19/01/2025
ތިޔަ ފެއިލްކޮށްލެވުނީ ޝިފްޒާއެއް ނޫން!
މޯލްޑިވްސް ބްރޯޑްކާސްޓިންގ ކޮމިޝަނަކީ ރައްޔިތުންގެ ޓެކްސް ފައިސާއިން ހިންގާ، ދިވެހި ދައުލަތުގެ މިނިވަން ދުސްތޫރީ މުއައްސަސާއެކެވެ. ޤާނޫނު ބުނާގޮތުން ކޮމިޝަނުގެ ކޮންމެ މެންބަރަކީ ވެސް ބްރޯޑްކާސްޓްކުރުމުގެ ދާއިރާއިން، ޚާއްޞަކޮށް ސިޔާސަތު އެކުލަވައިލުމާއި، ޤާނޫނާއި އާ އީޖާދުތަކާއި، ނޫސްވެރިކަން އަދި/ނުވަތަ ވިޔަފާރީގެ ރޮނގުން ތަޢުލީމު ނުވަތަ ތަޖުރިބާ ލިބިފައިވާ، މުޖުތަމަޢު ޤަބޫލުކުރާ މިންގަނޑުތަކުން އަބުރުވެރި، އަޚްލާޤު ރަނގަޅު، ވަކިފަރާތަކަށް ނުޖެހޭ ޤާބިލު މީހެއް ކަމުގައި ވާންވާނެއެވެ.
މީޑިއާގެ ދާއިރާއަށް މުޅި ޙަޔާތް ހުސްކޮށްލައިގެން ހުރި މީހެއްގެ ހައިސިއްޔަތުން ދާއިރާއަށް ހެޔޮ ބަދަލުތަކެއް ގެނައުމަށް މަސައްކަތްކުރުމުގެ ހެޔޮ ނިޔަތުގައި މީގެ ކުރިން ވެސް އެއްފަހަރު މި ކޮމިޝަނަށް ކުރިމަތިލީމެވެ. ލިބުނީ ހަމަ އެއް ނަތީޖާއެކެވެ. ދެފަހަރު ވެސް ކޮމިޓީން އެންމެ މަތިން ލިބުނު ލިސްޓުގައި ހިމެނިފައި، އަޅުގަނޑަށްވުރެ ދަށުން މާކްސް ލިބުނު މީހާ މަޤާމަށް ހޮވުނީއެވެ.
ކުރީ ފަހަރު ސަބަބަކަށްވީ، އަނެއް ކެންޑިޑޭޓަކީ އޭރު މަޖިލީހުގެ ކޮންޓްރޯލް އޮތް ޕާޓީގެ މެންބަރަކަށް ވުމާއި، ކޮންމެވެސް މެންބަރަކަށް އެ ކެންޑިޑޭޓް ނިސްބަތްވާ ޢާއިލާގެ ތާއީދު ގެއްލިދާނެ ކަމަށްޓަކައި ޕާޓީގެ ޕާލަމަންޓަރީ ގުރޫޕްގައި މާ ހަރުއަޑުން އެ މެންބަރަކު ވަކާލާތުކުރައްވައި އެގޮތަށް ޕާޓީން ނިންމައިގެން ތަޅުމުގައި ވޯޓަށް އެހުމެވެ. މިއީ އަޅުގަނޑު ބުނި ވާހަކައެއް ނޫނެވެ. މަޖިލީހުގެ ތަޅުމުގައި އެދުވަހު އެ ޕާޓީގެ މެންބަރަކު އެކަމާ ހިތްޕުޅު ހަމަޖެހިވަޑައިނުގެން އުދާސްތައް ބަންޑުންކުރައްވައި ޔައުމިއްޔާއިން ފެންނަން އޮތް ވާހަކައެކެވެ.
ދެން އޮތީ މިފަހަރެވެ. ބުރަ މަސައްކަތުން ޙާޞިލުކޮށްފައިވާ ކަމާގުޅޭ ތަޢުލީމާއި ތަމްރީނުގެ ސެޓްފިކެޓުތަކާއި، ތަޖުރިބާގެ ލިޔުންތަކާއި، އިޚްލާޞްތެރި ޤައުމީ ޚިދުމަތުގެ އަގުވަޒަންކޮށް ދިވެހި ދައުލަތުން ދެއްވާފައިވާ ލިޔުންތައް ހުށަހެޅީމެވެ. ލަޔާޤަތު ތަންދިން އެންމެ ފުރިހަމައަށް ކޮމިޓީގެ އިންޓަވިއުއަށް ތައްޔާރުވެ، މެންބަރުންގެ ސުވާލުތަކަށް އިޚްލާޞްތެރިކަމާއެކު ޖަވާބު ދިނީމެވެ. އަޅުގަނޑުގެ ފަޅިން ކުރަން އޮތް ކަމެއް ވިއްޔާ ކުރީމެވެ. އަޅުގަނޑު އަތުގައި ދެއްކެން އޮތް އެއްޗެއް ވިއްޔާ ދެއްކީމެވެ. އަޅުގަނޑަށް ނުދެއްކުނީ ސިޔާސީ ޕާޓީއެއްގެ މެންބަރުކަމުގެ ސަނަދެވެ. އަދި ސިޔާސީ އެކްޓިވިސްޓްކަމުގެ ފާހެވެ. އަޅުގަނޑަށް ނުކުރެވުނު ކަމަކީ ސިޔާސީ ބޭފުޅުން ނުވަތަ މަޖިލީސް މެންބަރުންނަށް ގުޅައި، މެސެޖުކޮށް، އެބޭފުޅުންނާއެކު ކޮފީ/ޑިނަރ އަށް ދިޔުމެވެ. ނުވަަތަ ސިޔާސީ ބޭފުޅުންނަށް ލޮބީކުރުމެވެ. އެ ކަންކަން ނުކުރީ އެއީ އަޅުގަނޑު ޤަބޫލުކުރާ ހަމައަށް ނުވާތީއެވެ. ބްރޯޑްކާސްޓިންގ ކޮމިޝަނުގެ މެންބަރުކަމަކީ ސިޔާސީ މަޤާމަކަށް ނުވާތީއެވެ. އެފަދަ މަޤާމަކަށް އައުމަށްޓަކައި ސިޔާސީ ނުފޫޒެއް ބޭނުންކުރުމަކީ ޖާއިޒު އަމަލަކަށް ނުވާތީއެވެ. ޤާނޫނުއަސާސީއާއި ޤާނޫނުތަކުން ތަޞައްވުރު ކޮށްދީފައިވާ މިނިވަން މުއައްސަސާތަކަށް މެންބަރުން ޢައްޔަންކުރުމުގައި ސިޔާސީ ނުފޫޒެއް އޮވެގެން ނުވާނެތީއެވެ. ނަމަވެސް ތަކުރާރުކޮށް ފެންނަމުންދާ މަންޒަރުތަކުން މިނިވަން މުއައްސަސާތަކުގެ މެންބަރުކަމަކީ ވެސް ސިޔާސީ މަޤާމުތަކެއްގެ ގޮތުގައި މިއަދު ރައްޔިތުންނަށް ވެސް ޤަބޫލުކުރެވޭ ހިސާބަށް ހިނގައްޖެއެވެ.
