Nazifi A. Khazimiyyah (2024)

02/12/2021

-WURIDIN SAMUN BIYAN BUƘATA DA GAGGAWA.

-An Samo Daga Imam Husain (as) Daga Manzon Allah (S) Yace: "Ana Karanta Waɗannan Zikirorin Tsawon Kwana 7, Kullum Sau 1000 Domin Samun Biyan Buƙatu.

-A Ranar Asabar Ana Karanta "Ya Hayyu Ya Ƙayyumu" Sau Dubu 1000.

-Ranar Lahadi Ana Karanta "Iyyaka Na'abudu Wa iyyaka Nasta'in" Sau Dubu 1000.

-Ranar Litinin Ana Karanta "Subhanallahi Wal Hamdu Lillahi Sau Dubu 1000.

-Ranar Talata Ana Karanta "Ya Allahu Ya Rahmanu Sau Dubu 1000".

-Ranar Laraba Ana Karanta "Hasbiyallahu Wa Ni'imal Wakil" Sau Dubu 1000.

-Ranar Alhamis Ana Karanta "Ya Gafuru Ya Rahimu"

-Ranar Juma'a Ana Karanta "Ya Zal jalali Wal ikram"

ﻟﻘﻀﺎﺀ ﺟﻤﻴﻊ ﺍﻟﺤﻮﺍﺋﺞ
ﻋﻦ ﺍﻻﻣﺎﻡ ﺍﻟﺤﺴﻴﻦ ﻉ ﺃﻥ ﺭﺳﻮﻝ ﺍﻟﻠﻪ ﺹ
ﻗﺎﻝ ﺗﻘﺮﺃ ﻟﻤﺪﺓ ﺳﺒﻌﺔ ﺃﻳﺎﻡ ﻛﻞ ﻳﻮﻡ ﺃﻟﻒ
ﻣﺮﺓ ﻫﺬﻩ ﺍﻻﺫﻛﺎﺭ ﻋﻠﻰ ﺍﻟﺘﺮﺗﻴﺐ ﺍﻻﺗﻲ ﻳﻮﻡ
ﺍﻟﺴﺒﺖ ﻳﺎﺣﻲ ﻳﺎﻗﻴﻮﻡ ﻳﻮﻡ ﺍﻻﺣﺪ ﺍﻳﺎﻙ ﻧﻌﺒﺪ ﻭﺍﻳﺎﻙ ﻧﺴﺘﻌﻴﻦ ﻳﻮﻡ ﺍﻻﺛﻨﻴﻦ ﺳﺒﺤﺎﻥ ﺍﻟﻠﻪ ﻭﺍﻟﺤﻤﺪ ﻟﻠﻪ ﻳﻮﻡ ﺍﻟﺜﻼﺛﺎﺀ ﻳﺎﺍﻟﻠﻪ ﻳﺎﺭﺣﻤﻦ
ﻳﻮﻡ ﺍﻻﺭﺑﻌﺎﺀ ﺣﺴﺒﻲ ﺍﻟﻠﻪ ﻭﻧﻌﻢ ﺍﻟﻮﻛﻴﻞ
ﻳﻮﻡ ﺍﻟﺨﻤﻴﺲ ﻳﺎﻏﻔﻮﺭ ﻳﺎﺭﺣﻴﻢ
ﻳﻮﻡ ﺍﻟﺠﻤﻌﺔ ﻳﺎﺫﺍ ﺍﻟﺠﻼﻝ ﻭﺍﻻﻛﺮﺍﻡ

-Muhammad Jiddah Nguru
07037009525

27/10/2021

-Maulana Imam Sadik (as) Yace "Wata Rana Manzon Allah (S) Yana Zaune Tare da Sahabbansa Sai Kawai S**a ga Ya Mike Tsaye da Sauri Ya Tarbi Wata Gawa Janaza da Wasu Mutane Hudu 'Yan Habasha S**a Dauko,

-Sai Yace da su "Ku Sauke Gawar a kasa, Bayan Sun Sauke Sai S**a ga Manzan Allah (S) Ya Yaye Fuskar Mamacin, Sannan Ya Cewa Sahabbansa "Wanene Daga Cikin ku Ya San Wannan Mamacin?

-Sai Imam Ali (as) Yace" Nine Ya Rasulallah, ai Wannan Bawan Kabilar Bani Riyah ne. bai Taba Haduwa Da ni ba Face Sai Yace da ni: Wallahi ina Son ka Ya Ali".

-Sai Manzon Allah (S) Yace: Ya Ali! ka Shaida Lallai ba Mai Son ka Sai Mumini Kuma ba Mai Kin ka Sai Kafiri,

-Lallai Wannan Mamacin ga Kabilun Mala'iku Dubu Saba'in Nan Suna Raka Janazarsa, Kuma Kowace Kabila Daya akwai Mala'iku Dubu Saba'in a Cikinsata, Sannan Sai Manzon Allah (S) Ya Kwance Daurin da aka Yiwa Gawar Yayi Mata Wanka Ya yi Mata likkafani Ya yi Mata Sallah Sannan Yace: "Hakika Mala'iku nan Sun Cika Hanyoyi Suna Raka shi,

-kuma an yi Masa Wannan girmamawa ce Saboda Son da Yake yi Maka Ya Ali..!.

-Don Karin Bayani Sai A duba: Littafin Mahasin Shafi Na 150.

11/09/2021

WULAKANTA MUTANE

Daga karatun littafin Khamsuna Darsan Fil Akhlaq, wanda Shaikh Adamu Tsoho Ahmad ya gabatar.

Tahqirun Naas (Wulaqanta Mutane):

Ya kai dan uwa, ka yi hankali, kar ka wulakanta wani daga cikin bayin Allah ko ka kaskantar da shi, domin an ruwaito daga Mafificin Manzonni, mafi soyuwan bayi a wajen ubangijin talikai, yana cewa: “Ubangijina ya yi Isra’I da ni kuma ya min wahayi cewa, duk wanda ya kaskantar da waliyina (mumini) to ya yi dakon yaki ne da ni, wanda kuwa ya yakeni nima zan yake shi.”

A wani hadisin Manzon Allah (S) yana cewa: “Duk wanda ya cutar da mumini ya cutar da ni, duk wanda ya cutar da ni ya cutar da Allah, duk wanda ya cutar da Allah shi tsinanne ne a Attaura da Injila da Zabura da Alqur’ani.”

