21/12/2023
TI BASEBALL, KAS ITI PANNAKIDAYA
Sarita ni Joel B. Manuel
Kas Pananggutigot ni Eric B. Aguilar
KELLAAT nga immalsem ti rupa ni PSDS Ryan iti dayta a nakitana. Iti maysa a suli, napintas ti panagtakder dagiti baseball players ni Mistro Rovin a mangsipsiput iti panangrugi ti puni ti agpabunar a balikbayan.
“An’a met ti kaaddada ditoy dagita, ikit?” inkissiimna ken ni Prinsipala Aileen. “Di met kompleto ti finances ti kanenda nga ag-training aya? An’a lat’ serserbinan di impaibudgettayo dita Local School Board, ikit?”
“Wen ita, numona ta nakaunipormeda pay, dida ketdi pudoten a kunam,” insungbat ni Prinsipala Aileen. Medio namustreng a puraw nga adda babassit nga unsoyna a berde ti uniporme dagiti baseball players. Naka-tuck-in dagiti jersey-da, dumanon iti tumeng ti baseball socks-da. Nakakipisda iti Cadugolan ES Alimukens.
“Diak magustuan ti kastoy a tabasda, ikit!” insariwagwag ni PSDS Ryan. “Paayabamto man dayta a Mistro Rovin didiay office ta pakagatak iti sao! Umayda makipangpangan imbes a rest hour-da?”
“Kitaem a, angkel, nagkukuttongda ngaminen, mabisbisisinandan san,” indillaw met ni Prinsipala Aileen.
Nakita ni Mistro Rovin dagiti dua a dadauluen dagiti eskuelaan ket nagdusngiit sa nagpakallid, inamuyna pay ti patayok a buok iti nawada a mugingna. Tinaldiapanna dagiti baseball players-na.
“Adda dagiti mananakem,” imballaagna. Lininteg dagiti baseball players ti takderda ken sinayaatda ti liniada. Awan timtimekda.
Idi kuan, simmangpet ti nangisit a Nissan Terra ni Mayor Kristofer ti Agbannawag.
“Uhmm, an’atta, addan mayoren!” imbiragsot ni PSDS Ryan. “Makitana dagita baseball-tayo, data ti pagdidillawanna, ikit!” immirugrogna.
“Isutta nay!” inyayon ni Prinsipala Aileen a dina ammo no sumalipengpeng iti likud ni PSDS Ryan wenno sumpok iti kapuskolan ti tao.
Dimsaag ni Mayor Kristofer ket nakitana da Mistro Rovin. Kunam met no militar dagiti baseball players, naggigiddanda a nangikkat kadagiti kipisda, impátayda dagitoy kadagiti kannigid a barukongda sada nagkumbawa iti mayor.
Immisem ni Mayor Kristofer, napanna dinaras a pinikpik ti abaga ni Mistro Rovin sana tinarapnos a sinaggaysa nga inalamano dagiti baseball players. “Galing a! Disiplinado!” inkatawa ti mayor. “Dapat magkampeon kayo, ha?”
“Sir, yes, sir!” naggigiddan dagiti baseball players a simmungbat.
“Pumaknita koma, ikit, ket no masagangnata,” kinuna ni PSDS Ryan ngem naladawen ta namulagatanen ni Mayor Kristofer ida.
“Oh, Ryan, Aileen, andito kayo gayam? Ayos ba ti training nila?” insungona dagiti baseball players.
“Ayos naman po, sir, nagrerelax lang sila kaya andito sila, sir,” inalimon ni PSDS Ryan ti insungbatna. Ania pay ti kunana no di kasta. Kinusilapanna ni Mistro Rovin ket kimmidday met daytoy.
“Ay, hindi, inimbita ko ngarud sila,” insungbat ni Mayor Kristofer. “Puro na nga training ti ob-obraenda eh, magrelax naman!” kinuna ti mayor. “Paano ti panag-modiul nila?”
“Walang problema, mayor, may pumupunta sa kanilang magtuturo sa breaktime nila,” insalingbat ni Prinsipala Aileen ngem nakitana ni Maam Loreyna a sumungad met nga umay makidaya. Ni Maam Loreyna ti para deliver ken para kolekta iti modiul dagiti baseball players. Adda bitbitna a dakkel a bag a napno siguro iti modiul.
Kinasarita ni Maam Loreyna ni Mistro Rovin. Singsingirenna no apay nga awanda idiay kuartersda idiay Agbannawag Sports Complex ket agmodiulda manipud ala una agingga iti alas tres. Inngiwat daytoy a matalaan kano ti panagibunongna iti modiul.
“Uhmm, daytan, kariri ni Loreynan ni Rovin,” inkissiim ni Prinsipala Aileen ken ni PSDS Ryan.
“Gunggonana a, ta daytanto met makidaydaya ti is-ispiarenna,” imper-ak ni PSDS Ryan.
