Naypyitaw Gazette Online TV

25/09/2023

10/09/2023

25/08/2023

13/08/2023

30/07/2023

30/07/2023

29/07/2023

24/07/2023

"နှစ်သောင်းကျပ်"တန် ငွေစက္ကူ ထုတ်ဝေမည်
***=***=***=***=***=***=***=***=***=***

မာရဝိဇယ ဗုဒ္ဓရုပ်ပွားတော်မြတ်ကြီးတည်‌ဆောက်ပြီးစီးမှု အထိမ်းအမှတ်အဖြစ် "နှစ်သောင်းကျပ်"တန်ငွေစက္ကူ ထုတ်ဝေမယ်လို့ မြန်မာနိုင်ငံတော် ဗဟိုဘဏ်က ကြေညာခဲ့ပါတယ်။

အဆိုပါ ကြေညာချက်အရ လာမယ့် ဇူလိုင် ၃၁ ရက်နေ့မှာ စတင်ထုတ်ဝေမှာ ဖြစ်တယ်လို့ သိရပါတယ်။

"မာရဝိဇယ"ဗုဒ္ဓရုပ်ပွားတော်မြတ်ကြီး တည် ဆောက်ပြီးစီးမှုနဲ့ ၂၀၂၂ ခုနှစ် ဇူလိုင် ၂၃ ရက်တွင်မွေးဖွားခဲ့တဲ့ ဆင်ဖြူတော်ရတနာ "ရဋ္ဌနန္ဒက" ၁ နှစ်မြောက်မွေးနေ့အထိမ်းအမှတ်အဖြစ် ဗဟိုဘဏ်က “နှစ်သောင်းကျပ်တန်"ငွေစက္ကူအမျိုးအစားသစ်ကို ဇူလိုင် ၃၁ ရက်နေ့မှာ စတင် ထုတ်ဝေသွားမှာဖြစ်တယ်လို့ သိရပါတယ်။

ငွေစက္ကူ အရွယ်အစားဟာ အလျား(၁၅) စင်တီမီတာ၊ အနံ(၇)စင်တီမီတာနဲ့ အစိမ်းနုရောင်အဖြစ် ထုတ်ဝေမှာဖြစ်ပြီး အရေအတွက်ကန့်သတ်နဲ့ထုတ်ဝေသွားမှာဖြစ်တယ်လို့ ဗဟိုဘဏ်မှ ဇူလိုင် ၂၃ ရက်(ယနေ့)က ထုတ်ပြန်တဲ့ ကြေညာချက်မှာ ဖော်ပြထားပါတယ်။

အဆိုပါ ငွေစက္ကူအသစ်ကို မြန်မာနိုင်ငံတွင်း လှည့်လည်သုံးစွဲနေတဲ့ ငွေစက္ကူတွေထဲက ဟောင်းနွမ်းပြီး လှည့်လည်သုံးစွဲရန်မသင့်တဲ့ ငွေစက္ကူအမျိုးအစားတို့နဲ့ “တန်ဖိုးတူ"လဲလှယ်ပေးတဲ့ ပုံစံနဲ့ ဖြန့်ဝေသွားမှာလို့လည်း သိရပါတယ်။

နှစ်သောင်းကျပ်တန်ရဲ့ ထိပ်ပိုင်းမှာ “မြန်မာနိုင်ငံတော်ဗဟိုဘဏ်" စာတန်းရိုက်နှိပ်ထားပြီး မျက်နှာစာဖက်အလယ်ပိုင်းတွင် ရတနာဆင်ဖြူတော်ပုံရိုက်နှိပ်ထားသလို ငွေစက္ကူလက်ယာဘက်တွင် ငွေစက္ကူတန်ဖိုးကို မြန်မာစာသားဖြင့်ဖော်ပြထားပါတယ်။

ထောင့်သုံးထောင့်တွင်လည်း ငွေစက္ကူတန်ဖိုးအား မြန်မာ၊အင်္ဂလိပ်ဂဏန်းတွေနဲ့ ရိုက်နှိပ်ထားပါတယ်။ ငွေစက္ကူနံပတ်ကို မြန်မာအက္ခရာ မြန်မာဂဏန်းနဲ့ အလျားလိုက်၊ အင်္ဂလိပ်အက္ခရာ အင်္ဂလိပ်ဂဏန်းနဲ့ ဒေါင်လိုက် ရိုက်နှိပ်ထားပြီး လက်ဝဲဘက်မှာ ရတနာဆင်ဖြူတော်ဦးခေါင်းပုံ ရေစာပါရှိတယ်လို့ ဆိုပါတယ်။

ငွေစက္ကူရဲ့ ဘယ်ညာအစွန်းတွေမှာ အမြင်အာရုံချို့ယွင်းသူတွေ အထိအတွေ့နဲ့ အာရုံ ခံသိရှိနိုင်တဲ့ မျဉ်းတို (၁၂)ချောင်းစီရိုက်နှိပ်ထားပြီး ကျောဘက်မှာ စစ်ကိုင်းတံတားပုံနဲ့ဧရာဝတီတံတား(ရတနာပုံ)တို့ကို ရိုက်နှိပ်ထားပါတယ်။ အပေါ်ပိုင်းမှာ “CENTRAL BANK OF MYANMAR"စာတန်း၊အောက်ပိုင်း၌ “TWENTY THOUSAND KYATS”စတဲ့စာတန်းတွေ ရိုက်နှိပ်ထားပါတယ်။

နောက်ကျောဘက်မှာ ရှုထောင့်အမျိုးမျိုးနဲ့ ပြောင်းလဲကြည့်ပါက ရွှေရောင်ကနေ အစိမ်းရောင် ပြောင်းလဲတဲ့ Colour Shift လုံခြုံရေးကြိုးကို ဒေါင်လိုက်မြှုပ်နှံထည့်သွင်းထားတယ်လို့ သိရပါတယ်။

#သတင်း
#ငွေစက္ကူ #နှစ်သောင်းတန် #မာရဝိဇယဗုဒ္ဓရုပ်ပွားတော်

24/07/2023

"ပုံတစ်ပုံက ရတဲ့အတွေး"
====+====+====+====

အမျိုးတို့ရေ...
ဒီတစ်ခါတော့ မင်မင်အနေနဲ့ ပုံတစ်ပုံကရတဲ့ အတွေး အပိုင်းအစအချို့ကို မျှဝေပေးမှာ ဖြစ်ပါတယ်။ ပုံလေးကိုကြည့်လိုက်တာနဲ့ မင်မင်ဘာပြောမယ်ဆိုတာ အမျိုးတို့ခံစားမိမှာပါ။

ဒီပုံကတော့ စပါးကြီးမြွေနဲ့ တောကြီး မြွေဟောက်တို့ ရန်ပွဲမှာ နှစ်ကောင်လုံးသေကြရတဲ့ ပုံလေးပါ။ ဒီပုံလေးကိုမြင်တော့ မင်မင်တို့ ငယ်ငယ်က သင်ခဲ့ရတဲ့ ဟင်္သာကိုးသောင်း ပုံပြင်လေးကို သတိရမိတယ်။ ဟင်္သာတွေဟာ သူတို့နေထိုင်တဲ့ ဂူပေါက်မှာ ပင်းကူက အိမ်ဖွဲ့ပြီး ဝင်တိုးလာတဲ့ ဟင်္သာတွေကို ဖမ်းယူစားသောက်စားသောက်လို့ အပြင်ထွက်ပြီး အစာမရှာနိုင်ဘဲ အချင်းချင်း သတ်ဖြတ်စားသောက်ကြလို့ ဟင်္သာကိုးသောင်းလုံး အသက်ဆုံးရှုံးခဲ့ရတယ်လို့ ဆိုပါတယ်။ ပုံပြင်ရဲ့ ဆိုလိုရင်းက အချင်းချင်းစည်းလုံးဖို့၊ ပြဿနာကြုံလာရင် အတူပူးပေါင်း ဖြေရှင်းဖို့၊ အဲလိုမဟုတ်ဘဲ စိတ်ဝမ်းကွဲပြီး အချင်းချင်း တိုက်ခိုက်ကြမယ်ဆိုရင် အဆုံးသတ်မှာ အားလုံးဒုက္ခတွေ့ပြီး အဆုံးမှာ အသက်ဆုံးရှုံးရတဲ့အထိ အဖြစ်ဆိုးနဲ့ ရင်ဆိုင်ရနိုင်တယ်ဆိုတာ သတိထားဆင်ချင်နိုင်ဖို့ ဖြစ်ပါတယ်။

အဲပုံပြင်ကို စသင်ရတော့ ကလေးအတွေးနဲ့ မဖြစ်နိုင်တာကွာ ဘယ်သတ္တဝါမှ ကိုယ့်အမျိုးနွယ်ကို ကိုယ်ပြန်မစားဘူးလို့ တွေးခဲ့တာပေါ့။ တကယ် လက်တွေ့ဘဝကို ကိုယ်တိုင်ဖြတ်သန်းရတဲ့အခါ အချင်းချင်း အနိုင်ကျင့်၊ တိုက်ခိုက်၊ ​ချောက်တွန်းပြီး ကောင်းမွန်နေတဲ့ ပတ်ဝန်းကျင်တစ်ခုကနေ သွေးကွဲပျက်စီးပြီး ကျရှုံးရတဲ့အထိ ဖြစ်ရတဲ့ အခြေနေတွေ မြင်တွေကြားသိရချိန်မှာ ပုံပြင်ဆိုတာ ဘဝရဲ့အမှန်တရားတွေကို ဥပမာပေးပြောပြတဲ့ သင်ခန်းစာတွေဆိုတာ လက်ခံခဲ့ရပါတယ်။