Idan haka ne, to ba dabi’ar mumini bane wulakanta mutane, face ya girmama dukkaninsu (dukkan mutane ba kawai sai Musulmi ba), musamman ma ma’abota ilimi da falala, da ma’abota tsantseni da taqawa, da tsofaffi, da wanda ya tsufa (gemunsa ya yi furfura) a cikin Musulunci, da zuriya mai albarka na Shugabanni masu daraja tsatson Shugaban talikai Muhammad (S).

Domin Manzon Allah (S) yace: “Duk wanda ya kaskantar da mumini ko mumina, ko ya wulakanta shi saboda talaucinsa, ko saboda karancin abin hannunsa, to Allah zai bayyanar da shi a ranar Alkiyama a kunyata shi sannan a kai shi wuta.”

A wata ruwaya daga Imam Sadiq (AS) yace: “Wanda ya qaskantar da miskini Allah ba zai gushe ba yana wulaqanta shi, har sai ya zo ya dena wulakanta dan uwan nan nasa (miskinin).”

Umurnin Allah da Manzonsa shine mu girmama ‘yan uwanmu. Har ma ya zo a ruwaya Manzon Allah (S) yana cewa: “Bashi tare da mu (ba Musulmi bane) wanda baya girmama na gaba da shi, kuma baya tausayin na kasa da shi.”

A wani Hadisi daga Abu Abdullah (As) daga Manzon Allah (S) yace, Allah Ta’ala yace: “Duk wanda ya wulakanta majibincina, to ya shirya yaki da ni.” Ma’ana wulakanta dan uwanka Mumuni kamar sanarwa da Allah Ta’ala shirinka na yaqar Allah din ne.

Manzon Allah (S) yana cewa, Allah Ta’ala yace: “Hakika ya yi fito-na-fito da ni (Allah) duk wanda ya kaskantar da bawana mumini.”

Imam Baqir (AS) yana cewa: “Lokacin da aka yi Isra’I da Manzon Allah (S), yace Ya Ubangijina, yaya halin mumini yake a wajenka? Sai yace ya Muhammad, duk wanda ya wulakanta min waliyina, to ya yi fito-na-fito ne da ni. Nine kuma mafi gaggawa wajen taimakon waliyaina. Ban taba kai komo ina taraddudi kan wani abu ba, kamar yadda nake taraddudi wajen karbar ran mumini.” Duk wanda yace La’ilaha illallah Muhammadur Rasulallah to shi Ahlin Wilaya ne ga Allah Ta’ala. Wato shine wannan waliyin da wulakanta shi tamkar tsokanar Allah ne.

Don haka ana so muminai su dauki tarbiyar girmama mutane baki daya, musulmi da wadanda ba musulmi ba, kowanne a bashi hakkinsa tare da girmamawa da mutunta shi. Kar ka wulakanta mutum saboda rashin abin duniya ko saboda wani abu da kake tinkaho da shi.

10/09/2021

NESANTAR CIN HARAM

Daga karatun littafin Khamsuna Darsan Fil Akhlaq, wanda Shaikh Adamu Tsoho Ahmad ya gabatar.

Ijtinabil Haram (Nesantar Haram):

Ka nesanci dukiya ta haram, domin dukiyar haram na daga mafi tsanani a cikin dangogin abubuwa masu halakarwa, kuma shine mafi girman abin da ke hana mutum saduwa da rabauta (a wajen Allah Ta’ala).

Mafi yawan mutanen da aka haramta musu ni’imar Allah Ta’ala, an haramta musu ne sakamakon cin dukiyar haram.

Ya zo a ruwaya daga Manzon Allah (S) yana cewa: “Yin Ibada tare da cin haram kamar gini ne a kan rairayi (ko ruwa).” A wani wajen yake cewa: “Barin loma na haram ne mafi soyuwa a wajen Allah fiye da ka yi sallar nafila raka’a dubu.”

Imam Bakir (AS) yana cewa: “Idan mutum ya samu dukiyar haram, ba za a karba masa hajjinsa da umransa da sadar da zumuncinsa ba, face yana barna ne a cikinsu ma.”

Ya zo a babin halal, Allah Ta’ala na cewa: “Suna tambayarka (Ya Rasulallah) mene ne abin da aka halalta musu? Kace musu an halalta muku tsarkakan abubuwa na halal.” Don haka duk abin da mutum zai yi hankoro ya zama yana neman halal ne.

Allah Ta’ala yana cewa: “Ya ku mutane, ku ci daga abin da ke cikin kasa na halal kuma tsarkakakke, kar ku bi tafarkokin shaidan, domin shi makiyi ne a gareku kuma mai bayyanannen gaba.”

Imam Ali (AS) yana cewa: “Na horeka da lizimtar halal, da kuma kyautatawa iyali, da tuna Allah a kowane hali.”

Imam Sadik (As) yake cewa: “Fito-na-fito da takubba (a wfagen yaki) shine mafi sauki daga neman halal.”

Manzon Allah (S) yana cewa: “Baya halatta ga mutum ya ci dukiyar dan uwansa face da amincewarsa.”

Na’am, wace zuciya ce da ta taso a kan cin haram za ta zamo ta samu albarka da alkairi na Allah Ta’ala?

Doh haka ya hau kan duk wanda yake neman tsira ya yi iyakan kokari wajen neman halal, kuma ya katange hannunsa da cikinsa daga abin da yake haram, ya kame su daga dukkan abincin haram, wanda ya kasance sakamakon zalunci da ketare iyaka, da ha’inci a cikin amanoni, da yaudara ko makirci, ko hila, ko kwace, ko sata, ko cin rashawa, ko cin riba, ko abubuwan da suke dangantaka da su. Mutum ya sanya suturar tsantseni da taqawa “Kuma tufafin taqawa shine mafi alkairi” (Suratul A’araf: 26).

An ruwaito hadisi daga mafi daukakan Manzonni Muhammad (S) yace: “Wanda ya ci loma daya na haram ba za a karbi sallolinsa na dare arba’in ba. Kuma Allah ya haramta Aljanna ga jikin da aka ciyar da shi da haram.

