Tambihi da Tunatarwa

25/01/2025

TSOKACI AKAN QUR'AN DAY DA AMARE SUKE SHIRYAWA

1. A yayin shagulgulan biki, abubuwa da dama sun halatta musamman ga mata da yara matuƙar dai ba'a ƙetare iyaka wajen aikatasu ba. Babbar matsalar da muke fuskanta itace rashin kiyaye ladubban shari'a tareda koyi da yahudawa a yayin shagulgulan bukukuwan mu.

2. "Qur'an day" yini ne da ake shiryawa a yayin shagulgulan biki, amarya da ƙawayenta suna yin shiga ta kamala. Suna rarraba Alƙur'ani (juz'i- juz'i) a wajen domin a karanta, ko kuma asamu waɗansu da s**a iya karatun Alkur'ani su rera shi da kyakkyawan sauti. Wannan babu laifi.

3. Galibi matan da suke shirya wannan yini basa rasa alaƙa da karatun islamiyya ko na Tahfeez. Kuma babu shakka shi wannan yini yafi taron kaɗe-kaɗe (Dj) da raye-raye, Arabian Night da sauran nau'ukan ƙetare iyaka.

4. Shi a karan kansa "Qur'an day" ɗin al'ada ce mai kyau amma baya daga cikin karantarwar sunnah don haka babu wani lada na musamman da za'a baiwa mutum don ya halarci "QUR'AN DAY" face ladan karatun Alkur'ani idan anyi da ikhlasi. Duk Amaryar da take son dacewa da karantarwar sunnah a yayin shagalin bikinta sai ta shirya walima daidai gwargwadon ikonta.

5. Akwai wasu abubuwa goma (10) marasa kyau da a tareda wannan sabuwar al'ada ta "QUR'AN DAY". Sun haɗarda:

i. Maye gurbin walima da "Qur'an Day" ma'ana ɗaukar "QUR'AN DAY" a matsayin ibada.
ii. Shigar maza wurin wannan taro koda kuwa mahaifin amaryar ne.
iii. Cire shigar kamala yayin da aka tashi za'a tafi gida. Mace tazo da hijabi ta koma gida da gyale.
iv. Mayar da hankali akan ɗaukar hoto amadadin karatun.
v. Ɓarnatar da kuɗi masu yawa don ƙayatar da taron.
vi. K**a Event hall domin yin wannan yini wanda hakan zai buɗe ƙofofin fitina.
vii. Kunna kiɗa da raye-raye a ƙarshen karatun.
viii. Kallafawa kai da ɗaukarsa a matsayin wajibi.
ix. Wasa, ihu, ko surutu a yayin gudanar da karatun.
x. Zargi ko aibata wacce bata yi ba ko bata halarta ba.

6. Allah yayi riƙo da hannayenmu.

✍️
Umar Sa'ad Abdullahi
25/01/25

22/01/2025

طوبى لمن أصلح نفسه قبل رمضان

15/12/2024

'Yar uwa mace: ki sani cewa duk duniya babu wanda zai tsare miki mutuncinki kamar yadda zaki tsare wa kanki da kanki.

22/11/2024

DOMIN KYAUTATA AMFANI DA SOCIAL MEDIA

Assalamu alaikum warahmatulLah, barkan mu da wannan yini na Juma'a mai albarka. Ina farin cikin gabatar muku da wani ɗan takaitaccen nazari domin masu amfani da kafofin sadarwa na zamani wato "Social Media".

Wannan nazarin yana ƙunshe da muhimman batutuwa da yakamata mu kiyaye game da alfanu, illoli, sirrika, ladubba, da shawarwari domin kyautata amfani da wannan saha ta zamani tareda cin moriyarta.

Inshaa Allah, wannan aiki zai kammala nan da ranar Juma'a mai zuwa, duk mai sha'awar karantawa zai sami softcopy a ranar.

Allah ya bamu sa'a!

✍️
Umar Sa'ad Abdullahi
Fri, 22 Nov. 24

20/11/2024

26/10/2024

Riƙo da Sunnah:

Mataki na farko sai ka fara ƙundurcewa a ranka cewa koyarwar manzon Allah (ﷺ) itace mafificiya.

21/10/2024

Duk aninda yake bugarwa sunansa "GIYA" kuma haramun ne a musulunci koda kuwa ba sunansa "GIYA" ba, dole ne ya amsa sunan "GIYA" saboda bugarwa da yake yi.

20/10/2024

Lafazin iƙāmar Sallah:

- ƙad ƙāmatis-Sallātu ❌
- ƙad ƙāmatis-Salātu ✅
(Ba'a cewa SALLATU)

15/09/2024

Ƙwarai kuwa! Shaiɗan ne kaɗai yake baƙin ciki da samuwar fiyayyen halitta, daga shi sai kafirai 'yan fadarsa.