အခုဖော်ပြထားတဲ့ ပုံလေးကလည်း ဟင်္သာကိုးသောင်းပုံပြင်လိုပါပဲ။ အကောင်းဆုံး ဥပမာပေးတဲ့ ပုံလေးလို့ ဆိုနိုင်ပါတယ်။ ပုံလေးကို လေ့လာကြည့်ရအောင်ဗျာ...။ ပုံထဲမှာ တောကြီးမြွေဟောက်နဲ့ စပါးကြီးမြွေဟာ အစာအဟာရအတွက် မြွေဆိုတဲ့ မူလမျိုးနွယ်ကိုမေ့ပြီး အချင်းချင်း တိုက်ခိုက်ခဲ့ကြတာပါ။ မြွေဟောက်ကတော့ ညစ်အားကောင်းတဲ့ စပါးကြီးမြွေကြောင့် အတွင်းကြေ ကြေပြီး အရိုးတွေကြိုးကုန်တယ်။ နောက်ဆုံးမှာတော့ အသက်သေဆုံးသွားတယ်။ စပါးကြီးမြွေက တောကြီးမြွေဟောက်ရဲ့ ပြင်းထန်တဲ့အဆိပ်ကြောင့်သေရတယ်။ ဒါ့ကြောင့်လည်း ဇာတ်တူသားမစားဖို့ ဟင်္သာကိုးသောင်းပုံပြင်နဲ့ ဥပမာပေး ဆုံးမခဲ့တာပါ။

အသိဥာဏ်ရှိပြီး အမှားအမှန်ကို စဥ်းစားတွေးတောနိုင်တဲ့ ကျွန်တော်တို့လူသားတွေအနေနဲ့ ပုံထဲက မြွေနှစ်ကောင်ရဲ့အဖြစ်ကိုနမူနာယူပြီး ဇာတ်တူသားမစားကြဖို့လိုပါတယ်။ စီးပွားရေးနယ်ပယ်မှာပဲဖြစ်ဖြစ်၊ လုပ်ငန်းခွင်မှာပဲဖြစ်ဖြစ် တစ်ဦးနဲ့တစ်ဦး ကိုယ်သာတဲ့အင်အားနဲ့ အသေသတ်၊ အပြုတ်ချတာမျိုး လုပ်မိဖို့လိုပါတယ်။ အဲလိုမဟုတ်ဘဲ ငါစွဲအတ္တကြီးမားပြီး ဘဝတူအချင်းချင်း၊ လုပ်ငန်းတူအချင်းချင်း တိုက်ခိုက်ကြမယ်ဆိုရင် အဆုံးမှာ နှစ်ဖက်လုံး ဆုံးရှုံးပျက်စီးဖို့ရှိပြီး ဘေးပတ်ဝန်းကျင်ပါ ထိခိုက်မှုတွေ ရှိလာစေမှာဖြစ်ပါတယ်။

အမြင်မတူ စရိုက်မတူ စိတ်တွေဝေးသွားရင်ကိုယ့်လမ်းကိုယ် သွားလိုက်ပါ။ နယ်ပယ်တူ၊ အလုပ်တူနေလို့ ပြိုင်ဆိုင်ထိုးဖောက်ရမယ်ဆိုရင်လည်း တဖက်သားကို တိုက်ခိုက်တာမျိုးမဟုတ်ဘဲ ကောင်းသောယှဥ်ပြိုင်မှုမျိုးနဲ့ ယှဉ်ပြိုင်လိုက်ပါ။ မေတ္တာတရားနဲ့ ဘဝကို ရှေ့ဆက်ပါ။ အဆုံးသတ်လို့ ဘဝခရီးကနေ ထွက်ခွာရချိန်မှာ ကိုယ့်လိပ်ပြာခုံရုံးမှာ ရဲရဲဝံ့ဝံ့ စစ်ဆေးခံနိုင်သူတွေ ဖြစ်ကြပါစေ....။

#ချစ်ခြင်းများစွာဖြင့်
#ပုံတစ်ပုံကရတဲ့အတွေး

24/07/2023

" အပြစ်မကင်းနိုင် "
🙏🙏🙏🙏🙏🙏

တစ်ဦးနှင့်တစ်ဦး အပြစ်မရှာပါနှင့်၊ မပုတ်ခတ်မိပါ စေနှင့်၊ နှုတ်စောင့်စည်းပါ၊ အထူးသတိပြု၍ ရှောင်ကြဉ်ပါ။

တစ်ဦးနှင့်တစ်ဦး အပြစ်ရှာမယ်ဆိုရင် သူ့မှာလည်း အပြစ်ရှိနေသလို ကိုယ့်မှာလည်း အပြစ်ရှိနေဦးမှာပဲ၊ ပုထုဇဉ် ပုဂ္ဂိုလ်မှန်သမျှ အနည်းနှင့်အများ ဘယ်ပုဂ္ဂိုလ်မှ အပြစ်မကင်း နိုင်ကြဘူး။

✒ ဝန်းသိုဆရာတော်ဘုရားကြီး

#ဆရာတော် #တရားစကား
#ပြောစကား #နှလုံးလှစကားများ

24/07/2023

✒ လူငယ်များသို့ ✒

အခြားသူတွေရဲ့
မနာလိုမှုတွေ အပြောတွေကို
ဂရုစိုက်နေသမျှ
အမြဲတမ်း သူတို့ရဲ့
အကျဉ်းသား ဖြစ်နေဦးမှာပဲ

✒ Lao Tzu

သင် မပျံသန်းနိုင်ရင် ပြေးပါ ။
မပြေးနိုင်ရင် လမ်းလျှောက်ပါ ။
လမ်းမလျှောက်နိုင်ရင် ဒရွတ်တိုက်သွားပါ ။
သင် ဘာပဲဖြစ်ဖြစ်
အရှေ့ကိုဆက်သွားနေဖို့တော့လိုတယ် ။

✒ Martin Luther King Jr.

#ပြောစကား
#စိတ်ခွန်အားစာစု #လူငယ်

24/07/2023

😘 ချေးခြောက် ရေမနှူးနဲ့ 😘

နိုင်ငံတိုင်း လူမျိုးတိုင်းမှာ စကားပုံတွေ စကားလိမ်တွေရှိကြပြီး ဒါတွေကို ပြောဆိုလိုတဲ့ စကားအကြောင်းအရာအတွက် တိုက်ရိုက်မပြောလိုတဲ့အခါ စကားပြောပညာရည်တစ်ခု အဖြစ်နဲ့ အသုံးချ ပြောဆိုကြပါတယ်။

ဒါဟာ လူမျိုးတစ်မျိုး၊ နိုင်ငံတစ်နိုင်ငံရဲ့ ယဉ်ကျေးမှုအဆင့်အတန်းကို ဖော်ပြရာကြပြီးတော့ စာပေတက်ခြင်း၊ မတက်ခြင်းထက် စကားအရာမှာ၊ ယဉ်ကျေးပျူငှာမှုအရာမှာ အဆင့်အတန်းမြင့်မားတာကို ပြသနိုင်တဲ့အရာတစ်ခုလည်းဖြစ်ပါတယ်။

ဒါကြောင့် လူငယ်တွေအနေနဲ့ မြန်မာ့ရိုးရာစကားပုံနဲ့ ပုံပြင်တွေကို လက်ဆင့်ကမ်းသယ်ဆောင်လာဖို့ လိုအပ်ပြီး ပျောက်ပျက်မသွားအောင် ထိန်းသိမ်းသင့်တဲ့ အရာထဲမှာ ပါ၀င်နေပါတယ်။ ဒီတစ်ခေါက်မှာတော့ ရှေးလူကြီးသူမတွေ ပြောဆိုလေ့ရှိတဲ့ စကားပုံတွေထဲက 😘 ချေးခြောက် ရေမနှူးနဲ့ 😘 ဆိုတဲ့ စကားပုံတွေကို ဗဟုသုတအနေနဲ့ ဖော်ပြပေးသွားမှာဖြစ်ပါတယ်။

😘 ချေးခြောက် ရေမနှူးနဲ့ 😘

ဒီစကားပုံရဲ့ ပေးလိုတဲ့အရာက အဟောင်းကို အသစ်ပြန်မလုပ်ဖို့ လွန်ခဲ့ပြီးသော ကိစ္စတခုကို ပြန်ပြောနေယုံနဲ့ အကျိုးရှိမှာမဟုတ်ဘူးဆိုတဲ့ အဓိပ္ပါယ်ဖြစ်ပါတယ်။

စကားပုံနဲ့ ပုံပြင်ဆိုတာ လူသားတွေအတွက် အမှားနဲအောင်၊ အကျိုးမရှိတဲ့ အလုပ်တွေမလုပ်မိအောင်၊ အမှားတွေမလုပ်မိအောင်၊ ဘဝအတွက် ကောင်းမွန်မှန်ကန်တဲ့ အရာတွေ လုပ်ဆောင်နိုင်အောင် သင်ခန်းစာပေးပြောဆိုတဲ့ အရာတွေပါ။

😘 ချေးခြောက် ရေမနှူးနဲ့ 😘 ဆိုတဲ့ စကားပုံဟာလည်း လူသားတွေ၊ အထူးသဖြင့် ဘဝကို စတင်နေတဲ့ လူငယ်တွေအတွက် သင်ခန်းစာပေး ပြောဆိုထားတဲ့ စကားပုံဖြစ်ပါတယ်။ လူငယ်ဆိုတာ စိတ်
ခံစားချက်ပြင်းထန်တဲ့အရွယ်၊ ခံစားချက်ကို မေ့
ဖျောက်ဖို့ ခတ်ခဲတဲ့အရွယ်၊ ကြိုးစားရင် ကြိုးစားသလောက် ကိုယ်စွမ်းအား၊ စိတ်စွမ်းအား လိုက်နိုင်တဲ့အရွယ်ဖြစ်လို့ ကိုယ့်ကိုကိုယ် သတိထားပြင်ဆင်နိုင်ဖို့ လိုပါတယ်။