A wata ruwaya daga Annabi (S) yana cewa: “Allah yana da wani Mala’ika a Baitul Muqaddas, yana yin kira a kowane dare cewa, duk wanda yaci haram ba za a karba masa wani abu na adalci ba (na nafila ne ko na farilla).”

Manzon Allah (S) yace: “Idan loman haram ya shiga cikin bawa, dukkan Mala’ikun da suke sama za su tsine masa, haka wadanda suke bayan kasa. Ibada tare da cin haram kamar gini ne a kan rairayi.”

An ruwaito daga Shugaban Wasiyai, Amirulumimin (AS) yana cewa: “Allah Ta’ala bai taba hana mutane daga barin wani abu ba, face sai ya wadatar da su daga wannan abin. Tir da abincin da yake na haram.”

Muhimmin abu ne ka san me kake sakawa a cikinka, ko kake sakawa a jikinka, me kake kwana a cikinsa, me kake tafiya a kansa? Ya zama duk wani abu da zai rabeka ka yi kokarin ganin cewa wannan abin halal dinka ne. Ta haka ne ibadarka zai zama karbabbe, kuma ka zama ahalin samun rabon Allah Ta’ala na rahama da alkairinsa.

07/09/2021

KYAUTA

Daga karatun littafin Khamsuna Darsan Fil Akhlaq, wanda Shaikh Adamu Tsoho Ahmad ya gabatar.

As-Sakha’u (Baiwa/Kyauta):

Baiwa (ko Kyauta) shine akasin rowa, baiwa yana daga cikin dabi’u madaukaka, mai baiwa yana soyuwa daga ma’abota sansani da ma’abota samma da kasa.

Falala da fifikon wannan siffa ta kyauta a sarari yake, wanda ke da wannan dabi’ar abin soyuwa ne a wajen Allah Ta’ala da wajen halitta baki daya.

Ya isa daukaka da yabon wannan dabi’a cewa Allah Ta’ala ya siffata kansa da shi. Da yawa sauka da baiwa ta Allah Ta’ala tana sakkowa ga bayinsa daga gareshi a yayin da ya ji bayinsa suna kiransa da cewa ‘Ya Jawadu ya Kareem.’ Wato Ya mai baiwa, ya mai karamci.

Duk wanda ya zamo mai baiwa to ya siffanta da dabi’un Allah Ta’ala, kamar yadda ya zo a ruwaya cewa “Ku siffantu da dabi’un Allah Ta’ala.” To, yana daga siffofin Allah Ta’ala cewa shi mai yawan baiwa ne, ba mai rowa ba. kuma shi mai karamci ne.

An ruwaito daga mafi alkairin Manzonni Annabi Muhammad (S) yana cewa: “Lallai Allah Ta’ala yana son mai baiwa a cikin hakkinsa.”

Ya zo a ruwayar Hadisi Manzon Allah (S) yana cewa: “Aljanna gida ce ta masu baiwa.”

Imam Sadik (AS) ya fadawa sashin wadanda suke tare da shi cewa: “Bana baku labarin wani abu da za ku kusanci Allah da Aljanna daga shi kuma ku nesanci wuta daga shi ba?” Sai s**a ce “Bamu ya dan Manzon Allah (S).” Sai Imam (As) yace musu: “Na horeku ku zama masu yawan kyauta da baiwa.”

Manzon Allah (S) yana cewa: “Ita baiwa bishiya ce da take tsirowa a Aljanna, ba wanda zai shiga Aljanna sai mai baiwa (mai kyauta).”

An ruwaito hadisi daga wasiyin Manzon Allah, Imam Ali Amirulmuminin (AS) yana cewa: “Kyautan Matalauci yana girmama shi, rowan mawadaci kuma yana kaskantar da shi.”

A wani wajen Imam (AS) yake cewa: “Kyautar mutum na sanya soyayyarsa ga wanda suke kishiyantarsa, kuma rowarsa na sa hatta ‘ya’yansa (da ya Haifa) su qi shi).”

Imam (AS) ya kuma cewa: “Kyauta dabi’ar Annabawa ne. Mafi jarumtan mutane shine wanda ya fi su kyauta. Kyauta yabanya ne na hankali, kyauta tana suturta aibobi, kyauta kan janyo soyayya ta kuma qawata dabi’a.”

06/09/2021

KIRA ZUWA GA ADDINI

Jawabin Shaikh Ibraheem Zakzaky (H) a Mu’utamar a garin Gusau, shekarar 2012

MAQASUDIN ZUWANMU GARIN GUSAU

Bismillahir Rahmanir Raheem.

Kamar yadda masu gabatarwa s**a yi bayani cewa makasudin zuwana Gusau don rufe wani taro ne wanda ake ce ma ‘conference’ ko ‘mu’utamar’, ko taron karawa juna sani, wanda sashin ‘yan uwa da suke manyan makarantun gaba da sakandire s**a shirya.

Dama akwai dandalin da ake cewa ‘Academic Forum’ wacce ke kula da daliban manyan makarantu da malamai masu karantarwa a irin wadannan makarantun. To su ne s**a shirya wannan taron wanda s**a fara tun shekaran jiya Alhamis, kuma za su kare gobe (Lahadi). Su ne s**a gayyaceni don na zo na yi jawabin rufe taron nasu.

To, dama irin wannan taron nasu su kan kira shi a garuruwa daban-daban, duk lokacin da muka je kowane gari sai su yi amfani da wannan damar a sadu da mutanen gari (al’ummar musulmi) gaba daya, a gaggaisa da wasu kalmomi ko yaya ne. Wannan shine ya sa ‘yan uwa na Gusau s**a bidi a zo a yi jawabi ga kowa da kowa, kuma aka amsa musu a kan haka nan.

To, gashi lokaci ya yi nisa, ya kamata ya zama muna gab da tashi ne, amma yanzu za mu fara. Saboda haka a gurguje ba tare da daukan dogon lokacinku ba, zan jaddada mana cewa gaskiyar magana ita ce ba wani abu ne sabo zan fada ba. Duk da kamar yadda shi Malam Shu’aibu ya fada cewa rabona da nan garin shekaru 18 ne cur in bai manta ba. Ina jin bai manta ba dama, rabona da nan garin shekara goma sha takwas din ne cur, akalla wanda aka yi wa’azi ga mutane.