Amma batun dai har ila yau shine, bikin Mauludi daban murna da samuwar fiyayyen halitta daban.

Idan da bikin mauludi shine hanyar murna da samuwar fiyayyen halitta, da Sahabbai, Ahalul baiti da tabi'ai da malaman Musulunci Magabata su za'a fara tuhuma da ƙiyayya ga manzon Allah (S.A.W).

Yadda Al'amarin yake, sun fimu tsananin murna da samuwar fiyayyen halitta, amma basa Mauludi saboda Maulidin ba addini bane.

✍️
Umar Sa'ad Abdullahi

14/09/2024

Idan da Alkhairi ne da Sahabbai sun rigaye mu wajen aikata.

13/09/2024

Yau (Juma'a) rana ce da sunnah ta koyar da riɓanya salati ga Manzon Allah (S.A.W) a cikinta.

07/09/2024

Hukuncin tafiye-tafiye domin wa'azi ko da'awah ga Mata.

07/09/2024

SHUBUHOHIN BID'AR MAULUDI

Kashi na 2/5

Suna cewa: Ai a wurin bikin Mauludin karatun Alƙur'ani ake yi, da karatun hadisi, sira da kuma sadar da zumunci, waɗannan ayyukan suma duka bid'o'i ne ?

Amsa:

Tabbas karatun Alkur'ani, karatun hadisi, karatun sira da sadar da zumunci ibadu ne da s**a tabbata a addinin musulunci, ibadu ne da ake son kowanne musulmi ya shagaltu dasu a halin rayuwarsa. Amma shin kuna sane da cewa tun kafin a fara biki mauludi ake yin karatun Alkur'ani, hadisi da sira, kuma ake sadarda zumunci?

Lallai waɗannan ibadu ɗauko su aka yi aka aza su bisa bigire na bid'a. Babu wanda yake inkarin abubuwa masu kyau da ake yi a wajen Mauludi, abin sani shine, MAƘSUDIN taron (manufa) itace bid'a. Domin cewa kowanne aiki yana tare da niyya, kyakkyawar niyyar bata halatta ƙirƙirarren aikin da bai dace da karantarwar Alƙur'ani da sunnah ba.

Idan dai maƙasudin taron Mauludi shine MURNA da kewayon ranar haihuwar Annabi Muhammad (S.A.W), wannan maƙasudin shine BID'A a musulunci domin bashi da gabataccen misali.

Bid'a a taƙaice tana nufin kowanne aiki da aka ƙirƙiroshi a addini wanda bashi da tushe daga Alƙur'ani, ko sunnar Annabi (S.A.W) ko ayyukan khalifofinsa masu shiryarwa (Abubakar, Umar, Usman da Aliy, Allah ya ƙara musu yarda).
Dubi مجموع فتاوى ومقالات الشيخ ابن باز 6/ 403).

✍️
Umar Sa'ad Abdullahi

07/09/2024

SHUBUHOHIN BID'AR MAULUDI

Kashi na 1/5

Muƙaddima:

Manufar wannan rubutu faɗakarda al'ummar Musulmai dangane da bid'ar mauludi. Insha Allahu zan kawo muku muhimman bayanai daya kamata kowanne mutum ya nazarta.

Ban yi wannan tsokaci don jayayya ko baƙanta ran wani ba. Wanda duk Allah ya nufa da karantawa to yayi nazari da kansa.

Bismillah, ina mai neman taimakon Allah (S.W.T).

Mas'ala ta farko: Yaushe ne aka fara bikin Mauludi a musulunci, wanene ya ƙirƙiro shi, a wanne birni aka fara yi ?

Amsa:

Wanda ya fara ƙirƙiro bikin Mauludi shine wani mutum mai suna Abu Tamim Ma'ad al-Mu’izz li-Dinillah daga ƙabilar Banu-ubaid a shekara ta 263 bayan Hijira a garin Ƙāhirah (Misra). Abu Tamin ya kasance limamin Rafidawa ('yan shi'a) faɗimiyya, gwarzo ne sosai a wurin 'yan shi'a, kuma limamine da yayi fice wajen tarbar kiristoci da yahudāwa tareda jan su a jiki, har ta kai Abu Tamim ya naɗa Kirista wakilci a daular musulunci. Wannan tasa kiristoci da dama sunyi rubutu akansa na girmamawa, domin baya nuna banbancin addini, wanda hakan na daga cikin aƙidun 'yan "Interfaith" a yau, masu ganin kowanne addini mutum ya zaɓa zai samu tsira.

Abu Tamim yayi koyi da Kiristoci da s**a ware 25 ga watan Disamba don shirya bukukuwan murnar zagayowar haihuwar Annabi Isa (A.S), sai yaga dacewar shirya irin wannan biki ga fiyayyen halitta, wanda a zahiri yaci karo da karantarwarsa.

