05/10/2024
FLAG RETREAT
Sarigilap ni Joel B. Manuel
ALAS KUATRO MEDIA. Immaweng ti nabannayat a pannakabatingting ti ag-100 a tawen a kampana ti Quintin Factora Memorial Elementary School a mangipakdaar iti flag retreat. Biernes, Oktubre 4, 2047. World Teachers Day iti kabigatanna.
Aglaladut, impisok ni Prinsipal Revon Pascua ti nameplate ti lamisaanna iti gym bag a dandanin mapno kadagiti memorabiliana kas nangipangulo iti pagadalan. Eksakto, inton kasangayna inton Lunes, saanen nga agsubli ditoy nga eskuelaan, agepektonton ti panagretirona. Early retirement iti tawenna a limapulo ket innem.
In-zipper-na ti bag.
“Please be reminded to keep everything in order before you leave,” kinuna ni Alexa School, ti school AI-generated voice, ket ammo ni Prinsipal Revon a nangngeg dagiti kakaduana a mannursuro dayta kadagiti awan matatao a klasrum-da.
Binagkat ni Prinsipal Revon ti bag, iniddepna ti silaw (nga ammona a no saanna a maiddep, iddepento ni Alexa) ket nagsao: “Makaammokan, darling! Pangngaasim, dimo baybay-an, wen?”. Sa naglayonen iti pasilio. Natimudna ti sungbat: “No worries, Mr. Pascua!”
Nakitana metten dagiti kakaduana a mannursuro a nagruruar kadagiti klasrumda.
Ngem saan a kas kadagiti flag retreat sumagmamano a tawenen ti napalabas a kaduada dagiti magagaran nga agawid nga ubbing, saan ita. Awan dagiti ubbing, uray maysa kadakuada. Kas itay, nag-Teachers’ Day-da nga is-isuda. Awan dagiti ubbing nupay adda dagiti ubbing a nagmensahe kadakuada iti “Happy World Teachers’ Day, ma’am!”
Awanen dagiti ubbing. Saandan a sumsumrek kadagiti pagadalan. Itay pay napan a tawen. Maigapu daytoy ken ni Alexa Scholar, ti AI software a kinontrata ti DepEd a mangisuro kadagiti ubbing. Agtalinaeden dagiti ubbing kadagiti balbalayda. Ageskuelada babaen iti Alexa Scholar.
“Ala, Miss Madel, please lead,” kinuna ni Prinsipal Revon iti kaubingan a mannursurona idi nakaliniadan iti artificial grass ti quadrangle. Kinantada ti “Ang Bayan Ko” a sibabannayat kabayatan ti nainayad met a panangipababa da Manong Floring a guardia ken ni Nana Duarda utility iti bandera.
Anianto ngata ti masakbayan dagiti mannursuro a kakaduana? Sumagmamanon kadagitoy ti immunan a pimmanaw iti DepEd. Nupay adu kadagiti ubbing ti inagsep ti Departamento a mangpataray iti Alexa Scholar, adun kadagitoy ti naallukoy iti diaya ti Departamento a separation benefit – tapno makapangrugida manen iti sabali a propesion wenno pagsapulan.
Uray ni Prinsipal Revon – itay napan a tawen, nangipasdek iti bakery – wen, daytanto metten ti obrana, agisagana kadagiti mayurno a tinapay ken cookies. Aglako iti bakery. Magustuan metten dagiti parokianona dagiti ar-aramidenda a tinapay, pandesal, rolls ken cookies. Patienna a saan a masagid ti Alexa Group ti panagaramid iti tinapay a kas iti namay-anna iti edukasion.
Naggibusen ti kantada.
Immasideg dagiti mannursurona kenkuana.
“Apo, uray um-umaykanto latta koma met a, sir,” inyumbi ni Yolly a mannursuro iti Grado Sais.
“Wen, nag-boring, sir!” immirugrog ni Donnie a floating teacher. “Awan la ngarud, ubbingen, awan pay prinsipalmin.”
Co-terminus ti posision ti prinsipal. No agretiron daytoy, saanen a masuktan. Kinaagpaysona, co-terminus aminen a teaching position. Itay met laeng napan a tawen dayta a polisia.
“Nagbusor dayta nga Alexa Scholar, kunak la no lumag-an la ti panangisuro, napannatay’ ketdin pinadisi!” impauyo ni Melinda a Master Teacher II.
“Kellaat met latta ngaminen,” insungbat ni Prinsipal Revon. “Addatayon iti super modern era. Ultimo amin a balay, adda Alexa Home AI-na. Amin a lugan, adda ni Alexa AI-na.”
“Sumarunokam’ kenkan, sir,” kinuna ni Margarette a Teacher 7. “I-grab-ko metten dayta early separation, sir.”
“Wen, ania ngamin ti kukuentayo?” insagpaw ni Troy. “Teacher-tayo laeng no adda pupils-tayo. No awan, saantayon a teacher.”
Inyawat ni Nana Duarda ti bandera ken ni Principal Revon. “Happy retirement lattan, sir!” inyisem daytoy. Kiniddawna ngamin nga alaenna ti bandera ti eskuelaan a kas memorabiliana.
Nagpayapay ni Prinsipal Revon kadagiti mapan metten lumugan a kakaduana. Tinurongna ti EV a luganna. Naglukaten daytoy. Nakaandar payen.
“Where to, sir?” dinamag ni Alexa Drive, ti AI ti kotse.
“Leave me alone!” naibugkaw ni Prinsipal Revon sa sinagidna ti Disable Alexa Drive nga icon. Nagulimek ti AI ket nagiddep ti agtaraytaray a cabin light iti panel ti kotse.
Alas singkon. Ginemgeman ni Prinsipal Revon ti manibela. Impakatna iti manual ti autodrive a kotse ket inturongnan iti gate. #
Nabulod ti ladawan iti https://www.facebook.com/ARMYCMOSCHOOL/posts/cmo-school-observes-flag-retreat-ceremonyflag-retreats-in-the-army-signals-the-e/2393999850656834/