အောင်မြင်သူတစ်ယောက်ဖြစ်ချင်ရင် လူငယ်တွေအနေနဲ့ ကိုယ့်ကိုကိုယ် အားမနာတမ်း ဝေဖန်စစ်ဆေးရပါမယ်။ ကိုယ်ဟာ အတိတ်ကအရိပ်အောက်မှာ လောင်းရိပ်မိနေသူလား၊ ကိုယ်ဟာ ဘဝကို သတ္တိရှိရှိနဲ့ အကောင်းဆုံး ကြိုးစားနေသူလား ဆိုတာသိဖို့လိုပါတယ်။

ကိုယ်ဟာ အတိတ်က ဖြစ်ခဲ့ပြီးသား အရာကို မေ့နိုင်ဖို့ မဆိုထားနဲ့ အဲဒီ အဖြစ်ကို တသသရှိနေသူဆိုရင် အောင်မြင်ဖို့ မဖြစ်နိုင်ပါဘူး။ ဘာလို့လည်းဆိုတော့ အတိတ်မှာပဲ ကိုယ့်ရဲ့ စိတ်စွမ်းအား၊ ကိုယ်စွမ်းအားက အချိန်ကုန်နေလို့ပါ။ အနာဂတ်ဆိုတာဝေးလို့ ကိုယ်ပိုင်ဆိုင်ထားတဲ့ လက်ရှိပစ္စုပ္ပန်မှာတောင် ကိုယ့်ဘဝတိုးတက်စေမယ့် အလုပ်၊ အတွေးနဲ့ လေ့လာသင်ယူမှုတွေ မလုပ်နိုင်လို့ပါ။

ဒါ့ကြောင့် 😘 ချေးခြောက် ရေမနှူးနဲ့ 😘 ဆိုတဲ့ စကားပုံလေးကို ဖော်ပြပေးတာပါ။ အဲတော့ အတိတ်က ဖြစ်ခဲ့ပြီးသားအရာတွေဟာ ပြန်ပြင်လို့မရလို့ အဲအတွက် ပျော်ရွှင်၊ ဝမ်းနည်း၊ ပူဆွေး တာတွေမလုပ်ပါနဲ့...။ သင်ခန်းစာယူပါ။ လက်ရှိပိုင်ဆိုင်ထားတဲ့ ပစ္စုပ္ပန်အချိန်ကို တန်ဖိုးထားပါ။ အသုံးချပါ။ အနာဂတ်အတွက် ရည်မှန်းချက်ထားပြီး ပုံဖော်ပါ။ အောင်မြင်သောဘဝတွေ ပိုင်ဆိုင်နိုင်ကြပါစေ။

အခုဖော်ပြခဲ့တာကတော့ 😘 ချေးခြောက် ရေမနှူးနဲ့ 😘 ဆိုတဲ့ စကားပုံရဲ့ ဆိုလိုရင်းအဓိပ္ပါယ်ကို အသုံးချပြီး လူမှုဘဝအတွက် ကောင်းမွန်တဲ့အရာတွေ တည်ဆောင်နိုင်ဖို့ ဆွေးနွေးဖော်ပြခဲ့တာ ဖြစ်ပါတယ်။ နောက်နေ့တွေမှာလည်း အခုလိုထူးခြားပြီး အဓိပ္ပါယ်ရှိတဲ့ စကားပုံလေးတွေကို အလျင်းသင့်သလို ထပ်ပြီး တင်ဆက်ပေးသွားပါဦးမယ်။ ချစ်ခြင်းများစွာဖြင့် YD ။

--- Youth Directory ---

#စကားပုံ
#ဗဟုသုတ

24/07/2023

💕 အနိုင်မခံ 💕

ဒီ​​နေ့​​​​မှာတော့ ၁၉၆၁ ခုနှစ် ဖေဖော်ဝါရီလက ငွေတာရီမဂ္ဂဇင်းမှာ ဖော်ပြခဲ့တဲ့ ဆရာ လယ်ဝေး-ဝင်းအောင်ရဲ့ 💕 အနိုင်မခံ 💕 ကဗျာကို လေ့လာနိုင်အောင် ကူးယူဖော်ပြပေးမှာ ဖြစ်ပါတယ်။

💕 အနိုင်မခံ 💕

သုခချမ်းသာ၊ ပြည့်စုံစွာနှင့်
လူ့ရွာတခေါက်၊ ငါလျှင်ရောက်လည်း
ဝမ်းမြောက်သာရွှင်၊ မဖြစ်ချင်ခဲ့။

ဤဘဝထဲ၊ လွန်ဆင်းရဲ၍
ငမွဲဘဝ၊ ငါ့မှာရလည်း
နွမ်းလျစိတ်ထဲ၊ ဝမ်းမနဲခဲ့။

လောကလူ့ ရွာ၊ ဤကမ္ဘာဝယ်
တွဲကာကောင်းဆိုး၊ ထိုနှစ်မျိုးသည်
ရှိရိုးကာသာ၊ ဓမ္မတာတည့်။

အို....လောကဓံ
ငါ့ထံလာရောက်၊ သင်လျှင်ချောက်လည်း
မကြောက်ဘဲသာ၊ ယောက်ျားငါဟု
ကြမ္မာမယိုးနေတော့မည်။

✒ လယ်ဝေး-ဝင်းအောင်
ငွေတာရီမဂ္ဂဇင်း (၁၉၆၁ ဖေဖော်ဝါရီလ)

ချစ်ရတဲ့ အမျိုးတွေအားလုံး YD က တင်ဆက်ပေးတဲ့ သုတ၊ ရသ စာပေတွေ၊ ကဗျာ၊ ကာတွန်း၊ တေးထပ်နဲ့ သီချင်းလေးတွေကို ဖတ်ရှုခံစားရင်း စိတ်ချမ်းသာ၊ ကိုယ်ကျန်းမာစွာဖြင့် အောင်မြင်သောဘဝတွေ ပိုင်ဆိုင်နိုင်ကြပါစေ...။


#ကဗျာ

24/07/2023

အနုပညာတက္ကသိုလ်က ကျောင်းသားသစ်ခေါ်ယူ
***=***=***=***=***=***=***=***=***=***=***

အမျိုးသားယဉ်ကျေးမှုနှင့် အနုပညာတက္ကသိုလ်(ရန်ကုန်)က ၂၀၂၃- ၂၀၂၄ ပညာသင်နှစ်အတွက် ပထမနှစ်ဝင်ခွင့်လျှောက်လွှာခေါ်ယူနေတယ်လို့ သိရပါတယ်။

လျောက်ထားလိုသူတွေအနေနဲ့ ယခင်သင်ကြားပေးနေတဲ့ ဂီတ၊ သဘင်၊ ပန်းချီ၊ ပန်းပု၊ ရုပ်ရှင်နှင့်ပြဇာတ်စတဲ့ ဘာသာတွေအပြင် ထပ်မံတိုးချဲ့ဖွင့်လှစ်မယ့် ယဉ်ကျေးမှုအမွေအနှစ် စီမံခန့်ခွဲမှုပညာကိုပါ လျောက်ထားလို့ ရတယ်လို့ ဆိုပါတယ်။

လျောက်ထားတဲ့ ကျောင်းသားသစ်တွေအနေနဲ့ (က) တက္ကသိုလ်ဝင်စာမေးပွဲ အောင်မြင်သူဖြစ်ရမယ်။ ( ခ ) သက်ဆိုင်ရာ အထူးပြုဘာသာရပ်နဲ့ ကိုက်ညီတဲ့ ကိုယ်အင်္ဂါကျန်းမာသန်စွမ်းသူ ဖြစ်ရမယ်။ ( ဂ ) အနုပညာဝါသနာပါသူဖြစ်ရမယ်။ (ဃ) နိုင်ငံသားစိစစ်ရေး ကတ်ပြားအမှတ် (နိုင်)/ (ပြု)/(ဧည့်)ကိုင်ဆောင်ထားသူဖြစ်ဖို့လိုပြီး (မိတ္တူ)ကို သင်ယူလိုသည့် အထူးပြုဘာသာရပ်ကို ဦးစားပေးလျှောက်ထားတဲ့ လျှောက်လွှာနဲ့အတူ ပူးတွဲလျှောက်ထားရပါမယ်လို့ ဆိုပါတယ်။

ပထမနှစ်တက်ရောက်ခွင့်ရတဲ့ ကျောင်းသား/ ကျောင်းသူတွေအနေနဲ့ သက်ဆိုင်ရာအထူးပြု နဲ့ (၄)နှစ်တက်ရောက်ရမှာဖြစ်ပြီး ဝိဇ္ဇာဘွဲ့ ရရှိမှာ ဖြစ်ပါတယ်။

လျှောက်လွှာပုံစံကို အမျိုးသားယဉ်ကျေးမှုနှင့် အနုပညာ တက္ကသိုလ်(ရန်ကုန်)၊ ၁/၅၊ အောင်ဇေယျလမ်း၊ (၂၆)ရပ်ကွက်၊ ဒဂုံ မြို့သစ်(တောင်ပိုင်း)၊ ရန်ကုန်တိုင်းဒေသကြီးမှာ ဝယ်ယူနိုင်​ပြီး တက္ကသိုလ်ဝင်စာမေးပွဲအောင်မြင် ကြောင်းထောက်ခံချက်၊ အမှတ်စာရင်းမူရင်း၊ ပတ်စပို့အရွယ် ဓာတ်ပုံ (၇)ပုံတို့နဲ့ ပူးတွဲပြီး ၂၀၂၃ ခုနှစ်၊ ဇူလိုင်လ ၂၄ ရက်ကနေ့မှ ၂၀၂၃ ခုနှစ်၊ အောက်တိုဘာလ ၁၇ ရက်နေ့ နောက်ဆုံးထားပြီး အမျိုးသားယဉ်ကျေးမှုနှင့် အနုပညာတက္ကသိုလ် (ရန်ကုန်)ကို ရုံးချိန်အတွင်း တိုက်ရိုက်ပေးပို့ လျှောက်ထားကြရမှာ ဖြစ်တယ်လို့ ဆိုပါတယ်။ လူတွေ့စစ်ဆေးမှုအနေနဲ့ ၂၀၂၃ ခုနှစ်၊ အောက်တိုဘာလ ၂၃ ရက်နေ့၊ နံနက် ၉:ဝဝ နာရီမှာ တက္ကသိုလ်ဝင်းအတွင်းက စွယ်တော်ဆောင်မှာ ပြုလုပ်သွားမှာဖြစ်ပြီး သင်တန်းဝင်ခွင့်ရ အောင်စာရင်းကို ၂၀၂၃ခုနှစ်၊ အောက်တိုဘာလ ၂၆ ရက်နေ့မှာ စွယ်တော်ဆောင်က ကြော်ငြာသင်ပုန်းမှာ ကြေညာသွား မှာဖြစ်ပြီး ၂၀၂၃ ခုနှစ်၊ နိုဝင်ဘာလ ၁ ရက်နေ့မှ စတင်ဖွင့်လှစ်သင်ကြားသွားမည်ဖြစ်တယ်လို့ သိရပါတယ်။