YINMU A MUSULMI BABBAR FALALA CE

To, amma abin da zan fada yanzu ba zai bambanta da wanda na fada wancan lokacin ba, da ma wasu lokuta kafin lokacin, kuma haka ma ba zai bambanta ba har nan gaba.

Kalma ce sassauka. Alhamdulillah, muna godiya ga Allah da ya mana baiwar zama musulmi, wanda wannan baiwa ita ce ta fi a kan dukkan baiwowin da Allah Ta’ala ke wa mutum. Na farko, halittar mutum daga rashi baiwa ne, domin da ba a haliccemu ba ma da babu mu. Saboda haka samar da mu daga rashi babban baiwa ce da Allah Ta’ala ya yi mana.

To, akwai baiwan da ya fi wannan. Bayan an samar da kai din, sai Allah Ta’ala ya fifita mu ya yi mu mutane, wanda su ya fifita birbishin sauran halitta (har da mala’iku da Aljannu, ballanta ma tsintsaye, kwari, dabbobi, kifaye a ruwa da sauransu), duk halittun da mutum zai gani, zai ga cewa mutum shine Allah Ta’ala ya fifita birbishin duk halitta.

Hatta a kyawun halitta da Allah ya wa mutum, ya fi kowace halitta kyau, don Dan Adam ba zai ga wata halitta a cikin halittu ya yi burin da ace shine wannan halittar ba komai kyawunsa kuwa. A kan ce Mariri yana da kyau, ko Barewa, amma Dan Adam ba zai ga Mariri yana da kyau yace ina ma shine Mariri ba. Ko kurciya, wacce ita ma aka ce tana da kyau, ko ma Dawisu, wanda yake da ado, Dan Adam ba zai ga Dawisu yace ina ma shine ba. Allah Ta’ala ya fifita Bi’adama birbishin duk sauran halittu. To, wannan babban baiwa ce; aka samar da kai daga rashi, sannan kuma aka yi ka mutum.

To, haka nan kuma wata falala da ta wuce a yi ka mutum shine a yi ka musulmi. Yinka musulmi ya fi a yi ka mutum. Domin kuwa in har ka kasance kai mutum ne amma ba musulmi ba, to gara ma a yi ka ba mutum ba. Gara a yi ka Akuya ka rika Mee, ko da kuwa wani zai sace ka. Akalla dai in ka je gobe kiyama ba wuta ba Aljanna ga akuya, amma shi kuwa mutum, an yi gida biyu dominsa; imma wuta ko Aljanna. To ba wanda zai shiga Aljanna sai musulmi. In ka shafa Aljanna kakakaf kowa da kowa musulmi ne, ba yadda za a yi kafiri ya shiga Aljanna.

Duk wanda ka ganshi a Aljanna musulmi ne, saboda haka a yi ka a musulmi ya fi a yi ka a mutum. Domin in an zo hisabi gobe kiyama, aka wa dabbobi hisabi ana cewa su zama turbaya. Wanda kuma Allah Ta’ala ya bamu labari a cikin Alkur’ani cewa: “Kuma kafiri zai ce ya kaiconsa, inama na zama turbaya.” Wato yana burin makomar dabba. To ka ga ashe shi yinsa mutum bai amfane shi ba, saboda yinka a musulmi ya fi a yi ka mutum. Saboda haka wannan babbar ni’ima ce yin mutum musulmi.

Dalilin da yasa nake cewa yinka musulmi, saboda mun ga kanmu ne a musulmi. Mun ga kanmu ne Alhamdulillahi iyayenmu musulmi ne, kakanninmu musulmi ne, kakannin kakanninmu iyakan saninmu dai mun girma a cikin musulmi ne. wannan baiwa ce da Allah Ta’ala ya mana, ba bisa hadari bane, ba kuma zabinmu bane, baiwa ce ta Allah Ta’ala.

Za mu cigaba
- Cibiyar Wallafa

06/09/2021

JIRAN TSAMMANI

Daga karatun littafin Khamsuna Darsan Fil Akhlaq da Shaikh Adamu Tsoho Ahmad ya gabatar.

Aɗ-Ɗama’u (Jiran Tsammani):

Jiran Tsammani shine sauraron samun abin da ke hannun mutane, wanda su kan baiwa mutum cikin kaskanci da wulakanci, wanda yana daga dabi’a kaskantacciya mai halakarwa.

Tsammani abokin tagwaitakan kwadayi ne, kishiyansu shine ka zama wadatacce daga jira ko neman abin hannun mutane.

An ruwaito daga Manzon Allah (S) yana cewa: “Jiran tsammani na tafiyar da hikima daga zukatan Malamai.”

A nan an fara da Malamai saboda su ya kamata su nunawa mutane kyakkyawan misali. Idan Malami ya zama mai kwadayi da jiran tsammani za ka ganshi bashi da hikima. Saboda zai wayi gari bashi da tunanin kansa, kullum tunaninsa abin da mutane suke da shi ne, da abin da zai zama ya musu dadi daga gare shi don abin da yake tsammani daga garesu.

Ya zo a ruwaya daga Imam Sadik (AS) cewa, Sa’adan ya tambaye shi cewa, mene ne yake tabbatar da imani a zuciyar bawa? Sai Imam (AS) yace “Tsantseni.” Sai yace wanne ne kuma yake fitar da imani daga zuciyar bawa? Sai Imam (AS) yace “Tsammani.”

An ruwaito daga Amirulmuminin (AS) yana cewa: “Wanda ke da wadatar zuciya ya daukaka, wanda kuma ya zama mai tsammani ya kaskanta kuma ya wahala, kankanin tsammani yak an toshe tsantseni mai yawa. Babu abin da yake rusa addinin mutum kamar bidi’a a cikin addini, kuma babu abin da yake bata mutum kamar ya zama mai jiran tsammani.”

An ruwaito daga Imam Sajjad (AS) yana cewa: “Ni na ga dukkan alkairi baki daya ya taru ne a cikin yanke tsammanin mutum daga abin da ke hannun mutane.”

A cikin Alkafiy, Imam Muhammad Baqir (AS) yana cewa: “Tir da bawa mai kwadayi wanda kwadayinsa ke jansa, tir da bawan da ya zamo mai ‘ragaba’ wanda ya kaskantar da shi.”

