22/12/2021
တရုတ်နိုင်ငံထုတ် FD-2000B မြေပြင်မှ ဝေဟင်ပစ် ဒုံးကျည်စနစ် ပထမအသုတ် မော်ရိုကို လက်ခံရရှိ
--------------------------------------------
မော်ရိုကိုနိုင်ငံသည် တရုတ်နိုင်ငံထုတ် FD-2000B မြေပြင်မှ ဝေဟင်ပစ် ဒုံးကျည်စနစ် ပထမအသုတ်ကို လက်ခံ ရရှိပြီဖြစ်ပြီး မော်ရိုကိုနိုင်ငံ ဆီဒီယာဟျားအယ်လ်ဂါ့ဘ်မြို့အနီးရှိ အခြေစိုက်တပ်စခန်းတွင် နေရာချထားကြောင်း ဘလာဒီနက်ဝက်ဆိုက်တွင် ဒီဇင်ဘာလ ၁၈ ရက်နေ့ကဖော်ပြထားသည်။
မော်ရိုကိုနိုင်ငံတွင် စစ်လက်နက်ပစ္စည်းများဝယ်ယူနိုင်ရန် ၂၀၂၁ ခုနှစ် ကာကွယ်ရေးဘတ်ဂျက်ကို ၄% တိုးပေး ထားခဲ့သည်။ မော်ရိုကိုတပ်မတော်ခေတ်မီအောင်အဆင့်မြှင့်တင်ရေးစီမံချက်ကို ၂၀၁၇ ခုနှစ်မှစတင်ရေး ဆွဲခဲ့ ကာ ၂၀၂၀ ပြည့်နှစ်တွင် စတင်ဆောင်ရွက်ခဲ့ပြီး ၂၀၃၀ ပြည့်နှစ်အထိ ဆောင်ရွက်သွားရန် ရည်မှန်းထားခဲ့သည်။
စီမံချက်အရ မော်ရိုကို ကြည်း၊ ရေ၊ လေ တပ်မတော်အတွက် စစ်လက်နက်ပစ္စည်းများကို အဆင့်မြှင့်တင် သွားရန် အမေရိကန်ပြည်ထောင်စု၊ နေတိုးအဖွဲ့တို့နှင့် အပြန်အလှန်ပူးပေါင်းဆောင်ရွက်သွားမည်ဖြစ်သည်။
မော်ရိုကိုတပ်မတော်သည် အင်အားကြီးမားပြီး ခေတ်မီတပ်မတော်တစ်ရပ်အဖြစ်တည်ဆောက်သွားရန် သံန္နိဋ္ဌာန် ချမှတ်ထားသည်။ မော်ရိုကိုတပ်မတော်တွင် အင်အား ၂၃၅,၀၀၀ ရှိပြီး အရန်အင်အားမှာ ၂၅၀,၀၀၀ ရှိကာ ကြည်းတပ်အင်အားမှာ တပ်မတော်တစ်ရပ်လုံး၏ ၈၈% ရှိကြောင်းသိရသည်။
လက်ရှိအချိန်တွင် မော်ရိုကိုတပ်မတော်တွင် VT-1A ပင်မတိုက်ပွဲဝင်တင့်ကားများ၊ Type 56 7.62mm မောင်း ပြန်ရိုင်ဖယ်များ၊ HJ-8L တင့်ဖျက်ဒုံးကျည်များ၊ PHL-03 နှင့် WS-2D MLRS အတွဲလိုက်ဒုံးပစ်လောင်ချာများ၊ Sky Dragon 50 တာလတ်ပစ် မြေပြင်-ဝေဟင်ပစ် လေကြောင်းရန်ကာကွယ်ရေးဒုံးကျည်များနှင့် Type 90 35mm လေယာဉ်ပစ်စက်သေနတ်တို့အပါအဝင် တရုတ်နိုင်ငံထုတ် စစ်လက်နက်ပစ္စည်းများကိုအသုံးပြုလျက်ရှိသည်။