Nakararagan ti taraon. Narugian ti puni. Naipasobre da PSDS Ryan ken Prinsipala Aileen. Dinanondan ni Mayor Kristofer ken dadduma pay a dadayawen iti uneg.
“Umaykayon, apo sir Ryan ken maam Aileen ket adu’t obrayo dita opisinayo,” kinuna ti agpasken.
“Alam niyo, bilibak sa pagdisiplina ninyo kadaytoy baseball team natin, a,” kinuna ni Mayor Kristofer. “Kanina, nakita ko sila, bigbigat, nag-jogging sa oval, tapos isa-isa kumuha ng sagad, dustpan ken trash bin, immayda naglinis sa Government Center, kasama si Coach Rovin,” kinuna ni Mayor Kristofer.
Nanglapayag da PSDS Ryan ken Prinsipal Aileen.
“Kahapon naman, pininturahan nila dagita bleachers ng sports complex. Matagal ko nang pinapagawa kadagita job order, di met nila obraen.”
Dimmakkel dagiti mulagat ni PSDS Ryan idinto ta ad-adda a simmingkit ken ni Prinsipala Aileen.
“Kunayo ngarud, mayor, anakko ‘diay maysa,” kinuna ti municipal accountant. “Dina pay ammo nga itarimaan ta iddana, idi, ita, maay-ayatanak ta nakadaldalimanek metten, sir,” innayonna pay. “Agsagad payen ken agikkat ti agiw! Manipud idi nangrugi nga ag-baseball, kastan.”
“Kasta? Positive ngarud ti sports sa pagturo ti kinasipag a?” inyisem ti mayor.
“Ay, agpadada ken ni Rey Noelkon, a, sir,” kinuna met ti maysa pay. “Mapan met sumursurot ken amana nga ag-wiring no bakasion. Ur-urnongenna pay ta it-ited ni amana. Ket dayta,kastan idi miembro dita team ti baseball.”
“Ay, child labor dayta!” inkatawa ti mayor. “Ngem maganda pag makasursuro para may electrician manen ti Agbannawag a!” Kiniddayan ni Mayor Kristofer da PSDS Ryan ken Prinsipala Aileen. “Magagaling mga ito, super saludo ako sa kanila,” insungo ni Mayor Kristofer da PSDS Ryan ken Prinsipala Aileen.
Mangrugin a manglapayag ti isem dagiti dua a papanguluen ti eskuelaan.
“Mayat, no positive a pagdevelop ng ugali ti sports, ikadkadakkel ang LSB budget no umay a tawen,” kinuna ni Mayor Kristofer.
“Kadi man, a, sir!” naggiddan pay da PSDS Ryan ken Prinsipala Aileen.
Nalpasen da PSDS Ryan ken Prinsipala Aileen. Idi rummuarda, nadarimusmosanda dagiti kameng ti baseball team a mayat ti panagalikumkomda kadagiti wara a paper plate, plastic a kutsara ken tenedor, plastic cup. Dandani saggaysa ti trash bag dagitoy. Mayat ti panangimando ni Mistro Rovin kadakuada.
“Dikay’ sa met nagbussogen, kaanakan?” kinuna ni PSDS ken ni Mistro Rovin.
“Amman, sir, ngem kas kunak kadakuada, saan nga amin a potahe, rumbeng a ramananda.”
“Naa, apay met? Diyo rinamanan amin? Nagimas ‘tay beefsteak kada dinardaraanda sa,” kinuna ni Prinsipala Aileen.
“Ay, sir, ma’am, kasla baseball ti pannakidaya,” indusngi ni Mistro Rovin sana impisok ti maysa a paper plate iti trash bag. “Saan nga amin nga i-pitch-da, nasken a patitem. Adda strikes, adda balls! Isu a kasta met iti pannakidaya. Saan nga amin a potahe, rumbeng a ramanam. Adda strikes, adda balls!”
“Ne, ket naudi metten ni Burog?” indillaw ni Prinsipala Aileen iti pamussuoten a baseball player nga agal-aliston ti panangibusna iti labayna.
“Ay, kasla met iti baseball ti pannakidaya, sir, ma’am,” kinuna latta ni Mistro Rovin. “Awan ti ag-quit, uray maat-atiwkan. Lumabanka latta agingga a kayam. Di ngamin, Burog?”
Nagtung-ed ti ubing ket impapelnan ti maudi a kammet iti labayna. Timmakder a timmulong a nagalikunkon.
“Fight to the finish, win or lose,” inkatawa ni Mistro Rovin.
Naginnapir da PSDS Ryan ken ni Prinsipala Aileen. Agay-ayek-ekda a timmulong kada Mistro Rovin ken dagiti baseball players nga agipakpakni pay laeng kadagiti napanawan lattan a nanganan. #
Nabulod ti ladawan iti
https://www.wbsc.org/en/news/no-23-philippines-win-east-asia-cup-qualify-for-asia-championship-in-september