#အနုပညာ
#သတင်း #ယဥ်ကျေးမှုတက္ကသိုလ် #ပညာရေး

24/07/2023

✒ လူငယ်များသို့ ✒

နဲနဲပဲအောင်မြင်ချင်ရင်လည်း
နဲနဲတော့စွန့်လွှတ်ရလိမ့်မယ်။
များများအောင်မြင်ချင်သူက
များများပေးဆပ်ရလိမ့်မယ်။
ကြီးကြီးမားမားအောင်မြင်ချင်သူက
ကြီးကြီးမားမားစွန့်လွှတ်ရလိမ့်မယ်။

✒ James Allen

#ပြောစကား
#စိတ်ခွန်အားစာစု #လူငယ်

23/07/2023

23/07/2023

💕 အခြေခံ ကဗျာရေးနည်း 💕

ဒီ​​နေ့​​​​မှာတော့ ကဗျာရေးဖို့ ဝါသနာပါတဲ့ လူငယ်တွေအတွက် ဆရာ ဒေါက်တာတင့်ဆွေရေးသား မျှဝေထားတဲ့ အခြေခံ ကဗျာရေးနည်းကို လေ့လာနိုင်အောင် ကူးယူဖော်ပြပေးမှာ ဖြစ်ပါတယ်။

အခြေခံ ကဗျာရေးနည်း (၉)

(တြိချိုး အကြောင်း)
အချိုးအဆစ် အပိုဒ်သုံးပိုဒ် (တက်ချိုး၊ ခံချိုး၊ အုပ်ချိုး) ဖြစ်အောင် ရေးစပ်သော ကဗျာမျိုးကို တြိချိုးခေါ်သည်။
၁။ ဒွေးချိုးပေါ် တချိုးထပ်တိုးခြင်း ဖြစ်သည်။
ယခင်နေ့ ရေးတင်သည့် ဒွေးချိုးကို ဥပမာပြုစို့-
ထုံးဟောင်းမှီ
ကုံးသီစို့ နှစ်ဆစ်။ ။ (စို့-အပို)
ဒွေးချိုးပင်
ရေးပျိုးစဉ် လွယ်အောင်လို့
ကြွယ်နောင် ကျစ်လစ်။ ။ (ဒွေးချိုး)
-> တြိချိုးဖြစ်အောင် ဒွေးချိုးပေါ် တချိုးတိုးလျှင်-
တပိုဒ်ပဲ
တင်မြဲ အထက်ဆီ
တြိချိုး ပြောင်းမည်။ ။
ထုံးဟောင်းမှီ
ကုံးသီစို့ နှစ်ဆစ်။ ။ (စို့-ကို ဖယ်မရတော့)
ဒွေးချိုးပင်
ရေးပျိုးစဉ် လွယ်အောင်လို့
ကြွယ်နောင် ကျစ်လစ်။ ။ (တြိချိုး ဖြစ်၏။)
၂။ ပ-ချိုး၏ အဆုံးအက္ခရာကို အာ,အီ,အူ,အယ်… စသည့် တက်/ချီသံ လေလျော့ဖြင့် ပြီးဆုံးရမည်။
၃။ ဒွေးချိုးကဲ့သို့ ဒု-ချိုးနှင့် တ-ချိုးတို့၏ အဆုံးအက္ခရာတို့ကို အ,အား,အိ,အီး… စသည့် ချသံ လေပြင်းဖြင့် ကာရန်တူ ပြီးဆုံးရမည်။
၄။ ဒု-ချိုး၌ အပိုဒ်ငယ် နှစ်ပိုဒ်သာ အထားများသည်။
၅။ ပ-ချိုးနှင့် တ-ချိုးတို့၏ အပိုဒ်ငယ် ထားဖွဲ့ပုံမှာ ဒွေးချိုးနှင့် သဘောအတူ ဖြစ်သည်။
၆။ ဒု-ချိုး၏ ဒုတိယ အပိုဒ်ငယ်ကို ပေါ်လွင်သောအသံ အက္ခရာ (၅)လုံးသာ ထားရိုးဖြစ်သည်။
ထို့ကြောင့် ဒွေးချိုးမှ တြိချိုးပြောင်းလျှင် စို့-ဖယ်မရ ပြခဲ့သည်။
၇။ သုံးပိုဒ်လုံး တပိုဒ်ပြီး တပိုဒ် ကာရန်စပ်ရမည်။
(က) ပ-ပိုဒ်နှင့် ဒု-ပိုဒ်တို့ကို ခွာထောက်ကာရန်ဖြင့် စပ်ယူရမည်။
-> ဤနေရာ၌ ခွါထောက်ကာရန်နှင့် ကာရန်ပြန် တို့၏သဘောကို နားလည်ရပါမည်။
တနည်းအားဖြင့် ကာရန်ပြန်ဟူသည် ခွာထောက်ကာရန်သာ ဖြစ်သည်။ လုပ်ငန်း မတူ၍သာ ခွဲပြောရသည်။
-> ဥပမာပြရန် အထက်နှစ်ပိုဒ်-
တပိုဒ်ပဲ
တင်မြဲ အထက်ဆီ
တြိချိုး ပြောင်းမည်။ ။
ထုံးဟောင်းမှီ
ကုံးသီစို့ နှစ်ဆစ်။ ။
ပ-ချိုးအဆုံး မည်-နှင့် ဒု-ချိုးမှ သီ-ကို ကြားတွင် တပါဒခွာ၍ ကာရန်ယူထားသောကြာင့် ခွါထောက်ကာရန် ခေါ်သည်။
ဒု-ချိုးမှ မှီ-ကို ပ-ပိုဒ်မှ ပိုဒ်တွင်းကာရန် ဆီ-မည် ကာရန်ကို တပိုဒ်ခြား ပြန်ယူခြင်းဖြစ်၍ ၎င်း မှီ-ကို ကာရန်ပြန် ခေါ်ရသည်။ မှီ-မှ သီ-သို့ ကာရန်ဆက်ယူသည်။
=> ပ-ပိုဒ်နှင့် ဒု-ပိုဒ်တို့၏ ကာရန်အစပ်များ ဖြစ်သည်။
(ခ) ဒု-ပိုဒ်နှငိ့ တ-ပိုဒ်တို့၏ ကာရန်အစပ်ကား ဒွေးချိုးနှင့် အတူတူ နောက်ဆုံးအသံ ကာရန်နှစ်ခု ဖြစ်သည်။ ခွါထောက်ကာရန်ပင် ဖြစ်သည်။
=> ခွါထောက်ကာရန်သည် ခွဲထားမဟုတ်ဘဲ အသံတူ,အက္ခရာတူ, အဓိပ္ပါယ်တူ ဖြစ်ပါက ခွါထောက်အပြစ် ဒေါသသင့်၍ ကဗျာပျက်သည်ဟု ဆိုကြသည်။
=> လေ့လာရန် တြိချိုးအချို့-
ရွှေလမှာ ယုန် ဝပ် လို့
ဆန် ဖွတ် သည့် အဖိုး အို
ဟောကြည့်ပါ ဆို။ ။
ဆိုသာ ဆို၊
ပို မိုသည့် စ ကား။ ။
ကလေးအငိုတိတ် အောင်
အရိပ်အ ယောင် ပြ တယ်
ဖိုး လ နတ် သား။ ။
ပျိုလေးတို့ အိမ်ဦး
ဆတ်သွားဖူးက တရုံနှစ်ရုံ
ကျေးတွေက အုံ။ ။
မအုံပါနဲ့ ကိုရွှေကျေး။ ။
ပျိုတို့မောင် ရှင်လိင်ပြန်တော့
နားပန်ဘို့ လေး။ ။
နောက်တချီ ဒီတလုံးက
ဖုံးလိုက်ပြန်ပါ။ ။
မြုပ်လေပေါ့ ပေါ်မလာ
မဗဒေါ အလှ။ ။
တလံအကွာ လှိုင်းအကြွ
ပေါ်လိုက်ပြန်ရ။ ။
ရှေးစာကဗျာများ

✒ ဒေါက်တာတင့်ဆွေ

ချစ်ရတဲ့ အမျိုးတွေအားလုံး YD က တင်ဆက်ပေးတဲ့ သုတ၊ ရသ စာပေတွေ၊ ကဗျာ၊ ကာတွန်း၊ တေးထပ်နဲ့ သီချင်းလေးတွေကို ဖတ်ရှုခံစားရင်း စိတ်ချမ်းသာ၊ ကိုယ်ကျန်းမာစွာဖြင့် အောင်မြင်သောဘဝတွေ ပိုင်ဆိုင်နိုင်ကြပါစေ...။