FD-2000 သည် တရုတ်စစ်လက်နက်ပစ္စည်းထုတ်လုပ်ရေးကုမ္ပဏီဖြစ်သော China Precision Machinery Import & Export Corporation (CPMIEC) က ဒီဇိုင်းရေးဆွဲထုတ်လုပ်ထားသည့် HQ-9 ခေတ်မီတာဝေးပစ် လေကြောင်းရန်ကာကွယ်ရေးဒုံးကျည်စနစ်ကို အဆင့်မြှင့်တင်ထားသည့် ပြည်ပပို့ကုန်ပုံစံလက်နက်စနစ်ဖြစ် သည်။
FD-2000B သည် FD-2000 တာဝေးပစ်လေကြောင်းရန်ကာကွယ်ရေးဒုံးကျည်စနစ်ကို အဆင့်မြှင့်တင်ထားသည့် ပုံစံသစ်လက်နက်အမျိုးအစားဖြစ်ပြီး အမြင့်ပေအမျိုးမျိုးမှ ပျံသန်းလာသော သမရိုးကျတိုက်လေယာဉ်များ၊ ကိုယ် ပျောက်တိုက်လေယာဉ်များ၊ ရဟတ် ယာဉ်များ၊ ခရုစ်ဒုံးကျည်များနှင့် ပဲ့ထိန်းဒုံးကျည်များကို ကြားဖြတ်ပစ်ချတိုက် ခိုက်နိုင်သည့် စွမ်းရည်ရှိသော ဒုံးကျည်စနစ်ဖြစ်သည်။
၎င်းအပြင် အဆိုပါဒုံးကျည်စနစ်သည် တာတိုမှ တာဝေးအထိ ပစ်မှတ်မျိုးစုံကို တန်ပြန်ပစ်ခတ်နိုင်စွမ်းရှိသည့် အ ပြင် အခြားလေကြောင်းရန်ကာကွယ်ရေးလက်နက်စနစ်များနှင့်လည်း ချိတ်ဆက်ထားနိုင်သည့် လက်နက်စနစ် ဖြစ်သည်။
တရုတ်လက်နက်ကိုင်တပ်ဖွဲ့များတွင် HQ-9 (FD-2000) လက်နက်စနစ်တွင် အမိန့်ပေးယာဉ် ၁ စီး၊ ထိန်းချုပ်ရေး ယာဉ် ၆ စီး၊ ပစ်မှတ်သတ်မှတ်ရေးရေဒါယာဉ် ၆ စီး၊ ရေဒါရှာဖွေရေးယာဉ် ၆ စီး၊ ဒုံးကျည်ပစ်စင်ပါယာဉ် ၄၈ စီးနှင့် ဒုံးကျည်အစင်းရေ ၁၉၂ စင်းအပြင် နေရာသတ်မှတ်ရေးယာဉ် ၁ စီး၊ ဆက်သွယ်ရေးယာဉ် ၁ စီး၊ အားဖြည့်ယာဉ် ၁ စီးနှင့် ထောက်ပံ့ရေးယာဉ် ၁ စီး တို့ပါဝင်ဖွဲ့စည်းထားသည်။ တပ်ရင်းတစ်ရင်းတွင် ဒုံးကျည်စနစ်ယာဉ် ၈ စီး ရှိ ကြောင်းသိရသည်။
FD-2000B လောင်ချာတင်ယာဉ်တွင် ဒုံးကျည်ပစ်စင်လေးခုပါရှိသည်။ FD-2000B မြေပြင်မှ ဝေဟင်ပစ်ဒုံးကျည် တွင် ၁၈၀ ကီလိုဂရမ်ရှိ ထိပ်ဖူးများတပ်ဆင်ထားပြီး ၄.၂ မက် အရှိန်ဖြင့် ပျံသန်းနိုင်သည်။ အမြင့်ဆုံး ကီလိုမီတာ ၃၀၀ အကွာအဝေးအထိပစ်ခတ်နိုင်ပြီး အမြင့် ၃၀ ကီလိုမီတာအထိ ပစ်ခတ်နိုင်သည်။
Ref: Morocco takes delivery of Chinese FD-2000B surface-to-air defense missile systems
Credit; PeopleMedia
