhanan sa Silago, Southern Leyte.

Kini human mipirma ang LGU Silago sa panguna ni Municipal Mayor Lemuel Honor ug SSS Maasin Branch og Memorandum of Agreement nga maghatag ug social protection sa mga trabahante sa lokal nga kagamhanan ubos sa KaltaSSS Collect Program niadtong Pebrero 27.

Nasayran nga ang KaltaSSS-Collect Program nagtanyag og automatic salary-deduction scheme, diin ang lokal nga panggamhanan ang responsible sa pag-remit sa binuwan nga kontribusyon sa SSS sa mga JO ug contractual worker nga marehistro isip self-employed nga myembro.

Niini, ang JO ug ang mga kontraktwal nga trabahante sa LGU Silago mahimo nang makatagamtam sa social security protection, lakip na ang sickness, maternity, disability, unemployment, death ug funeral benefits.

Mamahimo ba usab sila makapahimulos sa mga pribilehiyo sa loan, sama sa salary, calamity, educational loan assistance, housing ug uban pa.

27/02/2023

44 KA ATLETA SA HINUNANGAN DISTRICT I MAKIGTIGI SA EVRAA MEET 2023

Makigtigi ang 44 ka mga atleta sa Hinunangan District I sa umaabot nga Eastern Visayas Regional Athletic Association kon EVRAA Meet 2023.

Kini human gipokan ang ilang kontra ug nasakmit ang bulawang medalya sa gipahigayong Palarong Panlalawigan 2023 niadtong Pebrero 25-26 sa lungsod sa Hinunangan, Southern Leyte.

Sa taho ni Hinunangan District 1 Sports Coordinator Windel Burila, lakip sa gidominar sa nasangpit nga distrito ang Men's Volleyball Elementary; Men's Baseball Elementary; Sepak Takraw; ug Men's Badminton Secondary.

Bitbiton usab ang bandera sa Southern Division "Whale Sharks" sa rehiyonal nga kompetisyon ni Ejey Biñas alang sa Men's Chess Secondary; Marjolyn Cotamora sa Women's Chess Secondary; Jericho Ruiz alang sa High Jump; Jeafel Lompot sa Taekwondo Finweight Secondary; ug Elpedio Pega III alang sa Tennis Secondary Single A.

Mahinumduman nga nitigbabaw nga daog ang Integrated Area Development kon IAD 4 sa probinsyal meet, diin lakip ang Hinunangan District, human mibulsa og 80 ka bulawan, 39 ka silver, ug 26 ka bronze medals sulod sa duha ka adlaw nga paugnat sa kusog.

Sa inisyal nga taho, himuon ang EVRAA Meet karong umaabot nga buwan sa Abril.

25/02/2023

BREAKING NEWS | 2,000 pesos nga cash incentive ang naghuwat sa mga atleta sa Integrated Area Development (IAD) 4 nga makasakmit og bulawang medalya sa Palarong Panlalawigan 2023.

Mao kini ang gipasalig ni Hinunangan Sangguniang Bayan Member Hon. Ymard Joseph Tocmo.

Gilangkoban ang IAD 4 sa mga Distrito sa Silago, Hinunangan I ug II, Hinundayan, Anahawan, San Juan, ug St. Bernard I ug II.

| via Aljon P. Malot, RP Sogod

25/02/2023

23/02/2023

JUST IN | Gideklarar ni Presidente Ferdinand Marcos Jr ang Pebrero 24, 2023 nga special non-working holiday. Kini agig pagsaulog sa anibersaryo sa EDSA People Power Revolution karong Pebrero 25 nga maatol sa Sabado.

22/02/2023

13 KA BAG-ONG SUNDALO SA SOUTHERN LEYTE LAKIP SA MGA NAKAHUMAN SA MILITARY TRAINING SA 8ID

Anaa sa 13 ka mga bag-ong sundalo sa Southern Leyte ang lakip sa giabiabi sa 8th Infantry "Stormtroopers" Division, Philippine Army human makompleto ang ilang basic military training sa Camp Eugenio Daza sa Hinabangan, Samar niadtong Pebrero 20 niining tuiga.

Nasayran nga ang mga bag-ong sundalo gipaubos sa pagbansay sulod sa unom ka buwan sukad niadtong Hulyo 18, 2022.

Uban sa mga sundalo sa Southern Leyte ang laing pang 551 ka sundalo nga migraduwar sa Candidate Soldier Course Classes 736, 737, 738, ug 739-2022.

Sa iyang mensahe, gidayeg ni Major General Camilo Ligayo, Commander sa 8th Infantry Division, ang mga bag-ong miyembro sa militar sa pagbuntog sa mga hagit nga kabahin sa proseso sa pag-umol ug pag-andam kanila nga mahimong mas maalamon ug mas lig-on, nga gikinahanglan sa pagsugod nila sa ilang panaw sa pagserbisyo sa nasud .

Nagpasalamat usab si Maj Gen. Ligayo sa mga ginikanan sa bag-ong tropa sa pagtugyan sa ilang mga anak nga moalagad sa nasod isip bag-ong mga sundalo.