#ကဗျာ

23/07/2023

"ကာဗာဝတ္ထုရေးမယ့်...ဖွေးစိန်"
===*===*===*===*===*===

ကျွန်ုပ် ဆရာကွန်းတစ်ယောက် နံနက်စောစော ကော်ဖီသောက် သတင်းစာဖတ်ပြီးသကာလ ပေးရန်ရှိသည့် စာမူတစ်ပုဒ်ကို အဆုံးသတ်နိုင်ရန် ရေးနေလေတော့သည်။

ကျွန်ုပ် စာရေးကောင်းကောင်းနှင့် ရေးနေရာမှ မသိစိတ်အတွင်းဝယ် ခြောက်ခြားဖွယ် အငွေးအသက်ကို ခံစားလိုက်ရပေသည်။
"ထူးဆန်းပေစွ"

ကျွန်ုပ်စိတ်အတွင်းဝယ် ထုံးစံအတိုင်း ကြားနေကြ စိန်လိုဖွေးတဲ့ ဖွေးစိန်လေး လာပါပြီဆိုတဲ့ အသံမကြားရပါတကား။ ခါတိုင်းနေများဆို မဟေသီဖွေးစိန်ရဲ့ ကြွေးကြော်သံကို သုံးကြိမ်တော့ အနည်းဆုံးကြားရပြီး ဖြစ်သည်။

ထူးဆန်းလွန်းသည့် သီချင်းစာသားနဲ့ အကြောင်းအရာများကိုလည်း စာဆက်မရေးနိုင်သည်အထိ တစ်တွတ်တွတ် ပြောနေကြားနေကြ ဖြစ်​ပေသည်။ ယခုမူကား ဖွေးစိန်တစ်ယောက် ငြိမ်ချက်သားကောင်းလွန်းပေစွ...။

သို့နှင့် ကျွန်ုပ်လည်း ဖွေးစိန်ရှိရာ နောက်ဖေးမီးဖိုချောင်ဘက်ကို ခြေဖွဖွနင်းရင်း မဟေသီဖွေးစိန်ရဲ့ အနေအထားကို သွားရှိုးရလေသည်။

မီးဖိုအပေါက်က ချောင်းကြည့်အဝယ် ဖွေးစိန်တစ်ယောက် မီးဖိုပေါ်က ဟင်းအိုးကို ငူငူကြီးကြည့်ကာ မဟာစဥ်းစားခန်းဝင်နေပုံရလေသည်။

တစ်ချက်တစ်ချက်တွင် ဖွေးစိန်တစ်ယောက် မျက်ခုံးကို ကွေးလိုက်ဆန့်လိုက်လုပ်ကာပင် စဥ်းစားနေလေတော့သည်။ ဒီမိန်းမ ဒီလောက်စဥ်းစားနေရင် တော်ရုံတန်ရုံတော့ မဖြစ်နိုင် အသံတိတ်ပင် စဥ်းစားနေသည်ဆိုတော့ ကျွန်ုပ်မေးကိုမေးမှရတော့မည်။ တော်ကြာ အတွေးကို လက်တွေ့ထလုပ်ရင် ဂွကျတော့မည်။

"ကိုယ့်မိန်းမလက်ဆ ကိုယ်အသိဆုံး"
"မှားမှန်းသိတောင် ကြိုပြောလေ" ဆိုပြီး ကိုယ့်ဘက်မြှားဦးလှည့်ကာ ဗိုက်ခေါက်အလိမ်ခံရသည်က အခါခါကိုး...။
" သို့နှင့် "
"စိန်လိုဖွေးတဲ့ ဖွေးစိန်လေးရေ... ကိုကွန်း စကားလေးနဲနဲလောက် ပြောလို့ရမလား" ဟု လေပြေလေးနဲ့မေးရလေသည်။ ခပ်ကြမ်းကြမ်းလည်း မမေးရဲ။ တော်ကြာ သူ့အတွေးဖျက်သည်ဆိုပြီး ကိုယ့်ဘက်လှည့်လာရင် " ကိုယ့်မိန်းမ လက်သံကိုယ် အသိဆုံး" အနားမှာ ငရုတ်ဆုံထဲ ထည့်ထားသည့် ကျည်ပွေ့က ဝေဟင်ပစ် "ဒုံး"လို အသင့်ရှိနေလေသည်။

ကျွန်ုပ်မေးခွန်းဆုံးသည်နှင့် ...
ဖွေးစိန်တစ်ယောက် ကျွန်ုပ်ဘက်လှည့်ကာ
" လာကိုကွန်း... အခန့်သင့်လိုက်ပေတယ်။ ကျွန်မအတွေးတွေ တော်တော်ရှုပ်နေပြီ။ တွေးထားတာလေး ရှင်နဲ့တိုင်ပင်ရင် ကောင်းမလားလို့ စဥ်းစားနေတုန်း ရှင်ချက်ချင်းရောက်လာတာပဲ"

ဒီမိန်းမ အတွေအရှိန်က တော်တော် ခရီးမသေးပါလား။ အရမ်းဝင်ပြီး ကန့်ကွက်နိုင်မယ့် အနေအထားတော့။ ကျွန်ုပ်အတွက် အန္တရာယ်ရှိလာနိုင်သည့် အနေအထားလို့ မှတ်ယူရပေသည်။

သို့နှင့် မျက်နှာကို အတက်နိုင်ဆုံး သကြားဖြူးကာ...
"ပြောပါဦး ဖွေးစိန်ရဲ့...ဘာတွေများ တွေးနေတာတုန်း"လို့ လေပျော့လေးနှင့် မေးရလေသည်။

" ဒီလိုတော့ ကျွန်မတို့ မိသားစု သုံးယောက်မှာ ရှင်တစ်ယောက်တည်း၊ သတင်းတွေရေး၊ ဆောင်းပါးတွေရေးနဲ့ မိသားစု စားဝတ်နေရေးဖြေရှင်းနေရတာ ကျွန်မမကြည့်ရက်တော့ဘူး။ ဒီတော့ အလုပ်လုပ်တဲ့အခါ၊ စာရေးကြတဲ့အခါ ...
"မောင်နှစ်ရွက် ... မယ်တစ်ရွက်"
"မောင်နှစ်ပုဒ်... မယ်တစ်ပုဒ်"
"မောင်က နှစ်တိုက်ပို့ရင်... မယ်က တစ်တိုက်ပို့ ဆိုသလို ကျွန်မလည်း စာရေးကူမလားလို့ ရှင့်ကို"
" ဘုရား... ဘုရား ဒီမိန်းမ ဘယ်အထိတွေးထားသည်မသိ ချက်ချင်းကန့်ကွက်လို့တော့ မဖြစ်၊ အချိုသပ်ပြီးမှ အကျိုးကြောင်းပြောရမည်"

လက်မှတ်တစ်ချက်ထိုးရသည်ပင် စာရှည်သည်ဟု ပြောသည့်မိန်းမက စာအပိုက်လိုက်ရေးမည်ဆိုတာ ကျွန်ုပ်အတွက် ကဿ်သိန်းအစိမ်းလိုက် ထစရာပင် ဖြစ်လေသည်။

"နေပါဦး ဖွေးစိန်ရဲ့၊ မင်းက ဘာာစတွေများ ကူရေးပေးမှာတုန်းကွဲ့"
ကျွန်ုပ်အမေးအဆုံး ဖွေးစိန်တစ်ယောက် မျက်လုံးများ အရောင်တောက်ကာ
"ဒီလိုလေ ကျွန်မငယ်ငယ်က စာရေးအတွေ့အကြုံကို ပြောရရင် လေးငါးတန်းလောက်မှာ ဆရာမက "တစ်ခဲနက်" ဆိုတဲ့ စကားလုံးကို ဝါကျဖွဲ့ခိုင်းဖူးတယ်။ အဲမှာ ကျွန်မတစ်ညလုံး စဥ်းစားပြီး မနက်ထရေးလိုက်တယ်...။
"ကျောက်ခဲ နှစ်လုံးတွင် တစ်ခဲဖူပြီး တစ်ခဲနက်ပါသည်" လို့ ဘယ်ပြောကောင်းမလဲ ဆရာမက မင်နီကြီးနဲ့ ကြက်ခြေခတ်ချခံလိုက်ရရော...။ ဒါ ကျွန်မရဲ့ ငယ်ဘဝ စာရေးအတွေ့အကြုံ။

ကျွန်ုပ်မှာ ဖွေးစိန်စကားအဆုံး မပြုံးဘဲ ဝါးလုံးကွဲ ဆိုသလို ရယ်လိုက်ချင်ပေမယ့် ဖွေးစိန်တစ်ယောက် ရုပ်တည်ကြီးနဲ့ ပြောနေသည်မို့ ရယ်ချင်စိတ်ကို မျိုသိပ်ကာ ဖွေးစိန်စကားကို ဆက်နားစွင့်နေလေဟန် ပြုရလေသည်။ "ရယ်လို့မဖြစ် ကိုယ့်မိန်းမလက်ဆကိုယ်အသိဆုံး"
သို့နှင့် ဖွေးစိန်က ဆက်လက်ပြီး ...
"ဒီတော့ ကျွန်မရဲ့ ငယ်ငယ်က အမှားကို ပြင်မယ်။ ကိုယ့်ဘာသာ မရေးတော့။ စာရေးတဲ့အခါ အခုခေတ်မှာ ကာဗာဆောင်းတွေ ပြန်ဆိုတေးလုပ်သလိုမျိုး... ကျွန်မ ကာဗာကဗျာတို့၊ ပြန်ယူရေးတို့ဆိုပြီး ကဗျာကောင်းတွေ၊ ဝတ္ထုကောင်းတွေကို ပြန်ရေးမယ်လေ"

