11/05/2023
मितिः २०८०।०१।२८
प्रेस विज्ञप्ति
सुनसरीको धरान उपमहानगरपालिकाका नगर प्रमुख हर्कराज राई (हर्क साम्पाङ) ले आफ्नो आलोचना गरेको भन्दै सञ्चारकर्मी र सञ्चारमाध्यम लक्षित अमर्यादित, अशोभनीय र गालीगलौजपूर्ण भाषामा लगातार धाकधम्की दिइरहेको घटनाप्रति नेपाल पत्रकार महासंघ प्रदेश समितिको ध्यानाकर्षण भएको छ ।
स्थानीय सरकारको प्रमुखजस्तो जिम्मेवार व्यक्तिले आफ्ना सबै कामको समर्थन नगरेको र आलोचना गरेको आधारमा पत्रकार तथा सञ्चारमाध्यमलाई गालीगलौज गर्ने, पत्रकारलाई बयान दिन कार्यालय आउनु भन्दै हतोत्साही बनाउने र समर्थकहरु प्रयोग गरि स्थिति भड्काउने गतिबिधि बारम्बार गरिरहेको देखिन्छ । उपमहानगरको उपप्रमुखसहित कार्यपालिकाका सम्पूर्ण सदस्यहरुले राईलाई आफ्नो रवैयामा सुधार गर्न आग्रह गरिरहेको अवस्थामा उनले अझैं उग्र र अराजक रुपमा प्रस्तुत भएर प्रेस तथा अभिव्यक्ति स्वतन्त्रता विरोधी अराजक, अमर्यादित र गैरजिम्मेवार गतिविधि गरिरहेको स्पष्ट छ ।
श्रृंखलाबद्ध रूपमा पत्रकार र सञ्चार माध्यममाथिको दुव्र्यवहार र धम्कीपूर्ण अभिव्यक्तिले असुरक्षाको अवस्था पैदा भएको भन्दै नेपाल पत्रकार महासंघ सुनसरीले निजको ध्यानाकर्षण गराउँदा पनि अटेर गरेको देखिएको छ । प्रेस तथा अभिव्यक्ति स्वतन्त्रताको प्रयोग गर्दै राज्यका जिम्मेवार निकायका कमजोरी उजागर गर्दै सुधारको लागि खबरदारी गर्नु र नागरिकलाई सुसुचित गर्नु पत्रकार तथा सञ्चार माध्यमको कर्तब्य नै हो । त्यसबाट पत्रकारहरुलाई बिमुख बनाउने उपमहानगर प्रमुख राईको कार्य निन्दनीय र भत्र्सनायोग्य छ ।
समाचारको विषयमा चित्त नबुझेमा त्यसको कानुनी उपचार खोज्ने स्थापित मान्यता र बिधि जो कोहीले प्रयोग गर्नसक्छ । हामी त्यसको स्वागत गर्दछौं । तर, त्यसविपरित गतिबिधि राज्यको जिम्मेवार तहमा बसेको व्यक्तिबाट हुनु आपत्तीजनक छ । नेपाल पत्रकार महासंघ प्रदेश समिति उपमहानगर प्रमुख राईलाई आफ्ना कमजोरी सच्याउन, पत्रकार तथा सञ्चार माध्यम विरुद्धको अराजक अभिव्यक्ति र गतिबिधि बन्द गर्न एवं प्रेस तथा अभिव्यक्ति स्वतन्त्रताप्रति प्रतिबद्ध रहन सचेत गराउँदछ । साथै पत्रकारहरुलाई स्वतन्त्र रुपमा पत्रकारिता गर्ने वातावरण बनाई असुरक्षाको अवस्था अन्त्य गर्न सरकार तथा स्थानीय प्रशासनको ध्यानाकर्षण गराउँदछौं ।
विवेक गौतम
महासचिब