އޭރުވެސް، މިހާރުވެސް ޙާލަތަކީ މިއެވެ. ކޮންމެ ފަސް އަހަރަކުން ކުރާ ބޮޑު ކެމްޕޭނުގައި، ކިޔަވައިގެން ތިބި، ތަޖުރިބާ ހުރި، ކަމަށް ޤާބިލު މީހުންނަށް ދައުލަތުގެ ވަޒީފާތަކުން ފުރުޞަތު ނުގެއްލޭނެ ކަމަށް ޢަހުދުވެ ދައްކާ ހުވަފެނަކީ ބިލާހަކަށްވެ ނިމިއްޖެއެވެ. އަމުދުން މިނިވަން މުއައްސަސާތަކަށް މީހުން ޢައްޔަންކުރުމުގައި ސިޔާސީ ނުފޫޒު ނުފޯރުވައި ހަމައާއި އިންސާފު ހިފަހައްޓާނެ ކަމަށް ބުނެ ކިޔާހާޅެން ފަރިއްސަށް ވެއްޖެއެވެ. މިއިން ދައްކައިދެނީ އެތައް ޤުރުބާނީއެއް ވެގެން ހޯދާ ޢިލްމުގެ އަގެއް ނެތް ކަމެވެ. ބުރަ މަސައްކަތާއި ދިގު މުއްދަތުން ހޯދާ ތަޖުރިބާއާއި ޤާބިލުކަމަކީ ބޭކާރު އެއްޗެއް ކަމެވެ. ފަސާދަވެފައިވާ ވެށީގައި ނަޒާހަތްތެރިކަމުގެ ފޭރާމަކީ އެއްވެސް އަގެއް ނެތް އެއްޗެއް ކަމެވެ. ހުރިހާވެސް އެއްޗަކީ ސިޔާސީ ބާރާއި ސިޔާސީ ނުފޫޒު ކަމެވެ.
ހަމައާއި އިންސާފުގެ އުސޫލުތަކުގައި ހިފަހައްޓައިގެން ހުންނަ މީހާއަކީ ސިޔާސީ ބާރެއް ނެތް މީހެއް ކަމަށް ބަލައި މިއަދު ކަޓުވައިލެވިދާނެއެވެ. ނަމަވެސް އެ ފެއިލްކޮށްލެވެނީ ޝިފްޒާ މުޞްޠަފާއެއް ނޫނެވެ. ނުވަތަ އޭނާފަދަ އެހެން މީހެއްވެސް ނޫނެވެ. އެ ފެއިލްކޮށްލެވެނީ ޙައްޤުގެ މަގުގައި ސާބިތުވެ ހުންނަން ބޭނުންވާ އަދި މި ޤައުމާމެދު ފޮނި އުންމީދުތަކެއް ކުރާ އެތައް ބައެއްގެ އުންމީދެވެ. އެ ފެއިލްކޮށްލެވެނީ ވަކި ފަރާތަކަށް ނުޖެހި، މިނިވަންކަމާއި ނަޒާހަތްތެރިކަމާއި އަބުރުވެރިކަމާއެކު ޚިދުމަތްކުރާ ޤައުމީ ޚިދުމަތްތެރިންގެ ޚިދުމަތުގެ ރެކޯޑެވެ. ﷲ ތަޢާލާ ތިމާމެންނަށް ދެއްވި ބާރު ނަހަމަގޮތުގައި ބޭނުންކޮށްގެން ހަމައާއި އިންސާފުގައި އަތްއަޅައިގެން މިއަދު ތިބެވިދާނެއެވެ. ނަމަވެސް ޙައްޤާއި އިންސާފަކީ، މާދަމާ ތިމާމެން ޖަވާބުދާރީވާންޖެހޭ ހިނދު، އެހެން ފެއިލްކޮށްލެވޭނެ ނުވަތަ ކަޓުވައިލެވޭނެ އެއްޗެއް ނޫނެވެ.
كلُّكم راعٍ وكلُّكم مسؤولٌ عن رعيتِهِ
"ކޮންމެ މީހަކީ ވެސް އެމީހަކާ ހަވާލުކުރެވޭ މަސްއޫލިއްޔަތާ މެދު ސުވާލު ވެވޭނެ މީހެކެވެ."