Imam Amirulmuminin (As) yana cewa: “Ka wadatu daga barin duk wanda ka so, sai ka zamo tsaransa.” Wato idan ka wadatu daga abin da ke hannun mutum sai ka zamo kamarsa. Ba zai daukaka a kanka ba. Imam yaci gaba da cewa: “Ka yi kwadayi ga duk wanda ka so, sai ka zamo bawansa. Ka kuma kyautatawa duk wanda ka so, sai ka zamo shugabansa.”

___
A ruwayar Hadisi daga Manzon Allah (S) yake cewa: “Yanayi da kafafuwan Malamai ke zamewa a kai shine tsammani.”

Imam Amirulmuminin (As) yace: “Duk wanda ke son ya yi rayuwa ta ‘yanci to kar ya bar kwadayi da tsammani su zauna a zuciyarsa.”

Imam Kazeem (AS) yana fadawa Hisham cewa: “Na horeka kar ka zama mai tsammani, kuma ina horonka da yanke kauna daga abin da ke hannun mutane, ka kashe tsammani da kwadayinka daga abin halitta, domin tsammani mabudi ne ga kaskanci kuma yak an birkita hankali sannan ya tafi da mutunci, ya kuma zubar da darajar mutum, sannan ya tafi da ilimin mutum.”

Imam Ali Alhadi (AS) yana cewa: “Tsammani dabi’a ce mummuna.”

Imam Al-Askari (AS) yana cewa: “Ina muni ga mumini da ya kai ga zama yana da kwadayin da yake kaskantar da shi.”

Don haka ana son ya zama tsammaninka ya zama yana wajen Allah Ta’ala ne, rokonka ya zama yana wajen Allah ne, kwadayinka ya zama na abin da yake wajen Allah Ta’ala ne, don haka ya zo a cikin Alkur’ani Allah Ta’ala na yabon wasu bayi wadanda s**a zama masu tsammani izuwa gareshi da cewa: “Suna masu rokon Ubangijinsu a cikin tsoro da tsammani, daga abin da muke azurtasu kuma suna ba da infaki.”

A wata ayar, Allah Ta’ala na bamu labarin muminai cewa, suna cewa “Me yake garemu ba za mu yi imani da abin da ya zo mana na gaskiya daga Allah ba, alhali muna tsammani da kwadayin Ubangijinmu ya shigar da mu tare da salihan bayi.”

Ka ga irin wannan kwadayi da tsammanin na daga siffofin salihan bayi, wanda ma ya rasa su bai zama daga managartan bayi ba. Ana so ya zama mumini na bautan Ubangiji, yana tsoronsa, yana kwadayin abin da ke wajensa tare da tsammaninsu ga Allah Ta’ala.

Imam Zainul Abidin (AS) a cikin addu’arsa yana cewa: “Ya Ubangiji, idan na dubi zunubina sai na razana, amma idan na dubi afuwarka sai na yi tsammani (a kan zan zamu rahamarka).”

A cikin wata addu’ar Imam (AS) yake cewa: “Ya Ubangiji ni na roke ka ne saboda dadadden kaunata a gareka, da kuma girman tsammanina a gareka, wanda ka wajabtawa kanka.”

04/09/2021

KWAƊAYI

Daga karatun littafin Khamsuna Darsan Fil Akhlaq wanda Shaikh Adamu Tsoho Ahmad ya gabatar.

Al-Hirs (Kwadayi):

Ya kai dan uwa mai girma, ka nesanci kwadayi, domin shi sahara ne wanda yake da zurfin sassa maras iyaka, duk ta inda ka fuskanta a cikinsa ba za ka iya kai makurarsa ba. kwadayi kamar teku ne da bashi da karshe, duk inda ka kai ga iya nitso da ninkaya ba za ka kai matukar zurfinsa ba. Duk wanda aka jarabce shi da kwadayi ya kasance mai mummunan rabo, domin zai bace sannan ya halaka, kuma kubutarsa yana wahalar gaske.

An ruwaito daga Manzon Allah (S) yana cewa: “Mai kwadayi haramtacce ne, tare da wannan haramcin kuma shi abin zargi ne a cikin duk wani abu da ya kasance a kansa, ya mutum ba zai zamo wanda aka haramta masa rabon duniya da lahira ba bayan ya guje daga igiyar amincin Allah (T) ba?”

Ana so a kullum mumini ya yarda da hukuncin Allah, idan Allah ya rubuta masa wadata ya yarda da wadatar, ya tafi da ita yadda Allah ke so. Idan Allah ya hukunta masa talauci, ya yi hakuri da talaucin, ya nemi yardarm Allah a cikinsa, kar ya sanya idanu a cikin abin da ba nasa ba.

An ruwaito daga Amirulmuminin (AS) yana cewa: “Mai kwadayi ya fi wuta zafi. Kuma kwadayi na tauye darajar mutum, sannan baya kara arzikin mutum. Kwadayi ya kan kashe mai yinsa. Mai kwadayi kamammen bawa ne na wulakanci kuma ba zai taba rabuwa da shi ba.” A wani wajen yake cewa: “Mai kwadayi matalauci ne ko da ya mallaki duniya da abin da yake cikinta gaba daya.”

An ruwaito Hadisi daga Imam Baqir (AS) yana cewa: “Misalin mai kwadayi a kan duniya kamar kwatankwacin tsutsa ce, duk lokacin da ta kara tsawon zarenta a kanta (tana lullubewa), zai zama tana dabaibaye kanta ne har ya nesanta gareta ta iya fita daga dabai-bayin da ta ma kanta, har ta mutu a cikin bakin ciki.”

Amma ka ga wadatuwar zuciya, siffa ce da dukkan wani abu na daukakan duniya da lahira yake tattare da ita, hatta hutun duniya da lahira yana tare da wadatuwar zuci ne. Domin tafiya ta kan hada dangin mutum, amma a lokaci guda za ka ga karnuka guda biyu suna fada a kan mushe, haka ma mai kwadayi ya kan wanzu ne a cikin yunwa ko da kuwa an mallaka masa duniyar nan. alhali shi mawadaci busasshen Alkubus ya wadatar da shi.

