PEACE YOWWπͺβοΈπ
25/12/2024
LALAKING MIBALIBAD SA PAGHATAG SA IYANG PAYSLIP SA 13TH MONTH PAY, GITIGBAS SA KAIPON!
Nagkaratil nga nagpakitabang ngadto sa Mabolo Police Station, sa Cebu City ang usa ka lalaki, human matud pa kining gitigbas sa iyang kaipon nga babaye, kagahapong adlawa.
Sa nahimong pag-asoy sa biktima, hubog matud ang babaye sa dihang gipangitaan kini sa iyang payslip aron tan-awon ang kantidad sa nadawat niining 13th month pay.
Apan, nagmagahi matud pa siya nga ipatan-aw ang nahimong agi niya sa trabaho, hinungdan aron nasuko usab ang babaye, kung asa gilayon kining mikuha og pangtadtad nga pinuti, dayun gitigbas ang biktima.
Wala pa makontento ang babaye, giingong mikuha pa kini og gabas dayung largo nga gihapak sa nawong sa biktima.
Dugang pa sa wala na hinganling lalaki nga natingala matud pa ang iyang kaipon kabahin sa nakuha niyang kwarta, rason aron namugos ang suspek nga tan-awon niini ang iyang payslip.
Gani, giangkon gayud sa biktima nga nakuhaan na ang nadawat niya nga kwarta, gumikan sa gipangpalitan pa usab niya og mga gamit ang ilang lima ka anak.
Ingon man, naanad na matud pa kini nga kanunay na lamang siyang dagmalan sa iyang kaipon sa matag higayon nga sila maglalis ug mahubog kini.
