20/08/2024
အီလွန်မတ်စ်သာ လက်ခံပါက ၎င်းအား အကြံပေးအဖြစ်ခန့်ရန် စဉ်းစားမည်ဟု ထရန့်ပြောကြား
တက်စ်လာ ကားကုမ္ပဏီ၏စီအီးအို၊ ဘီလျံနာလုပ်ငန်းရှင် အီလွန်မတ်စ် အား အစိုးရ အဖွဲ့ဝင်အဖြစ် သို့မဟုတ် အကြံပေးနေရာ၌ ခန့်ရန် စဉ်းစားပေးမည်ဟု ဒေါ်နယ်ထရန့်က ရိုက်တာသတင်းဌာနနှင့် သြဂုတ် ၁၉ ရက် အင်တာဗျူးတွင်ပြောခဲ့သည်။
လာမည့်ရွေးကောက်ပွဲအတွက် အီလွန်မတ်စ် က ထရန့်ကိုထောက်ခံကြောင်း ပေါ်ပေါ်ထင်ထင်ပြလာပြီး X လူမှု ကွန်ရက်တွင် ထရန့်ကိုဖိတ်ပြီး အင်တာဗျူးပါ ပြုလုပ်ထားသေးသည်။
သူကအရမ်းထက်မြက်တဲ့လူပါ။ သူသာလက်ခံမယ်ဆို သူ့ကို အကြံပေး ဒါမှမဟုတ် အစိုးရအဖွဲ့မှာခန့်ဖို့ သေချာပေါက်စဉ်းစားပေးမှာပါ ဟု ထရန့်က ပြောကြားထားသည်ကို မတ်စ်ကလည်း ၎င်း ဆန္ဒရှိပါသည်ဟု တုံ့ပြန်ထားသည်။
မတ်စ် သည် တချိန်က ထရန့်ကို ပြင်းပြင်းထန်ထန် ဝေဖန်သူဖြစ်သည်။ပြီးခဲ့သည့်ရွေးကောက်ပွဲ တွင် မတ်စ်က မည်သူ့အား မဲပေးခဲ့သည်ကို လိမ်ခဲ့သည်ဟုဆိုကာ ထရန့်ကစွပ်စွဲလိုက်ပြီး နောက် မတ်စ်၏အတိုက်အခံပြောမှုများ ထွက်လာသည်။
သို့သော်ယခုနောက်ပိုင်းတွင် မတ်စ်က ထရန့်ကိုထောက်ခံမှုက သိသာလာခဲ့သည်။ ဂျိုးဘိုင်ဒင်နှင့် ၎င်းဆက်ဆံရေးက အဆင်ပြေပြေမရှိခဲ့ဘဲ ၂၀၂၁ အိမ်ဖြူတော် လျှပ်စစ်ကားဆွေးနွေးပွဲသို့ ဘိုင်ဒင်က မဖိတ် ခဲ့သဖြင့် ဘိုင်ဒင်ကို မဲမပေးတော့ဟုလည်း ထိုစဉ် မတ်စ်က လူသိရှင်ကြားကြေညာခဲ့သည်။