Daga wannan lokaci aka cigaba da shirya tarukan mauludi, ya cigaba da gudana a daulolin Rafidawa ('yan shi'a) lokaci bayan lokaci, har daga bisani ya fantsama cikin mabiya ɗariƙar sufaye, har ya kawo wannan lokaci.

Tambihi:

Munji cewa 'yan shi'a su s**a farar da bikin Mauludi, kuma ba'a fara mauludi a musulunci ba sai a shekara ta 263. Mu san cewa 'yan Shi'a suna da'awar son Manzon Allah da ahalin gidansa, amma kuma baya ga miyagun aƙidu, suna kafirta Abubakar, Umar da Usman (Allah yaƙara musu yarda). Sannan suna muzanta wasu daga cikin matayen Manzon Allah kamar Aisha, Hafsa da sauransu (R.A). Duk musulmai suna ala-wadai da hakan.

Wajibi ne ɗayan abubuwa biyu ya tabbata:

1. Idan har mauludi kyakkyawar hanya ce ta nuna soyayya ga Manzon Allah, tabbas 'yan shi'a sun fi kowa son Manzon Allah a cikin musulmai a tareda miyagun aƙidunsu, tunda dai ƙarewarta sune s**a ƙirƙiro bikin mauludin da ake tutiya da shi. Duk wanda ya shirya bikin Mauludi yana koyi da 'yan shi'a ne, ko yaƙi ko yaso.

2. Wanda bai yadda da hakan ba kuma, dole ya yarda cewa shi bikin Mauludin ba sahihiyar hanyar nuna soyayya ga Manzon Allah (S.A.W) ba ce.

A dakaci ƙarashe!

Allah ya shiryar da zukatanmu.

✍️
Umar Sa'ad Abdullahi

06/09/2024

05/09/2024

Idan ka taimaki wani domin Allah baka buƙatar sanar da mutane a social media.
Yin hakan zai iya ɓata aikinka.

04/09/2024

MUTUWAR MUTUMIN BANZA: LADUBBAN SHARI'A ?

A ƙarƙashin karantarwar Alƙur'ani da sunnar manzon Allah (S.A.W) komai girman laifin da mutum ya mutu akai idan har bai kasance mushriki ko kafiri ba, ba a nesanta shi daga rahamar Ubangiji, domin Allah (S.W.T) mai iko ne wajen gafarta zunuban bayinsa komai muninsu kamar yadda ya faɗa cikin littafinsa. (Dubi, Nasa'i: 48, Zumar: 53 ).

Babu wani laifi koma bayan shirka da mutum zai mutu akai ya zamto an sami yaƙini game da makomarsa face ta fuskar wahayi. Lallai wajibine mu kiyaye harsunan mu daga kutsawa tsakanin Allah Ta'ala da bayinsa. Hatta Manzon Allah (S.A.W) Allah ya gaya masa cewa shi (Manzo) bashi da alhakin zartar da hukuncin ga bayin Allah (waɗanda s**a mutu suna azzalumai) Idan Allah yaga dama zai yafe musu (da yalwar rahamarsa), idan ya ga dama zai azabtar dasu (saboda cancantarsu da azabar). (Dubi, Ali Imran: 128).

Me yakamata muyi yayin da muka sami labarin rasuwar mutumin banza ?

1. Idan dai musulmi ne babu laifi ayi masa addu'a komai munin cikawarsa. (Allah ka gafarta masa, ka gafarta mana a bayansa). Ba kuma wajibi bane.

2. Mutum ya roƙi Allah ya kare shi daga mummunar cikawa irin ta wannan mamacin.

3. Haramun ne zagin mamaci, komai girman laifinsa. (Dubi, Bukhari #1393)

4. Bai dace ayi masa baƙar addu'a ba, domin bawan Allah ne, kuma yana ƙarƙashin ganin damar Ubangiji. Babu wanda ya san haƙiƙanin yadda Allah zai yi dashi.

5. Babu laifi ambaton miyagun ayyukansa (idan fasiƙi ne) domin anyi hakan a lokacin manzon Allah kuma bai hana ba. Har ma yake tabbatarwa. (Dubi, Bukhari #1367)

6. Wajibine ayi masa sutura, sallah, da binneshi gwargwadon koyarwar sunnah, sai dai malami sun ce mutane masu daraja (kamar malamai, hafizai, da makamantansu) zasu ƙauracewa jana'izarsa. Domin hakan zai ƙara sage gwiwar masu aiki irin nasa.

7. Babu laifi a faɗakarda sauran mutane game haɗarin mummunar cikawa

Allah ya sa muyi kyakkyawan ƙarshe.

✍️
Umar Sa'ad Abdullahi