Shi mai kwadayi tsawon rayuwarsa yana cikin kwadayin abin da yake hankoro ne, domin ba kawai a kan kudi ne ake kwadayi ba, mutum kan iya zama mai kwadayin abinci, sutura, gida, mata, abin hawa da sauransu dai, wanda in zuciyarsa ta damfara da wannan kwadayin sai ya zama baya iya ganin komai face wannan abin da yake hankoro.

A wata ruwayar Hadisi Manzon Allah (S) yana cewa: “Ka sani ya kai Ali, ka ga tsoro da rowa da kwadayi dabi’a daya ce, dukkansu mummunan zato (ga Allah ne) ke tattara su.”

Duk mai munana zato ga Allah za ka same shi matsoraci, idan ana neman mazaje ba za ka same shi a wajen ba, kuma za ka same shi marowaci, idan ana neman mutane masu baiwa wanda za su sadaukar da dukiyarsu su taimaki addinin Allah su taimakawa al’umma ba za ka same shi a wajen ba, sannan kuma in ana neman masu kwadayi na rayuwa ko na abin duniya za ka same shi a wajen. Saboda munana zato ga Allah Ta’ala.

Ma’ana, ba mai kwadayi sai mai mummunan zato ga Allah, wanda ke ganin Allah bai san da shi ba ko yake ganin kamar Allah ya manta da shi. Ba mai rowa sai mai mummunan zato ga Allah, wanda yana ganin in ya bayar Allah ba zai mayar masa ba, ko yana ganin dabararsa ce tasa ya samu abin da yake da shi. Ba mai tsoro sai mai mummunan zato ga Allah saboda yana ganin Allah ba zai kare shi ba kana bin da fuskanto shi, in bashi zai rasa abin da ya tara.

Manzon Allah (S) yana cewa: “Lallai shi dan Adam mai kwadayin abin da aka hana shi ne (kuma ba zai samu ba).”

A zantukan Amirulmuminin (As) yana cewa: “Shakku da karancin aminci ga Allah a kansu ne kwadayi da qoro s**a ginu.” A wani wajen yace: “Tsananin kwadayin mutum na daga cikin tsananin sharrinsa da raunin addininsa.”

A wata ruwayar Imam Ali (AS) yana cewa: “Wanda ya zama mai kwadayi ya tabe ya wahala, mai kwadayi baya wadatuwa. Kwadayi baya kara arziki, sai dai ya kaskantar da matsayin mutum.”

Imam Husaini (AS) yana cewa: “Kama kai baya hana arziki, kuma kwadayin makwadaici baya janyo masa wani daraja, domin arziki rababbe ne tuntuni.”

03/09/2021

ROƘO

Daga karatun littafin Khamsuna Darsan Fil Akhlaq da Shaikh Adamu Tsoho Ahmad ya gabatar

As-Su’aal (Tambaya/Roko):

Ya kai dan uwa, ka daga hannayenka sama gwargwadon iyawarka zuwa ga Ubangijinka, ka nemi bukatarka a wajen Allah, kar ka zubar da mutuncinka ga ababen zargi don kawai samun loman abinci.

Ka sani cewa suturar masu mulki ko da sun kasance masu daukaka, shine ya fi kaskanci a kan suturar talakawan da suke yawo ba tare da cikakkiyar sutura ba cikin godiyar Allah.

An ruwaito daga Amirulmuminin (AS) yana cewa: “Roko yana raunana harshen mai magana.” Saboda in ka zo za ka yi roko baka isa ka daukaka muryarka ba, dole ka raunana muryarka. Kuma akwai Hadisi da ke cewa: “Hannun mai bayarwa shi ya fi alkairi fiye da na mai karba.” Don haka duk wanda ya sakawa kansa yawan roko, za ka ga yana magana cikin kaskanci.

Imam Ali (As) yaci gaba da cewa: “Sannan kuma roko na karya zuciyar jarumi, kuma ya kan mai da ‘yantaccen Da ya zama bawa makaskanci, ya kan tafi da mutuncin mutum, kuma ya kan shafe arziki. Kuma kusanci zuwa ga Allah Ta’ala da rokonsa ne, amma ga su mutane da barin (rokon) ne. Mabiyana sune wadanda ba su irin kwadayin kare ko na hankaka ba, ba su zamo masu rokon mutane ba ko da sun mutu da yunwa. Roko fa mabudi ne na talauci.”

Ya zo a hadisin Manzon Allah (S) yace: “Babu wani bawa da zai budewa kansa kofar roko, face sai Allah ya bude masa kofofi saba’in na talauci.”

A wata ruwayar Manzon Allah (s) yana cewa: “Mutum bai taba budewa kansa kofar roko ba, face sai Allah ya bude masa kofar talauci.”

Imam Sadik (AS) yana cewa: “Neman bukatu a wajen mutane zubar da daraja ne, kuma yana tafi da kunya. Yanke kauna daga abin da ke hannun mutane shine daukakar mumini. Ka ga kwadayi shine talauci na kai tsaye.”

Amma kai mai bayarwa, hakan bai hana idan lalura ta sa mutum ya zo ya roka a wajenka ka bashi shi ba. Allah Ta’ala yana cewa: “Amma shi mai tambaya, kar a hana shi.”

02/09/2021

TALAUCI

Daga Karatun Littafin Khamsuna Darsan Fil Akhlaq da Shaikh Adamu Tsoho Ahmad ya gabatar.

Al-Faqar (Talauci):

Allah Ta’ala yana cewa: “Ya ku mutane, ku faqirai (matalauta) ne, Allah ne mawadaci.”

Ya kai talaka (faqiri), kar ka yi baqin ciki da talaucin da ka samu kanka a ciki, domin adon talauci ga mumini ya fi alkairi fiye da adon linzami ga doki, duk mutane suna so da begen Aljanna, amma ita aljanna tana buri da begen matalauta ne.

Ya zo a ruwayar Hadisi daga Manzon Allah (s) yana cewa: “Talakawa sune sarakuna a cikin ‘yan Aljanna, mutane gaba dayansu suna shaukin Aljanna, ita kuwa Aljanna tana begen Talakawa (faqirai) ne.”

Ya isa Talauci ya zama abin fariya ga mumini, kuma ya sanyaya zuciyarsa, da fadin shugaban halitta, mai bushara da gargadi, Manzon Allah (S) da yace: “Talauci abin alfaharina ne.” A wani wajen yace: “Talauci abin fariyana ne, kuma da shi nake alfahari.”