" မူရင်း ရေးသားသူတွေထက် စာရွက်အသားတွေ ပိုကောင်းအောင်လုပ်မယ်၊ စာတစ်ပိုဒ်နဲ့ တစ်ပိုဒ်ကြားမှာလည်း ကြည့်ကောင်အောင်ဆိုပြီး ပန်းပွင့်ပုံလေးတွေ ထည့်မယ်။ မူရင်းဝတ္ထုက စာမျက်နှာ တစ်ရာရှိတယ်။ ကျွန်မက ပရိတ်သတ်တွေကို ပိုအလေးထားတဲ့အနေနဲ့ စာလုံးအရွယ်အစားကြီးပြီး စာမျက်နှာ တစ်ရာ့ငါးဆယ်လောက်ရေးမယ်။
"မျက်မှန်ပါဝါ ဘယ်လောင်တပ်ရသူဖြစ်ဖြစ် မျက်မှန်မလိုဘဲ ဖတ်လို့ရကြောင်း အာမခံနဲ့ ကျွန်မကာဗာဝတ္ထုတွေကို ကြေညာမယ်။ မကောင်းဘူးလား။ အောင်မြင်လာရင် ဝန်ထမ်းတွေခန့်ပြီး အလုပ်တွေတိုးချဲ့မယ်။ ဥပမာ-ဆရာကြီး ရွှေဥဒေါင်းရဲ့ ဝတ္ထုကို ကာဗာရေးဖို့ တစ်ယောက်၊ ဆရာကြီးမြသန်းတင်ဆိုရင်လည်း သူ့အတွက်တစ်ယောက်ခန့်...မကောင်းဘူးလား။ ရှင်မြင်ယောင်ကြည့်စမ်း ကျွန်မတို့ရဲ့ တစ်ဟုတ်ထိုး တိုးတက်နေမယ့် စာပေဗိမာန်ကြီးကို။

မဟေသီဖွေးစိန်က သူ့ရဲ့ မဟာ့မဟာ အတွေးကြီးကို မိန့်ခွန်းခြွေသူလို တရပ်စပ်ပြောပြီးသကာလ အားပါပြီး ဝုန်းကနဲ ထရပ်လိုက်လေတော့သည်။

မဟေသီဖွေးစိန်ရဲ့ ရွေဥာဏ်တော် -ူးရောက်လွန်းသည့်အတွေးကို ကြားပြီးသကာလ ကျွန်ုပ်မှာ ခေါင်းမွှေးထောင်၍ နားများအူကာ မျက်လုံးများပင်ပြာသွားရလေသည်။

အားပါနေသည့်အချိန်ဆိုတော့ သူ့ကို ဝုန်းကနဲထ မကန့်ကွက်ရဲ။ အချိုသပ် လမ်းလွှဲရန် ကြံရပေမည်။

"အင်း... ဖွေးစိန်ရယ် မင်းအတွေးကလည်း ထူးဆန်းပါတယ်။ ဒါပေမယ့် အခုတော့ မင်းရဲ့အဖိုးတန် လက်ကလေးကို စာမရေးပါနဲ့ဦး။ကိုယ်တို့သမီးလေးကို ထိန်းကျောင်းဖို့ အရင်လုပ်ပါဦးကွယ်။ ပုခတ်လွှဲတဲ့ လက်ကလည်း ကမ္ဘာကြီးကို ကိုင်လှုပ်နိုင်တယ်ဆိုတဲ့ စကားလည်း ရှိတာပဲလေကွယ်"

ကျွန်ုပ်စကားအဆုံး ဖွေးစိန်တစ်ယောက် " ဟုတ်တော့လည်း ဟုတ်သား သမီးက ငယ်သေးတော့ ကျွန်မတို့နှစ်ယောက်လုံး စာရေးရင် မဟန်သေးပါဘူး။ သမီးကြီးမှ ရေးကြတာပေါ့ရှင်... ဒါဆိုလည်း" ဟူး.. လတ်တလော နားအေးသွားလို့ တော်ပါသေးလား မဖွေးစိန်ရယ်...။

✒ ဆရာကွန်း


#သရော်စာ #ဖွေးစိန် #ဆရာကွန်း

19/07/2023

*** မိမိကြိုက်နှစ်သက်ရာ ဝိုင်းစုခိုင်သိန်း တစ်ပုဒ် ဖြေဆိုပါ ***
အဆိုတော် ဖွေးစိန်
===+===+===+===+===+===+===+====

ကျွန်ုပ် ဆရာကွန်းဝယ် ကံအကျိုးပေးလေသည့်အတိုင်း ပါရမီဖြည့်ဖက်"ဖွေးစိန်" အမည်ရ မဟေသီတစ်ပါး ရှိလေသည်။

ကျွန်ုပ်မှာ "ဖွေးစိန်" အတွက် ပါရမီဖြည့်ဖက် ဆိုရသော်ညား ကျွန်ုပ်ဘက်က ကြည့်လျှင်မူ ခန္ဓီပါရမီသီးသန့် ဖြည့်ရသည်သာများလေသည်။ (ဟဲ...ဟဲ)

"ဖွေးစိန်" အတွက် ခန္ဓီပါရမီ ဖြည့်ရာတွင် တစ်နေ့ သုံးကြိမ် အနည်းဆုံးကြားရလေ့ရှိသည့် စိန်လိုဖွေးတဲ့ "ဖွေးစိန်" လေး လာပါပြီရှင် ဟူသည့် ကြွေးကျော်သံပင် ဖြစ်လေသည်။

ဒါက နေ့တိုင်းဖြည့်ရသည့် ဦးစားပေး ခန္ဓီပါရမီ တစ်ခုဖြစ်လေသည်။ ထိုသို့ ခန္ဓီပါရမီများစွာ ဖြည့်ရသည့်အထဲက ပါရမီတစ်ခုကို ပြောပြချင်ပါသေးသည်။

ထိုပါရမီကား "ဖွေးစိန်" ၏ အဆိုတော်ပိုးလေးဝင်ကာ တေးသီချင်းများ သီဆိုပုံပင်ဖြစ်​ပေသည်။ ကျွန်ုပ်မှာ "ဖွေးစိန်" ၏ တေးသီချင်း သီဆိုမှုများကို ရဲရဲတင်းတင်းလည်း မကန့်ကွက်ရဲပေ...။ တော်ကြာ "ဖွေးစိန်" ၏ မထင်ရင် မထင်သလို ထွက်ပေါ်လာတတ်သည့် ဒေါသကိုလည်း ကြောက်ရသေးသည်ကိုး...(ဟဲ...ဟဲ)။

"ဖွေးစိန်" ၏ တေးသီချင်းသီဆိုရာတွင် ရသအမြောက်ဆုံးအပိုင်းမှာ သံစဥ်လွဲမှားခြင်းမျိုးမဟုတ်ပေ။ သံစဥ်အလိုက်စာသားများကို သူမှန်သည်ထင်သည့်အတိုင်း သီဆိုခြင်းပင်။

ဟဲ...ဟဲ။ နားဆင်ကြည့်ပါ မိတ်ဆွေတို့...

တနေ့က ကျွန်ုပ် ဆောင်းပါးတစ်ပုဒ်ရေးနေခိုက်ဝယ် "ဖွေးစိန်" တစ်ယောက် မနီးမဝေးမှာ သီချင်းတစ်ကြောင်းကို ညည်းလျှက်ရှိပေသည်။ ပထမ ကျွန်ုပ်လည်း မကွဲပြား။ ဒီအလိုက်လေး ကြားဖူးသလိုရှိသည်ဟုတော့ စိတ်ထဲထင်မိလေသည်။

ဖွေးစိန် သီဆိုနေသော သီချင်းက တိုင်းသိပြည်သိတေးသံရှင် စိုင်းစိုင်မော့ဝ်၏ "မြောက်ပိုင်းလမ်း မူဆယ်နမ့်ခမ်းလမ်း" သီချင်းဖြစ်လေသည်။ သီချင်းစာသားမှာ " ကျွန်တော်လေ ရွှေဖီချိန်က လက်ဖက်ပေါတဲ့အချိန်မှာ GMC လို ကားကြီးမျိုး မန္တလေးဘက်သို့ ကုန်တင်ကာသွားတယ် " ဆိုသည့် အပိုင်းဖြစ်သည်။

ထိုသီချင်းကို "ဖွေးစိန်" သီဆိုလိုက်ပုံမှာ " ကျွန်တော်လေ ရွှေဖီချိန်က လက်ဖက်ပေါတဲ့အချိန်မှာ BMW လို ကားကြီးမျိုး မန္တလေးဘက်သို့ ကုန်တင်ကာသွားတယ် " တဲ့။

မြင်ယောင်နားထောင်ကြည့်ပါ မိတ်ဆွေတို...။ ဘယ်လောက်များ ရသမြောက်လိမ့်လဲ ဆိုတာ။ BMW ကားပေါ် ကုန်တွေတင်ထားပုံကို မြင်ယောင်ကြည့်ပါ မိတ်ဆွေတို့...။

သို့နှင့် ကျွန်ုပ်မှာ ရေးလက်စ ဆောင်းပါးကို ဆက်မရေးနိုင်တော့ဘဲ " "ဖွေးစိန်" ရယ်။ မင်းဟာက မဟုတ်သေးပါဘူးကွယ်။ GMC လို ကားကြီးမျိုးပါဟဲ့လို့ ဝင်ပြင်ပေးရလေသည်။

ဒါတောင် ကျွန်ုပ်စကားကို "ဖွေးစိန်" တစ်ယောက် ပြောပုံက " ကိုကွန်းရယ်... တော်အနာဂတ်ကို ကြိုမြင်နိုင်လို့လား။ နောက်ကျ BMW တွေနဲ့ တင်ချင်တင်မှာပေါ့" ဆိုပဲ။

ကျွန်ုပ်မှာ ထို့ထက်လည်း ပိုမကန့်ကွက်ရဲတော့ " အေးပါ "ဖွေးစိန်"ရယ်... ဖြစ်ချင်လည်း ဖြစ်မှာပေါ့" လို့ဆိုကာ ဆောင်းပါးရေးဖို့ စျန်ပြန်ဝင်ရလေသည်။

အဆိုတော် "ဖွေးစိန်" တစ်ယောက် တစ်ရက်တွင်တော့ ဖုန်းထဲမှ တေးသီချင်း ပြိုင်ပွဲဝင်များရဲ့ အလွဲများကို ကြည့်ကာ

