30/12/2024
ЭЙНШТЕЙНТЭЙ ЦАЙЛАХ ЗУУР ☕
өдөр тутмын амьдрал дахь ер бусын физикийн талаар хууч хөөрье! 🧬
----------
Энэхүү ном нь квант физикийн зарим суурь ойлголтуудыг олон нийтэд зориулан хялбаршуулсан байдлаар бичигдсэн. Ихэнх хүмүүс квант физикийг бодит амьдралаас хол хөндий мэтээр төсөөлдөг. Харин зохиогч бидний эргэн тойронд байгаа сэрүүлэг, компьютер, интернет, халаагуур гэх мэт зүйлсийн ажиллах зарчим квант физикийн зарим үзэгдэлд тулгуурласан байдгийг, квант физик биднээс хол биш, харин ч өдөр тутмын амьдралтай тун ойрхон зүйл болохыг маш энгийнээр, сонирхолтой байдлаар дүрслэн тайлбарласан.🧐
----------
2019 онд Бельги улсын Левён хотод суралцаж байх үедээ тэндхийн номын мухлагаас нэгэн өвөрмөц гарчигтай, тод улаан өнгийн хавтастай ном худалдан авсан минь Чад Орзел зохиогчтой “Breakfast with EInstein” гэх туйлын сонирхолтой бүтээл байлаа. Хуудсыг нь эргүүлэн хальтхан гүйлгээд харахад л гэрэл, дулаан, өнгө, атом, хориотой бүс, хагас дамжуулагч, үелэх систем, соронз гээд чухам танил үгнүүд дурайн харагдаж байв. Зарим хэсгийг нь уншаад үзэхэд л шинжлэх ухааны ойлголтуудыг, тэр дундаа квант физикийг тун нухацтай атлаа энгийн ойлгомжтой байдлаар тайлбарлан бичсэн байх ажээ. Суралцаж байсан нанотехнологийн чиглэлтэй маань ч тун ойр сэдэв учир шуудхан худалдаж авав. Дотуур байрандаа ирэн номоо үргэлжлүүлэн унших явцдаа “Манай улсад шинжлэх ухааны чиглэлийн ном тун ховор байдаг юм байна шүү дээ. Яг ийм төрлийн, аливаа юмс, үзэгдлийн цаад нарийн учир шалтгааныг тайлбарласан ном байдаг бол сайхан аа. Магадгүй би өөрөө энэ номыг орчуулж болох юм биш үү?” хэмээн хальт бодоод өнгөрсөн нь санааны мухарт хадгалагдан үлджээ.
Монголдоо буцаж ирээд “бичих”, “хичээл заах” гэсэн хоёр төрлийн ажлыг голчлон хийж гүйцэтгэсэн ба 2023 онд их сургуулийн сурах бичиг зохиох ажилд оролцсон маань надад тун чиг урам зориг, итгэл өгөв. “Нөгөө номоо орчуулж болох юм биш үү? Чадах юм биш үү?” гэсэн найдвар төрөв. Улмаар ахлах ангийн сурагчдад химийн хичээл заах явцдаа монгол хэлээр хэвлэгдсэн шинжлэх ухааны холбогдол бүхий унших материал, ном төдийлөн олон тоотой байдаггүйг анзаарч, хүмүүс уншихгүй байсан ч гэсэн ийм төрлийн номыг хэн нэгэн заавал орчуулах хэрэгтэй гэж бодон энэхүү номоо орчуулахаар шийдсэн билээ.
“Нар яаж оршин тогтнодог вэ?”, “Халсан бие яагаад улайсдаг вэ?” Соронз яагаад соронзлогддог вэ?”, “Компьютерын чипний цаад нарийн учир юу вэ?”, “Молекул хэрхэн бий болдог вэ?”, “Цацраг идэвх гэж юу вэ?” гээд олон сонирхолтой сэдвийг уг номд тайлбарлан бичсэнийг монгол хэлнээ орчуулан “Эйнштейнтэй цайлах зуур” нэртэйгээр уншигч та бүхэнд ийнхүү хүргэж байна. Нэг дор суугаад уншиж дуусгах ном лавтай биш тул нээрэнгээсээ л цай уух зуураа, аажуу тайвнаар, сэдэв сэдвээр нь бүтээлч байдлаар сониучирхан уншаарай гэж орчуулагч миний зүгээс зөвлөх байна. Квант физик гэхээр хүмүүс ихэнхдээ эрдэмтэн судлаачдад л хамаатай сэдэв гэж ойлгодог. Харин энэ номыг уншсанаар та жирийн өдөр тутмын амьдрал дахь юмс, үзэгдэл хэрхэн квант физиктэй холбогддогийг, ер нь шинжлэх ухаан гэдэг амьдралаас хол тасархай биш болохыг, математик, хими, физик, биологи зэрэг салбарууд салангид тусдаа биш, харин ч өөр хоорондоо нягт уялдаатай байдгийг ойлгож, эргэн тойрноо өөр нүдээр харж эхлэх болно. Зохиогч уг номыг олон нийтэд зориулан бичсэн учир шинжлэх ухааныг сонирхдог, сонирхдоггүй, ойлгодог, ойлгодоггүй хэн бүхнийг уншаасай хэмээн бодож байна. Ялангуяа ахлах ангийн сурагчид, шинжлэх ухаан, инженерчлэлийн чиглэлээр суралцаж буй оюутан залуус, ерөнхий боловсролын сургуулийн хими, физикийн багш нар, залуу судлаачид, инженерүүдэд тун хэрэгцээтэй байх болов уу.
Хүндэтгэсэн,
Наранбаатарын ЗОЛЗАЯА
Захиалга: https://www.kharaatsai-lab.com/
----------
⭐️⭐️⭐️⭐️⭐️Amazon 4️⃣.5️⃣ ratings
⭐️⭐️⭐️⭐️⭐️Goodreads 3️⃣.5️⃣ ratings
----------
ℹ️ Зохиогч: ЧАД ОРЗЕЛ
ℹ️ Орчуулсан: Н.ЗОЛЗАЯА
ℹ️ Хянан найруулсан: Ч.ГАНЗОРИГ, А.СУГАРМАА
ℹ️ Дизайнер: Д.ХЭРЛЭНБАЯР, Б.МӨНХМЭНД
ℹ️ Хавтасны зураг: Э.БАЗАРРАГЧАА
ℹ️ Copyright: ©2018 BenBella Books, Inc.
ℹ️ Эрхлэн гаргасан: ©2025 Garuna publishing
ℹ️ Хэмжээ 130*198 | нүүр 315
ℹ️ ISBN: 978-9919-9077-4-7
ℹ️ ДАА 530 | ННА 22.3 | O-429
----------
Release date 2️⃣0️⃣2️⃣5️⃣-0️⃣1️⃣-1️⃣0️⃣
#ФИЗИК #гайхамшигтфизик #ШинэНом