Motabang ang mga bag-ong sundalo sa pakigbatok sa insurhensya ug pagdala sa kalinaw sa tibuok rehiyon pinaagi sa pagserbisyo sa nagkalain-laing batalyon ug yunit sa kasundalohan sa tibuok Eastern Visayas.

21/02/2023

PROGRAMA BATOK TEENAGE PREGNANCY SA SOUTHERN LEYTE, GILUSAD

Nagtigum ang mga opisyal sa gobyerno sa Pilipinas, Korea International Cooperation Agency kon KOICA, ug United Nations kon UN alang sa hiniusang paglusad sa usa ka programa batok teenage pregnancy sa nasud partikular sa probinsya sa Southern Leyte ug Samar niadtong Pebrero 20 sa Summit Hotel sa dakbayan sa Tacloban.

Nasayran nga ang maong programa gipunduhan sa Republic of Korea pinaagi sa KOICA diin tumong niini ang pagpalambo sa access sa mga kabatan-onan sa serbisyo ug impormasyon nga adunay kalabotan sa sexual and reproductive health kon SRH.

Lakip usab sa mga paningkamot sa programa ang paghatag og dugang pagbansay alang sa mga health worker ug non-health service providers sama sa mga social worker, magtutudlo ug peer educators; ug paghatag og mobile medical facilities sa probinsya aron makabenepisyo ang mga batan-on.

Gitinguha usab niini nga mapalapdan ang PhilHealth package alang sa mga batan-on nga magmabdos; ug suportahan ang pagpatuman sa Performance Accountability System ug Youth Leadership and Governance initiative sa matag lokal nga panggamhanan.

Pagapangunahan ang komitiba sa naasoy programa sa Department of Health kon DOH uban ni UN Resident Coordinator Gustavo Gonzalez isip co-chair.

Miyembro usab ang mga ahensya sa UN, KOICA, Department of Education kon DepEd, ug ang mga gobernador sa Samar ug Southern Leyte.

Samtang, makigtambayayong ang komitiba sa ubang strategic government partners nga magsilbing advisory members nga naglakip sa Department of the Interior and Local Government; Department of Social Welfare and Development, ug ang National Youth Commission.

Mahinumduman nga niadtong Nobyembre 2022, pormal nga mipirma ang KOICA, United Nations Population Fund, United Nations Children’s Funds, ug ang World Health Organization sa maong kasabutan sa hiniusang programa, nga gitakdang molungtad hangtod 2026.

21/02/2023

PROPESOR SA HINUNANGAN CAMPUS GIILA NGA TOP-CITED SCIENTIST SA KINATIBUK-ANG SLSU

Subling napamatud-an sa usa ka propesor sa Southern Leyte State University kon SLSU Hinunangan Campus ang iyang kahanas sa natad sa pagpanuki-duki human giila isip top-cited scientist sa kinatibuk-ang SLSU.

Nailhan si Dr. Ian A. Navarrete, Propesor sa Environmental Soil Science ug kasamtang pangu sa Research, Innovation and Extension Services sa Hinunangan Campus, sa iyang labing gisitar nga papel kabahin sa polusyon sa parmasyutiko sa mga suba sa kalibotan nga anaa sa Proceedings of the National Academy of Sciences of the United States of America.

Nasayran nga si Dr. Navarette usa ka multi-awarded international soil ug environmental scientist nga nakadaog sa Asian Science Diplomats Award 2021 alang sa iyang talagsaong mga panuki-duki ug mga programa nga nagtubag sa mga problema sa kinaiyahan.

Gitaho nga anaa sa 80 ka mga publikasyon ang nahimo ni Dr. Navarette diin pipila niini pinaagi sa pakigtambayayong sa mga internasyonal nga tigpanuki-duki gikan sa Indonesia, Japan, ug uban pang nasud sa Asya.

Matod pa, napili si Dr. Navarette isip top-cited scientist sa SLSU pinasubay sa AD Scientific Index.

Ang AD Scientific Index usa ka sistema sa pagranggo base sa scientific performance ug uban pang siyentipikanhong produktibidad sa tigpanuki-duki.

Samtang gisundan si Dr. Navarette isip most-cited scientist sa SLSU nila Vice President for Students and Auxiliary Services Dr. Dewoowoogen P. Baclayon; Director sa Knowledge and Technology Transfer Office Dr. Mary Ann Jilly Ramirez; ug Propesor sa Tomas Oppus Campus Dr. Joey Caraquil.

📷 Ian Navarette

18/02/2023

SAINT BERNARD UPDATE |

KASUMARAN SA NAHITABONG LANDSLIDE SA SAINT BERNARD HINIUSANG GIHINUMDUMAN; TABANG SA GOBYERNO GIHATAGAN OG GIMBUG-ATON

| via Ria Micate, RP Sogod

18/02/2023

SOUTHERN LEYTE GIPAUBOS SA GALE WARNING; GAGMAY'NG SAKAYAN GITAMBAGAN SA DILI PAGLAWOD

Gipaigmat sa PAG-ASA ug Philippine Coast Guard ang publiko ilabina ang mga mananagat subay sa daot nga panahon nga epekto sa Low Pressure Area ug Northeast Monsoon.