" ကိုကွန်း... "ဖွေးစိန်" လိုပဲ ပြိုင်ပွဲဝင်တွေ စာသားလွဲဆိုကြတာကြည့်ပြီး တစ်ခုစဥ်းစားမိတယ် သိလား။ ပြိုင်ပွဲဝင်တဲ့အဆင့်ကို တဆင့်ထပ်တိုးလိုက်ရင် ပိုပြီးတိုးတက်မှန်ကန်လာမလားလို့လေ" တဲ့။

ကျွန်ုပ်မှာ သတင်းစာဖတ်ရင်း မျက်ခုံးပင့်ကာ "ဖွေးစိန်" ကို မေးရတော့သည်။ မမေးလို့ကလည်း မရ။ တခါတရံ မဟေသီ "ဖွေးစိန်"ရဲ့ အတွေးများကား ကြောက်ခမန်းလိလိ ရွှေဥာဏ်တော် -ဆူးရောက်လွန်းလေစွ...။

" ဘယ်လိုများ အဆင့်ထပ်တိုးချင်လို့လည်း "ဖွေးစိန်"ရဲ့...။ ကိုကွန်းကို ပြောပါဦး”

" ဒီလိုလေ ဆိုပြီး... အသံစစ်တဲ့အခါ စာသားမလွဲအောင် ရေးဖြေလေးများ အရင်ထည့်မလားလို့လေ။ ဥပမာ- မေးခွန်းထဲမှာ မိမိကြိုက်နှစ်သက်ရာ ဝိုင်းစုခိုင်သိန်းတစ်ပုဒ် ဖြေဆိုပါတို့၊ ဖြူဖြူကျော်သိန်းရဲ့ ရင်မှာခံစား သူမမြင်နိုင်ပေ ငါ့ရင်ထဲက ကွက်လပ်တွေ၊ ကွက်လပ်မှာ အတွင်းလို့ ဖြည့်။ အဲလိုရေးဖြေလေး အရင်လုပ်ရင် မကောင်းဘူးလား "
" အဲဒါဆို အဖြေလွှာစာရွက်ကို ပြန်ကြည့်ပြီး အသံစစ်သီဆိုပြိုင်ပွဲဝင်တဲ့အခါ ကိုယ်အားသန်တဲ့ အဆိုတော်ရဲ့သီချင်းနဲ့ပြိုင်ရင် ပိုမကောင်းပေဘူးလား "

"ဗုဒ္ဓေါ" သီချင်းဆိုပြိုင်ပွဲကို ရေးဖြေထည့်မယ်ဆိုပါလား။ ရွှေဥာဏ်တော် -ဆူးရောက်လှပါလား မ "ဖွေးစိန်" ရဲ့လို့ ကျွန်ုပ် ပြောချင်လိုက်သော်ညား စကားကြောရှည်လျှင် နက်ဖြန်ပေးရမည့်စာမူ မပြီးမည်ဆိုး၍ ....
" ကောင်းသလိုလို ရှိသား "ဖွေးစိန်" ရယ် " ဟုသာ ပြောလိုက်နိုင်ပါတော့တယ်...။
တော်သေးပြီ မ "ဖွေးစိန်" ရယ်....။

✒ ဆရာကွန်း


#သရော်စာ #ဖွေးစိန် #ဆရာကွန်း

19/07/2023

သို့/
❣️ချစ်သောနှင်း ❣️

ချစ်ရတဲ့ "နှင်း" ရေ။ အလုပ်နဲနဲ ရှုပ်သွားလို့ "နှင်း" ဆီကို စာမရေးနိုင်တာ ခွင့်လွှတ်နော်။ ရုံးက ဝန်ထမ်းတွေကို လုပ်ငန်းစွမ်းရည် တိုးတက်လာဖို့ ဟောပြောပွဲတွေ လုပ်ပေးနေရတာနဲ့ မအားဘူးဖြစ်သွားတာ။ ဟောပြောမယ့် ဆရာတွေလည်းခေါ်ရ၊ ကိုယ်တိုင်လည်း တစ်ချိန်ဝင်ပြောရဆိုတော့ လူကအားချိန်မရှိသလောက်ပဲ။

အခု အလုပ်နဲနဲပါးတာနဲ့ "နှင်း" ဆီ စာတန်းရေးလိုက်တာ။ ဒါတောင် နောက်တစ်ပတ်ထဲမှာ ကိုယ့် တောင်ငူရုံးကို သွားပြီး အဲကဝန်ထမ်းတွေအတွက် ဟောပြောပွဲလေးစီစဥ်ပေးရအူးမှာ။ ဟောပြောပွဲမှာ ဝန်ထမ်းတစ်ယောက်မေးတဲ့မေးခွန်းနဲ့ ကိုယ်ပြန်ရှင်းပြလိုက်တဲ့ အဖြေကို "နှင်း" ကို ပြောခြင်တာလည်း ပါတာပေါ့လေ...။ အာ့ကြောင်း အခုအားချိန်ရတုန်း တန်းရေးလိုက်တာ။

ဒီလို..."နှင်း" ရဲ့။ ရှေ့ကဆရာတွေကတော့ တကယ့်ဝါရင့်သဘာရင့် ပညာရှင်ဆရာတွေဆိုတော့ အေးအေးဆေးဆေးပဲ။ ဝန်ထမ်းတွေလည်း သဘောကြတာတွေ့ရတယ်။ ကိုယ့်အလှည့်ရောက်လို့ ကိုယ်ပြောပြီးတဲ့အချိန်မှာ ဝန်ထမ်းတစ်ယောက်က ထမေးတယ်။ ကျွန်တော်က တစ်ချိန်မှာ အောင်မြင်ချမ်းသာတဲ့သူ ဖြစ်ရမယ်လို့ ခံယူထားတယ်။ အဲလိုဖြစ်အောင် ဘာတွေလုပ်ဖို့လိုလည်းတဲ့...။ အဲမေးခွန်းကြားတော့... ကိုယ့်စိတ်ထဲမှာတွေးလိုက်တယ်။ ငါတော့ မေးခွန်းသက်ခံရပြီ။ မဖြေနိုင်ရင်လည်း သိက္ခာကြမယ်၊ ကိုယ်ထင်တာ ဖြေလိုက်ပြန်လို့ လွဲသွားရင်လည်း တစ်ဖတ်သားကို ဒုက္ခပေးသလိုဖြစ်မယ်။ အတော် ဂွကြတဲ့ အခြေအနေပဲလို့။ ဒါပေမယ့်လည်း အမေးရှိလာမှတော့ အဖြေပေးရတော့မှာပေါ...လို့ ဆုံးဖြတ်ပြီး... ချောင်းလေးဟန့်.. ဘေးမှာချထားတဲ့ ရေခွက်ထဲကရေကို တစ်ဝက်လောက်ထိသောက်ပြီး...မေးခွန်းရှင်ကို ကြည့်လိုက်တယ်။ နောက်ပြီး ထိုင်ပါညီလေး... ညီလေးရဲ့ မေးခွန်းကို ဥပမာလေးနဲ့ ဖြေပေးမယ်နော်လို့ ပြောပြီး အောင်သမာဓိပိုင်ရှင် ဦးအောင်အကြောင်းကို အကျဥ်းချုံး ပြောပြလိုက်တယ်။ ပြီးတာနဲ့ ငါ့ညီဖြစ်ချင်တဲ့ အောင်မြင်ချမ်းသာသူဖြစ်ဖို့ဆိုရင် ဦးအောင်လိုတွေးဖို့၊ လုပ်ဖို့လိုတယ်။ ဦးအောင်က ရွှေသင်တန်းတွေပေးပြီး သူ့ရဲ့စျေးကွက်ကိုချဲ့တယ်။ အခုဆိုရင် သူ့ရဲ့ရွှေဆိုင်က နိုင်ငံအနှံ့မှာ မရှိပေမယ့် သူ့ရဲ့ရွှေကို တစ်နိုင်ငံလုံးနည်းပါးမှာ ပြန်ရောင်းလို့ရတယ်။ ရွှေဆိုင်တွေဟာ သူ့ဆိုင်ကရွှေမဟုတ်ရင် မဝယ်ကြဘူး။ အဲတော့ ဝယ်သူတွေဟာ ကိုယ့်မြို့နယ်ကဆိုင်ကိုပဲ ဝယ်ကြတာများတယ်။ မြို့နယ်တိုင်က ဝယ်သူတွေကို ရောင်းချဖို့ဆိုရင် မြို့တိုင်းမှာ ဆိုင်ဖွင့်နိုင်ရင်ဖွင့် မဖွင့်နိုင်ရင် မြို့တိုင်းနီးပါးမှာ ကိုယ့်ရွှေရောင်းလို့ရတဲ့ဆိုင်တွေရှိဖို့လိုတယ်။ ဒီအချက်ကို သိတဲ့ ဦအောင်က မြို့တိုင်းမှာ ဆိုင်ဖွင့်ဖို့မလွယ်တော့ မြို့တိုင်းနီးပါးမှာ သူရွှေဝယ်ပေးမယ့် သူ့သင်တန်းသားတပည့်တွေရဲ့ဆိုင်တွေ ပေါ်လာအောင် လုပ်တယ်။ အခုဆိုရင် အောင်းသမာဓိဆိုတာ ရွှေဆိုင်လောကမှာ ထိပ်တန်းစာရင်းဝင်ရွှေဆိုင်တစ်ဆိုင်ဖြစ်နေပြီး။

