18/07/2025
πππ‘ππ¨π π¦ππ‘π ππ§π π‘ππ π ππ‘πππ‘ πππ π¦ πππ£ππ§ππ ππ‘π πͺπ©, π¦ππ₯ππ‘π π‘ππ π ππππ-π’π§ π¦π¨π‘π’ π¦π π£ππ‘π¨π‘π’ π¦ππ‘π ππ£π’ ππ’π π£ππ‘π¬
Nagapati ang pinuno sang Business Process Outsourcing (BPO) company sa Iloilo City nga sarang nga malab-ot ang handum sang Department of Trade and Industry Western Visayas (DTI) nga mangin Healthcare Information Management Sector (HIMS) Capital of the World ang rehiyon.
Kadungan sang inagurasyon sang ila bag-o nga site sa distrito sang Mandurriao, ginpabutyag ni Nicki Agcaoili, Chief Country Executive sang Carelon Global Solutions Philippines, nga indi imposible nga mahatagan katumanan ang ginkabig ambitious target sang DTI sa Kabisay-an Nakatungdan.
Suno kay Agcaoili, ini bangud nga ang rehiyon partikular na ang Iloilo ang bugana sa talento, availability sang mga unibersidad, kag ang kasulhay sang pagnegosyo sa syudad.
Paathag sang CapizeΓ±o nga pinuno sang BPO, kon ikumpara sa iban nga area sang pungsod, mas manami ang performance nga nagahalin sa Iloilo partikular na ang passion kag compassion sang mga Ilonggo.
Dugang pa niya, talalupangdun ang kadamuon sang unibersidad sa Iloilo City nga nagatanyag sang mga kurso malapit sa healthcare space rason nga madamo man sang nagakapatubas nga mga propesyonal.
Gintumod man ni Agcaoili ang kaimportansya sang ease of doing business ukon ang kasulhay sang pagnegosyo sa Iloilo City.
Malipayon nga ginpaambit ni Agcaoili nga makaligad ang halos pito ka tuig humalin sang nagsugod ang ila operasyon sa Iloilo, linibo na ang nahatagan nila sang trabaho kag 4,500 diri ang aktibo nila nga empleyado.
Dugang pa niya, sa pagbukas sang ila bag-o nga opisina sa duha ka panalgan sa SM Strata, posible nga magsobra pa sa 5,000 ang mahatagan nila sang obra.
Kadungan sang pagtanyag sang mas madamo nga trabaho sa komunidad, padayon man ang koordinasyon sang kompanya sa mga lokal nga pamunuan para pabaskugon ang talento kag abilidad sang mga luyag mangin kabahin sang industriya.
Ginpaambit sang kompanya nga sa idalum sang ila Project CARE, isa ka programa nga nagahanas sang mga senior citizen kag persons with disability, lima sa 11 nila ka graduate ang padayon nga nagatrabaho sa ila.
Kasunod sang tanan nga pagtinguha sang kompanya, ini ang ginkilala karon nga tuig sang Great Place to Work bilang 9th Best Workplace in the Philippines.
Sang nagligad nga tuig, ginpadunggan man ini sang Healthcare Information Management Association of the Philippines, Inc. (HIMAP) sa kategoriya sang Kaunlaran (Business Growth) kag Pinuno (Leadership Excellence).| JP Hervas, RP1