Sa gipagawas nga advisory sa buhatan karong adlawa, Pebrero 18, sa alas 5:00 sa buntag, gipaubos sa gale warning ang Southern Leyte tungod sa kusog nga uros sa hangin hinungdan nga baluron ang kadagatan.

Ngani, gitaho sa PAG-ASA nga posibleng masinati ang 2.8 ngadto sa 5.5 metros nga gitas-on sa bawod.

Nunot niini, gitambagan ang mga mananagat ilabina sa mga gagmay nga sakayan nga dili usa mulawod aron malikayan ang disgrasya.

18/02/2023

TEENAGE PREGNANCY SA EASTERN VISAYAS NIKUNHOD SA TUIG 2022

Mikunhod ang teenage pregnancy o ang pagmabdos sa mga bata nga nag-edad og 15 ngadto sa 19 anyos sa Eastern Visayas base sa 2022 National Health and Demographic Survey (NDHS).

Matod sa Commission on Population and Development kon PopCom, nius-os kini ngadto sa 4.9 porsyento sa miaging tuig gikan sa 6.9 porsyento nga narekord niadtong 2017.

Sa gihimong press briefing sa PopCom niadtong Pebrero 16 atol sa ilang ika-54 ka tuig nga anibersaryo, si PopCom Eastern Visayas regional director Elnora Pulma nibutyag nga labing taas nga porsyento sa mga kaso o 13 porsyento ang narekord sa mga babaye nga nag-edad og 19 anyos.

Samtang kinaubsan nga porsiyento sa mga babayeng nanganak anaa sa 16-anyos sa 1.7 porsiyento.

Matodni Pulma, ang pagkunhod sa teenage pregnancy sa rehiyon mahimong tungod sa limitado nga interaksyon sa mga kabatan-onan sa mga pagdili sa pandemya.

Apan gidugang sa direktor nga bisan pa sa pagkunhod, nagpabilin kining taas ug ilang gitungha ang zero teenage pregnancy sa rehiyon.

Mahinumduman nga una nang nanawagan ang PopCom sa tanang hingtungdan nga ahensya sa paghimo og mga lakang aron mapugngan ang teenage pregnancy.

17/02/2023

TAN-AWA | Luwas nga napadpad sa San Pedro Island, Hinunangan, Southern Leyte karong gabie, Pebrero 17, ang usa ka manangat nga taga Barangay 3, Giporlos, Eastern Samar.

Giila ang mananagat nga si Rodrigo Valdemoro Ortillada, 42 anyos, kinsang gikataho sa mga otoridad sa Giporlos nga na missing sukad pa niadtong Pebrero 15.

| via Aljon Malot, RP Sogod

📷 Jun Sinahon Bungal Jr.

17/02/2023

KAPIN 400 KA PANIMALAY SA HINUNANGAN, GIPAUBOS SA EBALWASYON ALANG SA 4Ps

Nagpadayon ang gihimong ebalwasyon sa mga panimalay sa lungsod sa Hinunangan, Southern Leyte kinsang potensyal nga mamahimong bag-ong benepisyaryo sa Pantawid Pamilya Pilipino Program kon 4Ps sa Department of Social Welfare and Development kon DSWD.

Nasayran sa Radyo Pilipinas sa pagpakighinabi kang DSWD Municipal Link Janice Arceo nga anaa sa 404 ka mga panimalay ang kasamtangang hugot nila nga gisusi kung kuwalipikado isip benepisyaryo sa 4Ps.

Gipadayag ni Arceo nga aron mapili ang usa ka panimalay, gikinahanglan nga adunay 0-18 anyos nga miyembro. Gikinahanglan usab nga ang panimalay kasamtangang nagpuyo sa lungsod ug labaw sa tanan, mouyon sa pagsunod sa ilang katungdanan o responsibilidad isip benepisyaryo sa 4Ps.

Giklaro usab niya nga ang mga nalakip sa listahan wala gipili pinaagi sa aplikasyon apan pinasubay sa Republic Act 11310 partikular ang Section 5 ug 6 nga nagmando nga kinahanglan ang panimalay lakip sa mga gikonsiderar nga kabus o “poor” nga miagi sa pagtuki nga gihimo sa National Household Targeting System for Poverty Reduction o Listahan.

Kasamtangan, adunay 1,478 nga benepisyaryo sa 4Ps sa lungsod sa Hinunangan.

Mahinumduman nga gitinguha sa DSWD Eastern Visayas nga malakip ang kapin 73 mil ka benepisyaryo sa 4Ps alang sa karon nga tuig.

Kini aron ihulip sa mga migraduwar na sa nasangpit nga programa human wala nay sakop nga nag-edad 0 hangtod 18 anyos ug sa mga nakakab-ot na sa level 3 o giila nga self-sufficient level.