အနှစ်ချုပ်ပြောရမယ်ဆိုရင် အလုပ်တိုင်းလုပ်နေဖို့မလိုဘူး၊ ကိုယ်လုပ်တဲ့အလုပ်ကို ထိရောက်အောင်လုပ်ရမယ်။ အဲဒီအလုပ်အတွက် ကျွမ်းကျင်ဖို့လိုတယ်။ အချိန်ကိုက်လုပ်ဆောင်ဖို့လိုတယ်။ အရေးကြီးဆုံးကတော့ အဲဒီအလုပ်နဲ့ ငွေရှာတဲ့အပိုင်းပဲ။ ကိုယ် ကျွမ်းကျင်တဲ့ အလုပ်ကို တစ်ဦးတစ်ယောက်ဆီမှာ ရောင်းတာမျိုးမဟုတ်ဘဲ လူအများဆီမှာ ရောင်းချနိုင်ဖို့လိုတယ်။ ဒါမှသာ ဒီအလုပ်နဲ့ အောင်မြင်ချမ်းသာသူဖြစ်မှာလို့ ရှင်းပြလိုက်တယ်။ စာလည်း အတော်ရှည်နေပြီဆိုတော့ အရင်ထက်ပိုအောင်မြင်တဲ့ "နှင်း" လေး ဖြစ်ပါစေလို့ ဆုတောင်းရင်း အဆုံးသက်လိုက်တယ်နော်။ ကျန်းမာ၊ ဘုန်းကြီး၊ သက်ရှည် ပါစေကွယ်။

ချစ်ခြင်းများစွာဖြင့်
အောင် (၁၇.၇.၂၀၂၃)

05/07/2023

🔸 အင်အား🔸

ဒီ​​နေ့​​​​မှာတော့ ဆရာ ချစ် စု အောင် ရဲ့ 🔸 အင်အား🔸 ကဗျာကို ဗဟုသုတရစေဖို့ ​ပြန်လည် မျှ​ဝေလိုက်ပါတယ်။

🔸 အင်အား🔸

* အင်အားအရာ
ထင်ရှားစွာ တည်ဆောက် ။
မိုးထိအောင် တောင်ပြာမှိုင်း
မုန်တိုင်းမကြောက် ။
* အင်အားအရာ
ထင်ရှားစွာ တည်ဆောက် ။
အပြောကျယ် ပင်လယ်ကြီး
မီးဘေးမကြောက် ။

* အင်အားအရာ
ထင်ရှားစွာ တည်ဆောက် ။
ဘယ်သူဖျက်စေတော့
လင်းလက်ဖြာ ပုံရိပ်လွှာနဲ့
ဂုဏ်သိက္ခာ ကိုယ့်သမိုင်း
မရိုင်းမပျောက်။ ။

✒ ချစ် စု အောင်

ချစ်ရတဲ့ အမျိုးတွေအားလုံး YD က တင်ဆက်ပေးတဲ့ သုတ၊ ရသ စာပေတွေ၊ ကဗျာ၊ ကာတွန်း၊ တေးထပ်နဲ့ သီချင်းလေးတွေကို ဖတ်ရှုခံစားရင်း ပျော်ရွှင်စွာ နှစ်သစ်ကူးပြီး စိတ်ချမ်းသာ၊ ကိုယ်ကျန်းမာစွာဖြင့် အောင်မြင်သောဘဝတွေ ပိုင်ဆိုင်နိုင်ကြပါစေ...။


#ကဗျာ

05/07/2023

🗣 စကားလုံးတွေမှာ အစွမ်းရှိတယ်... သတိနဲ့ပြောပါ 🗣
===+====+====+====+====+====+===

"စကားစကား ပြောပါများ၊ စကားထဲက ဇာတိပြ" ဆိုတဲ့ စကားကို ကြားဖူး၊ မှတ်ဖူး၊ ပြောဆိုဖူး ကြမှာပါ။ ဒါ့ကြောင့် ပညာရှိတွေက စကားပြောဆိုမှုကို သတိထားဖို့၊ သိတိုင်း မပြောဖို့။ မြင်တိုင်း မပြောဖို့၊ ကြားတိုင်း မပြောဖို့၊ နိုင်တိုင်း မပြောဖို့၊ ဒေါသနဲ့ မပြောဖို့၊ မာန်မာနတွေနဲ့ မပြောဖို့၊ မဖြစ်မနေ ပြောရမယ်ဆိုရင် ပုဂ္ဂိုလ်ကိုကြည့်ပြောဖို့၊ အချိန်ကာလကိုကြည့်ပြောဖို့ အထူးသတိပေး ဆုံးမကြတာဖြစ်ပါတယ်။

ဒီလိုဆုံးမရတာဟာ စကားလုံးတွေမှာ အစွမ်းရှိနေလို့ဖြစ်ပါတယ်။ မိမိရဲ့ဘေးပတ်ဝန်းကျင်ကို သတိထားကြည့်မယ်ဆိုရင် စကားလုံးတွေရဲ့ အစွမ်းသတ္တိကြီးပါးပုံကို တွေ့ကြရမှာပါ။

စကားကြောင့် ရန်ဖြစ်ကြတယ်၊ စကားကြောင့် ချစ်ကြတယ်၊ စကားကြောင့် မုန်းကြတယ်၊ စားကြောင့် ခွဲခွာကြတယ်၊ စကားကြောင့် ကွဲကွာကြတယ်၊ စကားကြောင့် လမ်းခွဲနှုတ်ဆက်ကြတယ် နေ့စဥ်မြင်တွေ့နေရတာ အများကြီးပါ။

ဒါကြောင့် စကားပြောတဲ့အခါ သူဘက်၊ ကိုယ့်ဘက် မထိခိုက်အောင် စဉ်းစားဆင်ခြင်ပြီးမှ ပြောဖို့၊ မလိုအပ်ရင် မပြောဖို့ ပညာရှိတွေက ဆုံးမစကားဆိုခဲ့ကြတာပါ။ "စကား" ဆိုတဲ့အတိုင်း စလိုက်တာနဲ့ ကားတော့တာပဲ။ ဒီနေရာမှာ ကြုံကြိုက်လို့ ပုံပြင်လေးတစ်ပုဒ်ကို အနှစ်ချုပ်ပြီး ပြောပြလိုတယ်။

တစ်ခါက လယ်သမားအိမ်မှာ ခိုင်းနွားတစ်ကောင်ရှိတယ်တဲ့။ တစ်နေ့ မိုးလေးဖွဲဖွဲကျနေချိန် မိုးပေါက်လေးတွေကြည့်ပြီး ခိုင်းနွားက စကားပြောလိုက်သတဲ့။ " အင်း... မိုးရွာနေတော့ ဒီတစ်ရက်လောက် ငါ့ကို သခင်က အနားပေးရင် ကောင်းမှာပဲ"လို့ပေါ့။ ဒီစကားကို ကြက်ကကြားပြီး သူ့မိတ်ဆွေ ဝက်ကိုပြောသတဲ့။ "နွားက... သခင်က အနားမပေးပဲ ခိုင်နေတော ဒီတစ်ရက်လောက်နားပေးရင် ကောင်းမယ်လို့ ပြောနေတယ်" ဆိုပြီး ပြန်ပြောပြသတဲ့။ ဝက်ကလည်း သူ့မိတ်ဆွေ ခွေးကို ပြောသတဲ့။ " နွားက တစ်ရက်လောက်နားချင်နေတာ၊ သခင်က အနားမပေးလို့ စိတ်တိုနေတယ်"လို့ ပြန်ပြောပြသတဲ့။ အဲဒီစကားကိုကြားတော့ ခွေးက သူ့သခင်ရဲ့ မိန်းမဆီပြေးပြီး ပြောသတဲ့။ " သခင်မ နွားကသူ့ကို အနားမပေးဘဲခိုင်နေလို့ ဒေါသထွက်ပြီး သခင်မတို့ကို ပုံကန်မလို့တဲ့"လို့ ပြောသတဲ့။ ဒီတင် သခင်မကလည်း သူ့ယောင်္ကျားကို ပြန်ပြောပြလိုက်သတဲ့။

အဲဒီစကားကြာတော့ ယောင်္ကျားဖြစ်သူက "သူက ပုံကံခြင်နေမှတော့ ထားမနေဘူး၊ အဲနွားကို အမဲဖော်လိုက်မယ်"လို့ပြောပြီး အဲညနေမှာပဲ နွားကိုသတ်ပြီး အသားဖော်လိုက်သတဲ့။ ပုံပြင်လေးက အဲမှာတင်ဆုံးသွားပါတယ်။ နွားသေရတာဟာ အပေါ်မှာပြောခဲ့တဲ့ စကားလုံးတွေရဲ့အစွမ်းပါ။ စကားပြောရင်းနဲ့ ချဲ့ကားသွားပြီး နောက်ဆုံးမှာ အဓိပ္ပါယ်လွဲသွားလို့ ဖြစ်ရတာပါ။ ဒီနေရာမှာ ကိုယ်ပြောလိုက်တဲ့ “စကား ဟာ နားထောင်ရတဲ့သူကို နှလုံးစိတ်ဝမ်း ငြိမ်းအေး သွားစေတဲ့ စကားမျိုးဆိုရင်" ပြောဖို့လိုပေမယ့် တစ်ပါးသူ ထိခိုက်သွားနိုင်မယ်ထင်ရင် မပြောတာက သူ့အတွက်၊ ကိုယ့်အတွက်၊ ပတ်ဝန်းကျင်အတွက် အကောင်းဆုံးဖြစ်ပါတယ်။

ဒါ့ကြောင့် ပညာရှိသူတွေဟာ စကားပြောနည်းပြီး လိုအပ်သလောက်သာ ပြောဆိုတက်ကြပြီး အချိန်အများစုကို အကောင်းဆုံးနားထောင်သူတွေအဖြစ်နဲ့ နေထိုင်သွားကြတာဖြစ်ပါတယ်။ ဝစီဆိုတဲ့ စကားပြောဆိုမှုကို တက်နိုင်သမျှ ထိန်းသိမ်းပြီး သတိနဲ့ယှဥ်တွဲ ပြောဆိုနိုင်ကြပါစေ....

#ချစ်ခြင်းများစွာဖြင့် YD။
#ဆောင်းပါး