27/06/2024
माडी, चितवन । चितवन क्षेत्र नं. ३ का प्रतिनिधिसभा सदस्य (सांसद) बिक्रम पाण्डेले माडी क्षेत्रमा बाढीले गरेको क्षतीबारे सदनमार्फत सरकारको ध्यानाकर्षण गराउनुभएको छ ।
विहीबार, प्रतिनिधिसभामा बोल्दै पूर्वमन्त्री एवं राप्रपा उपाध्यक्ष समेत रहनुभएका पाण्डेले बाढीका कारण माडी-५, छरछरे निवासी रणबहादुर बि.क. बाढीबाट (हालसम्म) बेपत्ता रहेको, कीर्तनपुर आधारभूत विद्यालयमा चट्याङ परी क्षती भएको र घाँँघर खोलामा बाढीका कारण पोल ढल्दा बिजुली अवरुद्ध भएकोबारे सदनमार्फत सरकारको ध्यानाकर्षण गराउनुभएको हो ।
देशैभर मौसमी विपद्का कारण जनजीवन प्रभावित भएकोप्रति दुःख व्यक्त गर्दै उहाँले पश्चिमी चितवनमा नारायणी र राप्ती नदीले विकराल अवस्था लिएको तथा मुग्लिङ नारायणगढ बाटोमा पहिरोका कारण अवरोध हुने अवस्था रहेको सरकारले समयमै ध्यान दिनुपर्ने बताउनुभयो ।
त्यस्तै, किसानहरुले मल, बीउ, सिंचाई नपाएको तथा बजार व्यवस्थापन राम्रो नरहेको र किसानहरुले भुक्तानी पनि नपाएको उहाँले बताउनुभयो । हाल देशमा हस्पिटलमा बेड नपाउने, स्कुलमा राम्रो शिक्षा नपाउने र स्कुल पास गरेकोले रोजगारी नपाउने अवस्था रहेको उहाँको अभिव्यक्ति थियो ।
--- --- ---
#स्वदेश न्यूज डेस्क
२०८१ असार १३ गते बिहीबार || साँझ ०५:५५ मा प्रकाशित