Hakan ya sa ya zo a ruwaya Manzon Allah (S) yana addu’a da cewa: “Ya Ubangiji ka rayar da ni a miskini (talaka), kuma ka dauki rayuwata ina miskini, kuma ka tayar da ni a cikin taron miskinai.”

Kowa ya je lahira yana neman Manzon Allah (S) ne, amma ka ga sai Manzon Allah bai ce a tashe shi a cikin sarakuna ko masu wadata ba. Wannan na nuna maka daraja na talauci da matsayin talakawa.

Faqirai (talakawa) a nan ba yana nufin mutanen da suke kai karan Allah Ta’ala ba, ana nufin talakawan da s**a sallamawa Allah a kan talaucinsu, s**a rungumi abin da ya hukunta musu. Kamar yadda Imam Ali (As) tare da halin da yake ciki na talauci amma yake cewa: “Mun yarda da abin da Allah ya hukunta a garemu.” Yana mai godiya ga Allah a kan matsayin da ya fifita shi da shi na ilimi.

A wani hadisi daga Manzon Allah (S) yana cewa: “Duk wanda ya yi dawainiya da kai-komo wajen nemawa iyalinsa abinci na halal za a rubuta masa lada da matsayi na mai jihadi a tafarkin Allah Ta’ala, duk wanda ya nemi halal a duniya cikin kamewa (tare da tsantseni), za a rubuta darajarsa tare da darajar Shahidai.”

An ruwaito daga Imam Sadik (As) yana cewa: “Lallai Allah wanda ambatonsa ya daukaka, yana ba da uzuri ga bawansa mumini mai bukata a duniya kamar yadda dan uwa yakewa dan uwansa uzuri. Allah zai ce: “Na rantse da izza da buwayata, ya kai bawana ban saka ka cikin talauci a duniya saboda kai wulakantacce ne a wajena ba, ka daga wannan ‘sajaf’ din don na kalli abin da zan musanya maka da shi (a madadin talaucinka) na duniya.” Sai bawa yace; “Ya Ubangiji, baka cutar da ni ba, baka kuma hanani ba, tare da abin da ka bani na musanye.”

A ruwayar Hadisi daga Amirulumuminin (AS) yana cewa: “Sarakunan duniya da Lahira sune Talakawan da s**a yarda da hukuncin Allah Ta’ala.”

Kamar yadda ya zo a ruwayoyi daban-daban, akwai Talauci mummuna da ba a son yi, har ma an so mumini ya nemi tsari daga irin wannan talaucin. Irin wannan shine talaucin da zai sa ka mance da Allah har ka butulce masa. Wannan musiba ne da mutum zai nemi tsari daga irinsa.

Amma talaucin da zai sa ka koma ga Allah Ta’ala ka sallama masa, ka tsaya kyam a kan tafarkin neman yardarm Allah, wannan shine talauci mafi soyuwa a wajen bayi, wanda Manzon Allah (S) yake burin ya tashi a cikin masu irinsa. Har ma ya zo a hadisi, Manzon Allah (S) yana cewa: “Talakawa ababen gasgatawan Allah ne.” Don haka ka ga ashe talauci in dai an bi da shi ta yadda za a samu yardar Allah to wannan daukaka ne ga bawa.

A wata ruwaya Manzon Allah (S) yaka cewa: “Talauci hutu ne ga mai hankali, wadata kuma wahala ne.” Saboda wanda ya kasance matalauci mai yarda da kaddarar Allah za ka sameshi ba ruwansa, abin da ya zo masa yana godewa Allah a kansa, in bai zo masa ba ma yana godewa Allah, ba ruwanshi da dogon lissafi. Amma mai kudi za ka samu kullin a cikin lissafi yake kwana ya tashi, haka kuma ya kan kwana da daddare cikin tsoron amincin dukiyarsa daga ‘yan fashi, da safe kuma ya tashi yana tunanin kar ‘yan maula ko asara ya riske shi.

Hatta a Lahira ma ya zo a ruwaya cewa na karshen shiga Aljanna a cikin Annabawa shine Annabi Sulaiman, saboda Allah Ta’ala ya bashi dukiya da mulki a duniya.

Don haka yana da hadari ya zama mutum na la’akari da abin duniya ne wajen girmama mutane. Wasu su kan duba wace riga mutum ya saka, ya wadatarsa take kafin su dauke shi da daraja. Alhali Manzon Allah (s) yana cewa: “Duk wanda ya kaskantar da mumini ko mumina, ko ya wulakanta su saboda talaucinsu ko karancin abin hannunsu, Allah Ta’ala zai kunyatar da wannan mutumin a taron ranar Alkiyama.”

A wata ruwayar Imam Ali (AS) yana cewa: “Kar ku wulakanta raunanan ‘yan uwanku, domin in ka wulakanta dan uwanka mumini Allah ba zai hadaku a Aljanna ba in ba ka tuba ba.”

Imam Ridha (As) yana cewa: “Duk wanda ya hadu da matalauci musulmi, ya yi masa sallama wacce ta bambanta da wacce yake yiwa mawadata, to zai je ranar Alkiyama Allah yana mai fushi da shi.”

02/09/2021

MAGANA AKAN ABIN DA BA RUWANKA

Daga karatun littafin Khamsuna Darsan Fil Akhlaq da Shaikh Adamu Tsoho Ahmad ya gabatar.

Attakallam Bima La Ya’aniy (Magana a kan abin da bai shafeka ba):

Ya kai dan uwa, ka yi kokari daidai iyawarka wajen kawata lebbanka da yin shiru. Manzon Allah (S) yace: “Shirun harshe shine kubutar mutum.”, kar ka gurbata bakinka cikin kutsawa ga abin da yake ɓata da kuma maganar da bashi da fa’ida, domin a hakan akwai tozartar da lokaci, lokaci kuwa shine kan jarin kasuwanci da tsiranka.

Na’am, Ya kai dan uwana, ka sani lokacin shiri ga tafiya zuwa ga Lahira takaitacce ne, ballantana ka tozartar da rayuwarka a wajen zama a dandamalolin holewa da yin magana marasa amfani, domin shirya kayan tafiyarka bayan ka tara su shine mafi cancanta (ka damu da su).

