03/09/2024
JD VANCE ICIH KUA HIAM?
(Pu Trump i Vice President ding)
___________
By Muana Khuptong,Ph.D
President Donald Trump in 2024 Presidential Election ah dem ding ci in a khentat a kipanin mite lungsim ah Vice President ding, a kipawlpih (running mate) ding in kua a teel peuhmah tam maw!? Ciin mite in dipkua sa in ngak uh hi. Mike Pence tawh hong kilemlo uh ahih ciangin a thak a teel kul mawk hi. Republican party sungah primary kidemna kipan pah in Pu Trump in vote 17,015,756 ngah a, 76.42% pha in majority atam pen ngah in Party nominee ngah pah lian hi. Ama zawmah anihna Nikki Hailey (India mi South Carolina Governor lui nu) in 19.68% ngah a, athumna Ron DeSantis, Florida governor semlaitak in 1.59% bek ngah hi. Asawtlo in Governor DeSantis khawl pah hi. Adang ademte ahih leh mee tawm cik cik ngah uh a, amin a President dem ngei cih a khangtangthu uah bel gelh theih na hi bilbel hi. Adang a dem te:- Chris Christie, Vivek Ramaswamy (vaipa, India te), Asa Hutchinson, Perry Johnson, Tim Scott (South Carolina senator), Doug Burgum leh Mike Pence (VP lui pa) te ahi uh hi.
Pu Trump in mee a tampen angah akipan in a Vice President ding in mite in a ng*ihsut uh candidate teng lak ah Vivek Ramaswamy, Ron DeSantis, Tim Scott, Tulsi Gabbard, leh JD Vance te hi in, mite in kua a tel tam maw a cih laitak un, Republican National Convention kawhmpi Wisconsin ah aneih masak ni uh, July 15, 2024 ni in Truth Social media pan in President Trump in VP ding in JD Vance ka tel hi cih thu pulak khia hi.
James David Bowman (birth name) pen August 2, 1984 k*m in Middletown, Ohio ah suak hi. Tu in k*m 40 hipan hi. Anu min Beverly Carol hi a, apa min Donald Ray Bowman ahi hi. Anu lepa te a ngeklai in kikhen (divorce) uh hi. Anu in pasal thumvei nei a, a pasal thumna Bob Hamel in adopt in, anu in zong lungdam mah mah hiding hiven, apa min Bowman last name phiatin amin khel (name change) in apasal kik thumna min la in, James David Hamel ci in phuak hi. JD Vance in atangthu a gelhna “Hillbilly Elegy” cih laibu ah aneulai in apakik in nak bawlsiat mah mah in, genthei mah mah a, zawng mah mah in nek-le-dawn kicing neilo in, asanggam nu Lindsey tawh a nu pa, (maternal granpa) a pu ten kem uh a, anu in khamtheih zawngsang (drug addict) ahih manin nuntakna hamsa mah mah hi ci hi.
K*m 2003 ciangin Middletown High School pan in High School hong zawh tak ciangin military journalist nasep hong sem in US Marine Corps ah lut in 2nd Marine Aircraft Wingsah sem hi. K*m 2005 k*m in US leh Iraq akido tak ciangin Iraq ah gal kuan (deployed) in kha 6 sung om hi. Laigelh siam ahih manin Public Affairs office ah photo lak leh article gelh te ki suaksak in mite theih hong suak hi. Kidona tak tak (combat) ah bel kihelkha ngeilo hi. A galkap tum in picingsak (taught me to live like adult) ci in gelh hi. K*m 4 sung galkap a tum sungin pahtawina tuam tuam:- the Iraq Campaign Medal, Marine Corps Good Conduct Medal, and Navy and Marine Corps Achievement Medal cihte ngah hi.
K*m 2007 k*m in GI Bill kici galkap kuante huhna sum lepai te zangin sangkah kipan kik a, Ohio State University ah Bachelor of Arts in Political Science leh Philosophy degree summa cm laude (mark sangpen) tawh zo hi. Lai pil mah mah khat ahi hi. College akah k*mkhatna ah Ohio State Senator Bob Schuler zum ah nasep ngah pah hi. Ohio State University pan Bachelor aman tak ciangin Yale University Law School ah law sin pah a, 2013 k*min Juris Doctor degree ngah hi. Yale ah akah sungin The Yale Law Journal kici Vol 122 ah Editor semkha hi. 2014 k*m a zi neih tak ciangin JD Hamel min pen JD Vance ci in laih kik leu leu hi.
2022 General Election ah Repuclican ticket tawh Ohio pan in US Senate dem a, kidemna ah Democrats party candidate Tim Ryan 53% tawh zo in Ohio State pan a Senator telcing hong suak hi. Tuin US Senators mi 100 te lakah zong a pil pen pawl lakah kihel kha hi. A naupan mah mah hangin mipil mah mah khat ahih manin Republican ten kisak theih pih mah mah uh hi. Pil lua ahih manin Kamala Harris VP pick pa Tim Waltz in ‘weird’ ‘mi makpa or mihai pa, mi lamdang pa’ ci in ko liang hi.
K*m 2011 lai in Law School pan a asang kahpih te India mi nungak khat amin Usha Chilukuri Vance kici tawh ki mu uh a, 2014 Kentucky gamke khua khat ah interfaith biakinn khat ah kitenna mopawi bawl uh hi. JD Vance pen Chrisitan hi in, Bible simsak uh a, Usha Chilukuri pen Hindu ahih manin Hindu pandit siampi khat in Hindu ngeina tawh thupha kipia sak hi. Usha nulepa zong India mipil Telegu minam, Andra Pradesh gam pan hi uh a, apa Krish Chilukuri pen mechanical engineer, Indian Institute of Technology (IIT Madras) pan a sang man hi in lecturer San Diego State University, California ah sem ahi hi. Anu Lakshmi Chilukuri ahih leh, molecular biologist sangsia professor sem, provost at the University of California, San Diego ah sem hi.
Senator JD Vance pen Interview asiam dan pen mitawh kibang ngiat lo in, nuih mai kawmsa in khauhtak in dawngkik thei a, a gen ding ng*ihsun tawm nemnum cihbang omlo hi. Tu nai ah NBC reporter Kristen Welker tawh interview a neihna ah, a heh theih theihna ding in ko bawl in dotna khelno no d**g ta leh aman dai hithiat in dawng in, a cihna ding theilo in koih theih mawk hi. CNN Dana Bash tawh a interview na bang uh nak siam lua hi. Ama kampau ah awksak sawm in dotna khel nono d**g ta leh, awk vetlo in, khauh tak leh a d**g te a dia zaktha dah huai phial mawk in dai takin (calm takin) dawng hithiat thei mawk hi. JD Vance pen the future of Republican Party ci in gen liang uh hi. Apilna leh a theihna a cimna pen nasia mah mah mawk hi. Athu gente paih ding om vetlo hi. Pu Trump in a ut bang bang a gen khia bua bua phial zong in aman hoihtak in khui tuah kik thei ding hi, tuazah in thugen siam hi.