13/11/2022
Ku Ƙauracewa Shiga Harkokin Siyasar Jam'iyya, Sakon Gwamna Bala Ga Sarakuna
.. an miƙa sandar mulki ga Sarkin Katagum
Gwamnan jihar Bauchi, Sanata Bala Abdulƙadir Muhammad yayi kira ga masu riƙe da sarautun gargajiya da su ƙauracewa shiga lamuran siyasar jam'iyya inda yace gwamnatinsa ba za ta lamunci zagon ƙasa, ta-da-zaune tsaye, karya doka ko rigima ba.
Yayi wannan kira ne yau a Azare, ƙaramar hukumar Katagum yayin bikin miƙa sandar iko ga me martaba Sarkin Katagum, Alhaji Umar Farouq Umar, inda gwamnan ya jaddada aniyar gwamnatin sa na cigaba da tallafawa masarautu a wani matakin faɗaɗa samar da romon dimokraɗiyya ga al'uma.
Da yake taya sarkin murnar gadar gadon mumbarin iyaye da kakanninsa, Bala Muhammad ya kirayi sarakuna da su yi koyi da sadaukarwar sa wajen inganta zaman lafiya, haɗin kai da bin doka da oda a yankunan su.
Gwamna Bala sai ya ƙara da kira ga masu riƙe da masarautun gargajiyan da su cigaba tare da haɓaka tsarin masarautu na sanya ido kan tsaro da kuma bada rahoton duk wani abu da ka iya barazana ga tsaro ga hukumomin da s**a dace.
Ya kuma janyo hankulan su kan wayar da kan al'uma kan shirye-shirye da ayyukan gwamnati na ciyar da yankuna gaba don amfanin jama'a.
Gwamna Bala sai ya jaddada aniyar gwamnatin sa na cigaba da inganta zaman lafiya ta hanyar tsare rayuka da dukiyar al'uma baya ga gina da kwaskwarima wa fadojin hakimai.
Ƙasaitaccen bikin ya samu halartar me alfarma Sarkin Musulmi, manyan sarakuna, gwamnoni masu ci da tsoffi da sauran su.
Daga Lawal Muazu Bauchi
Me tallafawa Gwamna Bala kan kafafen yaɗa labarai na zamani