Ashe zancen Hujjar Allah a kanka, Amirulmuminin (AS) bai je kunnenka ba? inda yake cewa a cikin Munajatinsa: “Kaico da karancin guzuri, ga kuma hanya na da tsayi, ga tafiya mai nisa, ga kuma girman wanda za a je gaba gareshi.” A wani fadin nasa (AS) yake cewa: “Wallahi da za a ba ma’abota kaburbura dama kan su yi magana, da za su baku labarin kan cewa mafi alkairin guzuri shine taqawa (tsoron Allah).”

Har iyala yau, Imam Amirulmuminin (AS) yana cewa: “Magana kamar magani yake, kankaninsa sai ya amfana, in ya yi yawa kuma sai ya yi kisa.” Wato kamar yadda yake a magani, idan likita ya rubuta masa maganin da za ka sha, ka bi ka’idar shan sai ka samu waraka, amma idan ka kara a kan hakan, sai ya jam aka wani illar da zai kashe ka. Haka misalin magana take.

Shi yasa a wata ruwaya Manzon Allah (S) yake cewa: “Bala’in mutum daga harshe yake. Imanin bawa ba zai taba mikewa ya tsayu daidai ba har sai zuciyarsa ta daidaita, kuma zuciyarsa ba za ta daidaita ba har sai harshensa ya daidaita.”

A wani Hadisin Imam Ali (As) yake cewa: “Mai hankali baya magana sai in da bukatuwar maganar, ko kuma ta zamo hujjarsa ce.”

Sayyadina Luqman a cikin wa’azin da yakewa dansa yana cewa: “Ya dana, in kana raya cewa magana azurfa ce, to ka sani shiru kuma zinare ne.”

Kuma Annabi Dawud yana magana da dansa Annabi Sulaiman (AS) cewa: “Ya kai dana, na horeka da tsawaita yin shiru face a kan alkairi, domin yin nadama a kan tsawon shiru da ka yi so daya, ya fi alkairi a kan yawan magana da ka yi da yawa.”

Imam Jafarus Sadik (AS) yana cewa: “Bawa ba zai gushe ba a matsayin mumini, ana rubuta shi a matsayin kubutacce a wajen Allah matukar yana shiru. Idan kuma ya yi magana, za a rubuta shi imma Kubutacce ko mai sabo.”

Manzon Allah (S) yana cewa: “Duk mutumin da bai wa maganganunsa hisabi daga aikinsa ba, kura-kuransa za su yawaita, kuma zai fuskanci azabar Allah Ta’ala.”

Imam Baqir (AS) yana cewa: “Shi’a dinmu kamar bebaye suke (wajen kame baki daga yawan magana mare amfani).”

Manzon Allah (S) yake cewa: “Tsiran Mumini yana cikin kiyaye harshensa” Don haka in kana so ka tsira a rayuwarka a duniya da lahira, to ka kiyaye harshenka.

Yana daga koyarwar A’imma (AS) suna magana ne a inda ya dace, a lokacin da ya dace, sannan suna auna abin da za su fada da kuma su wa za su fadawa.

A hadisi daga Manzon Allah (S) yana cewa: “Lallai mutum zai furta wata kalma daga abin da Allah ya yarda da shi, a lokacin da yake maganar bai zaci ta kai wani abu ba, amma sai Allah ya rubuta masa yardarsa wacce zai samu har ranar da zai riski Allah Ta’ala, haka ma mutum zai furta wata kalma wacce take janyo fushin Allah, bai zaci maganar ta kai wani abu ba, amma sai a rubuta masa fushin Allah Ta’ala har izuwa ranar da zai koma ga Allah Ta’ala.”

An tambayi Amirulmuminin (AS), wane abu ne mafi kyawu daga abin da Allah ya halitta? Sai Imam (AS) yace: “Zance.” Sai aka ce, wane abu ne mafi muni daga abin da Allah ya halitta? Sai Imam (AS) yace: “Zance.” Sannan yace: “Da magana fuskoki ke zama farare, kuma da magana fuskoki na zama bakake (a duniya ko a Lahira).”

Manzon Allah (S) yana cewa: “Yana daga fahimta da wayewar mutum karancin maganarsa akan abin da bai shafeshi ba. Mafi yawan mutane a zunubi sune mafi yawansu magana a kan abin da bai shafe su ba. Mutum zai zamo ya kusanci Aljanna har ya zama tsakaninsa da Aljanna bai wuce kan mashi ba, amma sai ya fadi wata magana da za ta nesanta shi daga Aljanna nisa mai yawa.”

A wata ruwaya, Amirulmuminin (As) ya wuce wani mutum yana ta maganganu, sai Imam (As) yace masa: “Ka sani fa kai kana shifta ne ga Mala’iku suna rubuta duk abin da kake fadi, domin ba wani abu da za ka furta face Mala’iku sun rubuta shi sun kaiwa Ubangiji, don haka ka yi magana a kana bin da ya shafeka, ka bar abin da bai shafeka ba.”

A wani wajen, Imam Ali (As) yana cewa: “Ina mamakin wanda yake magana cikin abin da bai shafe shi ba a duniyarsa, kuma ba za a rubuta masa lad aba a lahira. Na horeka da surutai domin duk wanda ya zama mai yawan magana ne, zunubinsa da laifuffukansa za su yawaita.”

Imam Husaini (As) yana fadawa Ibn Abbas cewa: “Kar ka yi magana a kan abin da bai shafeka ba, domin ina ji maka tsoron zunubi. Kar ma ka yi magana cikin abin da ya shafeka, har sai a muhallin da ya dace ka yi ta.”

Ka ga ana koya mana yin shiru hatta a kan abin da ya shafi mutum ma, in har maganarsa ba za ta amfanar ba. Har ma Arifai kan ce idan maganarka da rashin maganarka duk ma’auninsu daya to rashin maganar shi ya fi alkairi. Shi yasa a cikin Alkur’ani Allah (T) yace: “Ka tunatar a inda tunatarwa zai yi amfani.”

Nazifi A. Khazimiyyah

02/12/2021

27/10/2021

11/09/2021

10/09/2021

07/09/2021

06/09/2021

06/09/2021

04/09/2021

03/09/2021

02/09/2021

02/09/2021

Address

Telephone

Website

Alerts

Contact The Business

Shortcuts

Share