15/04/2024
CD-prissentasie ‘LAEVESWAERD’…ein pareltje oet Midde-Limburg
Aafgeloupe zaoterdig höb ich de iërste cd van zien album LAEVESWAERD moge euverhandige aan Jack Schlicher.
In angerhalf jaor tied is d’r oet ein fijne en sjterke samenwerking ein album ôntsjtange mit 12 nummers, die de lien van ‘t laeve volge.
Prachtige tekste, naogenôg allemaol van de handj van Jack, op muzikale arranzjemente, bienao allemaol van de handj van Gerard Janissen van ‘muzieksjtudio ‘t iesveugelke’, zorge veur ein cd vol luusterplezeer en soms get kleine momentjes van naodinke en emotie.
Mer de cd (auch versjene op usb-sjtick) neudigt de luusteraer veural oet ‘t laeve LAEVESWAERD te make.
De zang op dit album is erg sjoon oetgeveurd door Jack Schlicher, ôngersjteund door de twiëde sjtumme van Nicole Klerkx en Harrie Berden en biej ‘t 11e leedje natuurlik door de femielede van de Schlicher-klen.
‘Muzieksjtudio ‘t iesveugelke’ haet hiej mit ôntzettend väöl plezeer en toewijding aan gewèrkt, same mit Guido Athmer (mastering en aafmix), Sjra Engelen (aafwerking drökwerk) en Sebastiaan Schlicher (hoes- en cd-ôntwerp).
Veur winse Jack hiël väöl succes mit dit prachtige en unieke album.
